ܒܪܝܬܐ 1
1
ܒܪܵܝܬܵܐ ܕܕܘܼܢܝܹܐ
1ܒܪܵܫܝܼܬ ܒܪܹܐ ܠܹܗ ܐܲܠܵܗܵܐ ܠܫܡܲܝܵܐ ܘܠܐܲܪܥܵܐ. 2ܘܐܲܪܥܵܐ ܚܵܪܵܒܵܐ ܘܣܦܝܼܩܬܵܐ ܝܗ݇ܘܵܐ، ܘܚܸܫܟܵܐ ܥܲܠ ܦܵܬܵܐ ܕܬܗܘܿܡܵܐ ܝܗ݇ܘܵܐ، ܘܪܘܼܚܵܐ ܕܐܲܠܵܗܵܐ ܪܲܦܪܘܼܦܹܐ ܝܗ݇ܘܵܐ ܥܲܠ ܦܵܬܵܐ ܕܡ̈ܝܼܵܐ. 3ܘܐ݇ܡܝܼܪܹܗ ܐܲܠܵܗܵܐ، ”ܗܵܘܹܐ ܒܲܗܪܵܐ،“ ܘܗܘܹܐ ܠܹܗ ܒܲܗܪܵܐ. 4ܘܚܙܹܐ ܠܹܗ ܐܲܠܵܗܵܐ ܠܒܲܗܪܵܐ، ܕܨܦܵܝܝܼ ܝܗ݇ܘܵܐ. ܘܦܪܝܼܫ ܠܹܗ ܐܲܠܵܗܵܐ ܒܹܝܠ ܒܲܗܪܵܐ ܘܚܸܫܟܵܐ. 5ܘܩܪܹܐ ܠܹܗ ܐܲܠܵܗܵܐ ܠܒܲܗܪܵܐ، ܐܝܼܡܵܡܵܐ، ܘܠܚܸܫܟܵܐ ܩܪܹܐ ܠܹܗ، ܠܲܝܠܹܐ. ܘܗܘܹܐ ܠܹܗ ܪܲܡܫܵܐ ܘܗܘܹܐ ܠܹܗ ܨܲܦܪܵܐ، ܝܵܘܡܵܐ ܚܲܕ.
6ܘܐ݇ܡܝܼܪܹܗ ܐܲܠܵܗܵܐ، ”ܗܵܘܹܐ ܪܩܝܼܥܵܐ ܒܹܝܠ ܡ̈ܝܼܵܐ؛ ܘܗܵܘܹܐ ܒܸܦܪܵܫܵܐ ܒܹܝܠ ܡ̈ܝܼܵܐ ܡ̣ܢ ܡ̈ܝܼܵܐ.“ 7ܘܥܒ݂ܝܼܕ ܠܹܗ ܐܲܠܵܗܵܐ ܠܪܩܝܼܥܵܐ، ܘܦܪܝܼܫ ܠܹܗ ܒܹܝܠ ܡ̈ܝܼܵܐ ܕܠܠܬܸܚܬ ܡ̣ܢ ܪܩܝܼܥܵܐ ܘܒܹܝܠ ܡ̈ܝܼܵܐ ܕܠܥܸܠܸܠ ܡ̣ܢ ܪܩܝܼܥܵܐ. ܘܗܘܹܐ ܠܹܗ ܗܲܕܟ݂ܵܐ. 8ܘܩܪܹܐ ܠܹܗ ܐܲܠܵܗܵܐ ܠܪܩܝܼܥܵܐ، ܫܡܲܝܵܐ. ܘܗܘܹܐ ܠܹܗ ܪܲܡܫܵܐ ܘܗܘܹܐ ܠܹܗ ܨܲܦܪܵܐ، ܝܵܘܡܵܐ ܕܬܪܹܝ.
9ܘܐ݇ܡܝܼܪܹܗ ܐܲܠܵܗܵܐ، ”ܗܵܘܝܼ ܓ̰ܡܝܼܥܹܐ ܡ̈ܝܼܵܐ ܕܝܼܢܵܐ ܠܠܬܸܚܬ ܡ̣ܢ ܫܡܲܝܵܐ ܠܚܕܵܐ ܕܘܼܟܵܐ، ܘܦܵܐܹܫ ܚܸܙܝܵܐ ܒܸܪܙܵܐ.“ ܘܗܘܹܐ ܠܹܗ ܗܲܕܟ݂ܵܐ. 10ܘܩܪܹܐ ܠܹܗ ܐܲܠܵܗܵܐ ܠܒܸܪܙܵܐ، ܐܲܪܥܵܐ، ܘܠܓ̰ܡܵܥܬܵܐ ܕܡ̈ܝܼܵܐ ܩܪܹܐ ܠܹܗ، ܝܵܡܵܬܹ̈ܐ. ܘܚܙܹܐ ܠܹܗ ܐܲܠܵܗܵܐ ܕܨܦܵܝܝܼ ܝܗ݇ܘܵܐ. 11ܘܐ݇ܡܝܼܪܹܗ ܐܲܠܵܗܵܐ، ”ܡܲܩܝܸܢܵܐ ܐܲܪܥܵܐ ܝܸܩܢܵܐ، ܢܨܝܼܒ݂ܬܵܐ ܝܵܗ݇ܒ݂ܵܢܬܵܐ ܕܒܲܪܙܲܪܥܵܐ، ܘܐܝܼܠܵܢܵܐ ܕܛܥܘܼܢܬܵܐ ܒܸܥܒ݂ܵܕܵܐ ܛܥܘܼܢܬܵܐ ܠܓܸܢܣܹܗ، ܕܒܲܪܙܲܪܥܹܗ ܒܝܼܹܗ، ܥܲܠ ܐܲܪܥܵܐ.“ ܘܗܘܹܐ ܠܹܗ ܗܲܕܟ݂ܵܐ. 12ܘܦܘܼܠܸܛ ܠܵܗ̇ ܐܲܪܥܵܐ ܝܸܩܢܵܐ، ܢܨܝܼܒ݂ܬܵܐ ܝܵܗ݇ܒ݂ܵܢܬܵܐ ܕܒܲܪܙܲܪܥܵܐ ܠܓܸܢܣܘܼܗ̇، ܘܐܝܼܠܵܢܵܐ ܒܸܥܒ݂ܵܕܵܐ ܛܥܘܼܢܬܵܐ، ܕܒܲܪܙܲܪܥܹܗ ܒܝܼܹܗ، ܠܓܸܢܣܹܗ. ܘܚܙܹܐ ܠܹܗ ܐܲܠܵܗܵܐ ܕܨܦܵܝܝܼ ܝܗ݇ܘܵܐ. 13ܘܗܘܹܐ ܠܹܗ ܪܲܡܫܵܐ ܘܗܘܹܐ ܠܹܗ ܨܲܦܪܵܐ، ܝܵܘܡܵܐ ܕܬܠܵܬܵܐ.
14ܘܐ݇ܡܝܼܪܹܗ ܐܲܠܵܗܵܐ، ”ܗܵܘܝܼ ܢܲܗܝܼܪܹ̈ܐ ܒܪܩܝܼܥܵܐ ܕܫܡܲܝܵܐ، ܠܸܦܪܵܫܵܐ ܐܝܼܡܵܡܵܐ ܘܠܲܝܠܹܐ؛ ܘܗܵܘܝܼ ܠܢܝܼܫܲܢܩܹ̈ܐ، ܘܠܘܲܥܕܹ̈ܐ، ܘܠܝܵܘܡܵܢܹ̈ܐ ܘܫܸܢܹ̈ܐ. 15ܘܗܵܘܝܼ ܠܢܲܗܝܼܪܹ̈ܐ ܒܪܩܝܼܥܵܐ ܕܫܡܲܝܵܐ ܠܒܲܗܪܘܼܢܹܐ ܥܲܠ ܐܲܪܥܵܐ.“ ܘܗܘܹܐ ܠܹܗ ܗܲܕܟ݂ܵܐ. 16ܘܥܒ݂ܝܼܕ ܠܹܗ ܐܲܠܵܗܵܐ ܬܪܹܝ ܢܲܗܝܼܪܹ̈ܐ ܓܘܼܪܹ̈ܐ–ܢܲܗܝܼܪܵܐ ܒܘܼܫ ܓܘܼܪܵܐ ܠܸܥܒ݂ܵܕܵܐ ܫܘܼܠܛܵܢܵܐ ܒܝܵܘܡܵܐ، ܘܢܲܗܝܼܪܵܐ ܒܘܼܫ ܙܥܘܿܪܵܐ ܠܸܥܒ݂ܵܕܵܐ ܫܘܼܠܛܵܢܵܐ ܒܠܲܝܠܹܐ–ܘܟܵܘܟ݂ܒܹ̈ܐ. 17ܘܡܘܼܬܒܲܝ ܠܹܗ ܐܲܠܵܗܵܐ ܒܪܩܝܼܥܵܐ ܕܫܡܲܝܵܐ، ܠܒܲܗܪܘܼܢܹܐ ܥܲܠ ܐܲܪܥܵܐ، 18ܘܠܸܥܒ݂ܵܕܵܐ ܫܘܼܠܛܵܢܵܐ ܒܐܝܼܡܵܡܵܐ ܘܒܠܲܝܠܹܐ، ܘܠܸܦܪܵܫܵܐ ܒܹܝܠ ܒܲܗܪܵܐ ܘܒܹܝܠ ܚܸܫܟܵܐ. ܘܚܙܹܐ ܠܹܗ ܐܲܠܵܗܵܐ ܕܨܦܵܝܝܼ ܝܗ݇ܘܵܐ. 19ܘܗܘܹܐ ܠܹܗ ܪܲܡܫܵܐ ܘܗܘܹܐ ܠܹܗ ܨܲܦܪܵܐ، ܝܵܘܡܵܐ ܕܐܲܪܒܥܵܐ.
20ܘܐ݇ܡܝܼܪܹܗ ܐܲܠܵܗܵܐ، ”ܡܲܫܪܸܨܝܼ ܡ̈ܝܼܵܐ ܫܸܪܨܵܐ، ܓܵܢܵܐ ܚܵܝܬܵܐ، ܘܦܵܪܲܚܬܵܐ ܦܵܪܚܵܐ ܥܲܠ ܐܲܪܥܵܐ، ܓܵܘ ܪܩܝܼܥܵܐ ܕܫܡܲܝܵܐ.“ 21ܘܒܪܹܐ ܠܹܗ ܐܲܠܵܗܵܐ ܬܲܢܝܼܢܹ̈ܐ ܓܘܼܪܹ̈ܐ، ܘܟܠ ܓܵܢܵܐ ܚܵܝܬܵܐ ܪܵܚܫܵܢܬܵܐ، ܕܡܘܼܫܪܸܨ ܠܗܘܿܢ ܡ̈ܝܼܵܐ ܠܓܸܢܣܲܝܗܝ، ܘܟܠ ܦܵܪܲܚܬܵܐ ܡܵܪܹܐ ܓܘܼܠܦܵܐ ܠܓܸܢܣܘܼܗ̇. ܘܚܙܹܐ ܠܹܗ ܐܲܠܵܗܵܐ ܕܨܦܵܝܝܼ ܝܗ݇ܘܵܐ. 22ܘܒܘܼܪܟܲܝ ܠܹܗ ܐܲܠܵܗܵܐ، ܒܹܐܡܵܪܵܐ، ”ܦܪܹܝܡܘܼܢ ܘܙܘܼܕܘܼܢ، ܘܡܠܹܝܡܘܼܢ ܠܡ̈ܝܼܵܐ ܕܒܝܵܡܵܬܹ̈ܐ، ܘܦܵܪܲܚܬܵܐ ܙܵܝܕܵܐ ܒܐܲܪܥܵܐ.“ 23ܘܗܘܹܐ ܠܹܗ ܪܲܡܫܵܐ ܘܗܘܹܐ ܠܹܗ ܨܲܦܪܵܐ، ܝܵܘܡܵܐ ܕܚܲܡܫܵܐ.
24ܘܐ݇ܡܝܼܪܹܗ ܐܲܠܵܗܵܐ، ”ܦܲܠܛܵܐ ܐܲܪܥܵܐ ܓܵܢܵܐ ܚܵܝܬܵܐ ܠܓܸܢܣܘܼܗ̇: ܒܥܝܼܪܵܐ، ܘܪܲܚܫܵܐ، ܘܚܲܝܘܬܵܐ ܕܐܲܪܥܵܐ، ܟܠ ܚܲܕ ܠܓܸܢܣܘܼܗ̇.“ ܘܗܘܹܐ ܠܹܗ ܗܲܕܟ݂ܵܐ. 25ܘܥܒ݂ܝܼܕ ܠܹܗ ܐܲܠܵܗܵܐ ܚܲܝܘܬܵܐ ܕܐܲܪܥܵܐ ܠܓܸܢܣܘܼܗ̇، ܘܒܥܝܼܪܵܐ ܠܓܸܢܣܹܗ، ܘܟܠ ܪܲܚܫܵܐ ܕܐܲܪܥܵܐ ܠܓܸܢܣܹܗ. ܘܚܙܹܐ ܠܹܗ ܐܲܠܵܗܵܐ ܕܨܦܵܝܝܼ ܝܗ݇ܘܵܐ.
26ܘܐ݇ܡܝܼܪܹܗ ܐܲܠܵܗܵܐ، ”ܥܵܒ݂ܕܲܚ ܐ݇ܢܵܫܵܐ ܒܨܲܠܡܲܢ ܐܲܝܟ݂ ܕܡܘܼܬܲܢ، ܘܥܵܒ݂ܕܝܼ ܫܘܼܠܛܵܢܵܐ ܥܲܠ ܢܘܼܢܹ̈ܐ ܕܝܵܡܵܐ، ܘܥܲܠ ܦܵܪܲܚܬܵܐ ܕܫܡܲܝܵܐ، ܘܥܲܠ ܒܥܝܼܪܵܐ، ܘܥܲܠ ܟܠܵܗ̇ ܐܲܪܥܵܐ، ܘܥܲܠ ܟܠ ܪܲܚܫܵܐ ܕܪܵܚܹܫ ܥܲܠ ܐܲܪܥܵܐ.“
27ܘܒܪܹܐ ܠܹܗ ܐܲܠܵܗܵܐ ܠܐ݇ܢܵܫܵܐ ܒܨܲܠܡܹܗ؛
ܒܨܲܠܡܵܐ ܕܐܲܠܵܗܵܐ ܒܪܹܐ ܠܹܗ ܐܸܠܹܗ؛
ܐܘܼܪܙܵܐ ܘܢܸܩܒ݂ܵܐ ܒܸܪܝܲܝ ܠܹܗ.
28ܘܒܘܼܪܟܲܝ ܠܹܗ ܐܲܠܵܗܵܐ، ܘܐ݇ܡܝܼܪܹܗ ܐܸܠܲܝܗܝ، ”ܦܪܹܝܡܘܼܢ ܘܙܘܼܕܘܼܢ، ܘܡܠܹܝܡܘܼܢ ܠܐܲܪܥܵܐ، ܘܙܲܒܛܸܢܘܼܢ ܠܵܗ̇، ܘܥܒ݂ܘܿܕܘܼܢ ܫܘܼܠܛܵܢܵܐ ܥܲܠ ܢܘܼܢܹ̈ܐ ܕܝܵܡܵܐ، ܘܥܲܠ ܦܵܪܲܚܬܵܐ ܕܫܡܲܝܵܐ، ܘܥܲܠ ܟܠ ܚܲܝܘܬܵܐ ܕܪܵܚܫܵܐ ܥܲܠ ܐܲܪܥܵܐ.“ 29ܘܐ݇ܡܝܼܪܹܗ ܐܲܠܵܗܵܐ، ”ܗܵܐ، ܝܘܼܗ݇ܒܸܠ ܠܝܼ ܐܸܠܵܘܟ݂ܘܿܢ ܟܠ ܢܨܝܼܒ݂ܬܵܐ ܝܵܗ݇ܒ݂ܵܢܬܵܐ ܕܒܲܪܙܲܪܥܵܐ ܕܝܼܠܵܗ̇ ܥܲܠ ܦܵܬܵܐ ܕܟܠܵܗ̇ ܐܲܪܥܵܐ، ܘܟܠ ܐܝܼܠܵܢܵܐ ܕܒܝܼܹܗ ܐܝܼܬ ܛܥܘܼܢܬܵܐ، ܝܵܗ݇ܒ݂ܵܢܵܐ ܕܒܲܪܙܲܪܥܵܐ؛ ܗܵܘܹܐ ܐܸܠܵܘܟ݂ܘܿܢ ܠܡܹܐܟ݂ܘܼܠܬܵܐ. 30ܘܠܟܠ ܚܲܝܘܬܵܐ ܕܐܲܪܥܵܐ، ܘܠܟܠ ܦܵܪܲܚܬܵܐ ܕܫܡܲܝܵܐ، ܘܠܟܠ ܕܪܵܚܹܫ ܥܲܠ ܐܲܪܥܵܐ، ܕܒܝܼܹܗ ܐܝܼܬ ܓܵܢܵܐ ܚܵܝܬܵܐ، ܟܠ ܢܨܝܼܒ݂ܬܵܐ ܩܝܼܢܬܵܐ ܗܵܘܝܵܐ ܐܸܠܲܝܗܝ ܠܡܹܐܟ݂ܘܼܠܬܵܐ.“ ܘܗܘܹܐ ܠܹܗ ܗܲܕܟ݂ܵܐ. 31ܘܚܙܹܐ ܠܹܗ ܐܲܠܵܗܵܐ ܠܟܠ ܕܥܒ݂ܝܼܕ ܠܹܗ، ܘܗܵܐ، ܨܦܵܝܝܼ ܝܗ݇ܘܵܐ ܪܵܒܵܐ. ܘܗܘܹܐ ܠܹܗ ܪܲܡܫܵܐ ܘܗܘܹܐ ܠܹܗ ܨܲܦܪܵܐ، ܝܵܘܡܵܐ ܕܐܸܫܬܵܐ.
Currently Selected:
ܒܪܝܬܐ 1: ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
