ܠܘܩܐ 15
15
ܡܲܬܠܵܐ ܕܥܸܪܒܵܐ ܛܠܝܼܩܵܐ
ܡܬܝ 18:12‐14
1ܐ݇ܬܹܐ ܠܗܘܿܢ ܠܟܸܣ ܝܼܫܘܿܥ ܡܵܟ݂ܣܹ̈ܐ ܘܚܲܛܵܝܹ̈ܐ ܕܫܵܡܥܝܼ ܗ݇ܘܵܘ ܠܹܗ. 2ܐܝܼܢܵܐ ܣܵܦܪܹ̈ܐ ܘܦܪ̈ܝܼܫܹܐ ܛܘܼܪܛܸܡ ܠܗܘܿܢ ܘܐ݇ܡܝܼܪܗܘܿܢ، ”ܐܵܗܵܐ ܐ݇ܢܵܫܵܐ ܩܲܒܘܼܠܹܐ ܝܠܹܗ ܚܲܛܵܝܹ̈ܐ ܘܒܹܐܟ݂ܵܠܵܐ ܝܠܹܗ ܥܲܡܲܝܗܝ.“ 3ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ ܐܵܗܵܐ ܡܲܬܠܵܐ: 4”ܐܲܝܢܝܼ ܝܠܹܗ ܡܸܢܵܘܟ݂ܘܿܢ ܕܗܵܘܹܐ ܠܹܗ ܐܸܡܵܐܐ ܥܸܪ̈ܒܹܐ، ܐܸܢ ܛܵܠܹܩ ܚܲܕ ܡܸܢܲܝܗܝ ܠܹܐ ܫܵܒܹܩ ܬܸܫܥܝܼ ܘܬܸܫܥܵܐ ܓܵܘ ܒܲܪܝܼܵܐ ܘܐܵܙܹܠ ܛܵܥܹܐ ܒܵܬ݇ܪ ܕܗ̇ܘ ܕܝܼܠܹܗ ܛܠܝܼܩܵܐ ܗܲܠ ܕܡܲܫ݇ܟ̰ܸܚ ܠܹܗ؟ 5”ܘܐܝܼܡܲܢ ܕܡܲܫ݇ܟ̰ܸܚ ܠܹܗ، ܟܹܐ ܚܵܕܹܐ ܘܟܹܐ ܫܵܩܹܠ ܠܹܗ ܥܲܠ ܪ̈ܘܼܦ̮ܫܵܢܘܼܗܝ. 6”ܟܹܐ ܐܵܬܹܐ ܠܒܲܝܬܹܗ ܘܩܵܪܹܐ ܠܚܲܒ݂ܪ̈ܵܘܵܬܹܗ ܘܠܫܒ݂ܵܒ݂ܘܼ̈ܗܝ، ܘܐܵܡܹܪ ܐܸܠܲܝܗܝ، ’ܚܕܹܝܡܘܼܢ ܥܲܡܝܼ ܕܡܘܼܫ݇ܟ̰ܸܚ ܠܝܼ ܥܸܪܒܝܼ ܕܝܼܗ݇ܘܵܐ ܛܠܝܼܩܵܐ.‘ 7”ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܗܲܕܟ݂ܵܐ ܒܸܬ ܗܵܘܝܵܐ ܚܲܕܘܼܬܵܐ ܒܘܼܫ ܙܵܘܕܵܐ ܓܵܘ ܫܡܲܝܵܐ ܥܲܠ ܚܲܕ ܚܲܛܵܝܵܐ ܕܬܲܘܸܒ ܡ̣ܢ ܥܲܠ ܬܸܫܥܝܼ ܘܬܸܫܥܵܐ ܙܲܕܝܼܩܹ̈ܐ ܕܠܹܐ ܝܢܵܐ ܣܢܝܼܩܹܐ ܠܬܵܘܲܒܬܵܐ.
ܡܲܬܠܵܐ ܕܙܘܼܙܵܐ ܛܠܝܼܩܵܐ
8”ܝܲܢ ܐܲܝܢܝܼ ܒܲܟ݂ܬܵܐ ܕܗܵܘܹܐ ܠܵܗ̇ ܥܸܣܪܵܐ ܙܘܼܙܹ̈ܐ ܘܛܲܠܩܵܐ ܚܲܕ ܡܸܢܲܝܗܝ، ܠܹܐ ܡܲܠܗܝܼܵܐ ܫܪܵܓ݂݇ܝܵܐ ܘܟܵܢܫܵܐ ܒܲܝܬܵܐ ܘܛܵܥܝܵܐ ܒܵܬ݇ܪܹܗ ܒܚܦܝܼܛܘܼܬܵܐ ܗܲܠ ܕܡܲܫ݇ܟ̰ܚܵܐ ܠܹܗ؟ 9”ܘܐܝܼܡܲܢ ܕܡܲܫ݇ܟ̰ܚܵܐ ܠܹܗ، ܟܹܐ ܩܵܪܝܵܐ ܠܚܲܒܲܪ̈ܝܵܬܘܼܗ̇ ܘܠܫܒ݂ܵܒ݂ܝܵܬܘܼ̈ܗ̇ ܘܐܵܡܪܵܐ ܐܸܠܲܝܗܝ، ’ܚܕܹܝܡܘܼܢ ܥܲܡܝܼ ܣܵܒܵܒ ܡܘܼܫ݇ܟ̰ܸܚ ܠܝܼ ܙܘܼܙܝܼ ܕܝܼܗ݇ܘܵܐ ܛܠܝܼܩܵܐ.‘ 10”ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܗܲܕܟ݂ܵܐ ܒܸܬ ܗܵܘܝܵܐ ܚܲܕܘܼܬܵܐ ܩܵܕ݇ܡ ܡܲܠܲܐܟܹ̈ܐ ܕܐܲܠܵܗܵܐ ܥܲܠ ܚܲܕ ܚܲܛܵܝܵܐ ܕܬܲܘܸܒ.“
ܡܲܬܠܵܐ ܕܒܪܘܿܢܵܐ ܐܵܣܘܿܛܵܐ
11ܡܸܢܕܪܸܫ ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܚܲܕ ܐ݇ܢܵܫܵܐ ܐܝܼܬ ܗ݇ܘܵܐ ܠܹܗ ܬܪܹܝ ܒܢܘܿܢܹ̈ܐ. 12”ܐ݇ܡܝܼܪܹܗ ܒܪܘܿܢܵܐ ܙܥܘܿܪܵܐ ܠܒܵܒܘܼܗܝ، ’ܒܵܒܝܼ، ܗܲܒ݂݇ܠ ܠܝܼ ܣܵܗܡܵܐ ܕܡܵܛܹܐ ܠܝܼ ܡ̣ܢ ܡܸܢܕܝܼ.‘ ܘܦܘܼܠܸܥ ܠܹܗ ܒܹܝܠܲܝܗܝ ܡܸܢܕܝܼܹܗ. 13”ܡ̣ܢ ܒܵܬ݇ܪ ܚܲܕ݇ܟܡܵܐ ܝܵܘܡܵܢܹ̈ܐ ܓ̰ܘܼܡܸܥ ܠܹܗ ܗ̇ܘ ܒܪܘܿܢܵܐ ܙܥܘܿܪܵܐ ܟܠ ܡܸܢܕܝܼ ܕܡܛܹܐ ܠܹܗ ܐܸܠܹܗ ܘܐ݇ܙܝܼܠ ܠܹܗ ܠܐܲܬܪܵܐ ܪܸܚܩܵܐ، ܘܬܵܡܵܐ ܒܘܼܪܒܸܙ ܠܹܗ ܡܸܢܕܝܼܹܗ ܟܲܕ ܒܸܚܵܝܵܐ ܒܫܪܝܼܚܘܼܬܵܐ. 14”ܡ̣ܢ ܒܵܬ݇ܪ ܕܚܘܼܪܸܓ̰ ܠܹܗ ܟܠ ܡܸܢܕܝܼ ܕܐܝܼܬ ܗ݇ܘܵܐ ܠܹܗ، ܗܘܹܐ ܠܹܗ ܟܸܦܢܵܐ ܓܘܼܪܵܐ ܓܵܘ ܗ̇ܘ ܐܲܬܪܵܐ، ܘܗ̇ܘ ܫܘܼܪܹܐ ܠܹܗ ܠܸܣܢܵܩܵܐ. 15”ܐ݇ܙܝܼܠ ܠܹܗ ܘܙܘܼܘܸܓ ܠܹܗ ܥܲܡ ܚܲܕ ܡ̣ܢ ܒܢܲܝ̈ ܗ̇ܘ ܐܲܬܪܵܐ، ܘܗ̇ܘ ܫܘܼܕܸܪܹܗ ܐܸܠܹܗ ܠܚܲܩܠܹܗ ܕܡܲܪܥܹܐ ܚܙܘܼܪܹ̈ܐ. 16”ܘܟܹܐ ܫܲܗܘܸܬ ܗ݇ܘܵܐ ܠܸܡܠܵܝܵܐ ܟܹܪ݇ܣܹܗ ܡ̣ܢ ܐܵܢܝܼ ܚܲܪ̈ܘܼܒܹܐ ܕܐܵܟ݂ܠܝܼ ܗ݇ܘܵܘ ܚܙܘܼܪܹ̈ܐ. ܘܐ݇ܢܵܫܵܐ ܠܹܐ ܝܲܗ݇ܒܸܠ ܗ݇ܘܵܐ ܠܹܗ ܡܸܢܕܝܼ ܠܹܐܟ݂ܵܠܵܐ. 17”ܐܝܼܡܲܢ ܕܪܥܝܼܫ ܠܹܗ ܠܓܵܢܹܗ، ܐ݇ܡܝܼܪܹܗ، ’ܟܡܵܐ ܦܲܠܵܚܹ̈ܐ ܕܒ݂ܝܼܩܹܐ ܒܗܵܩܵܐ ܐܝܼܬ ܓܵܘ ܒܲܝܬܵܐ ܕܒܵܒܝܼ ܕܟܹܐ ܙܵܐܹܕ ܡ̣ܢ ܩܵܕ݇ܡܲܝܗܝ ܠܲܚܡܵܐ، ܘܐܵܢܵܐ ܠܐܲܟ݂ܵܐ ܒܸܡܝܵܬܵܐ ܝܘܸܢ ܡ̣ܢ ܟܸܦܢܝܼ. 18”’ܒܸܬ ܩܵܝܡܹܢ ܘܐܵܙܹܠ݇ܢ ܠܟܸܣ ܒܵܒܝܼ، ܘܒܸܬ ܐܵܡܪܹܢ ܐܸܠܹܗ، ܒܵܒܝܼ، ܚܛܹܐ ܠܝܼ ܩܵܕ݇ܡ ܫܡܲܝܵܐ ܘܩܵܕ݇ܡܘܼܟ݂، 19”’ܘܡ̣ܢ ܐܵܕܝܼܵܐ ܠܹܐ ܝܘܸܢ ܚܫܝܼܚܵܐ ܕܦܵܝܫܹܢ ܩܸܪܝܵܐ ܒܪܘܿܢܘܼܟ݂. ܥܒ݂ܘܿܕ ܠܝܼ ܐܲܝܟ݂ ܚܲܕ ܡ̣ܢ ܦܲܠܵܚܘܼ̈ܟ݂ ܕܒ݂ܝܼܩܹܐ ܒܗܵܩܵܐ.‘ 20”ܩܝܼܡ ܠܹܗ ܘܐ݇ܬܹܐ ܠܹܗ ܠܟܸܣ ܒܵܒܘܼܗܝ، ܘܗܹܫ ܗ̇ܘ ܪܸܚܩܵܐ ܝܗ݇ܘܵܐ، ܚܙܹܐ ܠܹܗ ܐܸܠܹܗ ܒܵܒܘܼܗܝ ܘܪܘܼܚܸܡ ܠܹܗ ܥܲܠܘܼܗܝ، ܘܪܚܝܼܛ ܠܹܗ ܘܚܦܝܼܩ ܠܹܗ ܐܸܠܹܗ ܘܢܫܝܼܩ ܠܹܗ. 21”ܘܐ݇ܡܝܼܪܹܗ ܐܸܠܹܗ ܒܪܘܿܢܹܗ، ’ܒܵܒܝܼ، ܚܛܹܐ ܠܝܼ ܩܵܕ݇ܡ ܫܡܲܝܵܐ ܘܩܵܕ݇ܡܘܼܟ݂، ܡ̣ܢ ܐܵܕܝܼܵܐ ܠܹܐ ܚܵܫܚܹܢ ܕܦܵܝܫܹܢ ܩܸܪܝܵܐ ܒܪܘܿܢܘܼܟ݂.‘ 22”ܐܝܼܢܵܐ ܐ݇ܡܝܼܪܹܗ ܒܵܒܘܼܗܝ ܠܪܹ̈ܓܵܘܵܬܹܗ، ’ܒܓ̰ܲܠܕܘܼܬܵܐ ܦܲܠܛܘܼܢ ܓ̰ܘܼܒܵܐ ܪܹܫܵܝܬܵܐ ܘܡܲܠܒܸܫܘܼܢ ܠܵܗ̇ ܥܲܠܘܼܗܝ، ܘܡܚܹܝܡܘܼܢ ܥܸܙܲܩܬܵܐ ܒܐܝܼܕܹܗ، ܘܡܲܠܒܸܫܘܼܢ ܨܵܘܠܹ̈ܐ ܒܐܲܩܠܵܬܹ̈ܗ، 23”’ܘܡܲܝܬܹܝܡܘܼܢ ܘܦܪܘܿܡܘܼܢ ܬܵܘܪܵܐ ܛܪܝܼܨܵܐ ܕܐܵܟ݂ܠܲܚ ܘܥܵܒ݂ܕܲܚ ܒܘܼܣܵܡܵܐ، 24”’ܣܵܒܵܒ ܐܵܗܵܐ ܒܪܘܿܢܝܼ ܡܝܼܬܵܐ ܝܗ݇ܘܵܐ ܘܚܝܹܐ ܠܹܗ، ܛܠܝܼܩܵܐ ܝܗ݇ܘܵܐ ܘܦܝܼܫ ܠܹܗ ܡܫ݇ܟ̰ܝܼܚܵܐ.‘ ܘܫܘܼܪܹܐ ܠܗܘܿܢ ܠܸܥܒ݂ܵܕܵܐ ܒܘܼܣܵܡܵܐ.
25”ܒܪܘܿܢܹܗ ܓܘܼܪܵܐ ܓܵܘ ܚܲܩܠܵܐ ܝܗ݇ܘܵܐ، ܘܐܝܼܡܲܢ ܕܐ݇ܬܹܐ ܠܹܗ ܘܩܘܼܪܒܸܢܹܗ ܠܒܲܝܬܵܐ، ܫܡܝܼܥ ܠܹܗ ܩܵܠܵܐ ܕܙܡܵܪܵܐ ܘܪܸܩܕܵܐ. 26”ܩܪܹܐ ܠܹܗ ܚܲܕ ܡ̣ܢ ܪܹ̈ܓܵܘܵܬܹܐ ܘܒܘܼܩܸܪܹܗ ܡܸܢܹܗ، ’ܡܘܿܕܝܼ ܝܠܹܗ ܐܵܗܵܐ؟‘ 27”ܓ̰ܘܼܘܸܒ ܠܹܗ ܐܸܠܹܗ، ’ܐܲܚܘܿܢܘܼܟ݂ ܐ݇ܬܹܐ ܠܹܗ، ܘܒܵܒܘܼܟ݂ ܦܪܝܼܡ ܠܹܗ ܬܵܘܪܵܐ ܛܪܝܼܨܵܐ، ܣܵܒܵܒ ܩܘܼܒܸܠ ܠܹܗ ܐܸܠܹܗ ܚܵܝܵܐ.‘ 28”ܟܪܝܼܒ ܠܹܗ ܒܪܘܿܢܵܐ ܓܘܼܪܵܐ ܘܠܹܐ ܒܵܥܹܐ ܗ݇ܘܵܐ ܠܸܥܒ݂ܵܪܵܐ. ܦܠܝܼܛ ܠܹܗ ܒܵܒܘܼܗܝ ܘܦܘܼܪܦܸܠ ܠܹܗ ܒܝܼܹܗ. 29”ܐܝܼܢܵܐ ܗ̇ܘ ܓ̰ܘܼܘܸܒ ܠܹܗ ܘܐ݇ܡܝܼܪܹܗ ܠܒܵܒܘܼܗܝ، ’ܐܲܢܹܐ ܟܡܵܐ ܫܸܢܹ̈ܐ ܒܸܦܠܵܚܵܐ ܝܘܸܢ ܐܸܠܘܼܟ݂ ܐܲܝܟ݂ ܚܲܕ ܥܲܒ݂ܕܵܐ، ܘܗܸܟ̃ ܠܹܐ ܝܘܸܢ ܫܡܝܼܛܵܐ ܦܘܼܩܕܵܢܘܼܟ݂، ܐܝܼܢܵܐ ܐܘܼܦ ܚܲܕ ܓܸܕܝܵܐ ܠܹܐ ܝܘܸܬ ܝܘܼܗ݇ܒ݂ܵܐ ܐܸܠܝܼ ܕܡܲܒܣܸܡܸܢ ܥܲܡ ܚܲܒ݂ܪ̈ܵܘܵܬܝܼ. 30”’ܐܝܼܢܵܐ ܐܵܗܵܐ ܒܪܘܿܢܘܼܟ݂ ܕܒܘܼܪܒܸܙ ܠܹܗ ܡܸܢܕܝܼܘܼܟ݂ ܥܲܡ ܙܵܢܝܵܬܹ̈ܐ، ܐܝܼܡܲܢ ܕܐ݇ܬܹܐ ܠܹܗ ܦܪܝܼܡ ܠܘܼܟ݂ ܐܸܠܹܗ ܬܵܘܪܵܐ ܛܪܝܼܨܵܐ.‘ 31”ܐ݇ܡܝܼܪܹܗ ܐܸܠܹܗ ܒܵܒܘܼܗܝ، ’ܒܪܘܿܢܝܼ، ܐܲܢ݇ܬ ܒܟܠ ܥܕܵܢܵܐ ܥܲܡܝܼ ܝܘܸܬ، ܘܟܠ ܡܸܢܕܝܼ ܕܐܝܼܬ ܠܝܼ ܕܝܼܘܼܟ݂ ܝܼܠܹܗ. 32”’ܐܝܼܢܵܐ ܘܵܠܹܐ ܝܗ݇ܘܵܐ ܐܸܠܲܢ ܠܸܥܒ݂ܵܕܵܐ ܒܘܼܣܵܡܵܐ ܘܠܸܚܕܵܝܵܐ، ܣܵܒܵܒ ܐܵܗܵܐ ܐܲܚܘܿܢܘܼܟ݂ ܡܝܼܬܵܐ ܝܗ݇ܘܵܐ ܘܚܝܹܐ ܠܹܗ، ܛܠܝܼܩܵܐ ܝܗ݇ܘܵܐ ܘܦܝܼܫ ܠܹܗ ܡܫ݇ܟ̰ܝܼܚܵܐ.‘“
Currently Selected:
ܠܘܩܐ 15: ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
