ܠܘܩܐ 2

ܡܵܘܠܵܕܵܐ ܕܝܼܫܘܿܥ ܡܫܝܼܚܵܐ

ܡܬܝ 1‏:18‏‐25

1ܒܐܵܢܝܼ ܝܵܘܡܵܢܹ̈ܐ ܦܠܝܼܛ ܠܹܗ ܦܘܼܩܕܵܢܵܐ ܡ̣ܢ ܐܵܓ݂ܘܼܣܛܘܿܣ ܩܹܣܲܪ ܕܦܵܝܫܝܼ ܡܘܼܟܬܸܒܹܐ ܟܠܲܝܗܝ ܐ݇ܢܵܫܹ̈ܐ ܕܡܲܠܟܘܼܬܹܗ. 2ܐܵܗܵܐ ܡܲܟܬܲܒ݂ܬܵܐ ܩܵܕ݇ܡܵܝܬܵܐ ܗܘܹܐ ܠܵܗ̇ ܒܥܕܵܢܵܐ ܕܩܸܘܪܝܼܢܘܿܣ ܝܼܗ݇ܘܵܐ ܫܲܠܝܼܛܵܐ ܒܣܘܼܪܝܼܵܐ. 3ܘܐ݇ܙܝܼܠ ܠܹܗ ܟܠ ܐ݇ܢܵܫܵܐ ܠܡܕܝܼܢ݇ܬܵܐ ܕܓܵܢܹܗ ܕܡܲܟܬܸܒ݂ ܗ݇ܘܵܐ.

4ܘܐ݇ܣܝܼܩ ܠܹܗ ܐܘܼܦ ܝܵܘܣܸܦ ܡ̣ܢ ܢܵܨܪܲܬ، ܡܕܝܼܢ݇ܬܵܐ ܕܓܠܝܼܠܵܐ، ܠܝܼܗܘܼܕ، ܠܡܕܝܼܢ݇ܬܵܐ ܕܕܵܘܝܼܕ، ܕܦܝܵܫܵܐ ܝܠܵܗ̇ ܩܪܝܼܬܵܐ ܒܹܝܬܠܚܸܡ، ܣܵܒܵܒ ܡ̣ܢ ܒܲܝܬܵܐ ܘܫܲܪܒܬܵܐ ܕܕܵܘܝܼܕ ܝܼܗ݇ܘܵܐ. 5ܐ݇ܙܝܼܠ ܠܹܗ ܕܡܲܟܬܸܒ݂ ܗ݇ܘܵܐ ܬܵܡܵܐ ܥܲܡ ܡܲܪܝܲܡ ܛܠܝܼܒܬܹܗ ܟܲܕ ܗ̇ܝ ܒܛܝܼܢܬܵܐ. 6ܘܗܘܹܐ ܠܵܗ̇ ܟܲܕ ܐܵܢܝܼ ܬܵܡܵܐ ܝܗ݇ܘܵܘ ܡܛܹܐ ܠܗܘܿܢ ܝܵܘܡܵܢܹ̈ܐ ܕܗܲܨܠܵܐ ܗ݇ܘܵܐ. 7ܘܝ݇ܠܝܼܕ ܠܵܗ̇ ܒܪܘܿܢܘܼܗ̇ ܒܘܼܟ݂ܪܵܐ، ܘܟܘܼܪܡܸܟ݂ ܠܵܗ̇ ܐܸܠܹܗ ܒܒܲܢܕܹ̈ܐ، ܘܡܘܼܬܸܒ݂ ܠܵܗ̇ ܒܐܘܼܪܹܐ، ܣܵܒܵܒ ܠܲܝܬ ܗ݇ܘܵܘ ܠܗܘܿܢ ܕܘܼܟܵܐ ܓܵܘ ܡܲܫܪܝܵܐ.

ܣܓ݂ܵܕܬܵܐ ܕܪ̈ܵܥܝܹܐ

8ܘܐܝܼܬ ܗ݇ܘܵܘ ܪ̈ܵܥܝܹܐ ܒܗ̇ܝ ܕܘܼܟܵܐ ܫܸܪܝܹܐ ܒܚܲܩܠܵܐ، ܒܸܢܛܵܪܵܐ ܒܲܕܠܹ̈ܐ ܕܠܲܝܠܹܐ ܥܲܠ ܦܸܣܩܲܝܗܝ. 9ܘܗܵܐ ܡܲܠܲܐܟ݂ܵܐ ܕܡܵܪܝܵܐ ܐ݇ܬܹܐ ܠܹܗ ܠܟܸܣ ܠܲܝܗܝ، ܘܬܸܫܒܘܿܚܬܵܐ ܕܡܵܪܝܵܐ ܒܘܼܗܪܸܢܵܗ̇ ܠܚܵܕܸܪ̈ܘܵܢܲܝܗܝ، ܘܙܕܝܼܥ ܠܗܘܿܢ ܙܕܘܼܥܬܵܐ ܓܘܼܪܬܵܐ. 10ܘܐ݇ܡܝܼܪܹܗ ܐܸܠܲܝܗܝ ܡܲܠܲܐܟ݂ܵܐ، ”ܠܵܐ ܙܵܕܥܝܼܬܘܿܢ، ܣܵܒܵܒ ܗܵܐ ܡܲܫܚܘܼܕܹܐ ܝܘܸܢ ܐܸܠܵܘܟ݂ܘܿܢ ܚܲܕܘܼܬܵܐ ܓܘܼܪܬܵܐ ܕܒܸܬ ܗܵܘܝܵܐ ܠܟܠܹܗ ܥܵܠܡܵܐ. 11”ܦܝܼܫ ܠܹܗ ܝ݇ܠܝܼܕܵܐ ܐܸܠܵܘܟ݂ܘܿܢ ܐܸܕܝܘܿܡ ܝܵܘܡܵܐ ܓܵܘ ܡܕܝܼܢ݇ܬܵܐ ܕܕܵܘܝܼܕ، ܦܵܪܘܿܩܵܐ، ܗ̇ܘ ܕܝܼܠܹܗ ܡܫܝܼܚܵܐ ܡܵܪܝܵܐ. 12”ܘܐܵܗܵܐ ܝܠܹܗ ܢܝܼܫܲܢܩܵܐ ܐܸܠܵܘܟ݂ܘܿܢ: ܒܸܬ ܡܲܫ݇ܟ̰ܚܝܼܬܘܿܢ ܝܵܠܵܕ݇ܐ ܟܘܼܪܡܸܟ݂ܵܐ ܒܒܲܢܕܹ̈ܐ، ܘܡܘܼܬܒ݂ܵܐ ܒܐܘܼܪܹܐ.“

13ܘܡܸܢܫܸܠܬܵܢܹܐ ܦܝܼܫ ܠܗܘܿܢ ܚܸܙܝܹܐ ܥܲܡ ܡܲܠܲܐܟ݂ܵܐ ܚܲܝܠܵܘܵܬܹ̈ܐ ܕܫܡܲܝܵܐ ܪܵܒܵܐ، ܫܲܒܘܼܚܹܐ ܠܐܲܠܵܗܵܐ ܘܒܹܐܡܵܪܵܐ، 14”ܬܸܫܒܘܿܚܬܵܐ ܠܐܲܠܵܗܵܐ ܒܲܡܪ̈ܵܘܡܹܐ، ܘܥܲܠ ܐܲܪܥܵܐ ܫܠܵܡܵܐ ܘܣܲܒ݂ܪܵܐ ܛܵܒ݂ܵܐ ܠܒܢܲܝ̈ܢܵܫܵܐ.“

15ܗܘܹܐ ܠܵܗ̇ ܟܲܕ ܐ݇ܙܝܼܠ ܠܗܘܿܢ ܡ̣ܢ ܠܟܸܣ ܠܲܝܗܝ ܡܲܠܲܐܟܹ̈ܐ ܠܫܡܲܝܵܐ، ܗܘܼܡܙܸܡ ܠܗܘܿܢ ܪ̈ܵܥܝܹܐ ܚܲܕ ܥܲܡ ܕܗ̇ܘ ܐ݇ܚܹܪ݇ܢܵܐ، ܘܐ݇ܡܝܼܪܗܘܿܢ، ”ܐܵܙܲܠ݇ܚ ܗܲܠ ܒܹܝܬܠܚܸܡ، ܘܚܵܙܲܚ ܠܐܵܗܵܐ ܡܸܢܕܝܼ ܕܗܘܹܐ ܠܹܗ، ܐܲܝܟ݂ ܕܡܵܪܝܵܐ ܩܵܕ݇ܡ ܡܲܕܸܥ ܠܲܢ.“ 16ܘܐ݇ܬܹܐ ܠܗܘܿܢ ܒܓ̰ܲܠܕܘܼܬܵܐ ܘܚܙܹܐ ܠܗܘܿܢ ܠܡܲܪܝܲܡ ܘܠܝܵܘܣܸܦ، ܘܠܝܵܠܵܕ݇ܐ ܡܘܼܬܒ݂ܵܐ ܒܐܘܼܪܹܐ. 17ܘܐܝܼܡܲܢ ܕܚܙܹܐ ܠܗܘܿܢ، ܡܘܼܕܸܥ ܠܗܘܿܢ ܡܸܢܕܝܼ ܕܦܝܼܫ ܠܹܗ ܗܘܼܡܙܸܡܵܐ ܐܸܠܲܝܗܝ ܒܘܼܬ ܐܵܗܵܐ ܝܵܠܵܕ݇ܐ. 18ܘܟܠܲܝܗܝ ܐܵܢܝܼ ܕܫܡܝܼܥ ܠܗܘܿܢ ܥܘܼܓ̰ܸܒ ܠܗܘܿܢ ܒܘܼܬ ܡܸܢܕܝܼܵܢܹ̈ܐ ܕܦܝܼܫ ܠܗܘܿܢ ܐ݇ܡܝܼܪܹܐ ܐܸܠܲܝܗܝ ܡ̣ܢ ܪ̈ܵܥܝܹܐ. 19ܐܝܼܢܵܐ ܡܲܪܝܲܡ ܢܵܛܪܵܐ ܗ݇ܘܵܐ ܟܠܲܝܗܝ ܐܲܢܹܐ ܗܹܡܸܙܡܵܢܹ̈ܐ، ܘܬܲܚܡܸܢܵܐ ܗ݇ܘܵܐ ܒܘܼܬ ܕܝܼܲܝܗܝ ܒܠܸܒܘܼܗ̇. 20ܕܝܼܪܗܘܿܢ ܐܵܢܝܼ ܪ̈ܵܥܝܹܐ ܟܲܕ ܫܲܒܘܼܚܹܐ ܘܡܲܐܣܘܼܩܹܐ ܫܘܼܒ݂ܚܹ̈ܐ ܠܐܲܠܵܗܵܐ ܒܘܼܬ ܟܠ ܡܸܢܕܝܼ ܕܚܙܹܐ ܠܗܘܿܢ ܘܕܫܡܝܼܥ ܠܗܘܿܢ، ܕܵܐܟ݂ܝܼ ܕܦܝܼܫ ܠܹܗ ܐ݇ܡܝܼܪܵܐ ܐܸܠܲܝܗܝ ܒܝܲܕ ܡܲܠܲܐܟ݂ܵܐ.

ܝܼܫܘܿܥ ܡܫܝܼܚܵܐ ܦܝܵܫܵܐ ܓܙܝܼܪܵܐ

21ܘܐܝܼܡܲܢ ܕܬܘܼܡܸܡ ܠܗܘܿܢ ܬܡܵܢܝܵܐ ܝܵܘܡܵܢܹ̈ܐ ܕܦܵܐܹܫ ܓܙܝܼܪܵܐ ܝܵܠܵܕ݇ܐ، ܩܪܹܐ ܠܗܘܿܢ ܫܸܡܹܗ ܝܼܫܘܿܥ، ܕܵܐܟ݂ܝܼ ܕܦܝܼܫܵܐ ܝܗ݇ܘܵܐ ܩܸܪܝܵܐ ܒܝܲܕ ܡܲܠܲܐܟ݂ܵܐ ܡ̣ܢ ܩܵܕ݇ܡ ܕܦܵܐܹܫ ܗ݇ܘܵܐ ܒܛܝܼܢܵܐ ܒܟܹܪ݇ܣܵܐ. 22ܟܲܕ ܬܘܼܡܸܡ ܠܗܘܿܢ ܝܵܘܡܵܢܹ̈ܐ ܕܕܲܟ݂ܵܝܬܲܝܗܝ ܐܲܝܟ݂ ܢܵܡܘܿܣܵܐ ܕܡܘܼܫܹܐ، ܡܘܼܐܣܸܩ ܠܗܘܿܢ ܐܸܠܹܗ ܠܐܘܿܪܸܫܠܸܡ ܕܡܲܩܪܸܒ݂ܝܼ ܠܹܗ ܩܵܕ݇ܡ ܡܵܪܝܵܐ.#ܟܗܢ̈ܐ 12‏:3 23ܐܲܝܟ݂ ܕܝܼܠܹܗ ܟܬܝܼܒ݂ܵܐ ܒܢܵܡܘܿܣܵܐ ܕܡܵܪܝܵܐ:

ܟܠ ܐܘܼܪܙܵܐ ܒܸܪܝܵܐ ܩܵܕ݇ܡܵܝܵܐ، ܩܲܕܝܼܫܵܐ ܕܡܵܪܝܵܐ ܒܸܬ ܦܵܐܹܫ ܩܸܪܝܵܐ.#ܡܦܩܢܐ 13‏:2، 12 24ܘܗܲܕܟ݂ܵܐ ܡܘܼܩܪܸܒ݂ ܠܗܘܿܢ ܕܸܒ݂ܚܵܐ، ܕܵܐܟ݂ܝܼ ܕܝܼܠܹܗ ܐ݇ܡܝܼܪܵܐ ܒܢܵܡܘܿܣܵܐ ܕܡܵܪܝܵܐ:

ܚܲܕ ܙܵܘܓܵܐ ܕܓܘܼܪ̈ܓܘܼܡܹܐ، ܝܲܢ ܬܪܹܝ ܙܲܥܝܹ̈ܐ ܕܝܵܘܢܵܐ.#ܟܗܢ̈ܐ 12‏:8

ܢܲܒܵܝܬܵܐ ܕܫܸܡܥܘܿܢ

25ܐܝܼܬ ܗ݇ܘܵܐ ܚܲܕ ܐ݇ܢܵܫܵܐ ܓܵܘ ܐܘܿܪܸܫܠܸܡ، ܫܸܡܹܗ ܫܸܡܥܘܿܢ، ܐ݇ܢܵܫܵܐ ܟܹܐܢܵܐ ܘܙܲܕܝܼܩܵܐ ܝܗ݇ܘܵܐ، ܘܒܸܣܦܵܪܵܐ ܝܗ݇ܘܵܐ ܠܝܲܗ݇ܒܲܠܬܵܐ ܕܠܸܒܵܐ ܕܝܼܣܪܵܝܹܠ، ܘܪܘܼܚܵܐ ܕܩܘܼܕܫܵܐ ܥܲܠܘܼܗܝ ܝܗ݇ܘܵܐ. 26ܘܦܝܼܫܵܐ ܝܗ݇ܘܵܐ ܓܸܠܝܵܐ ܐܸܠܹܗ ܒܪܘܼܚܵܐ ܕܩܘܼܕܫܵܐ ܕܠܹܐ ܚܵܙܹܐ ܡܵܘܬܵܐ ܗܲܠ ܕܚܵܙܹܐ ܡܫܝܼܚܵܐ ܕܡܵܪܝܵܐ. 27ܐܵܗܵܐ ܐ݇ܬܹܐ ܠܹܗ ܠܗܲܝܟܠܵܐ ܡܗܘܼܕܝܵܐ ܒܪܘܼܚܵܐ، ܒܥܕܵܢܵܐ ܕܡܲܥܒ݂ܘܼܪܹܐ ܝܗ݇ܘܵܘ ܐܲܒ݂ܵܗܹ̈ܐ ܕܝܼܫܘܿܥ ܠܝܵܠܵܕ݇ܐ ܕܥܵܒ݂ܕܝܼ ܐܸܠܹܗ ܕܵܐܟ݂ܝܼ ܕܦܝܼܫܵܐ ܝܠܹܗ ܦܩܝܼܕܵܐ ܒܢܵܡܘܿܣܵܐ. 28ܫܩܝܼܠ ܠܹܗ ܫܸܡܥܘܿܢ ܠܝܵܠܵܕ݇ܐ ܥܲܠ ܕܪ̈ܲܥܢܵܢܘܼܗܝ، ܘܫܘܼܒܸܚ ܠܹܗ ܠܐܲܠܵܗܵܐ، ܘܐ݇ܡܝܼܪܹܗ،

29”ܝܵܐ ܡܵܪܝܵܐ، ܐܵܕܝܼܵܐ ܫܩܘܿܠ ܠܪܹܓܘܼܟ݂ ܒܫܠܵܡܵܐ ܐܲܝܟ݂ ܗܹܡܸܙܡܵܢܘܼܟ݂،

30ܣܵܒܵܒ ܚܙܹܐ ܠܗܘܿܢ ܥܲܝܢܝܼ̈ ܦܘܼܪܩܵܢܘܼܟ݂،

31ܗ̇ܘ ܕܗܘܼܕܸܪܘܼܟ݂ ܩܵܕ݇ܡ ܥܲܝܢܹ̈ܐ ܕܟܠܹܗ ܥܵܠܡܵܐ،

32ܒܲܗܪܵܐ ܕܒܲܗܪܸܢ ܠܐܸܡܘܵܬܹ̈ܐ، ܘܚܸܩܪܵܐ ܠܥܲܡܘܼܟ݂ ܝܼܣܪܵܝܹܠ.“#ܐܫܥܝܐ 42‏:6، 49‏:6

33ܝܵܘܣܸܦ ܘܡܲܪܝܲܡ ܥܘܼܓ̰ܸܒ ܠܗܘܿܢ ܒܐܲܢܹܐ ܕܦܝܼܫ ܠܗܘܿܢ ܐ݇ܡܝܼܪܹܐ ܒܘܼܬ ܕܝܼܹܗ. 34ܒܘܼܪܟܲܝ ܠܹܗ ܫܸܡܥܘܿܢ، ܘܐ݇ܡܝܼܪܹܗ ܠܡܲܪܝܲܡ ܝܸܡܵܐ ܕܝܵܠܵܕ݇ܐ، ”ܐܵܗܵܐ ܝܵܠܵܕ݇ܐ ܡܘܼܬܒ݂ܵܐ ܝܠܹܗ ܩܵܐ ܢܦܵܠܬܵܐ ܘܩܝܵܡܬܵܐ ܕܪܵܒܵܐ ܓܵܘ ܒܢܲܝ̈ ܝܼܣܪܵܝܹܠ، ܘܠܢܝܼܫܲܢܩܵܐ ܕܡܲܩܲܪܵܨܘܼܬܵܐ، 35”ܕܦܵܝܫܝܼ ܓܸܠܝܹܐ ܚܘܼܫܵܒܹ̈ܐ ܕܪܵܒܵܐ ܠܸܒܵܘܵܬܹ̈ܐ، ܘܪܘܼܡܚܵܐ ܒܸܬ ܥܵܒ݂ܪܵܐ ܒܓܵܢܵܟ݂ܝ.“

ܚܲܢܵܐ ܫܲܒܘܼܚܹܐ ܠܐܲܠܵܗܵܐ

36ܘܐܝܼܬ ܗ݇ܘܵܐ ܚܕܵܐ ܢܒ݂ܝܼܬܵܐ ܫܸܡܘܼܗ̇ ܚܲܢܵܐ، ܒܪܵܬܵܐ ܕܦܢܘܼܐܹܝܠ، ܡ̣ܢ ܫܲܒ݂ܛܵܐ ܕܐܵܫܹܝܪ، ܓܘܼܪܬܵܐ ܒܫܸܢܹ̈ܐ ܘܚܝܹܐ ܠܵܗ̇ ܫܒܲܥ ܫܸܢܹ̈ܐ ܥܲܡ ܓܲܒ݂ܪܘܼܗ̇ ܗܵܐ ܡ̣ܢ ܒܬܘܼܠܘܼܬܘܼܗ̇. 37ܗܘܝܼܬܵܐ ܝܗ݇ܘܵܐ ܐܲܪܡܸܠܬܵܐ ܩܘܼܪܒܵܐ ܠܬܡܵܢܝܼ ܘܐܲܪܒܲܥ ܫܸܢܹ̈ܐ، ܘܒܟܠ ܥܕܵܢܵܐ ܗܵܘܝܵܐ ܗ݇ܘܵܐ ܓܵܘ ܗܲܝܟܠܵܐ ܒܨܵܘܡܵܐ ܘܒܨܠܘܿܬܵܐ، ܘܒܸܣܓ݂ܵܕܵܐ ܒܐܝܼܡܵܡܵܐ ܘܒܠܲܝܠܹܐ، 38ܐܘܼܦ ܗ̇ܝ ܟܠܹܐ ܠܵܗ̇ ܒܗ̇ܝ ܥܕܵܢܵܐ ܘܫܘܼܒܸܚ ܠܵܗ̇ ܠܐܲܠܵܗܵܐ، ܘܗܲܡܙܸܡܵܐ ܗ݇ܘܵܐ ܒܘܼܬ ܝܼܫܘܿܥ ܥܲܡ ܟܠܲܝܗܝ ܐܵܢܝܼ ܕܒܸܣܦܵܪܵܐ ܝܗ݇ܘܵܘ ܠܦܘܼܪܩܵܢܵܐ ܕܐܘܿܪܸܫܠܸܡ.

ܕܝܵܪܬܵܐ ܠܢܵܨܪܲܬ

39ܘܟܲܕ ܬܘܼܡܸܡ ܠܗܘܿܢ ܟܠ ܡܸܢܕܝܼ ܐܲܝܟ݂ ܢܵܡܘܿܣܵܐ ܕܡܵܪܝܵܐ، ܕܝܼܪܗܘܿܢ ܠܓܠܝܼܠܵܐ، ܠܢܵܨܪܲܬ ܡܕܝܼܢ݇ܬܲܝܗܝ. 40ܘܝܵܠܵܕ݇ܐ ܓܘܼܪܘܸܣ ܠܹܗ، ܘܚܘܼܠܸܢܹܗ ܒܪܘܼܚܵܐ، ܘܦܝܼܫ ܠܹܗ ܡܸܠܝܵܐ ܚܸܟ݂ܡܬܵܐ، ܘܫܵܦܵܩܲܬ ܕܡܵܪܝܵܐ ܥܲܠܘܼܗܝ ܝܗ݇ܘܵܐ.

ܝܼܫܘܿܥ ܡܫܝܼܚܵܐ ܓܵܘܥܹܐܕܵܐ ܕܦܸܨܚܵܐ

41ܒܟܠ ܫܹܢ݇ܬܵܐ ܐܲܒ݂ܵܗܹ̈ܐ ܕܝܼܫܘܿܥ ܟܹܐ ܐܵܙܠ݇ܝܼ ܗ݇ܘܵܘ ܠܐܘܿܪܸܫܠܸܡ ܩܵܐ ܥܹܐܕܵܐ ܕܦܸܨܚܵܐ.#ܡܦܩܢܐ 12‏:1‏‐27 42ܐܝܼܡܲܢ ܕܗܘܹܐ ܠܹܗ ܝܼܫܘܿܥ ܒܲܪ ܬܪܸܥܣܲܪ ܫܸܢܹ̈ܐ، ܐ݇ܣܝܼܩ ܠܗܘܿܢ ܠܥܹܐܕܵܐ ܡܐܲܝܟ݂ ܥܵܕܲܬ. 43ܘܐܝܼܡܲܢ ܕܬܘܼܡܸܡ ܠܗܘܿܢ ܝܵܘܡܵܢܹ̈ܐ ܕܥܹܐܕܵܐ ܕܝܼܪܗܘܿܢ ܝܵܘܣܸܦ ܘܡܲܪܝܲܡ، ܘܝܼܫܘܿܥ ܝܵܠܵܕ݇ܐ ܦܝܼܫ ܠܹܗ ܓܵܘ ܐܘܿܪܸܫܠܸܡ. ܝܵܘܣܸܦ ܘܝܸܡܹܗ ܠܵܐ ܝ݇ܕܝܼܥ ܠܗܘܿܢ ܒܝܼܹܗ، 44ܣܵܒܵܒ ܚܫܝܼܒ݂ ܠܗܘܿܢ ܕܥܲܡ ܚܲܒ݂ܪ̈ܵܘܵܬܹܗ ܝܗ݇ܘܵܐ. ܐ݇ܬܹܐ ܠܗܘܿܢ ܐܘܼܪܚܵܐ ܕܚܲܕ ܝܵܘܡܵܐ، ܘܛܥܹܐ ܠܗܘܿܢ ܒܵܬ݇ܪܹܗ ܓܵܘ ܚܸܙܡܵܢܲܝ̈ܗܝ ܘܓܵܘ ܐܵܢܝܼ ܕܝܵܕܥܝܼ ܗ݇ܘܵܘ ܠܗܘܿܢ، 45ܘܠܵܐ ܡܘܼܫ݇ܟ̰ܸܚ ܠܗܘܿܢ ܐܸܠܹܗ. ܕܝܼܪܗܘܿܢ ܡܸܢܕܪܸܫ ܠܐܘܿܪܸܫܠܸܡ ܒܸܛܥܵܝܵܐ ܒܵܬ݇ܪܹܗ. 46ܘܡ̣ܢ ܒܵܬ݇ܪ ܬܠܵܬܵܐ ܝܵܘܡܵܢܹ̈ܐ، ܡܘܼܫ݇ܟ̰ܸܚ ܠܗܘܿܢ ܐܸܠܹܗ ܓܵܘ ܗܲܝܟܠܵܐ، ܝ݇ܬܝܼܒ݂ܵܐ ܓܵܘ ܡܲܠܦܵܢܹ̈ܐ، ܒܸܫܡܵܥܵܐ ܐܸܠܲܝܗܝ، ܘܒܲܩܘܼܪܲܝ ܒܘܼܩܵܪܹ̈ܐ. 47ܥܲܓ̰ܒܝܼ ܗ݇ܘܵܘ ܒܚܸܟ݂ܡܬܹܗ ܘܒܓ̰ܘܼܘܵܒܘܼ̈ܗܝ ܟܠܲܝܗܝ ܐܵܢܝܼ ܕܫܵܡܥܝܼ ܗ݇ܘܵܘ ܠܹܗ. 48ܐܝܼܡܲܢ ܕܒܵܒܘܼܗܝ ܘܝܸܡܹܗ ܚܙܹܐ ܠܗܘܿܢ ܐܸܠܹܗ ܥܘܼܓ̰ܸܒ ܠܗܘܿܢ. ܘܐ݇ܡܝܼܪܵܗ̇ ܐܸܠܹܗ ܝܸܡܹܗ، ”ܒܪܘܿܢܝܼ، ܩܵܡܘܿܕܝܼ ܗܲܕܟ݂ܵܐ ܥܒ݂ܝܼܕ ܠܘܼܟ݂ ܒܝܼܲܢ؟ ܐܵܢܵܐ ܘܒܵܒܘܼܟ݂ ܓ̰ܘܼܢܓ̰ܸܪܲܢ ܒܸܛܥܵܝܵܐ ܒܵܬ݇ܪܘܼܟ݂.“ 49ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܩܵܡܘܿܕܝܼ ܒܸܛܥܵܝܵܐ ܝܬܘܿܢ ܗ݇ܘܵܘ ܒܵܬ݇ܪܝܼ؟ ܠܹܐ ܝܵܕܥܝܼܬܘܿܢ ܗ݇ܘܵܘ ܕܓܵܘ ܒܲܝܬܵܐ ܕܒܵܒܝܼ ܘܵܠܹܐ ܝܠܵܗ̇ ܕܗܵܘܹܝܢ؟“ 50ܐܝܼܢܵܐ ܐܵܢܝܼ ܠܵܐ ܦܘܼܪܡܹܐ ܠܗܘܿܢ ܐܵܗܵܐ ܡܸܢܕܝܼ ܕܐ݇ܡܝܼܪܹܗ ܐܸܠܲܝܗܝ.

51ܘܨܠܹܐ ܠܹܗ ܥܲܡܲܝܗܝ ܘܐ݇ܬܹܐ ܠܹܗ ܠܢܵܨܪܲܬ، ܘܟܹܐ ܫܵܠܹܡ ܗ݇ܘܵܐ ܐܸܠܲܝܗܝ. ܘܝܸܡܹܗ ܟܹܐ ܢܵܛܪܵܐ ܗ݇ܘܵܐ ܟܠܲܝܗܝ ܗܹܡܸܙܡܵܢܹ̈ܐ ܒܠܸܒܘܼܗ̇. 52ܘܝܼܫܘܿܥ ܓܲܪܘܘܼܣܹܐ ܝܗ݇ܘܵܐ ܒܩܵܘܡܬܵܐ ܘܒܚܸܟ݂ܡܬܵܐ، ܘܒܫܵܦܵܩܲܬ ܩܵܕ݇ܡ ܐܲܠܵܗܵܐ ܘܒܢܲܝ̈ܢܵܫܵܐ.#ܐ. ܫܡܘܐܝܠ 2‏:26

Currently Selected:

ܠܘܩܐ 2: ABTAB

Highlight

Copy