ܝܘܚܢܢ 7

ܝܼܫܘܿܥ ܒܹܐܙܵܠܵܐ ܠܥܹܐܕܵܐ

1ܡ̣ܢ ܒܵܬ݇ܪ ܐܲܢܹܐ، ܒܸܚܕܵܪܵܐ ܝܗ݇ܘܵܐ ܝܼܫܘܿܥ ܓܵܘ ܓܠܝܼܠܵܐ، ܣܵܒܵܒ ܠܹܐ ܒܵܥܹܐ ܗ݇ܘܵܐ ܕܦܵܐܹܫ ܗ݇ܘܵܐ ܓܵܘ ܝܼܗܘܼܕ، ܣܒܵܒ ܕܝܗܘܼܕܵܝܹ̈ܐ ܒܵܥܝܼ ܗ݇ܘܵܘ ܠܸܩܛܵܠܹܗ. 2ܘܩܘܼܪܒܸܢܵܐ ܝܗ݇ܘܵܐ ܥܹܐܕܵܐ ܕܡܛܲܠܠܹ̈ܐ#ܟܗܢ̈ܐ 23‏:34؛ ܬܢܝܢ ܢܡܘܣܐ 16‏:13 ܕܝܗܘܼܕܵܝܹ̈ܐ. 3ܘܐ݇ܡܝܼܪܗܘܿܢ ܐܲܚܘܿܢܘܵܬܹ̈ܐ ܕܝܼܫܘܿܥ ܐܸܠܹܗ، ”ܫܲܢܝܼ ܡܐܲܟ݂ܵܐ ܘܙܹܠ݇ ܠܝܼܗܘܼܕ ܕܚܵܙܝܼ ܐܘܼܦ ܬܲܠܡܝܼܕܘܼ̈ܟ݂ ܦܘܼܠܚܵܢܹ̈ܐ ܕܒܸܥܒ݂ܵܕܵܐ ܝܘܸܬ. 4”ܐܸܢ ܐ݇ܢܵܫܵܐ ܒܵܥܹܐ ܕܦܵܐܹܫ ܝ݇ܕܝܼܥܵܐ، ܠܹܐ ܦܵܠܹܚ ܒܛܸܫܘܵܐ. ܐܸܢ ܐܲܢܹܐ ܦܘܼܠܚܵܢܹ̈ܐ ܒܸܥܒ݂ܵܕܲܝ ܝܘܸܬ، ܡܲܚܙܝܼ ܓܵܢܘܼܟ݂ ܠܥܵܠܡܵܐ.“ 5ܣܵܒܵܒ ܐܘܼܦ ܐܲܚܘܿܢܘܵܬܹ̈ܗ ܠܹܐ ܝܗ݇ܘܵܘ ܗܘܼܡܸܢܹܐ ܒܝܼܹܗ. 6ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܥܕܵܢܝܼ ܗܹܫ ܠܹܐ ܝܠܵܗ̇ ܡܛܝܼܬܵܐ، ܐܝܼܢܵܐ ܥܕܵܢܵܐ ܕܝܼܵܘܟ݂ܘܿܢ ܒܟܠ ܙܲܒ݂ܢܵܐ ܝܠܵܗ̇. 7”ܠܹܐ ܡܵܨܹܐ ܥܵܠܡܵܐ ܣܵܢܹܐ ܠܵܘܟ݂ܘܿܢ، ܐܝܼܢܵܐ ܐܸܠܝܼ ܟܹܐ ܣܵܢܹܐ ܣܵܒܵܒ ܐܵܢܵܐ ܒܸܣܗܵܕܵܐ ܝܘܸܢ ܒܘܼܬ ܕܝܼܹܗ ܕܦܘܼܠܚܵܢܘܼ̈ܗܝ ܒܝܼܫܹ̈ܐ ܝܢܵܐ. 8”ܐ݇ܣܘܿܩܘܼܢ ܐܲܚܬܘܿܢ ܠܥܹܐܕܵܐ. ܐܵܢܵܐ ܐܵܕܝܼܵܐ ܠܹܐ ܐܵܣܩܹܢ ܠܐܵܗܵܐ ܥܹܐܕܵܐ، ܣܵܒܵܒ ܥܕܵܢܝܼ ܗܹܫ ܠܹܐ ܝܠܵܗ̇ ܡܛܝܼܬܵܐ.“ 9ܟܲܕ ܐ݇ܡܝܼܪܹܗ ܐܲܢܹܐ، ܦܝܼܫ ܠܹܗ ܓܵܘ ܓܠܝܼܠܵܐ.

10ܐܝܼܢܵܐ ܡ̣ܢ ܒܵܬ݇ܪ ܕܐ݇ܣܝܼܩ ܠܗܘܿܢ ܐܲܚܘܿܢܘܵܬܹ̈ܗ ܠܥܹܐܕܵܐ، ܐܘܼܦ ܝܼܫܘܿܥ ܐ݇ܣܝܼܩ ܠܹܗ، ܐܝܼܢܵܐ ܠܵܐ ܓܲܠܝܵܐܝܼܬ، ܐܸܠܵܐ ܒܛܸܫܘܵܐ. 11ܐܝܼܢܵܐ ܝܗܘܼܕܵܝܹ̈ܐ ܛܵܥܝܼ ܗ݇ܘܵܘ ܒܵܬ݇ܪܹܗ ܒܥܹܐܕܵܐ ܘܒܲܩܪܝܼ ܗ݇ܘܵܘ، ”ܐܲܝܟܵܐ ܝܠܹܗ ܗ̇ܘ ܐ݇ܢܵܫܵܐ؟“ 12ܗܘܹܐ ܠܵܗ̇ ܛܲܪܛܲܡܬܵܐ ܪܵܒܵܐ ܒܘܼܬ ܕܝܼܹܗ ܓܵܘ ܟܸܢܫܵܐ. ܚܲܕ݇ܟܡܵܐ ܐܵܡܪܝܼ ܗ݇ܘܵܘ، ”ܐ݇ܢܵܫܵܐ ܛܵܒ݂ܵܐ ܝܠܹܗ،“ ܘܐ݇ܚܹܪ̈݇ܢܹܐ ܐܵܡܪܝܼ ܗ݇ܘܵܘ، ”ܠܵܐ، ܡܲܚܠܘܼܛܹܐ ܝܠܹܗ ܠܟܸܢܫܵܐ.“ 13ܐܝܼܢܵܐ ܐܘܼܦ ܚܲܕ ܠܹܐ ܗܲܡܙܸܡ ܗ݇ܘܵܐ ܓܲܠܝܵܐܝܼܬ ܒܘܼܬ ܕܝܼܹܗ ܡ̣ܢ ܙܕܘܼܥܬܵܐ ܕܝܗܘܼܕܵܝܹ̈ܐ.

ܝܼܫܘܿܥ ܡܲܠܘܼܦܹܐ ܒܥܹܐܕܵܐ

14ܡ̣ܢ ܒܵܬ݇ܪ ܕܥܒ݂ܝܼܪܗܘܿܢ ܦܲܠܓܵܐ ܕܝܵܘܡܵܢܹ̈ܐ ܕܥܹܐܕܵܐ، ܐ݇ܣܝܼܩ ܠܹܗ ܝܼܫܘܿܥ ܠܗܲܝܟܠܵܐ ܘܡܲܠܸܦ ܗ݇ܘܵܐ. 15ܘܥܲܓ̰ܒܝܼ ܗ݇ܘܵܘ ܝܗܘܼܕܵܝܹ̈ܐ ܘܐܵܡܪܝܼ ܗ݇ܘܵܘ، ”ܕܵܐܟ݂ܝܼ ܐܵܗܵܐ ܒܝܼܕܵܥܵܐ ܝܠܹܗ ܟܬܵܒܹ̈ܐ ܟܲܕ ܠܹܐ ܝܠܹܗ ܝ݇ܠܝܼܦܵܐ؟“ 16ܓ̰ܘܼܘܸܒ ܠܹܗ ܐܸܠܲܝܗܝ ܝܼܫܘܿܥ، ”ܝܘܼܠܦܵܢܝܼ ܠܹܐ ܝܠܹܗ ܡ̣ܢ ܓܵܢܝܼ ܐܸܠܵܐ ܡ̣ܢ ܕܗ̇ܘ ܕܫܘܼܕܪܸܢܹܗ. 17”ܡ̇ܢ ܕܒܵܣܡܵܐ ܠܹܗ ܕܥܵܒܹܕ ܨܸܒ݂ܝܵܢܹܗ، ܒܸܬ ܝܵܕܹܥ ܕܐܸܢ ܝܘܼܠܦܵܢܝܼ ܡ̣ܢ ܐܲܠܵܗܵܐ ܝܠܹܗ ܝܲܢ ܡ̣ܢ ܓܵܢܝܼ ܝܘܸܢ ܡܲܠܘܼܦܹܐ. 18”ܗ̇ܘ ܕܡ̣ܢ ܓܵܢܹܗ ܗܲܡܙܸܡ، ܚܸܩܪܵܐ ܩܵܐ ܓܵܢܹܗ ܟܹܐ ܛܵܥܹܐ، ܐܝܼܢܵܐ ܗ̇ܘ ܕܛܵܥܹܐ ܚܸܩܪܵܐ ܕܡ̇ܢ ܕܫܘܼܕܸܪܹܗ ܐܸܠܝܼ، ܗ̇ܘ ܫܲܪܝܼܪܵܐ ܝܠܹܗ، ܘܥܵܘܠܵܐ ܠܲܝܬ ܒܝܼܹܗ. 19”ܠܹܐ ܝܗ݇ܘܵܐ ܡܘܼܫܹܐ ܕܝܘܼܗ݇ܒܸܠ ܠܹܗ ܐܸܠܵܘܟ݂ܘܿܢ ܢܵܡܘܿܣܵܐ؟ ܐܝܼܢܵܐ ܐܘܼܦ ܚܲܕ ܡܸܢܵܘܟ݂ܘܿܢ ܠܹܐ ܝܠܹܗ ܒܸܢܛܵܪܵܐ ܠܢܵܡܘܿܣܵܐ. ܩܵܡܘܿܕܝܼ ܒܸܒܥܵܝܵܐ ܝܬܘܿܢ ܠܸܩܛܵܠܝܼ؟“ 20ܓ̰ܘܼܘܸܒ ܠܹܗ ܟܸܢܫܵܐ ܐܸܠܹܗ، ”ܫܹܐܕܵܐ ܐܝܼܬ ܒܝܼܘܼܟ݂. ܡܵܢܝܼ ܒܵܥܹܐ ܠܸܩܛܵܠܘܼܟ݂؟“ 21ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܚܲܕ ܦܘܼܠܚܵܢܵܐ ܥܒ݂ܝܼܕ ܠܝܼ ܘܟܠܵܘܟ݂ܘܿܢ ܥܲܓ̰ܘܼܒܹܐ ܝܬܘܿܢ. 22”ܡܘܼܫܹܐ ܝܘܼܗ݇ܒܸܠ ܠܹܗ ܐܸܠܵܘܟ݂ܘܿܢ ܓܙܘܼܪܬܵܐ، ܐܵܦܸܢ ܕܠܹܐ ܝܗ݇ܘܵܐ ܡܘܼܫܹܐ ܕܝܘܼܗ݇ܒ݂ܵܐ ܠܹܗ ܐܸܠܵܘܟ݂ܘܿܢ ܐܸܠܵܐ ܒܵܒܵܘܵܬܹ̈ܐ، ܘܒܝܵܘܡܵܐ ܕܫܲܒܬܵܐ ܟܹܐ ܓܵܙܪܝܼܬܘܿܢ ܒܲܪܢܵܫܵܐ.#ܒܪܝܬܐ 17‏:10؛ ܟܗܢ̈ܐ 12‏:3 23”ܐܸܢ ܐ݇ܢܵܫܵܐ ܦܵܐܹܫ ܓܙܝܼܪܵܐ ܒܝܵܘܡܵܐ ܕܫܲܒܬܵܐ ܩܵܐ ܕܠܵܐ ܦܵܐܹܫ ܫܸܪܝܵܐ ܢܵܡܘܿܣܵܐ ܕܡܘܼܫܹܐ، ܩܵܡܘܿܕܝܼ ܒܸܟܪܵܒܵܐ ܝܬܘܿܢ ܡܸܢܝܼ ܕܟܠܵܢܵܐܝܼܬ ܒܘܼܣܸܡ ܠܝܼ ܐܵܗܵܐ ܐ݇ܢܵܫܵܐ ܒܝܵܘܡܵܐ ܕܫܲܒܬܵܐ؟ 24”ܠܵܐ ܗܵܘܹܝܬܘܿܢ ܒܸܕܝܵܢܵܐ ܒܚܙܵܝܬܵܐ ܕܦܵܬܵܐ، ܐܝܼܢܵܐ ܕܘܼܢܘܼܢ ܕܝܵܢܬܵܐ ܫܲܪܝܼܪܬܵܐ.“

ܐܵܗܵܐ ܝܠܹܗ ܡܫܝܼܚܵܐ؟

25ܒܗ̇ܝ ܥܕܵܢܵܐ ܚܲܕ݇ܟܡܵܐ ܐ݇ܢܵܫܹ̈ܐ ܡ̣ܢ ܐܘܿܪܸܫܠܸܡ ܫܘܼܪܹܐ ܠܗܘܿܢ ܠܒܲܩܘܼܪܹܐ، ”ܠܹܐ ܝܠܹܗ ܐܵܗܵܐ ܗ̇ܘ ܕܒܵܥܝܼ ܕܩܵܛܠܝܼ ܠܹܗ؟ 26”ܗܵܐ ܡܲܠܘܼܦܹܐ ܝܠܹܗ ܓܲܠܝܵܐܝܼܬ، ܐܘܼܦ ܚܲܕ ܠܹܐ ܝܠܹܗ ܡܲܟܠܘܼܝܹܐ ܐܸܠܹܗ. ܟܹܐ ܝܵܕܥܝܼ ܓܘܼܪ̈ܵܢܲܢ ܒܫܲܪܝܼܪܘܼܬܵܐ ܕܐܵܗܵܐ ܝܠܹܗ ܡܫܝܼܚܵܐ؟ 27”ܐܵܗܵܐ ܟܹܐ ܝܵܕܥܲܚ ܠܹܗ ܡ̣ܢ ܐܲܝܟܵܐ ܝܠܹܗ، ܐܝܼܢܵܐ ܐܝܼܡܲܢ ܕܡܫܝܼܚܵܐ ܐܵܬܹܐ، ܐܘܼܦ ܚܲܕ ܠܹܐ ܝܵܕܹܥ ܡ̣ܢ ܐܲܝܟܵܐ ܝܠܹܗ.“ 28ܘܟܲܕ ܝܼܫܘܿܥ ܡܲܠܘܼܦܹܐ ܝܗ݇ܘܵܐ ܒܗܲܝܟܠܵܐ، ܡܘܼܩܘܸܚ ܠܹܗ ܘܐ݇ܡܝܼܪܹܗ، ”ܐܸܠܝܼ ܟܹܐ ܝܵܕܥܝܼܬܘܿܢ، ܘܡ̣ܢ ܐܲܝܟܵܐ ܝܘܸܢ ܟܹܐ ܝܵܕܥܝܼܬܘܿܢ. ܐܝܼܢܵܐ ܐܵܢܵܐ ܡ̣ܢ ܓܵܢܝܼ ܠܵܐ ܐ݇ܬܹܐ ܠܝܼ. ܗ̇ܘ ܕܫܘܼܕܸܪܹܗ ܐܸܠܝܼ ܫܲܪܝܼܪܵܐ ܝܠܹܗ، ܗ̇ܘ ܕܐܲܚܬܘܿܢ ܠܹܐ ܝܵܕܥܝܼܬܘܿܢ ܠܹܗ. 29”ܐܝܼܢܵܐ ܐܵܢܵܐ ܟܹܐ ܝܵܕܥܹܢܹܗ، ܣܵܒܵܒ ܐܵܢܵܐ ܡܸܢܹܗ ܝܘܸܢ ܘܗ̇ܘ ܩܲܡ ܫܲܕܸܪܝܼ.“ 30ܘܒܥܹܐ ܠܗܘܿܢ ܠܸܕܒ݂ܵܩܹܗ، ܐܝܼܢܵܐ ܐܘܼܦ ܚܲܕ ܠܵܐ ܕܪܹܐ ܠܹܗ ܥܲܠܘܼܗܝ ܐܝܼܕܵܐ ܣܵܒܵܒ ܗܹܫ ܣܵܥܲܬܹܗ ܠܹܐ ܝܗ݇ܘܵܐ ܐ݇ܬܝܼܬܵܐ. 31ܐܝܼܢܵܐ ܪܵܒܵܐ ܡ̣ܢ ܟܸܢܫܵܐ ܗܘܼܡܸܢܗܘܿܢ ܒܝܼܹܗ ܘܐܵܡܪܝܼ ܗ݇ܘܵܘ، ”ܩܵܡܘܿ ܐܝܼܡܲܢ ܕܐܵܬܹܐ ܡܫܝܼܚܵܐ ܒܸܬ ܥܵܒܹܕ ܢܝܼܫܲܢܩܹ̈ܐ ܒܘܼܫ ܙܵܘܕܵܐ ܡ̣ܢ ܐܵܗܵܐ ܕܒܸܥܒ݂ܵܕܵܐ ܝܠܹܗ؟“ 32ܐܝܼܡܲܢ ܕܫܡܝܼܥ ܠܗܘܿܢ ܦܪ̈ܝܼܫܹܐ ܠܟܸܢܫܹ̈ܐ ܦܲܟ̰ܦܘܼܟ̰ܹܐ ܐܲܢܹܐ ܚܲܒܪܹ̈ܐ ܒܘܼܬ ܕܝܼܹܗ، ܫܘܼܕܸܪܗܘܿܢ ܐܵܢܝܼ ܘܓܘܼܪ̈ܵܢܹܐ ܕܟܵܗܢܹ̈ܐ ܫܘܼܪ̈ܛܹܐ ܕܕܵܒ݂ܩܝܼ ܗ݇ܘܵܘ ܠܹܗ. 33ܐ݇ܡܝܼܪܹܗ ܝܼܫܘܿܥ، ”ܥܲܡܵܘܟ݂ܘܿܢ ܝܼܘܸܢ ܩܵܐ ܚܲܕ ܙܲܒ݂ܢܵܐ ܟܸܪܝܵܐ، ܘܗ̇ܝܓܵܗ ܒܸܬ ܐܵܙܹܠ݇ܢ ܠܟܸܣ ܗ̇ܘ ܕܫܘܼܕܸܪܹܗ ܐܸܠܝܼ. 34”ܒܸܬ ܛܵܥܹܝܬܘܿܢ ܒܵܬ݇ܪܝܼ ܘܠܹܐ ܡܲܫ݇ܟ̰ܚܝܼܬܘܿܢ ܠܝܼ، ܘܐܲܝܟܵܐ ܕܐܵܢܵܐ ܝܘܸܢ، ܐܲܚܬܘܿܢ ܠܹܐ ܡܵܨܹܝܬܘܿܢ ܐܵܬܹܝܬܘܿܢ.“ 35ܐ݇ܡܝܼܪܗܘܿܢ ܝܗܘܼܕܵܝܹ̈ܐ ܚܲܕ ܠܗ̇ܘ ܐ݇ܚܹܪ݇ܢܵܐ، ”ܠܐܲܝܟܵܐ ܒܵܥܹܐ ܐܵܙܹܠ ܐܵܗܵܐ ܕܐܲܚܢܲܢ ܠܹܐ ܚܵܙܲܚ ܠܹܗ؟ ܩܵܡܘܿܕܝܼ ܒܵܥܹܐ ܐܵܙܹܠ ܠܟܸܣ ܒܢܲܝ̈ ܐܘܼܡܬܲܢ ܕܝܼܢܵܐ ܒܘܼܪܒܸܙܹܐ ܓܵܘ ܝܵܘܢܵܝܹ̈ܐ ܘܡܲܠܸܦ ܠܝܵܘܢܵܝܹ̈ܐ؟ 36”ܡܘܿܕܝܼ ܝܠܹܗ ܐܵܗܵܐ ܕܒܹܐܡܵܪܵܐ ܝܠܹܗ، ’ܒܸܬ ܛܵܥܹܝܬܘܿܢ ܒܵܬ݇ܪܝܼ ܘܠܹܐ ܡܲܫ݇ܟ̰ܚܝܼܬܘܿܢ ܠܝܼ، ܘܠܐܲܝܟܵܐ ܕܐܵܢܵܐ ܝܘܸܢ ܐܲܚܬܘܿܢ ܠܹܐ ܡܵܨܹܝܬܘܿܢ ܐܵܬܹܝܬܘܿܢ‘؟“

ܢܲܗܪ̈ܵܘܵܬܹܐ ܕܡ̈ܝܼܵܐ ܕܚܲܝܹ̈ܐ

37ܒܝܵܘܡܵܐ ܐ݇ܚܵܪܵܝܵܐ ܕܥܹܐܕܵܐ، ܝܵܘܡܵܐ ܓܘܼܪܵܐ، ܟܠܹܐ ܠܹܗ ܝܼܫܘܿܥ ܘܗܘܼܡܙܸܡ ܠܹܗ ܒܩܵܠܵܐ ܪܵܡܵܐ ܘܐ݇ܡܝܼܪܹܗ، ”ܡ̇ܢ ܕܨܹܗܝܵܐ ܝܠܹܗ، ܐܵܬܹܐ ܠܟܸܣ ܠܝܼ ܘܫܵܬܹܐ،#ܟܗܢ̈ܐ 23‏:36 38”ܘܟܠ ܡ̇ܢ ܕܗܲܡܸܢ ܒܝܼܝܼ، ܢܲܗܪ̈ܵܘܵܬܹܐ ܕܡ̈ܝܼܵܐ ܚܵܝܹ̈ܐ ܒܸܬ ܗܵܘܝܼ ܒܸܫܦܵܟ݂ܵܐ ܡ̣ܢ ܟܹܪ݇ܣܹܗ، ܕܵܐܟ݂ܝܼ ܕܐ݇ܡܝܼܪܗܘܿܢ ܟܬܵܒܹ̈ܐ.“ 39ܐܵܗܵܐ ܐ݇ܡܝܼܪܹܗ ܒܘܼܬ ܪܘܼܚܵܐ ܕܩܲܒܠܝܼ ܗ݇ܘܵܘ ܐܵܢܝܼ ܕܗܲܡܸܢܝܼ ܗ݇ܘܵܘ ܒܝܼܹܗ. ܗܲܠ ܐܵܗܵܐ ܥܕܵܢܵܐ ܪܘܼܚܵܐ ܠܹܐ ܝܗ݇ܘܵܐ ܦܝܼܫܵܐ ܝܘܼܗ݇ܒ݂ܵܐ ܣܵܒܵܒ ܗܹܫ ܝܼܫܘܿܥ ܠܹܐ ܝܗ݇ܘܵܐ ܦܝܼܫܵܐ ܚܩܝܼܪܵܐ. 40ܪܵܒܵܐ ܡ̣ܢ ܟܸܢܫܵܐ ܐܝܼܡܲܢ ܕܫܡܝܼܥ ܠܗܘܿܢ ܗܹܡܸܙܡܵܢܘܼ̈ܗܝ ܐ݇ܡܝܼܪܗܘܿܢ، ”ܫܲܪܝܼܪܵܐܝܼܬ ܐܵܗܵܐ ܝܠܹܗ ܗ̇ܘ ܢܒ݂ܝܼܵܐ.“ 41ܐ݇ܚܹܪ̈݇ܢܹܐ ܐܵܡܪܝܼ ܗ݇ܘܵܘ، ”ܐܵܗܵܐ ܝܠܹܗ ܡܫܝܼܚܵܐ.“ ܘܐ݇ܚܹܪ̈݇ܢܹܐ ܒܲܩܪܝܼ ܗ݇ܘܵܘ، ”ܩܵܡܘܿ ܟܹܐ ܗܵܘܝܵܐ ܕܡܫܝܼܚܵܐ ܐܵܬܹܐ ܡ̣ܢ ܓܠܝܼܠܵܐ؟ 42”ܠܵܐ ܐ݇ܡܝܼܪܹܗ ܟܬܵܒ݂ܵܐ، ܕܡ̣ܢ ܙܲܪܥܵܐ ܕܕܵܘܝܼܕ ܘܡ̣ܢ ܒܹܝܬܠܚܸܡ ܡܵܬܵܐ، ܐܲܝܟܵܐ ܕܕܵܘܝܼܕ ܥܡܝܼܪܹܗ ܒܸܬ ܐܵܬܹܐ ܡܫܝܼܚܵܐ؟“#ܡܝܟ݂ܐ 5‏:2 43ܗܲܕܟ݂ܵܐ ܗܘܹܐ ܠܹܗ ܓܵܘ ܟܸܢܫܵܐ ܦܘܼܠܵܓ݂ܵܐ ܒܘܼܬ ܕܝܼܹܗ. 44ܚܲܕ݇ܟܡܵܐ ܒܥܹܐ ܠܗܘܿܢ ܕܕܵܒ݂ܩܝܼ ܗ݇ܘܵܘ ܠܹܗ، ܐܝܼܢܵܐ ܐܘܼܦ ܚܲܕ ܠܵܐ ܕܪܹܐ ܠܹܗ ܐܝܼܕܵܐ ܥܲܠܘܼܗܝ.

ܠܵܐ ܗܵܡܲܢܬܵܐ ܕܪܹ̈ܫܵܢܹܐ ܕܝܗܘܼܕܵܝܹ̈ܐ

45ܐܝܼܡܲܢ ܕܕܝܼܪܗܘܿܢ ܫܘܼܪ̈ܛܹܐ ܠܟܸܣ ܓܘܼܪ̈ܵܢܹܐ ܕܟܵܗܢܹ̈ܐ ܘܦܪ̈ܝܼܫܹܐ، ܐ݇ܡܝܼܪܗܘܿܢ ܐܸܠܲܝܗܝ ܟܵܗܢܹ̈ܐ، ”ܩܵܡܘܿܕܝܼ ܠܵܐ ܡܘܼܐܬܹܐ ܠܵܘܟ݂ܘܿܢ ܐܸܠܹܗ؟“ 46ܓ̰ܘܼܘܸܒ ܠܗܘܿܢ ܫܘܼܪ̈ܛܹܐ، ”ܐܘܼܦ ܚܲܕ ܐ݇ܢܵܫܵܐ ܠܹܐ ܝܠܹܗ ܗܘܼܡܙܸܡܵܐ ܡܐܲܝܟ݂ ܕܝܼܠܹܗ ܐܵܗܵܐ ܐ݇ܢܵܫܵܐ ܗܲܡܙܘܼܡܹܐ.“ 47ܐ݇ܡܝܼܪܗܘܿܢ ܐܸܠܲܝܗܝ ܦܪ̈ܝܼܫܹܐ، ”ܗܵܐ ܐܘܼܦ ܐܸܠܵܘܟ݂ܘܿܢ ܡܘܼܚܠܸܛ ܠܹܗ؟ 48”ܩܵܡܘܿ ܐ݇ܢܵܫܵܐ ܡ̣ܢ ܓܘܼܪ̈ܵܢܹܐ ܝܲܢ ܡ̣ܢ ܦܪ̈ܝܼܫܹܐ ܗܘܼܡܸܢܹܗ ܒܝܼܹܗ؟ 49”ܐܝܼܢܵܐ ܠܝܼܛܵܐ ܝܠܹܗ ܐܵܗܵܐ ܟܸܢܫܵܐ ܕܠܹܐ ܝܵܕܹܥ ܢܵܡܘܿܣܵܐ.“ 50ܐ݇ܡܝܼܪܹܗ ܐܸܠܲܝܗܝ ܢܝܼܩܵܕܹܡܘܿܣ، ܚܲܕ ܡܸܢܲܝܗܝ، ܗ̇ܘ ܕܐ݇ܬܹܐ ܠܹܗ ܠܟܸܣ ܝܼܫܘܿܥ ܩܵܕ݇ܡܵܝܬܵܐ، 51”ܩܵܡܘܿ ܢܵܡܘܿܣܲܢ ܟܹܐ ܕܵܐܹܢ ܠܚܲܕ ܐ݇ܢܵܫܵܐ ܡܩܵܕ݇ܡ ܕܫܵܡܥܲܚ ܠܹܗ ܘܚܵܙܲܚ ܡܘܿܕܝܼ ܝܠܹܗ ܥܒ݂ܝܼܕܵܐ؟“ 52ܓ̰ܘܼܘܸܒ ܠܗܘܿܢ ܐܸܠܹܗ ܘܐ݇ܡܝܼܪܗܘܿܢ، ”ܩܵܡܘܿ ܐܘܼܦ ܐܲܢ݇ܬ ܡ̣ܢ ܓܠܝܼܠܵܐ ܝܘܸܬ؟ ܨܲܚܨܝܼ ܘܚܙܝܼ، ܕܢܒ݂ܝܼܵܐ ܡ̣ܢ ܓܠܝܼܠܵܐ ܠܹܐ ܦܵܠܹܛ.“ 53ܗ̇ܝܓܵܗ ܟܠ ܚܲܕ ܐ݇ܙܝܼܠ ܠܹܗ ܠܒܲܝܬܹܗ.

Currently Selected:

ܝܘܚܢܢ 7: ABTAB

Highlight

Copy