ܒܪܝܬܐ 50

ܝܵܘܣܸܦ ܒܸܒܟ݂ܵܝܵܐ ܥܲܠ ܒܵܒܘܼܗܝ

1ܢܦܝܼܠ ܠܹܗ ܝܵܘܣܸܦ ܥܲܠ ܩܕܵܠܵܐ ܕܒܵܒܘܼܗܝ، ܘܒܟܹܐ ܠܹܗ ܥܲܠܘܼܗܝ، ܘܢܫܝܼܩ ܠܹܗ ܐܸܠܹܗ. 2ܦܩܝܼܕ ܠܹܗ ܠܪܹ̈ܓܵܘܵܬܹܗ ܐܵܣܝܹ̈ܐ ܠܸܚܢܵܛܵܐ ܠܒܵܒܘܼܗܝ. ܘܚܢܝܼܛ ܠܗܘܿܢ ܐܵܣܝܹ̈ܐ ܠܝܼܣܪܵܝܹܠ. 3ܬܘܼܡܸܡ ܠܗܘܿܢ ܐܸܠܹܗ ܐܲܪܒܥܝܼ ܝܵܘܡܵܢܹ̈ܐ، ܣܵܒܵܒ ܐܲܪܒܥܝܼ ܝܵܘܡܵܢܹ̈ܐ ܟܹܐ ܒܵܥܝܼ ܗ݇ܘܵܘ ܠܸܚܢܵܛܵܐ. ܘܒܟܹܐ ܠܗܘܿܢ ܥܲܠܘܼܗܝ ܡܸܨܪ̈ܵܝܹܐ ܫܲܒ݂ܥܝܼ ܝܵܘܡܵܢܹ̈ܐ.

4ܡ̣ܢ ܒܵܬ݇ܪ ܕܥܒ݂ܝܼܪܗܘܿܢ ܝܵܘܡܵܢܹ̈ܐ ܕܒܸܟ݂ܝܵܐ، ܗܘܼܡܙܸܡ ܠܹܗ ܝܵܘܣܸܦ ܥܲܡ ܒܢܲܝ̈ ܒܲܝܬܵܐ ܕܦܸܪܥܘܿܢ ܘܐ݇ܡܝܼܪܹܗ، ”ܦܲܪܦܘܼܠܹܐ ܝܘܸܢ، ܐܸܢ ܡܘܼܫ݇ܟ̰ܚܵܐ ܝܘܸܢ ܫܵܦܵܩܲܬ ܒܥܲܝܢܵܘ̈ܟ݂ܘܿܢ، ܗܲܡܙܸܡܘܼܢ ܥܲܡ ܦܸܪܥܘܿܢ ܘܐ݇ܡܘܿܪܘܼܢ، 5’ܒܵܒܝܼ ܩܲܡ ܡܲܡܹܐ ܠܝܼ ܒܹܐܡܵܪܵܐ، ”ܗܵܐ ܐܵܢܵܐ ܒܸܡܝܵܬܵܐ ܝܘܸܢ. ܩܵܒ݂ܪܹܬ ܠܝܼ ܒܩܲܒ݂ܪܵܐ ܕܚܦܝܼܪܵܐ ܝܘܸܢ ܩܵܐ ܓܵܢܝܼ ܓܵܘ ܐܲܪܥܵܐ ܕܟܢܲܥܢ.“ ܦܲܪܦܘܼܠܹܐ ܝܘܸܢ، ܐܵܕܝܼܵܐ ܫܒ݂ܘܿܩ ܠܝܼ ܕܐܵܣܩܹܢ ܘܩܵܒ݂ܪܹܢ ܠܒܵܒܝܼ ܘܕܵܝܪܹܢ.‘“ 6ܐ݇ܡܝܼܪܹܗ ܦܸܪܥܘܿܢ، ”ܐ݇ܣܘܿܩ ܘܩܒ݂ܘܿܪ ܠܒܵܒܘܼܟ݂، ܕܵܐܟ݂ܝܼ ܕܩܲܡ ܡܲܡܹܐ ܠܘܼܟ݂.“

ܩܒ݂ܵܪܬܵܐ ܕܝܲܥܩܘܿܒ݂

7ܘܐ݇ܣܝܼܩ ܠܹܗ ܝܵܘܣܸܦ ܠܸܩܒ݂ܵܪܵܐ ܠܒܵܒܘܼܗܝ، ܘܐ݇ܣܝܼܩ ܠܗܘܿܢ ܥܲܡܹܗ ܟܠܲܝܗܝ ܪܹ̈ܓܵܘܵܬܹܐ ܕܦܸܪܥܘܿܢ، ܚܘܵܪ̈ܕܸܩܢܹܐ ܕܒܲܝܬܹܗ، ܘܟܠܲܝܗܝ ܚܘܵܪ̈ܕܸܩܢܹܐ ܕܐܲܪܥܵܐ ܕܡܸܨܪܹܝܢ، 8ܘܟܠܹܗ ܒܢܲܝ̈ ܒܲܝܬܵܐ ܕܝܵܘܣܸܦ، ܘܐܲܚܘܿܢܘܵܬܹ̈ܗ، ܘܒܢܲܝ̈ ܒܲܝܬܵܐ ܕܒܵܒܘܼܗܝ. ܐܲܚܟ̰ܝܼ ܝܲܠܘܼܕܲܝ̈ܗܝ، ܘܦܸܣܩܲܝ̈ܗܝ، ܘܒܸܩܪ̈ܵܬܲܝܗܝ ܫܒ݂ܝܼܩܲܝ ܠܗܘܿܢ ܒܐܲܪܥܵܐ ܕܓܹܫܵܢ. 9ܘܐ݇ܣܝܼܩ ܠܗܘܿܢ ܥܲܡܹܗ ܐܘܼܦ ܡܲܪ̈ܟܒ݂ܵܬܹܐ ܘܪ̈ܲܟܵܒܹܐ، ܘܗܘܹܐ ܠܵܗ̇ ܡܲܫܪܝܼܬܵܐ ܓܘܼܪܬܵܐ ܪܵܒܵܐ.

10ܐܝܼܡܲܢ ܕܐ݇ܬܹܐ ܠܗܘܿܢ ܠܒܸܐܕܪܵܐ ܕܐܵܛܵܕ، ܕܝܼܠܵܗ̇ ܠܗ̇ܘ ܓܹܒܵܐ ܐ݇ܚܹܪ݇ܢܵܐ ܕܝܘܿܪܕܢܵܢ، ܥܒ݂ܝܼܕ ܠܗܘܿܢ ܬܵܥܙܝܼ ܬܵܡܵܐ، ܬܵܥܙܝܼ ܓܘܼܪܬܵܐ ܘܝܲܩܘܼܪܬܵܐ ܪܵܒܵܐ؛ ܘܥܒ݂ܝܼܕ ܠܹܗ ܬܵܥܙܝܼ ܥܲܠ ܒܵܒܘܼܗܝ ܫܲܒ݂ܥܵܐ ܝܵܘܡܵܢܹ̈ܐ. 11ܚܙܹܐ ܠܗܘܿܢ ܥܵܡܪ̈ܵܢܹܐ ܕܗ̇ܝ ܐܲܪܥܵܐ، ܟܢܲܥܢܵܝܹ̈ܐ، ܠܬܵܥܙܝܼ ܒܒܸܐܕܪܵܐ ܕܐܵܛܵܕ، ܘܐ݇ܡܝܼܪܗܘܿܢ، ”ܐܵܗܵܐ ܬܵܥܙܝܼ ܝܲܩܘܼܪܬܵܐ ܝܠܵܗ̇ ܠܡܸܨܪ̈ܵܝܹܐ.“ ܒܘܼܬ ܐܵܗܵܐ ܩܪܹܐ ܠܗܘܿܢ ܫܸܡܵܐ ܕܗ̇ܝ ܕܘܼܟܵܐ ܐܲܒܸܠ ܡܸܨܪܵܝܸܡ،#50‏:11 ܥܸܒ݂ܪܵܐܝܼܬ ܒܡܲܥܢܵܝܵܐ: ܬܵܥܙܝܼ ܕܡܸܨܪ̈ܵܝܹܐ ܕܝܼܠܵܗ̇ ܒܓܹܒܵܐ ܐ݇ܚܹܪ݇ܢܵܐ ܕܝܘܿܪܕܢܵܢ. 12ܗܲܕܟ݂ܵܐ ܥܒ݂ܝܼܕ ܠܗܘܿܢ ܐܸܠܹܗ ܒܢܘܿܢܘܼ̈ܗܝ ܐܲܝܟ݂ ܕܝܼܗ݇ܘܵܐ ܦܩܝܼܕܲܝ. 13ܠܘܼܒܸܠ ܠܗܘܿܢ ܐܸܠܹܗ ܒܢܘܿܢܘܼ̈ܗܝ ܠܐܲܪܥܵܐ ܕܟܢܲܥܢ، ܘܩܒ݂ܝܼܪܗܘܿܢ ܐܸܠܹܗ ܒܓܸܦܝܼܬܵܐ ܕܚܲܩܠܵܐ ܕܡܲܟ݂ܦܹܠܵܐ ܠܡܲܕܢܚܵܐ ܕܡܲܡܪܹܐ، ܗ̇ܝ ܕܙܒ݂ܝܼܢܵܐ ܠܹܗ ܐܲܒ݂ܪܵܗܵܡ ܥܲܡ ܚܲܩܠܵܐ، ܐܲܝܟ݂ ܐܲܪܥܵܐ ܕܒܹܝܬ ܩܒ݂ܘܼܪܵܐ، ܡ̣ܢ ܥܸܦܪܘܿܢ ܚܹܝܬܵܝܵܐ. 14ܡ̣ܢ ܒܵܬ݇ܪ ܕܩܒ݂ܝܼܪܹܗ ܠܒܵܒܘܼܗܝ، ܕܝܼܪܹܗ ܝܵܘܣܸܦ ܠܡܸܨܪܹܝܢ، ܗ̇ܘ ܘܐܲܚܘܿܢܘܵܬܹ̈ܗ ܘܟܠܲܝܗܝ ܐܵܢܝܼ ܕܝܼܗ݇ܘܵܘ ܐ݇ܣܝܼܩܹܐ ܥܲܡܹܗ ܠܸܩܒ݂ܵܪܵܐ ܠܒܵܒܘܼܗܝ.

ܝܵܘܣܸܦ ܒܝܼܵܗ݇ܒ݂ܵܐ ܠܸܒܵܐ ܠܐܲܚܘܿܢܘܵܬܹ̈ܗ

15ܐܝܼܡܲܢ ܕܚܙܹܐ ܠܗܘܿܢ ܐܲܚܘܿܢܘܵܬܹ̈ܐ ܕܝܵܘܣܸܦ ܕܡܝܼܬ ܠܹܗ ܒܵܒܲܝܗܝ، ܐ݇ܡܝܼܪܗܘܿܢ، ”ܩܵܘܡܵܐ ܒܸܬ ܣܵܢܹܐ ܠܲܢ ܝܵܘܣܸܦ ܘܦܵܪܹܥ ܠܲܢ ܣܸܪܝܘܼܬܵܐ ܥܲܠ ܟܠܵܗ̇ ܒܝܼܫܬܵܐ ܕܥܒ݂ܝܼܕ ܠܲܢ ܐܸܠܹܗ.“ 16ܗܲܕܟ݂ܵܐ ܫܘܼܕܸܪܗܘܿܢ ܠܟܸܣ ܝܵܘܣܸܦ ܒܹܐܡܵܪܵܐ، ”ܒܵܒܘܼܟ݂ ܦܩܝܼܕ ܠܹܗ ܡ̣ܢ ܩܵܕ݇ܡ ܡܵܘܬܹܗ ܒܹܐܡܵܪܵܐ، 17’ܐܵܡܪܝܼܬܘܿܢ ܠܝܵܘܣܸܦ، ”ܦܲܪܦܘܼܠܹܐ ܝܘܸܢ، ܕܦܲܚܠܸܬ ܓܢܵܗܵܐ ܘܚܛܝܼܬܵܐ ܕܐܲܚܘܿܢܘܵܬܘܼ̈ܟ݂ ܒܘܼܬ ܒܝܼܫܬܵܐ ܕܥܒ݂ܝܼܕ ܠܗܘܿܢ ܐܸܠܘܼܟ݂.“‘ ܘܐܵܕܝܼܵܐ ܦܲܪܦܘܼܠܹܐ ܝܘܸܢ ܒܝܼܘܼܟ݂، ܦܲܚܸܠ ܓܢܵܗܵܐ ܕܥܲܒ݂ܕܹ̈ܐ ܕܐܲܠܵܗܵܐ ܕܒܵܒܘܼܟ݂.“ ܘܒܟܹܐ ܠܹܗ ܝܵܘܣܸܦ ܐܝܼܡܲܢ ܕܫܡܝܼܥ ܠܹܗ ܡܘܿܕܝܼ ܝܗ݇ܘܵܘ ܗܘܼܡܙܸܡܹܐ ܥܲܡܹܗ. 18ܘܐ݇ܙܝܼܠ ܠܗܘܿܢ ܐܘܼܦ ܐܲܚܘܿܢܘܵܬܹ̈ܗ ܘܢܦܝܼܠ ܠܗܘܿܢ ܩܵܕ݇ܡܘܼܗܝ ܘܐ݇ܡܝܼܪܗܘܿܢ، ”ܗܵܐ ܐܲܚܢܲܢ ܪܹ̈ܓܵܘܵܬܘܼܟ݂ ܝܼܘܲܚ.“ 19ܐܝܼܢܵܐ ܐ݇ܡܝܼܪܹܗ ܐܸܠܲܝܗܝ ܝܵܘܣܸܦ، ”ܠܵܐ ܙܵܕܥܝܼܬܘܿܢ، ܩܵܡܘܿ، ܒܫܵܘܦܵܐ ܕܐܲܠܵܗܵܐ ܝܘܸܢ ܐܵܢܵܐ؟ 20ܐܲܚܬܘܿܢ ܚܫܝܼܒ݂ ܠܵܘܟ݂ܘܿܢ ܒܝܼܫܬܵܐ ܥܲܠܝܼ، ܐܝܼܢܵܐ ܐܲܠܵܗܵܐ ܚܫܝܼܒ݂ܵܐ ܠܹܗ ܠܛܵܒ݂ܬܵܐ، ܩܵܐ ܕܥܵܒܹܕ ܗ݇ܘܵܐ ܐܲܝܟ݂ ܐܸܕܝܘܿܡ ܝܵܘܡܵܐ، ܠܡܲܚܘܼܝܹܐ ܥܲܡܵܐ ܓܘܼܪܵܐ. 21ܘܐܵܕܝܼܵܐ ܠܵܐ ܙܵܕܥܝܼܬܘܿܢ، ܐܵܢܵܐ ܒܸܬ ܬܲܪܣܸܝܢ ܐܸܠܵܘܟ݂ܘܿܢ ܘܠܝܲܠܘܼܕܵܘ̈ܟ݂ܘܿܢ.“ ܗܲܕܟ݂ܵܐ ܝܘܼܗ݇ܒܲܝ ܠܹܗ ܠܸܒܵܐ ܘܚܘܼܠܸܢܲܝ ܠܹܗ.

ܡܵܘܬܵܐ ܕܝܵܘܣܸܦ

22ܘܦܝܼܫ ܠܹܗ ܝܵܘܣܸܦ ܓܵܘ ܡܸܨܪܹܝܢ، ܗ̇ܘ ܘܒܢܲܝ̈ ܒܲܝܬܵܐ ܕܒܵܒܘܼܗܝ؛ ܝܵܘܣܸܦ ܐܸܡܵܐܐ ܘܥܣܲܪ ܫܸܢܹ̈ܐ ܝܗ݇ܘܵܐ ܐܝܼܡܲܢ ܕܡܝܼܬ ܠܹܗ. 23ܚܙܹܐ ܠܹܗ ܝܵܘܣܸܦ ܠܒܢܘܿܢܹ̈ܐ ܕܐܲܦܪܹܝܡ ܒܬܠܵܬ ܬܵܘܠܕܵܬܹ̈ܐ؛ ܐܘܼܦ ܒܢܘܿܢܹ̈ܐ ܕܡܵܟ݂ܝܼܪ ܒܪܘܿܢܵܐ ܕܡܢܲܫܹܐ ܦܝܼܫ ܠܗܘܿܢ ܚܘܼܫܒܸܢܹܐ ܩܵܬܹܗ. 24ܐ݇ܡܝܼܪܹܗ ܝܵܘܣܸܦ ܠܐܲܚܘܿܢܘܵܬܹ̈ܗ، ”ܐܵܢܵܐ ܒܸܡܝܵܬܵܐ ܝܘܸܢ، ܐܝܼܢܵܐ ܐܲܠܵܗܵܐ ܒܸܬ ܣܲܚܒܸܪܵܘܟ݂ܘܿܢ، ܘܒܸܬ ܡܲܐܣܸܩ ܠܵܘܟ݂ܘܿܢ ܡ̣ܢ ܐܵܗܵܐ ܐܲܪܥܵܐ ܠܐܲܪܥܵܐ ܕܝ݇ܡܹܐ ܠܹܗ ܕܒܸܬ ܝܲܗ݇ܒܸܠ ܠܵܗ̇ ܠܐܲܒ݂ܪܵܗܵܡ، ܠܐܝܼܣܚܵܩ، ܘܠܝܲܥܩܘܿܒ݂.“ 25ܘܡܘܼܡܹܐ ܠܹܗ ܝܵܘܣܸܦ ܠܒܢܲܝ̈ ܝܼܣܪܵܝܹܠ ܒܹܐܡܵܪܵܐ، ”ܐܝܼܡܲܢ ܕܐܲܠܵܗܵܐ ܣܲܚܒܸܪܵܘܟ݂ܘܿܢ، ܡܲܐܣܩܝܼܬܘܿܢ ܠܓܲܪ̈ܡܝܼ ܡ̣ܢ ܐܵܗܵܐ ܕܘܼܟܵܐ.“ 26ܘܡܝܼܬ ܠܹܗ ܝܵܘܣܸܦ ܒܲܪ ܐܸܡܵܐܐ ܘܥܣܲܪ ܫܸܢܹ̈ܐ؛ ܘܩܲܡ ܚܵܢܛܝܼ ܠܹܗ، ܘܦܝܼܫ ܠܹܗ ܡܘܼܬܒ݂ܵܐ ܓܵܘ ܕܘܼܦܢܵܐ ܒܡܸܨܪܹܝܢ.

Currently Selected:

ܒܪܝܬܐ 50: ABTAB

Highlight

Copy

Compare