ܒܪܝܬܐ 24
24
ܐܲܒ݂ܪܵܗܵܡ ܡܲܡܘܼܝܹܐ ܠܪܹܓܵܐ
1ܐܲܒ݂ܪܵܗܵܡ ܣܝܼܒ݂ ܠܹܗ ܘܥܒ݂ܝܼܪܹܗ ܒܫܸܢܹ̈ܐ، ܘܡܵܪܝܵܐ ܒܘܼܪܸܟ݂ ܠܹܗ ܠܐܲܒ݂ܪܵܗܵܡ ܒܟܠ ܡܸܢܕܝܼ. 2ܐ݇ܡܝܼܪܹܗ ܐܲܒ݂ܪܵܗܵܡ ܠܪܹܓܹܗ، ܓܘܼܪܵܐ ܕܒܲܝܬܹܗ، ܕܝܼܗ݇ܘܵܐ ܬܲܓܒܸܪܵܢܵܐ ܥܲܠ ܟܠ ܡܸܢܕܝܼ ܕܐܝܼܬ ܗ݇ܘܵܐ ܠܹܗ ܐܲܒ݂ܪܵܗܵܡ، ”ܡܲܬܸܒ݂ ܐܝܼܕܘܼܟ݂ ܬܚܘܿܬ ܥܸܛܡܝܼ.#24:2 ܚܲܕ ܪܹܐܙܵܐ ܕܗܲܡܙܲܡܬܵܐ ܒܠܸܫܵܢܵܐ ܥܸܒ݂ܪܵܝܵܐ ܒܡܲܥܢܵܝܵܐ ܕܡܵܘܡܵܝܬܵܐ 3ܒܸܬ ܡܲܡܸܝܢܘܼܟ݂ ܒܡܵܪܝܵܐ ܐܲܠܵܗܵܐ ܕܫܡܲܝܵܐ ܘܕܐܲܪܥܵܐ، ܕܠܵܐ ܫܵܩܠܹܬ ܒܲܟ݂ܬܵܐ ܠܒܪܘܿܢܝܼ ܡ̣ܢ ܒܢܵܬܹ̈ܐ ܕܟܢܲܥܢܵܝܹ̈ܐ، ܐܵܢܝܼ ܕܒܸܥܡܵܪܵܐ ܝܘܸܢ ܓܵܘܲܝܗܝ، 4ܐܝܼܢܵܐ ܐܵܙܹܠ݇ܬ ܠܐܲܪܥܝܼ ܘܠܫܲܪܒܬܝܼ ܘܫܵܩܠܹܬ ܒܲܟ݂ܬܵܐ ܠܒܪܘܿܢܝܼ ܐܝܼܣܚܵܩ.“ 5ܘܐ݇ܡܝܼܪܹܗ ܐܸܠܹܗ ܪܹܓܵܐ، ”ܩܵܘܡܵܐ ܕܠܵܐ ܒܵܣܡܵܐ ܠܵܗ̇ ܒܲܟ݂ܬܵܐ ܠܹܐܬܵܝܵܐ ܥܲܡܝܼ ܠܐܵܗܵܐ ܐܲܪܥܵܐ؛ ܡܲܕܸܪܸܢܹܗ ܒܪܘܿܢܘܼܟ݂ ܠܐܲܪܥܵܐ ܕܦܠܝܼܛ ܠܘܼܟ݂ ܡܸܢܘܼܗ̇؟“ 6ܐ݇ܡܝܼܪܹܗ ܐܸܠܹܗ ܐܲܒ݂ܪܵܗܵܡ، ”ܦܘܼܫ ܙܗܝܼܪܵܐ ܕܠܵܐ ܗܵܘܝܵܐ ܕܡܲܕܸܪܸܬ ܠܒܪܘܿܢܝܼ ܠܬܵܡܵܐ. 7ܡܵܪܝܵܐ، ܐܲܠܵܗܵܐ ܕܫܡܲܝܵܐ، ܕܩܲܡ ܫܵܩܹܠ ܠܝܼ ܡ̣ܢ ܒܲܝܬܵܐ ܕܒܵܒܝܼ ܘܡ̣ܢ ܐܲܪܥܵܐ ܕܝܼܠܝܼܕܘܼܬܝܼ، ܗ̇ܘ ܕܗܘܼܡܙܸܡ ܠܹܗ ܥܲܡܝܼ ܘܕܝ݇ܡܹܐ ܠܹܗ ܐܸܠܝܼ ܒܹܐܡܵܪܵܐ، ’ܠܙܲܪܥܘܼܟ݂ ܒܸܬ ܝܵܗ݇ܒܹܢܵܗ̇ ܐܵܗܵܐ ܐܲܪܥܵܐ،‘ ܗ̇ܘ ܒܸܬ ܫܲܕܸܪ ܡܲܠܲܐܟܹܗ ܩܵܕ݇ܡܘܼܟ݂، ܘܒܸܬ ܫܵܩܠܹܬ ܒܲܟ݂ܬܵܐ ܩܵܐ ܒܪܘܿܢܝܼ ܡ̣ܢ ܬܵܡܵܐ. 8ܘܐܸܢ ܠܵܐ ܒܵܣܡܵܐ ܠܵܗ̇ ܒܲܟ݂ܬܵܐ ܠܹܐܬܵܝܵܐ ܥܲܡܘܼܟ݂، ܗ̇ܝܓܵܗ ܒܸܬ ܗܵܘܹܝܬ ܙܲܟܵܝܵܐ ܡ̣ܢ ܐܵܗܵܐ ܡܵܘܡܝܼܬܝܼ؛ ܐܝܼܢܵܐ ܠܒܪܘܿܢܝܼ ܠܵܐ ܡܲܕܸܪܸܬ ܠܬܵܡܵܐ.“ 9ܘܡܘܼܬܸܒ݂ ܠܹܗ ܪܹܓܵܐ ܐܝܼܕܹܗ ܬܚܘܿܬ ܥܸܛܡܵܐ ܕܐܲܒ݂ܪܵܗܵܡ ܡܵܪܹܗ، ܘܝ݇ܡܹܐ ܠܹܗ ܐܸܠܹܗ ܒܘܼܬ ܐܵܗܵܐ ܫܘܼܠܵܐ.
ܪܹܓܵܐ ܒܹܐܙܵܠܵܐ ܠܐܵܪܵܡ ܢܲܗܪ̈ܝܼܢ
10ܘܫܩܝܼܠ ܠܹܗ ܪܹܓܵܐ ܥܸܣܪܵܐ ܓܘܼܡܠܹ̈ܐ ܡ̣ܢ ܓܘܼܡܠܹ̈ܐ ܕܡܵܪܹܗ، ܘܡ̣ܢ ܟܠ ܡܸܢܕܝܼ ܨܦܵܝܝܼ ܕܡܵܪܹܗ ܒܐܝܼܕܹܗ، ܘܩܝܼܡ ܠܹܗ ܘܐ݇ܙܝܼܠ ܠܹܗ ܠܐܵܪܵܡ ܢܲܗܪ̈ܝܼܢ، ܠܡܕܝܼܢ݇ܬܵܐ ܕܢܵܚܘܿܪ. 11ܘܡܘܼܒܪܸܟ ܠܹܗ ܠܓܘܼܡܠܹ̈ܐ ܠܟܸܣ ܒܹܐܪܵܐ ܕܡ̈ܝܼܵܐ ܠܒܲܕܲܪ ܡ̣ܢ ܡܕܝܼܢ݇ܬܵܐ، ܒܥܕܵܢܵܐ ܕܪܲܡܫܵܐ، ܐܝܼܡܲܢ ܕܒܲܟ݂ܬܵܬܹ̈ܐ ܟܹܐ ܐܵܙܠ݇ܝܼ ܠܸܓܪܵܫܵܐ ܡ̈ܝܼܵܐ، 12ܘܐ݇ܡܝܼܪܹܗ، ”ܦܲܪܦܘܼܠܹܐ ܝܘܸܢ ܝܵܐ ܡܵܪܝܵܐ، ܐܲܠܵܗܵܐ ܕܡܵܪܝܼ ܐܲܒ݂ܪܵܗܵܡ، ܡܲܢܬܝܼ ܥܲܡܝܼ ܐܸܕܝܘܿܡ ܝܵܘܡܵܐ، ܘܥܒ݂ܘܿܕ ܫܵܦܵܩܲܬ ܥܲܡ ܡܵܪܝܼ ܐܲܒ݂ܪܵܗܵܡ. 13ܗܵܐ ܐܵܢܵܐ ܟܸܠܝܵܐ ܝܘܸܢ ܥܲܠ ܥܲܝܢܵܐ ܕܡ̈ܝܼܵܐ، ܘܒܢܵܬܹ̈ܐ ܕܐ݇ܢܵܫܹ̈ܐ ܕܡܕܝܼܢ݇ܬܵܐ ܒܸܦܠܵܛܵܐ ܝܢܵܐ ܠܸܓܪܵܫܵܐ ܡ̈ܝܼܵܐ. 14ܚܵܡܬܵܐ ܕܐܵܡܪܹܢ ܐܸܠܘܼܗ̇، ’ܡܲܟܸܦܝ ܬܲܠܡܵܟ݂ܝ، ܕܫܵܬܹܝܢ،‘ ܐܸܢ ܐܵܡܪܵܐ، ’ܫܬܝܼ، ܘܒܸܬ ܡܲܫܬܝܼܵܢ ܐܘܼܦ ܠܓܘܼܡܠܘܼ̈ܟ݂،‘ ܗܵܘܝܵܐ ܗ̇ܝ ܕܝܼܘܸܬ ܦܪܝܼܫܘܼܗ̇ ܠܪܹܓܘܼܟ݂ ܐܝܼܣܚܵܩ. ܒܐܵܗܵܐ ܒܸܬ ܝܵܕܥܹܢ ܕܥܒ݂ܝܼܕܵܐ ܝܘܸܬ ܫܵܦܵܩܲܬ ܥܲܡ ܡܵܪܝܼ.“
15ܡ̣ܢ ܩܵܕ݇ܡ ܕܦܵܪܹܩ ܗ݇ܘܵܐ ܡ̣ܢ ܨܲܠܘܼܝܹܐ، ܗܵܐ، ܦܠܝܼܛ ܠܵܗ̇ ܪܲܦܩܵܐ، ܬܲܠܡܘܼܗ̇ ܥܲܠ ܪܘܼܦ̮ܫܘܼܗ̇. ܗ̇ܝ ܦܝܼܫܬܵܐ ܝܗ݇ܘܵܐ ܝ݇ܠܝܼܕܬܵܐ ܠܒܬܘܼܐܹܝܠ، ܒܪܘܿܢܵܐ ܕܡܸܠܟܵܐ، ܕܝܼܗ݇ܘܵܐ ܒܲܟ݂ܬܵܐ ܕܢܵܚܘܿܪ، ܐܲܚܘܿܢܵܐ ܕܐܲܒ݂ܪܵܗܵܡ. 16ܚܵܡܬܵܐ ܫܲܦܝܼܪܬܵܐ ܝܗ݇ܘܵܐ ܒܚܸܙܘܵܐ ܪܵܒܵܐ، ܘܒܬܘܼܠܬܵܐ، ܘܐ݇ܢܵܫܵܐ ܠܹܐ ܝܗ݇ܘܵܐ ܝ݇ܕܝܼܥܘܼܗ̇؛ ܨܠܹܐ ܠܵܗ̇ ܠܥܲܝܢܵܐ، ܡܠܹܐ ܠܵܗ̇ ܬܲܠܡܘܼܗ̇ ܘܐ݇ܣܝܼܩ ܠܵܗ̇. 17ܪܚܝܼܛ ܠܹܗ ܪܹܓܵܐ ܠܐܘܼܪܚܘܼܗ̇ ܘܐ݇ܡܝܼܪܹܗ، ”ܡܲܫܬܝܼ ܠܝܼ ܚܲܕ݇ܟ̰ܵܐ ܡ̈ܝܼܵܐ ܡ̣ܢ ܬܲܠܡܵܟ݂ܝ.“ 18ܐ݇ܡܝܼܪܵܗ̇ ܚܵܡܬܵܐ، ”ܫܬܝܼ، ܡܵܪܝܼ.“ ܒܓ̰ܲܠܕܘܼܬܵܐ ܡܘܼܨܠܹܐ ܠܵܗ̇ ܬܲܠܡܘܼܗ̇ ܥܲܠ ܐܝܼܕܘܼܗ̇ ܘܩܲܡ ܡܲܫܬܝܼܵܐ ܠܹܗ. 19ܐܝܼܡܲܢ ܕܦܪܝܼܩ ܠܵܗ̇ ܡ̣ܢ ܠܡܲܫܬܘܼܝܹܗ، ܐ݇ܡܝܼܪܵܗ̇، ”ܒܸܬ ܓܵܪܫܵܢ ܐܘܼܦ ܩܵܐ ܓܘܼܡܠܘܼ̈ܟ݂ ܗܲܠ ܕܦܵܪܩܝܼ ܡ̣ܢ ܠܸܫܬܵܝܵܐ.“ 20ܒܓ̰ܲܠܕܘܼܬܵܐ ܣܘܼܦܸܩ ܠܵܗ̇ ܬܲܠܡܘܼܗ̇ ܓܵܘ ܚܵܘܕܵܐ، ܘܪܚܝܼܛ ܠܵܗ̇ ܡܸܢܕܪܸܫ ܠܒܹܐܪܵܐ ܠܸܓܪܵܫܵܐ ܡ̈ܝܼܵܐ، ܘܓܪܝܼܫ ܠܵܗ̇ ܩܵܐ ܟܠܲܝܗܝ ܓܘܼܡܠܘܼ̈ܗܝ. 21ܘܐ݇ܢܵܫܵܐ ܒܸܚܝܵܪܵܐ ܝܗ݇ܘܵܐ ܒܝܼܘܼܗ̇ ܟܲܕ ܫܬܝܼܩܵܐ، ܠܝܼܕܵܥܵܐ ܐܸܢ ܡܵܪܝܵܐ ܡܘܼܢܬܹܐ ܠܹܗ ܥܲܡܹܗ ܒܐܘܼܪܚܵܐ ܝܲܢ ܠܵܐ.
22ܟܲܕ ܦܪܝܼܩ ܠܗܘܿܢ ܓܘܼܡܠܹ̈ܐ ܡ̣ܢ ܠܸܫܬܵܝܵܐ، ܫܩܝܼܠ ܠܹܗ ܗ̇ܘ ܐ݇ܢܵܫܵܐ ܚܸܙܡܬܵܐ ܕܕܲܗܒ݂ܵܐ، ܦܲܠܓܵܐ ܕܡܲܬܩܵܠܵܐ ܬܩܘܼܠܬܘܼܗ̇، ܘܬܲܪܬܹܝ ܫܸܒܸܪ̈ܝܵܬܹܐ ܩܵܐ ܐܝܼܕܵܬܘܼ̈ܗ̇، ܝܘܼܩܪ̈ܲܝܗܝ ܥܸܣܪܵܐ ܡܲܬܩܵܠܹ̈ܐ ܕܕܲܗܒ݂ܵܐ، 23ܘܒܘܼܩܸܪܹܗ ܡܸܢܘܼܗ̇، ”ܒܪܵܬܵܐ ܕܡܵܢܝܼ ܝܘܲܬܝ؟ ܡܲܕܸܥ ܠܝܼ، ܦܲܪܦܘܼܠܹܐ ܝܘܸܢ، ܐܝܼܬ ܓܵܘ ܒܲܝܬܵܐ ܕܒܵܒܵܟ݂ܝ ܕܘܼܟܵܐ ܐܸܠܲܢ ܠܸܦܝܵܫܵܐ ܒܠܲܝܠܹܐ؟“ 24ܐ݇ܡܝܼܪܵܗ̇ ܐܸܠܹܗ، ”ܒܪܵܬܵܐ ܕܒܬܘܼܐܹܝܠ ܝܼܘܵܢ، ܒܪܘܿܢܵܐ ܕܡܸܠܟܵܐ ܕܝ݇ܠܝܼܕ ܠܵܗ̇ ܩܵܐ ܢܵܚܘܿܪ.“ 25ܘܐ݇ܡܝܼܪܵܗ̇ ܐܸܠܹܗ، ”ܐܝܼܬ ܠܲܢ ܐܘܼܦ ܬܸܒ݂ܢܵܐ ܐܘܼܦ ܡܹܐܟ݂ܠܵܐ ܪܵܒܵܐ، ܘܐܘܼܦ ܕܘܼܟܵܐ ܠܸܦܝܵܫܵܐ ܒܠܲܝܠܹܐ.“ 26ܘܐ݇ܢܵܫܵܐ ܡܘܼܟܸܦ ܠܹܗ ܪܹܫܹܗ ܘܣܓ݂ܝܼܕ ܠܹܗ ܠܡܵܪܝܵܐ، 27ܘܐ݇ܡܝܼܪܹܗ، ”ܒܪܝܼܟ݂ܵܐ ܝܠܹܗ ܡܵܪܝܵܐ ܐܲܠܵܗܵܐ ܕܡܵܪܝܼ ܐܲܒ݂ܪܵܗܵܡ، ܕܠܵܐ ܡܘܼܢܫܹܐ ܠܹܗ ܛܵܒ݂ܘܼܬܹܗ ܘܫܲܪܝܼܪܘܼܬܹܗ ܡ̣ܢ ܡܵܪܝܼ. ܟܲܕ ܐܵܢܵܐ ܒܐܘܼܪܚܵܐ، ܡܗܘܼܕܹܐ ܠܹܗ ܐܸܠܝܼ ܡܵܪܝܵܐ ܠܒܲܝܬܵܐ ܕܚܸܙܡܵܢܹ̈ܐ ܕܡܵܪܝܼ.“ 28ܘܪܚܝܼܛ ܠܵܗ̇ ܚܵܡܬܵܐ ܘܡܘܼܕܸܥ ܠܵܗ̇ ܠܒܲܝܬܵܐ ܕܝܸܡܘܼܗ̇ ܒܘܼܬ ܐܲܢܹܐ ܚܲܒܪܹ̈ܐ.
29ܪܲܦܩܵܐ ܐܝܼܬ ܗ݇ܘܵܐ ܠܵܗ̇ ܐܲܚܘܿܢܵܐ ܫܸܡܹܗ ܠܵܒ݂ܵܢ. ܪܚܝܼܛ ܠܹܗ ܠܵܒ݂ܵܢ ܠܟܸܣ ܕܗ̇ܘ ܐ݇ܢܵܫܵܐ ܠܒܲܕܲܪ، ܠܥܲܝܢܵܐ. 30ܡ̣ܢ ܒܵܬ݇ܪ ܕܚܙܹܐ ܠܹܗ ܠܚܸܙܡܬܵܐ، ܘܠܫܸܒܸܪ̈ܝܵܬܹܐ ܥܲܠ ܐܝܼܕܵܬܹ̈ܐ ܕܚܵܬܹܗ، ܘܡ̣ܢ ܒܵܬ݇ܪ ܕܫܡܝܼܥ ܠܹܗ ܗܹܡܸܙܡܵܢܹ̈ܐ ܕܪܲܦܩܵܐ ܚܵܬܹܗ ܒܹܐܡܵܪܵܐ، ”ܗܲܕܟ݂ܵܐ ܗܘܼܡܙܸܡ ܠܹܗ ܥܲܡܝܼ ܗ̇ܘ ܐ݇ܢܵܫܵܐ،“ ܪܚܝܼܛ ܠܹܗ ܘܐ݇ܬܹܐ ܠܹܗ ܠܟܸܣ ܗ̇ܘ ܐ݇ܢܵܫܵܐ، ܘܚܙܹܐ ܠܹܗ ܕܟܸܠܝܵܐ ܝܗ݇ܘܵܐ ܠܟܸܣ ܓܘܼܡܠܹ̈ܐ ܥܲܠ ܥܲܝܢܵܐ. 31ܘܐ݇ܡܝܼܪܹܗ، ”ܥܒ݂ܘܿܪ، ܝܵܐ ܒܪܝܼܟ݂ܵܐ ܕܡܵܪܝܵܐ. ܩܵܡܘܿܕܝܼ ܝܘܸܬ ܟܸܠܝܵܐ ܠܒܲܕܲܪ؟ ܐܵܢܵܐ ܗܘܼܕܪܵܐ ܝܘܸܢ ܠܒܲܝܬܵܐ، ܘܕܘܼܟܵܐ ܩܵܐ ܓܘܼܡܠܹ̈ܐ.“ 32ܥܒ݂ܝܼܪܹܗ ܗ̇ܘ ܐ݇ܢܵܫܵܐ ܠܒܲܝܬܵܐ، ܘܠܵܒ݂ܵܢ ܫܸܪܝܲܝ ܠܹܗ ܓܘܼܡܠܹ̈ܐ ܘܝܘܼܗܒܲܝ ܠܹܗ ܬܸܒ݂ܢܵܐ ܘܡܹܐܟ݂ܠܵܐ، ܘܝܘܼܗ݇ܒܸܠ ܠܹܗ ܡ̈ܝܼܵܐ ܠܚܲܠܘܼܠܹܐ ܐܲܩܠܵܬܹ̈ܗ ܘܐܲܩܠܵܬܹ̈ܐ ܕܐ݇ܢܵܫܹ̈ܐ ܕܥܲܡܹܗ. 33ܘܡܘܼܬܸܒ݂ ܠܹܗ ܡܹܐܟ݂ܘܼܠܬܵܐ ܩܵܕ݇ܡܘܼܗܝ. ܐܝܼܢܵܐ ܐ݇ܡܝܼܪܹܗ، ”ܠܹܐ ܐܵܟ݂ܠܹܢ ܗܲܠ ܕܗܲܡܙܸܡܸܢ ܚܲܒܪܝܼ.“ ܐ݇ܡܝܼܪܹܗ، ”ܗܲܡܙܸܡ.“
34ܐ݇ܡܝܼܪܹܗ، ”ܐܵܢܵܐ ܪܹܓܵܐ ܕܐܲܒ݂ܪܵܗܵܡ ܝܘܸܢ. 35ܡܵܪܝܵܐ ܡܒܘܼܪܟ݂ܵܐ ܝܠܹܗ ܠܡܵܪܝܼ ܪܵܒܵܐ، ܘܗܘܝܼܵܐ ܝܠܹܗ ܓܘܼܪܵܐ، ܘܝܘܼܗ݇ܒ݂ܵܐ ܝܠܹܗ ܐܸܠܹܗ ܦܸܣܩܹ̈ܐ ܘܒܸܩܪ̈ܵܬܹܐ، ܘܣܹܐܡܵܐ ܘܕܲܗܒ݂ܵܐ، ܘܪܹ̈ܓܵܘܵܬܹܐ ܘܚܹܕܲܡܝܵܬܹ̈ܐ، ܘܓܘܼܡܠܹ̈ܐ ܘܚܡܵܪܹ̈ܐ. 36ܝ݇ܠܝܼܕ ܠܵܗ̇ ܣܲܪܵܐ، ܒܲܟ݂ܬܵܐ ܕܡܵܪܝܼ، ܒܪܘܿܢܵܐ ܐܸܠܹܗ، ܒܙܲܒ݂ܢܵܐ ܕܣܲܝܒܘܼܬܘܼܗ̇، ܘܝܘܼܗ݇ܒ݂ܵܐ ܝܠܹܗ ܐܸܠܹܗ ܟܠ ܡܸܢܕܝܼ ܕܐܝܼܬ ܠܹܗ. 37ܘܡܘܼܡܹܐ ܠܹܗ ܐܸܠܝܼ ܡܵܪܝܼ ܒܹܐܡܵܪܵܐ، ’ܠܵܐ ܫܵܩܠܹܬ ܒܲܟ݂ܬܵܐ ܠܒܪܘܿܢܝܼ ܡ̣ܢ ܒܢܵܬܹ̈ܐ ܕܟܢܲܥܢܵܝܹ̈ܐ، ܕܐܵܢܵܐ ܝ݇ܬܝܼܒ݂ܵܐ ܝܘܸܢ ܒܐܲܪܥܲܝܗܝ. 38ܐܸܠܵܐ ܐܵܙܹܠ݇ܬ ܠܒܲܝܬܵܐ ܕܒܵܒܝܼ، ܘܠܫܲܪܒܬܝܼ، ܘܫܵܩܠܹܬ ܒܲܟ݂ܬܵܐ ܠܒܪܘܿܢܝܼ.‘ 39ܘܐ݇ܡܝܼܪܝܼ ܠܡܵܪܝܼ، ’ܩܵܘܡܵܐ ܕܠܵܐ ܐܵܬܝܵܐ ܒܲܟ݂ܬܵܐ ܥܲܡܝܼ.‘ 40ܐܝܼܢܵܐ ܐ݇ܡܝܼܪܹܗ ܐܸܠܝܼ، ’ܡܵܪܝܵܐ، ܕܚܕܝܼܪܵܐ ܝܘܸܢ ܩܵܕ݇ܡܘܼܗܝ، ܒܸܬ ܫܲܕܸܪ ܡܲܠܲܐܟܹܗ ܥܲܡܘܼܟ݂ ܘܒܸܬ ܡܲܢܬܹܐ ܠܵܗ̇ ܐܘܼܪܚܘܼܟ݂، ܘܒܸܬ ܫܵܩܠܹܬ ܒܲܟ݂ܬܵܐ ܠܒܪܘܿܢܝܼ ܡ̣ܢ ܫܲܪܒܬܝܼ ܘܡ̣ܢ ܒܲܝܬܵܐ ܕܒܵܒܝܼ. 41ܗ̇ܝܓܵܗ ܒܸܬ ܗܵܘܹܝܬ ܙܲܟܵܝܵܐ ܡ̣ܢ ܡܵܘܡܝܼܬܝܼ ܐܝܼܡܲܢ ܕܥܵܒ݂ܪܹܬ ܠܟܸܣ ܫܲܪܒܬܝܼ. ܐܘܼܦ ܐܸܢ ܠܵܐ ܝܵܗ݇ܒ݂ܝܼ ܠܘܼܟ݂ ܒܲܟ݂ܬܵܐ ܒܸܬ ܗܵܘܹܝܬ ܙܲܟܵܝܵܐ ܡ̣ܢ ܡܵܘܡܝܼܬܝܼ.‘ 42ܐ݇ܬܹܐ ܠܝܼ ܐܸܕܝܘܿܡ ܝܵܘܡܵܐ ܠܥܲܝܢܵܐ، ܘܐ݇ܡܝܼܪܝܼ، ’ܝܵܐ ܡܵܪܝܵܐ ܐܲܠܵܗܵܐ ܕܡܵܪܝܼ ܐܲܒ݂ܪܵܗܵܡ، ܦܲܪܦܘܼܠܹܐ ܝܘܸܢ، ܐܸܢ ܡܘܼܢܬܝܼܘܼܗ̇ ܝܘܸܬ ܐܘܼܪܚܝܼ ܕܒܹܐܙܵܠܵܐ ܝܘܸܢ ܒܝܼܘܼܗ̇، 43ܗܵܐ ܐܵܢܵܐ ܟܸܠܝܵܐ ܝܘܸܢ ܥܲܠ ܥܲܝܢܵܐ ܕܡ̈ܝܼܵܐ، ܘܚܵܡܬܵܐ ܕܦܵܠܛܵܐ ܠܸܓܪܵܫܵܐ ܡ̈ܝܼܵܐ، ܘܐܵܡܪܹܢ ܐܸܠܘܼܗ̇، ܡܲܫܬܝܼ ܠܝܼ ܦܲܪܦܘܼܠܹܐ ܝܘܸܢ ܚܲܕ݇ܟ̰ܵܐ ܡ̈ܝܼܵܐ ܡ̣ܢ ܬܲܠܡܵܟ݂ܝ، 44ܘܐܵܡܪܵܐ ܐܸܠܝܼ، ”ܫܬܝܼ ܐܲܢ݇ܬ، ܘܒܸܬ ܓܵܪܫܵܢ ܐܘܼܦ ܩܵܐ ܓܘܼܡܠܘܼ̈ܟ݂،“ ܗ̇ܝ ܒܸܬ ܗܵܘܝܵܐ ܒܲܟ݂ܬܵܐ ܕܦܪܝܼܫܵܐ ܠܹܗ ܡܵܪܝܵܐ ܠܒܪܘܿܢܵܐ ܕܡܵܪܝܼ.‘ 45ܡ̣ܢ ܩܵܕ݇ܡ ܕܦܪܝܼܩ ܠܝܼ ܡ̣ܢ ܗܲܡܙܘܼܡܹܐ ܒܠܸܒܝܼ، ܗܵܐ، ܪܲܦܩܵܐ ܦܠܝܼܛ ܠܵܗ̇، ܬܲܠܡܘܼܗ̇ ܥܲܠ ܪܘܼܦ̮ܫܘܼܗ̇، ܘܨܠܹܐ ܠܵܗ̇ ܥܲܠ ܥܲܝܢܵܐ، ܘܓܪܝܼܫ ܠܵܗ̇ ܡ̈ܝܼܵܐ. ܐ݇ܡܝܼܪܝܼ ܐܸܠܘܼܗ̇، ’ܡܲܫܬܝܼ ܠܝܼ ܦܲܪܦܘܼܠܹܐ ܝܘܸܢ.‘ 46ܡܘܼܠܝܸܙ ܠܵܗ̇ ܘܡܘܼܨܠܹܐ ܠܵܗ̇ ܠܬܲܠܡܘܼܗ̇ ܡܥܲܠܘܼܗ̇، ܘܐ݇ܡܝܼܪܵܗ̇، ’ܫܬܝܼ، ܘܒܸܬ ܡܲܫܬܝܼܵܢ ܐܘܼܦ ܠܓܘܼܡܠܘܼ̈ܟ݂.‘ ܫܬܹܐ ܠܝܼ، ܘܐܘܼܦ ܠܓܘܼܡܠܝܼ̈ ܡܘܼܫܬܹܐ ܠܵܗ̇. 47ܒܘܼܩܪܵܐ ܠܝܼ، ’ܒܪܵܬܵܐ ܕܡܵܢܝܼ ܝܘܲܬܝ؟‘ ܐ݇ܡܝܼܪܵܗ̇، ’ܒܪܵܬܵܐ ܕܒܬܘܼܐܹܝܠ ܒܪܘܿܢܵܐ ܕܢܵܚܘܿܪ، ܕܝ݇ܠܝܼܕ ܠܵܗ̇ ܐܸܠܹܗ ܡܸܠܟܵܐ.‘ ܘܡܚܹܐ ܠܝܼ ܚܸܙܡܬܵܐ ܒܢܵܚܝܼܪܘܼܗ̇، ܘܫܸܒܸܪ̈ܝܵܬܹܐ ܥܲܠ ܐܝܼܕܵܬܘܼ̈ܗ̇. 48ܘܟܝܼܦ ܠܝܼ ܘܣܓ݂ܝܼܕ ܠܝܼ ܠܡܵܪܝܵܐ، ܘܒܘܼܪܸܟ݂ ܠܝܼ ܠܡܵܪܝܵܐ ܐܲܠܵܗܵܐ ܕܡܵܪܝܼ ܐܲܒ݂ܪܵܗܵܡ، ܕܡܗܘܼܕܹܐ ܠܹܗ ܐܸܠܝܼ ܒܐܘܼܪܚܵܐ ܫܲܪܝܼܪܬܵܐ ܠܸܫܩܵܠܵܐ ܠܒܪܵܬܵܐ ܕܐܲܚܘܿܢܵܐ ܕܡܵܪܝܼ ܩܵܐ ܒܪܘܿܢܹܗ. 49ܘܐܵܕܝܼܵܐ ܐܸܢ ܥܵܒ݂ܕܝܼܬܘܿܢ ܫܵܦܵܩܲܬ ܘܣܲܪܲܣܬܘܼܬܵܐ ܥܲܡ ܡܵܪܝܼ، ܡܲܕܸܥܡܘܼܢ ܠܝܼ، ܘܐܸܢ ܠܵܐ، ܡܲܕܸܥܡܘܼܢ ܠܝܼ، ܕܝܵܕܥܹܢ ܡܘܿܕܝܼ ܥܵܒ݂ܕܹܢ.“
50ܓ̰ܘܼܘܸܒ ܠܗܘܿܢ ܠܵܒ݂ܵܢ ܘܒܬܘܼܐܹܝܠ ܒܹܐܡܵܪܵܐ، ”ܐܵܗܵܐ ܫܘܼܠܵܐ ܡ̣ܢ ܡܵܪܝܵܐ ܝܠܹܗ. ܠܹܐ ܡܵܨܲܚ ܕܐܵܡܪܲܚ ܗܹܐ ܝܲܢ ܠܵܐ. 51ܗܵܐ ܪܲܦܩܵܐ ܩܵܕ݇ܡܘܼܟ݂، ܫܩܘܿܠ ܘܙܹܠ݇، ܘܗܵܘܝܵܐ ܒܲܟ݂ܬܵܐ ܠܒܪܘܿܢܵܐ ܕܡܵܪܘܼܟ݂، ܕܵܐܟ݂ܝܼ ܕܗܘܼܡܙܸܡ ܠܹܗ ܡܵܪܝܵܐ.“ 52ܐܝܼܡܲܢ ܕܫܡܝܼܥ ܠܹܗ ܪܹܓܵܐ ܕܐܲܒ݂ܪܵܗܵܡ ܗܹܡܸܙܡܵܢܲܝ̈ܗܝ، ܡܘܼܟܸܦܵܐ ܠܹܗ ܓܵܢܹܗ ܠܐܲܪܥܵܐ ܩܵܕ݇ܡ ܡܵܪܝܵܐ. 53ܘܦܘܼܠܸܛ ܠܹܗ ܪܹܓܵܐ ܚܸܫܠܵܬܹ̈ܐ ܕܣܹܐܡܵܐ ܘܕܕܲܗܒ݂ܵܐ، ܘܠܒ݂ܘܼܫܹ̈ܐ، ܘܝܘܼܗ݇ܒܸܠ ܠܹܗ ܠܪܲܦܩܵܐ؛ ܘܡܵܘܗܒ݂ܵܬܹ̈ܐ ܛܝܼܡܵܢܹ̈ܐ ܝܘܼܗ݇ܒܸܠ ܠܹܗ ܠܐܲܚܘܿܢܘܼܗ̇ ܘܠܝܸܡܘܼܗ̇. 54ܘܐ݇ܟ݂ܝܼܠ ܠܗܘܿܢ ܘܫܬܹܐ ܠܗܘܿܢ، ܗ̇ܘ ܘܐ݇ܢܵܫܹ̈ܐ ܕܥܲܡܹܗ، ܘܦܝܼܫ ܠܗܘܿܢ ܒܠܲܝܠܹܐ. ܐܝܼܡܲܢ ܕܩܝܼܡ ܠܗܘܿܢ ܒܨܲܦܪܵܐ، ܐ݇ܡܝܼܪܹܗ، ”ܫܲܕܪܘܼܢ ܠܝܼ ܠܟܸܣ ܡܵܪܝܼ.“ 55ܐ݇ܡܝܼܪܗܘܿܢ ܐܲܚܘܿܢܘܼܗ̇ ܘܝܸܡܘܼܗ̇، ”ܦܵܝܫܵܐ ܚܵܡܬܵܐ ܥܲܡܲܢ ܚܲܕ ܡܸܬܚܵܐ، ܐܲܝܟ݂ ܥܸܣܪܵܐ ܝܵܘܡܵܢܹ̈ܐ، ܘܡ̣ܢ ܒܵܬ݇ܪ ܗܵܕܵܐ ܐܵܙܵܠ݇ܐ.“ 56ܐ݇ܡܝܼܪܹܗ ܐܸܠܲܝܗܝ، ”ܠܵܐ ܥܲܪܩܸܠܝܼܬܘܿܢ ܠܝܼ، ܣܵܒܵܒ ܡܵܪܝܵܐ ܡܘܼܢܬܝܼܵܐ ܠܹܗ ܐܘܼܪܚܝܼ؛ ܫܲܕܪܘܼܢ ܠܝܼ ܕܐܵܙܹܠ݇ܢ ܠܟܸܣ ܡܵܪܝܼ.“ 57ܐ݇ܡܝܼܪܗܘܿܢ، ”ܩܵܪܲܚ ܠܚܵܡܬܵܐ ܘܒܲܩܪܲܚ ܡܸܢܘܼܗ̇.“ 58ܩܪܹܐ ܠܗܘܿܢ ܠܪܲܦܩܵܐ ܘܒܘܼܩܸܪܗܘܿܢ ܡܸܢܘܼܗ̇، ”ܒܸܬ ܐܵܙܲܠ݇ܬܝ ܥܲܡ ܐܵܗܵܐ ܐ݇ܢܵܫܵܐ؟“ ܐ݇ܡܝܼܪܵܗ̇، ”ܒܸܬ ܐܵܙܵܠ݇ܢ.“ 59ܘܫܘܼܕܸܪܗܘܿܢ ܠܪܲܦܩܵܐ ܚܵܬܲܝܗܝ ܘܠܡܲܡܸܨܵܢܬܘܼܗ̇، ܘܠܪܹܓܵܐ ܕܐܲܒ݂ܪܵܗܵܡ ܘܠܐ݇ܢܵܫܘܼ̈ܗܝ. 60ܘܒܘܼܪܸܟ݂ ܠܗܘܿܢ ܠܪܲܦܩܵܐ، ܒܹܐܡܵܪܵܐ ܐܸܠܘܼܗ̇،
”ܚܵܬܲܢ، ܗܘܝܼ ܝܸܡܵܐ ܠܐܲܠܦܹ̈ܐ ܕܪܸ̈ܒܘܵܬܹܐ،
ܘܝܵܪܹܬ ܙܲܪܥܵܟ݂ܝ ܬܲܪܥܵܐ ܕܣܵܢܝܵܢܘܼ̈ܗܝ.“
61ܩܝܼܡ ܠܵܗ̇ ܪܲܦܩܵܐ ܘܚܹܕܲܡܝܵܬܘܼ̈ܗ̇، ܘܪܟܝܼܒ݂ ܠܗܘܿܢ ܥܲܠ ܓܘܼܡܠܹ̈ܐ، ܘܐ݇ܙܝܼܠ ܠܗܘܿܢ ܒܵܬ݇ܪ ܗ̇ܘ ܐ݇ܢܵܫܵܐ؛ ܘܫܩܝܼܠ ܠܹܗ ܪܹܓܵܐ ܠܪܲܦܩܵܐ ܘܐ݇ܙܝܼܠ ܠܹܗ.
ܐܝܼܣܚܵܩ ܙܲܘܘܼܓܹܐ ܥܲܡ ܪܲܦܩܵܐ
62ܐܝܼܣܚܵܩ ܐ݇ܬܝܼܵܐ ܝܗ݇ܘܵܐ ܡ̣ܢ ܒܹܪ ܠܲܚܲܝ ܪܘܿܐܝܼ، ܘܒܸܥܡܵܪܵܐ ܝܗ݇ܘܵܐ ܒܐܲܪܥܵܐ ܕܬܲܝܡܢܵܐ. 63ܘܦܠܝܼܛ ܠܹܗ ܐܝܼܣܚܵܩ ܠܸܚܕܵܪܵܐ ܓܵܘ ܕܸܫܬܵܐ ܒܥܕܵܢܵܐ ܕܪܲܡܫܵܐ، ܘܡܘܼܪܸܡ ܠܹܗ ܥܲܝܢܘܼ̈ܗܝ ܘܚܙܹܐ ܠܹܗ ܗܵܐ ܓܘܼܡܠܹ̈ܐ ܒܹܐܬܵܝܵܐ. 64ܡܘܼܪܸܡ ܠܵܗ̇ ܪܲܦܩܵܐ ܥܲܝܢܘܼ̈ܗܝ ܘܚܙܹܐ ܠܵܗ̇ ܠܐܝܼܣܚܵܩ، ܘܨܠܹܐ ܠܵܗ̇ ܡܥܲܠ ܓܘܼܡܠܵܐ، 65ܘܒܘܼܩܸܪܵܗ̇ ܡ̣ܢ ܪܹܓܵܐ، ”ܡܵܢܝܼ ܝܠܹܗ ܐܵܗܵܐ ܐ݇ܢܵܫܵܐ ܕܒܹܐܬܵܝܵܐ ܝܠܹܗ ܓܵܘ ܕܸܫܬܵܐ ܠܐܘܼܪܚܲܢ؟“ ܐ݇ܡܝܼܪܹܗ ܪܹܓܵܐ، ”ܐܵܗܵܐ ܡܵܪܝܼ ܝܠܹܗ.“ ܘܫܩܝܼܠ ܠܵܗ̇ ܫܲܪܦܵܐ، ܘܟܘܼܣܝܵܐ ܠܵܗ̇ ܓܵܢܘܼܗ̇. 66ܗܘܼܩܹܐ ܠܹܗ ܪܹܓܵܐ ܠܐܝܼܣܚܵܩ ܟܠ ܡܸܢܕܝܼ ܕܥܒ݂ܝܼܕܵܐ ܝܗ݇ܘܵܐ. 67ܗ̇ܝܓܵܗ ܡܘܼܥܒܸܪܵܐ ܠܹܗ ܐܝܼܣܚܵܩ ܠܡܲܫܟܢܵܐ ܕܣܲܪܵܐ ܝܸܡܹܗ، ܘܫܩܝܼܠ ܠܹܗ ܠܪܲܦܩܵܐ ܘܗܘܹܐ ܠܵܗ̇ ܐܸܠܹܗ ܠܒܲܟ݂ܬܵܐ، ܘܡܘܼܚܸܒܵܐ ܠܹܗ. ܘܦܝܼܫ ܠܹܗ ܝܘܼܗ݇ܒ݂ܵܐ ܠܸܒܵܐ ܐܝܼܣܚܵܩ ܡ̣ܢ ܒܵܬ݇ܪ ܡܵܘܬܵܐ ܕܝܸܡܹܗ.
Currently Selected:
ܒܪܝܬܐ 24: ABTAB
Highlight
Share
Compare
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
