ܒܪܝܬܐ 8
8
ܡ̈ܝܼܵܐ ܒܸܒܨܵܪܵܐ
1ܕܟ݂ܝܼܪܹܗ ܐܲܠܵܗܵܐ ܠܢܘܿܚ، ܘܠܟܠ ܚܲܝܘܬܵܐ، ܘܠܟܠ ܒܥܝܼܪܵܐ ܕܝܼܗ݇ܘܵܐ ܥܲܡܹܗ ܒܩܹܒ݂ܘܼܬܵܐ. ܥܒ݂ܝܼܕ ܠܹܗ ܐܲܠܵܗܵܐ ܦܵܘܚܵܐ ܕܡܵܚܹܐ ܥܲܠ ܐܲܪܥܵܐ، ܘܫܝܼܟ ܠܗܘܿܢ ܡ̈ܝܼܵܐ. 2ܘܦܝܼܫ ܠܗܘܿܢ ܥܟ̰ܝܼܡܹܐ ܡܲܒܘܼܥܹ̈ܐ ܕܬܗܘܿܡܵܐ ܘܟܵܘܵܬܹ̈ܐ ܕܫܡܲܝܵܐ، ܘܦܝܼܫ ܠܵܗ̇ ܡܘܼܟܠܝܼܬܵܐ ܡܸܛܪܵܐ ܡ̣ܢ ܫܡܲܝܵܐ. 3ܘܕܝܼܪܗܘܿܢ ܡ̈ܝܼܵܐ ܡ̣ܢ ܥܲܠ ܐܲܪܥܵܐ، ܘܒܨܝܼܪܗܘܿܢ ܪܵܒܵܐ ܡ̣ܢ ܒܵܬ݇ܪ ܐܸܡܵܐܐ ܘܚܲܡܫܝܼ ܝܵܘܡܵܢܹ̈ܐ. 4ܘܒܝܲܪܚܵܐ ܕܫܲܒ݂ܥܵܐ، ܒܝܵܘܡܵܐ ܕܫܒܲܥܣܲܪ، ܫܠܹܐ ܠܵܗ̇ ܩܹܒ݂ܘܼܬܵܐ ܥܲܠ ܛܘܼܪܵܐ ܕܐܵܪܵܪܵܛ. 5ܘܡ̈ܝܼܵܐ ܗܘܹܐ ܠܗܘܿܢ ܒܸܒܨܵܪܵܐ ܗܲܠ ܝܲܪܚܵܐ ܕܥܸܣܪܵܐ؛ ܒܝܵܘܡܵܐ ܩܵܕ݇ܡܵܝܵܐ ܕܝܲܪܚܵܐ ܕܥܸܣܪܵܐ، ܡܘܼܒܝܸܢܗܘܿܢ ܪܹ̈ܫܵܢܹܐ ܕܛܘܼܪ̈ܵܢܹܐ.
ܢܘܿܚ ܫܲܕܘܼܪܹܐ ܥܘܼܪܒ݂ܵܐ ܘܝܵܘܢܵܐ
6ܡ̣ܢ ܒܵܬ݇ܪ ܐܲܪܒܥܝܼ ܝܵܘܡܵܢܹ̈ܐ، ܦܬܝܼܚ ܠܹܗ ܢܘܿܚ ܠܟܵܘܹܐ ܕܬܘܼܪܨܘܼܗ̇ ܝܗ݇ܘܵܐ ܒܩܹܒ݂ܘܼܬܵܐ، 7ܘܫܘܼܕܸܪܹܗ ܚܲܕ ܥܘܼܪܒ݂ܵܐ ܕܦܠܝܼܛ ܠܹܗ ܒܸܦܪܵܚܵܐ ܘܒܸܕܝܵܪܵܐ، ܗܲܠ ܕܒܪܝܼܙ ܠܗܘܿܢ ܡ̈ܝܼܵܐ ܡܥܲܠ ܐܲܪܥܵܐ. 8ܗ̇ܝܓܵܗ ܫܘܼܕܸܪܹܗ ܚܕܵܐ ܝܵܘܢܵܐ ܡ̣ܢ ܠܟܸܣ ܠܹܗ، ܠܸܚܙܵܝܵܐ ܕܐܸܢ ܩܘܼܠܩܸܠܹܐ ܝܗ݇ܘܵܘ ܡ̈ܝܼܵܐ ܡ̣ܢ ܥܲܠ ܦܵܬܵܐ ܕܐܲܪܥܵܐ؛ 9ܐܝܼܢܵܐ ܝܵܘܢܵܐ ܠܵܐ ܡܘܼܫ݇ܟ̰ܸܚ ܠܵܗ̇ ܕܘܼܟܵܐ ܕܟܠܵܝܵܐ ܩܵܐ ܐܲܩܠܘܼ̈ܗ̇، ܣܵܒܵܒ ܡ̈ܝܼܵܐ ܗܹܫ ܥܲܠ ܦܵܬܵܐ ܕܟܠܵܗ̇ ܐܲܪܥܵܐ ܝܗ݇ܘܵܘ، ܘܕܝܼܪܵܗ̇ ܐܸܠܹܗ ܠܩܹܒ݂ܘܼܬܵܐ. ܦܘܼܫܛܵܐ ܠܹܗ ܐܝܼܕܹܗ ܢܘܿܚ ܘܫܩܝܼܠܵܐ ܠܹܗ، ܘܡܘܼܥܒܸܪܵܐ ܠܹܗ ܠܟܸܣ ܠܹܗ ܠܩܹܒ݂ܘܼܬܵܐ. 10ܣܦܝܼܪܹܗ ܫܲܒ݂ܥܵܐ ܝܵܘܡܵܢܹ̈ܐ ܐ݇ܚܹܪ̈݇ܢܹܐ، ܘܫܘܼܕܸܪܹܗ ܡܸܢܕܪܸܫ ܠܝܵܘܢܵܐ ܡ̣ܢ ܩܹܒ݂ܘܼܬܵܐ. 11ܘܕܝܼܪܵܗ̇ ܝܵܘܢܵܐ ܠܟܸܣ ܠܹܗ ܒܪܲܡܫܵܐ، ܘܗܵܐ ܛܲܪܦܵܐ ܕܙܲܝܬܵܐ ܢܟ̰ܝܼܠܵܐ ܚܵܕ݇ܬܵܐ ܓܵܘ ܦܘܼܡܘܼܗ̇. ܘܝ݇ܕܝܼܥ ܠܹܗ ܢܘܿܚ ܕܡ̈ܝܼܵܐ ܩܘܼܠܩܸܠܹܐ ܝܗ݇ܘܵܘ ܡܥܲܠ ܐܲܪܥܵܐ. 12ܗ̇ܝܓܵܗ ܣܦܝܼܪܹܗ ܡܸܢܕܪܸܫ ܫܲܒ݂ܥܵܐ ܝܵܘܡܵܢܹ̈ܐ ܐ݇ܚܹܪ̈݇ܢܹܐ، ܘܫܘܼܕܸܪܹܗ ܠܝܵܘܢܵܐ، ܐܝܼܢܵܐ ܠܵܐ ܕܝܼܪܵܗ̇ ܐ݇ܚܹܪ݇ܢܵܐ ܠܟܸܣ ܠܹܗ.
13ܗܘܹܐ ܠܵܗ̇ ܒܫܹܢ݇ܬܵܐ ܕܐܸܫܸܬܡܵܐܐ ܘܚܕܵܐ ܕܢܘܿܚ، ܒܝܲܪܚܵܐ ܩܵܕ݇ܡܵܝܵܐ، ܒܝܵܘܡܵܐ ܩܵܕ݇ܡܵܝܵܐ ܕܝܲܪܚܵܐ، ܕܒܪܝܼܙ ܠܗܘܿܢ ܡ̈ܝܼܵܐ ܡ̣ܢ ܥܲܠ ܐܲܪܥܵܐ، ܘܡܘܼܪܸܡ ܠܹܗ ܢܘܿܚ ܟܲܣܵܝܬܵܐ ܕܩܹܒ݂ܘܼܬܵܐ ܘܓܘܼܫܸܩ ܠܹܗ، ܘܗܵܐ، ܒܪܝܼܙܬܵܐ ܝܗ݇ܘܵܐ ܦܵܬܵܐ ܕܐܲܪܥܵܐ. 14ܘܒܝܲܪܚܵܐ ܕܬܪܹܝ، ܥܸܣܪܝܼ ܘܫܲܒ݂ܥܵܐ ܒܝܼܹܗ، ܐܲܪܥܵܐ ܒܪܝܼܙܬܵܐ ܝܗ݇ܘܵܐ.
ܢܘܿܚ ܒܸܦܠܵܛܵܐ ܡ̣ܢ ܩܹܒ݂ܘܼܬܵܐ
15ܘܗܘܼܡܙܸܡ ܠܹܗ ܐܲܠܵܗܵܐ ܥܲܡ ܢܘܿܚ، ܒܹܐܡܵܪܵܐ، 16”ܦܠܘܿܛ ܡ̣ܢ ܩܹܒ݂ܘܼܬܵܐ، ܐܲܢ݇ܬ ܘܒܲܟ݂ܬܘܼܟ݂، ܘܒܢܘܿܢܘܼ̈ܟ݂ ܘܒܲܟ݂ܬܵܬܹ̈ܐ ܕܒܢܘܿܢܘܼ̈ܟ݂ ܥܲܡܘܼܟ݂. 17ܦܲܠܸܛ ܠܟܠ ܐܝܼܬܝܵܐ ܚܵܝܵܐ ܕܝܼܠܹܗ ܥܲܡܘܼܟ݂، ܡ̣ܢ ܟܠ ܓܸܢܣܵܐ: ܦܵܪܲܚܬܵܐ، ܘܒܥܝܼܪܵܐ، ܘܟܠ ܪܲܚܫܵܐ ܕܪܵܚܹܫ ܥܲܠ ܐܲܪܥܵܐ، ܕܝܵܠܕܝܼ ܪܵܒܵܐ، ܘܡܲܦܪܝܼ ܘܡܲܙܝܸܕܝܼ ܥܲܠ ܐܲܪܥܵܐ.“ 18ܘܦܠܝܼܛ ܠܹܗ ܢܘܿܚ، ܗ̇ܘ ܘܒܢܘܿܢܘܼ̈ܗܝ، ܘܒܲܟ݂ܬܹܗ، ܘܒܲܟ݂ܬܵܬܹ̈ܐ ܕܒܢܘܿܢܘܼ̈ܗܝ ܥܲܡܹܗ. 19ܟܠ ܚܲܝܘܬܵܐ، ܘܟܠ ܪܲܚܫܵܐ، ܘܟܠ ܦܵܪܲܚܬܵܐ، ܘܟܠ ܐܵܕܫܵܐ ܓ̰ܵܘܓ̰ܵܢܵܐ ܥܲܠ ܐܲܪܥܵܐ، ܐܲܝܟ݂ ܓܸܢܣܹܗ، ܦܠܝܼܛ ܠܗܘܿܢ ܡ̣ܢ ܩܹܒ݂ܘܼܬܵܐ.
ܢܘܿܚ ܒܸܒܢܵܝܵܐ ܡܲܕܒܚܵܐ
20ܒܢܹܐ ܠܹܗ ܢܘܿܚ ܡܲܕܒܚܵܐ ܠܡܵܪܝܵܐ، ܘܫܩܝܼܠ ܠܹܗ ܡ̣ܢ ܟܠ ܒܥܝܼܪܵܐ ܕܸܟ݂ܝܵܐ، ܘܡ̣ܢ ܟܠ ܦܵܪܲܚܬܵܐ ܕܟ݂ܝܼܬܵܐ، ܘܡܘܼܩܪܸܒ݂ ܠܹܗ ܕܸܒ݂ܚܹ̈ܐ ܡܘܼܩܕܹ̈ܐ ܥܲܠ ܡܲܕܒܚܵܐ. 21ܐܝܼܡܲܢ ܕܫܩܝܼܠ ܠܹܗ ܡܵܪܝܵܐ ܪܹܝܚܵܐ ܒܲܣܝܼܡܵܐ، ܐ݇ܡܝܼܪܹܗ ܒܠܸܒܹܗ، ”ܠܹܐ ܠܵܝܛܹܢ ܡܸܢܕܪܸܫ ܠܐܲܪܥܵܐ ܒܘܼܬ ܒܲܪܢܵܫܵܐ، ܣܵܒܵܒ ܚܘܼܫܵܒܹ̈ܐ ܕܠܸܒܵܐ ܕܒܲܪܢܵܫܵܐ ܒܝܼܫܹ̈ܐ ܝܢܵܐ ܡ̣ܢ ܝܵܠܕ݇ܘܼܬܹܗ؛ ܘܠܹܐ ܡܸܢܕܪܸܫ ܡܲܚܪܸܒܸܢ ܠܟܠ ܚܲܝܘܬܵܐ ܐܲܝܟ݂ ܕܥܒ݂ܝܼܕ ܠܝܼ.
22ܟܡܵܐ ܕܐܝܼܬ ܐܲܪܥܵܐ،
ܙܪܵܥܵܐ ܘܚܨܵܕܵܐ،
ܩܲܪܬܵܐ ܘܚܸܡܵܐ،
ܩܲܝܛܵܐ ܘܣܸܬܘܵܐ،
ܐܝܼܡܵܡܵܐ ܘܠܲܝܠܹܐ،
ܠܹܐ ܫܵܠܝܼ.“
Currently Selected:
ܒܪܝܬܐ 8: ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
