ܝܘܚܢܢ 1

ܐܲܠܵܗܘܼܬܵܐ ܕܡܫܝܼܚܵܐ

1ܒܪܵܫܝܼܬ ܡܸܠܬܵܐ ܝܼܗ݇ܘܵܐ، ܘܗ̇ܘ ܡܸܠܬܵܐ ܠܟܸܣ ܐܲܠܵܗܵܐ ܝܗ݇ܘܵܐ، ܘܐܲܠܵܗܵܐ ܝܗ݇ܘܵܐ ܗ̇ܘ ܡܸܠܬܵܐ. 2ܐܵܗܵܐ ܒܪܵܫܝܼܬ ܠܟܸܣ ܐܲܠܵܗܵܐ ܝܗ݇ܘܵܐ. 3ܟܠ ܡܸܢܕܝܼ ܒܝܲܕ ܕܝܼܹܗ ܗܘܹܐ ܠܹܗ، ܘܒܠܵܐ ܕܝܼܹܗ ܐܘܼܦ ܚܲܕ ܡܸܢܕܝܼ ܠܵܐ ܗܘܹܐ ܠܹܗ ܡ̣ܢ ܗ̇ܘ ܕܗܘܹܐ ܠܹܗ. 4ܒܝܼܹܗ ܚܲܝܹ̈ܐ ܝܗ݇ܘܵܘ، ܘܚܲܝܹ̈ܐ ܒܲܗܪܵܐ ܝܗ݇ܘܵܘ ܠܒܢܲܝ̈ܢܵܫܵܐ. 5ܘܒܲܗܪܵܐ ܓܵܘ ܚܸܫܟܵܐ ܟܹܐ ܙܵܪܹܩ، ܘܚܸܫܟܵܐ ܠܵܐ ܓ݂ܠܝܼܒ ܠܹܗ ܐܸܠܹܗ.

ܝܘܿܚܲܢܵܢ ܘܣܵܗܕܘܼܬܹܗ ܒܘܼܬ ܡܫܝܼܚܵܐ

6ܐܝܼܬ ܗ݇ܘܵܐ ܚܲܕ ܐ݇ܢܵܫܵܐ ܫܘܼܕܪܵܐ ܡ̣ܢ ܐܲܠܵܗܵܐ، ܫܸܡܹܗ ܝܘܿܚܲܢܵܢ. 7ܐܵܗܵܐ ܐ݇ܬܹܐ ܠܹܗ ܕܝܲܗ݇ܒܸܠ ܣܵܗܕܘܼܬܵܐ ܒܘܼܬ ܗ̇ܘ ܒܲܗܪܵܐ، ܗܲܕܟ݂ܵܐ ܕܟܠ ܐ݇ܢܵܫܵܐ ܗܲܡܸܢ ܒܝܲܕ ܕܝܼܹܗ. 8ܗ̇ܘ ܠܹܐ ܝܗ݇ܘܵܐ ܗ̇ܘ ܒܲܗܪܵܐ، ܐܝܼܢܵܐ ܐ݇ܬܹܐ ܠܹܗ ܕܝܲܗ݇ܒܸܠ ܣܵܗܕܘܼܬܵܐ ܥܲܠ ܒܲܗܪܵܐ. 9ܗ̇ܘ ܒܲܗܪܵܐ ܫܲܪܝܼܪܵܐ ܕܟܹܐ ܒܲܗܪܸܢ ܠܟܠ ܐ݇ܢܵܫܵܐ، ܒܹܐܬܵܝܵܐ ܝܗ݇ܘܵܐ ܠܥܵܠܡܵܐ. 10ܗ̇ܘ ܓܵܘ ܥܵܠܡܵܐ ܝܗ݇ܘܵܐ، ܘܥܵܠܡܵܐ ܒܝܲܕ ܕܝܼܹܗ ܗܘܹܐ ܠܹܗ، ܐܝܼܢܵܐ ܥܵܠܡܵܐ ܠܵܐ ܝ݇ܕܝܼܥ ܠܹܗ ܐܸܠܹܗ. 11ܠܟܸܣ ܕܝܼܹܗ ܐ݇ܬܹܐ ܠܹܗ ܘܥܲܡܵܐ ܕܓܵܢܹܗ ܠܵܐ ܩܘܼܒܸܠ ܠܗܘܿܢ ܐܸܠܹܗ. 12ܐܝܼܢܵܐ ܟܠܲܝܗܝ ܐܵܢܝܼ ܕܩܘܼܒܸܠ ܠܗܘܿܢ ܐܸܠܹܗ، ܘܕܗܘܼܡܸܢܗܘܿܢ ܒܫܸܡܹܗ، ܝܘܼܗ݇ܒܸܠ ܠܹܗ ܐܸܠܲܝܗܝ ܫܘܼܠܛܵܢܵܐ ܕܗܵܘܝܼ ܒܢܘܿܢܹ̈ܐ ܕܐܲܠܵܗܵܐ، 13ܐܵܢܝܼ ܕܠܵܐ ܡ̣ܢ ܕܸܡܵܐ، ܘܠܵܐ ܡ̣ܢ ܨܸܒ݂ܝܵܢܵܐ ܕܦܲܓ݂ܪܵܐ، ܘܠܵܐ ܡ̣ܢ ܨܸܒ݂ܝܵܢܵܐ ܕܓܲܒ݂ܪܵܐ، ܐܸܠܵܐ ܡ̣ܢ ܐܲܠܵܗܵܐ ܦܝܼܫ ܠܗܘܿܢ ܗܘܝܼܹܐ. 14ܘܡܸܠܬܵܐ ܗܘܹܐ ܠܹܗ ܒܸܣܪܵܐ، ܘܫܪܹܐ ܠܹܗ ܒܓܵܘܲܢ، ܘܚܙܹܐ ܠܲܢ ܚܸܩܪܹܗ، ܚܸܩܪܵܐ ܕܝܼܚܝܼܕܵܝܵܐ ܕܡ̣ܢ ܒܵܒܵܐ، ܡܸܠܝܵܐ ܫܵܦܵܩܲܬ ܘܫܪܵܪܵܐ. 15ܝܘܿܚܲܢܵܢ ܣܗܝܼܕ ܠܹܗ ܒܘܼܬ ܕܝܼܹܗ، ܘܡܘܼܩܘܸܚ ܠܹܗ، ܒܹܐܡܵܪܵܐ، ”ܐܵܗܵܐ ܝܗ݇ܘܵܐ ܗ̇ܘ ܕܐ݇ܡܝܼܪܝܼ ܒܘܼܬ ܕܝܼܹܗ ܕܒܹܐܬܵܝܵܐ ܝܠܹܗ ܡ̣ܢ ܒܵܬ݇ܪ ܕܝܼܝܼ، ܗ̇ܘ ܕܝܼܠܹܗ ܒܘܼܫ ܓܘܼܪܵܐ ܡܸܢܝܼ، ܣܵܒܵܒ ܝܼܗ݇ܘܵܐ ܡ̣ܢ ܩܵܕ݇ܡ ܕܝܼܝܼ.“ 16ܘܡ̣ܢ ܡܸܠܝܘܼܬܹܗ ܐܲܚܢܲܢ ܟܠܲܢ ܫܩܝܼܠ ܠܲܢ ܫܵܦܵܩܲܬ ܥܲܠ ܫܵܦܵܩܲܬ. 17ܣܵܒܵܒ ܢܵܡܘܿܣܵܐ ܒܝܲܕ ܡܘܼܫܹܐ ܦܝܼܫ ܠܹܗ ܝܘܼܗ݇ܒ݂ܵܐ، ܐܝܼܢܵܐ ܫܵܦܵܩܲܬ ܘܫܪܵܪܵܐ ܒܝܲܕ ܝܼܫܘܿܥ ܡܫܝܼܚܵܐ ܦܝܼܫ ܠܗܘܿܢ ܝܘܼܗ݇ܒܹܐ. 18ܐܘܼܦ ܚܲܕ ܠܹܐ ܝܠܹܗ ܚܸܙܝܵܐ ܠܐܲܠܵܗܵܐ. ܐܝܼܢܵܐ ܒܪܘܿܢܵܐ ܝܼܚܝܼܕܵܝܵܐ، ܗ̇ܘ ܕܝܼܠܹܗ ܒܥܘܼܒܵܐ ܕܒܵܒܘܼܗܝ، ܗ̇ܘ ܡܘܼܕܸܥ ܠܹܗ ܒܘܼܬ ܕܝܼܹܗ.

ܣܵܗܕܘܼܬܵܐ ܕܝܘܿܚܲܢܵܢ ܡܲܥܡܕܵܢܵܐ

ܡܬܝ 3‏:1‏‐12؛ ܡܪܩܘܣ 1‏:2‏‐8؛ ܠܘܩܐ 3‏:15‏‐17

19ܐܵܗܵܐ ܝܗ݇ܘܵܐ ܣܵܗܕܘܼܬܵܐ ܕܝܘܿܚܲܢܵܢ، ܐܝܼܡܲܢ ܕܝܗܘܼܕܵܝܹ̈ܐ ܡ̣ܢ ܐܘܿܪܸܫܠܸܡ ܫܘܼܕܸܪܗܘܿܢ ܠܟܸܣ ܠܹܗ ܟܵܗܢܹ̈ܐ ܘܠܹܘܵܝܹ̈ܐ ܕܒܲܩܪܝܼ ܗ݇ܘܵܘ ܠܹܗ، ”ܐܲܢ݇ܬ ܡܵܢܝܼ ܝܘܸܬ؟“ 20ܗ̇ܘ ܡܘܼܕܹܐ ܠܹܗ ܘܠܵܐ ܣܪܝܼܒ݂ ܠܹܗ، ܒܹܐܡܵܪܵܐ، ”ܐܵܢܵܐ ܠܹܐ ܝܘܸܢ ܡܫܝܼܚܵܐ.“ 21ܒܘܼܩܸܪܗܘܿܢ ܡܸܢܹܗ، ”ܒܲܣ ܡܵܢܝܼ ܝܘܸܬ، ܐܹܠܝܼܵܐ ܝܘܸܬ؟“ ܓ̰ܘܼܘܸܒ ܠܹܗ، ”ܠܵܐ، ܠܹܐ ܝܘܸܢ.“ ”ܗ̇ܘ ܢܒ݂ܝܼܵܐ ܝܘܸܬ؟“ #ܡܠܐܟ݂ܝ 4‏:5؛ ܬܢܝܢ ܢܡܘܣܐ 18‏:15‏، 18 ܓ̰ܘܼܘܸܒ ܠܹܗ، ”ܠܵܐ.“ 22ܐ݇ܡܝܼܪܗܘܿܢ ܐܸܠܹܗ، ”ܡܵܢܝܼ ܝܘܸܬ؟ ܐ݇ܡܘܿܪ ܐܸܠܲܢ ܕܝܵܗ݇ܒܲܚ ܓ̰ܘܼܘܵܒ ܠܐܵܢܝܼ ܕܫܘܼܕܸܪܗܘܿܢ ܐܸܠܲܢ. ܡܘܿܕܝܼ ܒܹܐܡܵܪܵܐ ܝܘܸܬ ܒܘܼܬ ܓܵܢܘܼܟ݂؟“ 23ܓ̰ܘܼܘܸܒ ܠܹܗ ܝܘܿܚܲܢܵܢ:

”ܐܵܢܵܐ ܩܵܠܵܐ ܝܘܸܢ ܒܸܩܪܵܝܵܐ ܓܵܘ ܒܲܪܝܼܵܐ، ’ܡܲܫܘܹܝܡܘܼܢ ܐܘܼܪܚܵܐ ܕܡܵܪܝܵܐ،‘#ܐܫܥܝܐ 40‏:3

ܕܵܐܟ݂ܝܼ ܕܐ݇ܡܝܼܪܹܗ ܐܹܫܲܥܝܵܐ ܢܒ݂ܝܼܵܐ.“ 24ܐܵܢܝܼ ܕܦܝܼܫܹܐ ܝܗ݇ܘܵܘ ܫܘܼܕܪܹܐ ܡ̣ܢ ܦܪ̈ܝܼܫܹܐ ܝܗ݇ܘܵܘ، 25ܘܒܘܼܩܸܪܗܘܿܢ ܡܸܢܹܗ، ”ܒܲܣ ܩܵܡܘܿܕܝܼ ܡܲܥܡܘܼܕܹܐ ܝܘܸܬ، ܐܸܢ ܠܹܐ ܝܘܸܬ ܡܫܝܼܚܵܐ ܘܠܵܐ ܐܹܠܝܼܵܐ ܘܠܵܐ ܗ̇ܘ ܢܒ݂ܝܼܵܐ؟“ 26ܓ̰ܘܼܘܸܒ ܠܹܗ ܐܸܠܲܝܗܝ ܝܘܿܚܲܢܵܢ، ”ܐܵܢܵܐ ܡܲܥܡܘܼܕܹܐ ܝܘܸܢ ܒܡ̈ܝܼܵܐ، ܐܝܼܢܵܐ ܐܝܼܬ ܟܸܠܝܵܐ ܓܵܘܵܘܟ݂ܘܿܢ ܗ̇ܘ ܕܐܲܚܬܘܿܢ ܠܹܐ ܝܬܘܿܢ ܒܝܼܕܵܥܹܗ، 27”ܐܵܗܵܐ ܝܠܹܗ ܗ̇ܘ ܕܒܹܐܬܵܝܵܐ ܝܠܹܗ ܡ̣ܢ ܒܵܬ݇ܪ ܕܝܼܝܼ، ܗ̇ܘ ܕܐܵܢܵܐ ܠܹܐ ܚܵܫܚܹܢ ܕܫܵܪܹܝܢ ܬܲܣܡܵܬܹ̈ܐ ܕܨܵܘܠܘܼ̈ܗܝ.“ 28ܐܲܢܹܐ ܗܘܹܐ ܠܗܘܿܢ ܓܵܘ ܒܹܝܬ ܥܲܢܝܵܐ، ܒܡܲܪܙܵܐ ܐ݇ܚܹܪ݇ܢܵܐ ܕܝܘܿܪܕܢܵܢ ܐܲܝܟܵܐ ܕܝܘܿܚܲܢܵܢ ܡܲܥܡܘܼܕܹܐ ܝܗ݇ܘܵܐ.

ܝܼܫܘܿܥ ܦܹܐܪܵܐ ܕܐܲܠܵܗܵܐ

29ܘܠܝܵܘܡܵܐ ܕܒܵܬ݇ܪܹܗ ܚܙܹܐ ܠܹܗ ܝܘܿܚܲܢܵܢ ܠܝܼܫܘܿܥ ܒܹܐܬܵܝܵܐ ܠܟܸܣ ܠܹܗ، ܘܐ݇ܡܝܼܪܹܗ، ”ܗܵܐ ܦܹܐܪܵܐ ܕܐܲܠܵܗܵܐ، ܗ̇ܘ ܕܫܵܩܹܠ ܚܛܝܼܬܵܐ ܕܥܵܠܡܵܐ. 30”ܐܵܗܵܐ ܝܠܹܗ ܗ̇ܘ ܕܐܵܢܵܐ ܐ݇ܡܝܼܪܝܼ ܒܘܼܬ ܕܝܼܹܗ: ܡ̣ܢ ܒܵܬ݇ܪ ܕܝܼܝܼ ܒܹܐܬܵܝܵܐ ܝܠܹܗ ܚܲܕ ܒܘܼܫ ܓܘܼܪܵܐ ܡܸܢܝܼ، ܣܵܒܵܒ ܡ̣ܢ ܩܵܕ݇ܡ ܕܝܼܝܼ ܝܗ݇ܘܵܐ. 31”ܘܐܵܢܵܐ ܠܹܐ ܝܵܕܥܹܢ ܗ݇ܘܵܐ ܠܹܗ، ܐܸܠܵܐ ܩܵܐ ܕܦܵܐܹܫ ܗ݇ܘܵܐ ܝ݇ܕܝܼܥܵܐ ܠܝܼܣܪܵܝܹܠ، ܒܘܼܬ ܗܵܕܵܐ ܐܵܢܵܐ ܐ݇ܬܹܐ ܠܝܼ ܡܲܥܡܘܼܕܹܐ ܒܡ̈ܝܼܵܐ.“ 32ܝܘܿܚܲܢܵܢ ܣܗܝܼܕ ܠܹܗ، ܒܹܐܡܵܪܵܐ، ”ܚܙܹܐ ܠܝܼ ܪܘܼܚܵܐ ܒܸܨܠܵܝܵܐ ܡ̣ܢ ܫܡܲܝܵܐ ܐܲܝܟ݂ ܝܵܘܢܵܐ ܘܒܸܫܪܵܝܵܐ ܥܲܠܘܼܗܝ. 33”ܘܐܵܢܵܐ ܠܵܐ ܝ݇ܕܝܼܥ ܠܝܼ ܐܸܠܹܗ، ܐܸܠܵܐ ܗ̇ܘ ܕܫܘܼܕܪܸܢܹܗ ܕܡܲܥܡܸܕܸܢ ܒܡ̈ܝܼܵܐ ܐ݇ܡܝܼܪܹܗ ܐܸܠܝܼ، ’ܠܡ̇ܢ ܕܚܵܙܹܝܬ ܪܘܼܚܵܐ ܒܸܨܠܵܝܵܐ ܘܒܸܫܪܵܝܵܐ ܥܲܠܘܼܗܝ، ܐܵܗܵܐ ܝܠܹܗ ܗ̇ܘ ܕܡܲܥܡܸܕ ܒܪܘܼܚܵܐ ܕܩܘܼܕܫܵܐ.‘ 34”ܘܐܵܢܵܐ ܚܙܹܐ ܠܝܼ ܘܒܝܼܵܗ݇ܒ݂ܵܐ ܝܘܸܢ ܣܵܗܕܘܼܬܵܐ ܕܐܵܗܵܐ ܝܠܹܗ ܒܪܘܿܢܵܐ ܕܐܲܠܵܗܵܐ.“

ܬܲܠܡܝܼ̈ܕܹܐ ܩܲܕ݇ܡܵܝܹ̈ܐ

35ܡܸܢܕܪܸܫ ܒܝܵܘܡܵܐ ܐ݇ܚܹܪ݇ܢܵܐ ܝܘܿܚܲܢܵܢ ܘܬܪܹܝ ܡ̣ܢ ܬܲܠܡܝܼܕܘܼ̈ܗܝ ܟܸܠܝܹܐ ܝܗ݇ܘܵܘ ܬܵܡܵܐ، 36ܘܚܝܼܪܹܗ ܒܝܼܫܘܿܥ ܟܲܕ ܒܸܚܕܵܪܵܐ، ܘܐ݇ܡܝܼܪܹܗ، ”ܗܵܐ ܦܹܐܪܵܐ ܕܐܲܠܵܗܵܐ.“ 37ܐܝܼܡܲܢ ܕܫܡܝܼܥ ܠܗܘܿܢ ܐܵܢܝܼ ܬܪܹܝ ܬܲܠܡܝܼܕܘܼ̈ܗܝ، ܐ݇ܙܝܼܠ ܠܗܘܿܢ ܒܵܬ݇ܪ ܝܼܫܘܿܥ. 38ܕܝܼܪܹܗ ܝܼܫܘܿܥ ܘܚܸܙܝܲܝ ܠܹܗ ܒܹܐܬܵܝܵܐ ܒܵܬ݇ܪܹܗ ܘܒܘܼܩܸܪܹܗ ܡܸܢܲܝܗܝ، ”ܡܘܿܕܝܼ ܒܵܥܹܝܬܘܿܢ؟“ ܐܵܢܝܼ ܓ̰ܘܼܘܸܒ ܠܗܘܿܢ، ”ܪܲܒܝܼ (ܕܦܝܵܫܵܐ ܝܠܹܗ ܦܘܼܫܩܵܐ ܡܲܠܦܵܢܵܐ)، ܐܲܝܟܵܐ ܟܹܐ ܦܵܝܫܹܬ؟“ 39ܐ݇ܡܝܼܪܹܗ، ”ܬܹܝܡܘܼܢ ܘܚܙܹܝܡܘܼܢ.“ ܘܐ݇ܬܹܐ ܠܗܘܿܢ ܘܚܙܹܐ ܠܗܘܿܢ ܐܲܝܟܵܐ ܦܝܵܫܵܐ ܝܗ݇ܘܵܐ، ܘܦܝܼܫ ܠܗܘܿܢ ܠܟܸܣ ܠܹܗ ܒܗ̇ܘ ܝܵܘܡܵܐ، ܘܐܲܝܟ݂ ܣܵܥܲܬ ܕܐܲܪܒܲܥ ܝܗ݇ܘܵܐ ܡ̣ܢ ܒܵܬ݇ܪ ܟܵܘܸܬܪܵܐ. 40ܚܲܕ ܡ̣ܢ ܐܵܢܝܼ ܬܪܹܝ ܕܫܡܝܼܥ ܠܗܘܿܢ ܡ̣ܢ ܝܘܿܚܲܢܵܢ ܘܐ݇ܙܝܼܠ ܠܗܘܿܢ ܒܵܬ݇ܪ ܝܼܫܘܿܥ، ܐܲܢܕܪܹܐܘܿܣ ܝܼܗ݇ܘܵܐ، ܐܲܚܘܿܢܵܐ ܕܫܸܡܥܘܿܢ ܟܹܐܦܵܐ. 41ܐܵܗܵܐ ܡܘܼܫ݇ܟ̰ܸܚ ܠܹܗ ܩܵܕ݇ܡܵܝܬܵܐ ܠܫܸܡܥܘܿܢ ܐܲܚܘܿܢܘܼܗܝ ܘܐ݇ܡܝܼܪܹܗ ܐܸܠܹܗ، ”ܡܘܼܫ݇ܟ̰ܸܚ ܠܲܢ ܠܡܫܝܼܚܵܐ.“ 42ܘܡܘܼܐܬܹܐ ܠܹܗ ܠܫܸܡܥܘܿܢ ܠܟܸܣ ܝܼܫܘܿܥ. ܚܝܼܪܹܗ ܒܝܼܹܗ ܝܼܫܘܿܥ ܘܐ݇ܡܝܼܪܹܗ، ”ܐܲܢ݇ܬ ܝܼܘܸܬ ܫܸܡܥܘܿܢ ܒܪܘܿܢܵܐ ܕܝܵܘܢܵܐ، ܐܲܢ݇ܬ ܒܸܬ ܦܵܝܫܹܬ ܩܸܪܝܵܐ ܟܹܐܦܵܐ.“

ܝܼܫܘܿܥ ܒܸܩܪܵܝܵܐܠܦܝܼܠܝܼܦܘܿܣ ܘܠܢܵܬܢܝܼܐܹܝܠ

43ܒܝܵܘܡܵܐ ܐ݇ܚܹܪ݇ܢܵܐ ܒܥܹܐ ܠܹܗ ܝܼܫܘܿܥ ܕܐܵܙܹܠ ܠܓܠܝܼܠܵܐ. ܡܘܼܫ݇ܟ̰ܸܚ ܠܹܗ ܠܦܝܼܠܝܼܦܘܿܣ ܘܐ݇ܡܝܼܪܹܗ ܐܸܠܹܗ، ”ܬܵܐ ܒܵܬ݇ܪܝܼ.“ 44ܦܝܼܠܝܼܦܘܿܣ ܡ̣ܢ ܒܹܝܬ ܨܲܝܵܕܵܐ ܝܗ݇ܘܵܐ، ܡܕܝܼܢ݇ܬܵܐ ܕܐܲܢܕܪܹܐܘܿܣ ܘܫܸܡܥܘܿܢ ܟܹܐܦܵܐ. 45ܦܝܼܠܝܼܦܘܿܣ ܡܘܼܫ݇ܟ̰ܸܚ ܠܹܗ ܠܢܵܬܢܝܼܐܹܝܠ ܘܐ݇ܡܝܼܪܹܗ ܐܸܠܹܗ، ”ܡܘܼܫ݇ܟ̰ܸܚ ܠܲܢ ܠܗ̇ܘ ܕܡܘܼܫܹܐ ܟܬܝܼܒ݂ ܠܹܗ ܒܘܼܬ ܕܝܼܹܗ ܒܢܵܡܘܿܣܵܐ، ܘܐܘܼܦ ܢܒ݂ܝܼܹ̈ܐ ܟܬܝܼܒ݂ ܠܗܘܿܢ ܒܘܼܬ ܕܝܼܹܗ، ܕܝܼܠܹܗ ܝܼܫܘܿܥ ܒܪܘܿܢܵܐ ܕܝܵܘܣܸܦ، ܡ̣ܢ ܢܵܨܪܲܬ.“ 46ܒܘܼܩܸܪܹܗ ܢܵܬܢܝܼܐܹܝܠ، ”ܟܹܐ ܗܵܘܝܵܐ ܕܡ̣ܢ ܢܵܨܪܲܬ ܦܵܠܹܛ ܡܸܢܕܝܼ ܛܵܒ݂ܵܐ؟“ ܐ݇ܡܝܼܪܹܗ ܐܸܠܹܗ ܦܝܼܠܝܼܦܘܿܣ، ”ܬܵܐ ܘܚܙܝܼ.“ 47ܐܝܼܡܲܢ ܕܚܙܹܐ ܠܹܗ ܝܼܫܘܿܥ ܠܢܵܬܢܝܼܐܹܝܠ ܒܹܐܬܵܝܵܐ ܠܟܸܣ ܠܹܗ، ܐ݇ܡܝܼܪܹܗ ܒܘܼܬ ܕܝܼܹܗ، ”ܗܵܐ، ܫܲܪܝܼܪܵܐܝܼܬ ܒܪܘܿܢܵܐ ܕܝܼܣܪܵܝܹܠ ܕܠܲܝܬ ܦܸܠܡܵܐ ܒܝܼܹܗ.“ 48ܒܘܼܩܸܪܹܗ ܡܸܢܹܗ ܢܵܬܢܝܼܐܹܝܠ، ”ܡ̣ܢ ܐܲܝܟܵܐ ܟܹܐ ܝܵܕܥܹܬ ܠܝܼ؟“ ܓ̰ܘܼܘܸܒ ܠܹܗ ܐܸܠܹܗ ܝܼܫܘܿܥ، ”ܡ̣ܢ ܩܵܕ݇ܡ ܕܩܵܪܹܐ ܗ݇ܘܵܐ ܠܘܼܟ݂ ܦܝܼܠܝܼܦܘܿܣ، ܟܲܕ ܬܚܘܿܬ ܐܝܼܠܵܢܵܐ ܕܬܹܐܢܹ̈ܐ، ܩܲܡ ܚܵܙܹܝܢܘܼܟ݂.“ 49ܓ̰ܘܼܘܸܒ ܠܹܗ ܐܸܠܹܗ ܢܵܬܢܝܼܐܹܝܠ، ”ܪܲܒܝܼ، ܐܲܢ݇ܬ ܝܼܘܸܬ ܒܪܘܿܢܵܐ ܕܐܲܠܵܗܵܐ، ܐܲܢ݇ܬ ܝܼܘܸܬ ܡܲܠܟܵܐ ܕܝܼܣܪܵܝܹܠ.“ 50ܓ̰ܘܼܘܸܒ ܠܹܗ ܝܼܫܘܿܥ ܘܐ݇ܡܝܼܪܹܗ ܐܸܠܹܗ، ”ܣܵܒܵܒ ܐ݇ܡܝܼܪܝܼ ܐܸܠܘܼܟ݂ ܕܩܲܡ ܚܵܙܹܝܢܘܼܟ݂ ܬܚܘܿܬ ܐܝܼܠܵܢܵܐ ܕܬܹܐܢܹ̈ܐ، ܗܲܡܘܼܢܹܐ ܝܘܸܬ؟ ܒܸܬ ܚܵܙܹܝܬ ܡܸܢܕܝܼܵܢܹ̈ܐ ܒܘܼܫ ܓܘܼܪܹ̈ܐ ܡ̣ܢ ܐܵܗܵܐ.“ 51ܘܐ݇ܡܝܼܪܹܗ ܐܸܠܹܗ، ”ܬܪܘܼܨܵܐ، ܬܪܘܼܨܵܐ، ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܡ̣ܢ ܐܵܕܝܼܵܐ ܒܸܬ ܚܵܙܹܝܬܘܿܢ ܫܡܲܝܵܐ ܦܬܝܼܚܬܵܐ ܘܡܲܠܲܐܟܹ̈ܐ ܕܐܲܠܵܗܵܐ ܒܹܐܣܵܩܵܐ ܘܒܸܨܠܵܝܵܐ ܠܟܸܣ ܒܪܘܿܢܵܐ ܕܐ݇ܢܵܫܵܐ.#ܒܪܝܬܐ 28‏:12

Currently Selected:

ܝܘܚܢܢ 1: ABTAB

Highlight

Copy