Luk 15
15
Parabolenn an Dhavas Kellys
Mat 18:12-14
1Yth esa oll an dolloryon ha'n beghadoryon ow tos nes dhodho rag goslowes orto. 2Mes an Fariseow ha'n skribys a grodhvola, ow leverel, ‘An den ma a wolkomm peghadoryon hag a dheber gansa.’
3Ytho ev a gewsis dhedha an barabolenn ma, ow leverel, 4‘Py den eus ahanowgh, ha dhodho kans davas, ow kelli onan anedha, na as an nownsek ha peswar-ugens y'n gwylvos ha mos war-lergh an dhavas kellys erna's kaffo? 5Ha pan y's kyv, ev a's gorr war y dhiwskoedh gans lowena, 6ha wosa dos tre ev a elow y gowetha ha'y gentrevogyon war-barth ha leverel dhedha, “Bedhewgh lowen genev, rag my re gavas ow davas o kellys.” 7My a lever dhywgh, yndella y fydh lowena yn nev rag unn peghador ha dhodho edrek, moy es dell vydh rag nownsek den gwiryon ha peswar-ugens nag eus dhedha edhomm a edrega.
Parabolenn an Bath Kellys
8‘Po py benyn eus, ha gensi deg draghma, mar kyll onan anedha, na enow lugarn ha skuba an chi, ha hwilas dour erna'n kaffo? 9Ha pan y'n kyv, hi a elow hy howethesow ha'y hentrevogyon war-barth ow leverel, “Bedhewgh lowen genev, rag my re gavas an draghma a gellis vy.” 10Yndella, yn-medhav dhywgh, y fydh lowena a-rag eledh Duw rag unn peghador ha dhodho edrek.’
Parabolenn an Mab Kellys
11Ena ev a leveris, ‘Yth esa den ha dhodho dew vab, 12ha'n yowynka anedha a leveris dh'y das, “Tas, ro dhymm an rann a'n pythow a goedh dhymm.” Hag ev a rannas yntredha an pygans. 13Ha nebes dydhyow a-wosa, an mab yowynka a guntellas pup-tra war-barth ha mos yn hyns bys yn bro bell, hag ena ev a skoellyas y substans, ow pewa lows. 14Pan wrussa spena pup-tra, divoetter bras a sevis y'n vro na, hag ev a dhallathas bos yn esow. 15Ytho ev eth hag junya y honan rag arveth gans onan a'n vurjysi a'n vrfo na, hag ev a'n dannvonas dh'y welyow dhe beski an mogh, 16hag ewl a'n jevo a dhybri y walgh a'n plisk-karob#15:16 dhybri y walgh a'n plisk-karob: War-lergh re a'n dornskrifow lenwel y dorr gans an plisk-karob. a wre an mogh aga dybri, mes denvyth ny's ros dhodho. 17Ow tos arta dh'y skians, ev a leveris, “Py lies goberwas a'm tas a's teves aga gwalgh a vara, mes my a verow omma gans nown! 18My a sav yn-bann ha mos dhe'm tas ha leverel dhodho, ‘A das, my re beghas erbynn nev hag a-dheragos; 19nyns ov vy gwiw na fella dhe vos gelwys dha vab; gwra ow dyghtya kepar hag onan a'th woberwesyon.’ ” 20Ytho ev a sevis yn-bann ha mos dh'y das. Hag ev hwath y'n pellder, y das a'n gwelas, ha piteth a'n jeva, hag ev a boenyas hag a goedhas war y gonna hag amma dhodho. 21Y vab a leveris dhodho, “A Das, my re beghas erbynn nev hag a-dheragos; nyns ov wordhi na fella dhe vos gelwys dha vab.” 22Mes y das a erghis dh'y gethwesyon, “Drewgh uskis an gwella pows ha'y gorra warnodho, ha rewgh bysow war y leuv hag eskisyow war y dreys. 23Ha drewgh an leugh peskys ha'y ladha, ha gwren ni dybri ha bos lowen, 24rag ow mab ma o marow ha re vewas arta; kellys o, ha trovys yw.” Hag i a dhallathas goelya.
25‘Mes yth esa y vab kottha y'n gwel, ha pan dhehwelis, ow tos nes dhe'n chi, ev a glewas menestrouthi ha karoli, 26hag ev a elwis onan a'n wesyon ha govynn pyth o henna. 27Ha'n gwas a leveris dhodho, “Dha vroder re dheuth, ha'th tas re ladhas an leugh peskys, rag ev dh'y dhegemmeres yagh ha saw.” 28Mes ev a sorras, ha skonyas a vos a-ji; ytho y das a dheuth yn-mes ha'y bysi. 29Hag ev a worthybis dh'y das ha leverel, “Mir, py lies blydhen y hwrugavy dha servya, ha ny derris dha arghadow bythkweth; ha bythkweth ny resys dhymm kemmys ha mynnik rag may fen lowen gans ow howetha. 30Mes pan dheuth dha vab ma, neb re gollonkas dha vewnans gans horys, ty a ladhas ragdho an leugh peskys.” 31Hag ev a leveris dhodho, “Ow mab, yth es'ta genev pub eur oll, hag oll ow fythow yw dhis. 32Mes lemmyn res yw ni dhe vos lowen ha heudhik; rag dha vroder ma a veu marow ha re vewas arta; kellys o, ha trovys yw.” ’
Currently Selected:
Luk 15: ABK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 2004, 2024
© Cornish Language Board 2004, 2024
