ܠܘܩܐ 8

ܝܼܫܘܿܥ ܡܲܟܪܘܼܙܹܐ ܘܒܲܣܘܼܡܹܐܓܵܘ ܓܠܝܼܠܵܐ

1ܡ̣ܢ ܒܵܬ݇ܪ ܐܲܢܹܐ، ܒܸܚܕܵܪܵܐ ܝܗ݇ܘܵܐ ܝܼܫܘܿܥ ܓܵܘ ܡܕܝܼܢܵܬܹ̈ܐ ܘܓܵܘ ܡܵܬܘܵܬܹ̈ܐ، ܡܲܟܪܘܼܙܹܐ ܘܡܲܫܚܘܼܕܹܐ ܡܲܠܟܘܼܬܵܐ ܕܐܲܠܵܗܵܐ، ܘܬܪܸܥܣܲܪ ܬܲܠܡܝܼܕܘܼ̈ܗܝ ܥܲܡܹܗ. 2ܐܝܼܬ ܗ݇ܘܵܘ ܐܘܼܦ ܒܲܟ݂ܬܵܬܹ̈ܐ ܥܲܡܹܗ، ܐܵܢܝܼ ܕܦܝܼܫ ܠܗܘܿܢ ܒܣܝܼܡܹܐ ܡ̣ܢ ܡܲܪ̈ܥܹܐ ܘܡ̣ܢ ܪ̈ܘܼܚܹܐ ܒܝܼܫܹ̈ܐ؛ ܡܸܢܲܝܗܝ ܡܲܪܝܲܡ ܕܦܵܝܫܵܐ ܗ݇ܘܵܐ ܩܪܝܼܬܵܐ ܡܲܓ݂ܕܠܵܝܬܵܐ، ܗ̇ܝ ܕܫܲܒ݂ܥܵܐ ܫܹܐܕܹ̈ܐ ܦܘܼܠܸܛ ܠܹܗ ܡܸܢܘܼܗ̇ ܝܼܫܘܿܥ، 3ܘܝܘܿܚܲܢ ܒܲܟ݂ܬܵܐ ܕܟܘܼܙܵܐ ܪܲܒ ܒܲܝܬܵܐ ܕܗܹܪܘܿܕܸܣ، ܘܫܘܿܫܲܢ، ܘܪܵܒܵܐ ܒܲܟ݂ܬܵܬܹ̈ܐ ܐ݇ܚܹܪ̈݇ܢܹܐ، ܕܟܹܐ ܥܵܒ݂ܕܝܼ ܗ݇ܘܵܘ ܠܗܘܿܢ ܚܸܠܡܲܬ ܡ̣ܢ ܡܸܢܕܝܼ ܕܐܝܼܬ ܗ݇ܘܵܘ ܠܗܘܿܢ.

ܡܲܬܠܵܐ ܕܙܵܪܥܵܢܵܐ

ܡܬܝ 13‏:1‏‐9؛ ܡܪܩܘܣ 4‏:1‏‐9

4ܟܲܕ ܓ̰ܡܝܼܥܹܐ ܝܗ݇ܘܵܘ ܠܟܸܣ ܝܼܫܘܿܥ ܟܸܢܫܹ̈ܐ ܪܵܒܵܐ، ܕܐ݇ܬܝܼܹܐ ܝܗ݇ܘܵܘ ܡ̣ܢ ܟܠܲܝܗܝ ܡܕܝܼܢܵܬܹ̈ܐ، ܐ݇ܡܝܼܪܹܗ ܐܸܠܲܝܗܝ ܐܵܗܵܐ ܡܲܬܠܵܐ: 5”ܦܠܝܼܛ ܠܹܗ ܚܲܕ ܙܵܪܥܵܢܵܐ ܠܸܙܪܵܥܵܐ ܒܲܪܙܲܪܥܵܐ. ܘܟܲܕ ܒܸܙܪܵܥܵܐ ܝܗ݇ܘܵܐ، ܐܝܼܬ ܗ݇ܘܵܐ ܕܢܦܝܼܠ ܠܹܗ ܥܲܠ ܡܲܪܙܵܐ ܕܐܘܼܪܚܵܐ، ܘܦܝܼܫ ܠܹܗ ܕܝܼܫܵܐ، ܘܠܩܝܼܛ ܠܗܘܿܢ ܐܸܠܹܗ ܛܲܝܪܹ̈ܐ ܕܫܡܲܝܵܐ. 6”ܘܐ݇ܚܹܪ݇ܢܵܐ ܢܦܝܼܠ ܠܹܗ ܥܲܠ ܐܲܪܥܵܐ ܟܹܐܦܵܢܬܵܐ، ܘܡ̣ܢ ܒܵܬ݇ܪ ܕܡܘܼܓ̰ܝܸܢܹܗ ܒܪܝܼܙ ܠܹܗ، ܣܵܒܵܒ ܠܲܝܬ ܗ݇ܘܵܐ ܠܹܗ ܬܲܠܝܼܠܘܼܬܵܐ. 7”ܘܐ݇ܚܹܪ݇ܢܵܐ ܢܦܝܼܠ ܠܹܗ ܓܵܘ ܟܸܬܘܹ̈ܐ، ܐܝܼܢܵܐ ܡܘܼܓ̰ܝܸܢܗܘܿܢ ܥܲܡܹܗ ܐܘܼܦ ܟܸܬܘܹ̈ܐ، ܘܚܢܝܼܩ ܠܗܘܿܢ ܐܸܠܹܗ. 8”ܘܐ݇ܚܹܪ݇ܢܵܐ ܢܦܝܼܠ ܠܹܗ ܒܐܲܪܥܵܐ ܫܲܡܝܼܢܬܵܐ، ܡܘܼܓ̰ܝܸܢܹܗ ܘܥܒ݂ܝܼܕ ܠܹܗ ܛܥܘܼܢܝܵܬܹ̈ܐ ܚܲܕ ܒܐܸܡܵܐܐ.“ ܘܐܝܼܡܲܢ ܕܦܪܝܼܩ ܠܹܗ، ܐ݇ܡܝܼܪܹܗ: ”ܡ̇ܢ ܕܐܝܼܬ ܠܹܗ ܢܵܬܝܵܬܹ̈ܐ ܠܸܫܡܵܥܵܐ، ܫܵܡܹܥ.“

ܢܝܼܫܵܐ ܕܡܲܬܠܹ̈ܐ

ܡܬܝ 13‏:10‏‐17؛ ܡܪܩܘܣ 4‏:10‏‐12

9ܘܒܘܼܩܸܪܗܘܿܢ ܡܸܢܹܗ ܬܲܠܡܝܼܕܘܼ̈ܗܝ، ”ܡܘܿܕܝܼ ܝܠܹܗ ܡܲܥܢܵܝܵܐ ܕܐܵܗܵܐ ܡܲܬܠܵܐ؟“ 10ܓ̰ܘܼܘܸܒ ܠܹܗ ܐܸܠܲܝܗܝ ܝܼܫܘܿܥ، ”ܐܸܠܵܘܟ݂ܘܿܢ ܦܝܼܫܵܐ ܝܠܹܗ ܝܘܼܗ݇ܒ݂ܵܐ ܠܝܼܕܵܥܵܐ ܐ݇ܪ̈ܵܙܹܐ ܕܡܲܠܟܘܼܬܵܐ ܕܐܲܠܵܗܵܐ، ܐܝܼܢܵܐ ܠܐ݇ܚܹܪ̈݇ܢܹܐ ܒܡܲܬܠܹ̈ܐ ܟܹܐ ܗܲܡܙܸܡܸܢ،

ܣܵܒܵܒ ܟܹܐ ܓܲܫܩܝܼ ܘܠܹܐ ܚܵܙܝܼ، ܘܟܹܐ ܫܵܡܥܝܼ ܘܠܹܐ ܦܲܪܡܝܼ.#ܐܫܥܝܐ 6‏:9

ܡܲܬܠܵܐ ܕܙܵܪܥܵܢܵܐ ܦܝܵܫܵܐ ܦܘܼܫܩܵܐ

ܡܬܝ 13‏:18‏‐23؛ ܡܪܩܘܣ 4‏:13‏‐20

11”ܐܵܗܵܐ ܝܠܹܗ ܡܲܥܢܵܝܵܐ ܕܡܲܬܠܵܐ. ܒܲܪܙܲܪܥܵܐ ܗܹܡܸܙܡܵܢ ܕܐܲܠܵܗܵܐ ܝܠܹܗ. 12”ܗ̇ܘ ܕܢܦܝܼܠ ܠܹܗ ܥܲܠ ܡܲܪܙܵܐ ܕܐܘܼܪܚܵܐ، ܐܵܢܝܼ ܝܢܵܐ ܕܟܹܐ ܫܵܡܥܝܼ. ܐܝܼܢܵܐ ܟܹܐ ܐܵܬܹܐ ܐܵܟܹܠܩܲܪܨܵܐ ܘܫܵܩܹܠ ܠܵܗ̇ ܗܹܡܸܙܡܵܢ ܡ̣ܢ ܠܸܒܲܝܗܝ، ܕܠܵܐ ܗܲܡܸܢܝܼ ܘܦܵܪܩܝܼ. 13”ܘܗ̇ܘ ܕܢܦܝܼܠ ܠܹܗ ܥܲܠ ܐܲܪܥܵܐ ܟܹܐܦܵܢܬܵܐ، ܐܵܢܝܼ ܝܢܵܐ ܕܟܹܐ ܫܵܡܥܝܼ ܠܗܹܡܸܙܡܵܢ ܘܒܚܲܕܘܼܬܵܐ ܟܹܐ ܩܲܒܠܝܼ ܠܵܗ̇. ܐܝܼܢܵܐ ܠܲܝܬ ܠܗܘܿܢ ܥܸܩܪܵܐ، ܐܸܠܵܐ ܗܲܝܡܵܢܘܼܬܲܝܗܝ ܩܵܐ ܚܕܵܐ ܥܕܵܢܵܐ ܟܪܝܼܬܵܐ ܝܠܵܗ̇، ܘܐܝܼܡܲܢ ܕܐܵܬܹܐ ܓ̰ܘܼܪܵܒܵܐ ܟܹܐ ܩܵܠܒܝܼ. 14”ܘܗ̇ܘ ܕܢܦܝܼܠ ܠܹܗ ܓܵܘ ܟܸܬܘܹ̈ܐ، ܐܵܢܝܼ ܝܢܵܐ ܕܟܹܐ ܫܵܡܥܝܼ، ܘܐܝܼܡܲܢ ܕܟܹܐ ܐܵܙܠ݇ܝܼ، ܪܸܢܝܵܐ ܘܕܵܘܸܠܬܵܐ ܘܫܲܗܘܲܬܝܵܬܹ̈ܐ ܕܐܲܢܹܐ ܚܲܝܹ̈ܐ ܟܹܐ ܚܵܢܩܝܼ ܠܗܘܿܢ، ܘܛܥܘܼܢܝܵܬܹ̈ܐ ܠܹܐ ܝܵܗ݇ܒ݂ܝܼ. 15”ܐܝܼܢܵܐ ܗ̇ܘ ܕܢܦܝܼܠ ܠܹܗ ܒܐܲܪܥܵܐ ܫܲܡܝܼܢܬܵܐ، ܐܵܢܝܼ ܝܢܵܐ ܕܒܠܸܒܵܐ ܨܸܦܝܵܐ ܘܛܵܒ݂ܵܐ ܟܹܐ ܫܵܡܥܝܼ ܠܗܹܡܸܙܡܵܢ ܘܢܵܛܪܝܼ ܠܵܗ̇، ܘܟܹܐ ܝܵܗ݇ܒ݂ܝܼ ܛܥܘܼܢܝܵܬܹ̈ܐ ܒܚܡܵܠܬܵܐ.

ܡܲܬܠܵܐ ܕܫܪܵܓ݂݇ܝܵܐ

ܡܪܩܘܣ 4‏:21‏‐25

16”ܐ݇ܢܵܫܵܐ ܠܹܐ ܡܲܠܗܹܐ ܫܪܵܓ݂݇ܝܵܐ ܘܟܲܣܹܐ ܠܵܗ̇ ܒܡܵܐܢܵܐ ܝܲܢ ܡܲܬܸܒ݂ ܠܵܗ̇ ܬܚܘܿܬ ܫܘܝܼܬܵܐ، ܐܸܠܵܐ ܟܹܐ ܡܲܬܸܒ݂ ܠܵܗ̇ ܥܲܠ ܡܢܵܪܬܵܐ ܕܟܠ ܥܵܒ݂ܪܵܢܵܐ ܚܵܙܹܐ ܒܲܗܪܘܼܗ̇. 17”ܣܵܒܵܒ ܠܲܝܬ ܡܸܢܕܝܼ ܡܘܼܟܣܵܐ ܕܠܵܐ ܦܵܐܹܫ ܓܸܠܝܵܐ، ܘܠܵܐ ܛܸܫܝܵܐ ܕܠܵܐ ܦܵܐܹܫ ܝ݇ܕܝܼܥܵܐ ܘܦܵܠܹܛ ܠܒܲܗܪܵܐ. 18”ܒܘܼܬ ܐܵܗܵܐ ܚܙܹܝܡܘܼܢ ܕܵܐܟ݂ܝܼ ܫܵܡܥܝܼܬܘܿܢ، ܣܵܒܵܒ ܡ̇ܢ ܕܐܝܼܬ ܠܹܗ ܒܸܬ ܦܵܐܹܫ ܝܘܼܗ݇ܒ݂ܵܐ ܙܵܘܕܵܐ ܐܸܠܹܗ، ܘܡ̇ܢ ܕܠܲܝܬ ܠܹܗ ܐܘܼܦ ܗ̇ܘ ܕܚܵܫܹܒ݂ ܕܐܝܼܬ ܠܹܗ ܒܸܬ ܦܵܐܹܫ ܫܩܝܼܠܵܐ ܡܸܢܹܗ.“

ܝܸܡܵܐ ܘܐܲܚܘܿܢܘܵܬܹ̈ܐ ܕܝܼܫܘܿܥ

ܡܬܝ 12‏:46‏‐50؛ ܡܪܩܘܣ 3‏:31‏‐35

19ܐ݇ܬܹܐ ܠܗܘܿܢ ܠܟܸܣ ܝܼܫܘܿܥ ܝܸܡܹܗ ܘܐܲܚܘܿܢܘܵܬܹ̈ܗ، ܐܝܼܢܵܐ ܠܵܐ ܡܨܹܐ ܠܗܘܿܢ ܡܵܛܝܼ ܠܟܸܣ ܠܹܗ ܣܵܒܵܒ ܟܸܢܫܵܐ ܪܵܒܵܐ ܝܗ݇ܘܵܐ. 20ܘܐ݇ܡܝܼܪܗܘܿܢ ܐܸܠܹܗ، ”ܗܵܐ ܝܸܡܘܼܟ݂ ܘܐܲܚܘܿܢܘܵܬܘܼ̈ܟ݂ ܟܸܠܝܹܐ ܝܢܵܐ ܠܒܲܕܲܪ ܘܒܵܥܝܼ ܕܚܵܙܝܼ ܠܘܼܟ݂.“ 21ܘܗ̇ܘ ܓ̰ܘܼܘܸܒ ܠܹܗ ܘܐ݇ܡܝܼܪܹܗ ܐܸܠܲܝܗܝ، ”ܐܲܢܹܐ ܝܢܵܐ ܝܸܡܝܼ ܘܐܲܚܘܿܢܘܵܬܝܼ̈، ܐܵܢܝܼ ܕܫܵܡܥܝܼ ܗܹܡܸܙܡܵܢ ܕܐܲܠܵܗܵܐ ܘܢܵܛܪܝܼ ܠܵܗ̇.“

ܝܼܫܘܿܥ ܡܲܫܠܘܼܝܹܐ ܠܲܦܹ̈ܐ ܕܝܵܡܵܐ

ܡܬܝ 8‏:23‏‐27؛ ܡܪܩܘܣ 4‏:35‏‐41

22ܒܚܲܕ ܡ̣ܢ ܝܵܘܡܵܢܹ̈ܐ ܐ݇ܣܝܼܩ ܠܹܗ ܝܼܫܘܿܥ ܠܓܵܡܝܼ ܥܲܡ ܬܲܠܡܝܼܕܘܼ̈ܗܝ، ܘܐ݇ܡܝܼܪܹܗ ܐܸܠܲܝܗܝ، ”ܛܪܹܝܡܘܼܢ ܕܥܵܒ݂ܪܲܚ ܠܗ̇ܘ ܡܲܪܙܵܐ ܐ݇ܚܹܪ݇ܢܵܐ ܕܝܵܡܵܐ.“ ܘܛܪܹܐ ܠܗܘܿܢ. 23ܘܟܲܕ ܒܸܛܪܵܝܵܐ ܝܗ݇ܘܵܘ، ܕܡܝܼܟ݂ ܠܹܗ ܝܼܫܘܿܥ. ܗܘܹܐ ܠܵܗ̇ ܒܘܼܪܵܢ ܕܦܵܘܚܵܐ ܒܝܵܡܵܐ، ܘܩܘܼܪܒܸܢܵܗ̇ ܓܵܡܝܼ ܠܸܡܠܵܝܵܐ ܡ̈ܝܼܵܐ، ܘܗܘܹܐ ܠܗܘܿܢ ܓܵܘ ܩܹܘܲܢܕܹܢܘܿܣ ܓܘܼܪܬܵܐ. 24ܡܘܼܪܥܸܫ ܠܗܘܿܢ ܐܸܠܹܗ ܬܲܠܡܝܼܕܘܼ̈ܗܝ، ܒܹܐܡܵܪܵܐ، ”ܪܲܒܝܼ، ܪܲܒܝܼ، ܒܸܛܠܵܩܵܐ ܝܘܲܚ.“ ܩܝܼܡ ܠܹܗ ܘܢܓ̰ܝܼܘ ܠܹܗ ܒܦܵܘܚܹ̈ܐ ܘܒܠܲܦܹ̈ܐ ܕܡ̈ܝܼܵܐ، ܘܟܠܹܐ ܠܗܘܿܢ. ܘܗܘܹܐ ܠܵܗ̇ ܫܸܠܝܘܼܬܵܐ. 25ܘܐ݇ܡܝܼܪܹܗ ܐܸܠܲܝܗܝ، ”ܐܲܝܟܵܐ ܝܠܵܗ̇ ܗܲܝܡܵܢܘܼܬܵܘܟ݂ܘܿܢ؟“ ܘܐܵܢܝܼ ܒܸܙܕܵܥܵܐ، ܥܲܓ̰ܒܝܼ ܗ݇ܘܵܘ ܘܐܵܡܪܝܼ ܗ݇ܘܵܘ ܚܲܕ ܠܗ̇ܘ ܐ݇ܚܹܪ݇ܢܵܐ، ”ܡܵܢܝܼ ܝܠܹܗ ܐܵܗܵܐ ܕܐܘܼܦ ܠܦܵܘܚܹ̈ܐ ܘܠܲܦܹ̈ܐ ܘܠܝܵܡܵܐ ܒܸܦܩܵܕܵܐ ܝܠܹܗ ܘܒܸܫܡܵܥܵܐ ܝܢܵܐ ܐܸܠܹܗ؟“

ܒܵܣܲܡܬܵܐ ܕܚܲܕ ܫܹܐܕܵܢܵܐ ܓܸܕܪܵܝܵܐ

ܡܬܝ 8‏:28‏‐34؛ ܡܪܩܘܣ 5‏:1‏‐20

26ܛܪܹܐ ܠܗܘܿܢ ܘܐ݇ܬܹܐ ܠܗܘܿܢ ܠܐܲܬܪܵܐ ܕܓܸܕܪ̈ܵܝܹܐ، ܕܝܼܠܹܗ ܠܡܲܪܙܵܐ ܐ݇ܚܹܪ݇ܢܵܐ ܠܒܲܠܩܘܼܒ݂ܠ ܕܓܠܝܼܠܵܐ. 27ܘܐܝܼܡܲܢ ܕܦܠܝܼܛ ܠܹܗ ܠܒܸܪܙܵܐ، ܬܦܝܼܩ ܠܹܗ ܒܝܼܹܗ ܚܲܕ ܐ݇ܢܵܫܵܐ ܡ̣ܢ ܡܕܝܼܢ݇ܬܵܐ، ܕܐܝܼܬ ܗ݇ܘܵܐ ܒܝܼܹܗ ܫܹܐܕܵܐ ܡ̣ܢ ܥܕܵܢܵܐ ܪܵܒܵܐ. ܠܹܐ ܠܵܒܹܫ ܗ݇ܘܵܐ ܓ̰ܘܼܠܹ̈ܐ، ܘܠܹܐ ܥܵܡܹܪ ܗ݇ܘܵܐ ܒܒܲܝܬܵܐ، ܐܸܠܵܐ ܟܹܐ ܚܵܝܹܐ ܗ݇ܘܵܐ ܓܵܘ ܒܹܝܬ ܩܒ݂ܘܼܪܹ̈ܐ. 28ܐܝܼܡܲܢ ܕܚܙܹܐ ܠܹܗ ܠܝܼܫܘܿܥ، ܢܦܝܼܠ ܠܹܗ ܩܵܕ݇ܡܘܼܗܝ ܘܡܘܼܩܘܸܚ ܠܹܗ ܒܩܵܠܵܐ ܪܵܡܵܐ ܘܐ݇ܡܝܼܪܹܗ، ”ܡܵܐ ܠܘܼܟ݂ ܡܸܢܝܼ، ܝܵܐ ܝܼܫܘܿܥ ܒܪܘܿܢܵܐ ܕܐܲܠܵܗܵܐ ܥܸܠܵܝܵܐ؟ ܦܲܪܦܘܼܠܹܐ ܝܘܸܢ ܒܝܼܘܼܟ݂، ܠܵܐ ܓ̰ܲܢܓ̰ܸܪܸܬ ܠܝܼ.“ 29ܣܵܒܵܒ ܦܩܝܼܕ ܠܹܗ ܝܼܫܘܿܥ ܠܪܘܼܚܵܐ ܛܲܡܐܹܐ ܕܦܵܠܛܵܐ ܡܸܢܹܗ، ܗ̇ܝ ܕܟܹܐ ܕܵܒ݂ܩܵܐ ܗ݇ܘܵܐ ܠܹܗ ܪܵܒܵܐ ܓܵܗܹ̈ܐ، ܘܟܹܐ ܦܵܐܹܫ ܗ݇ܘܵܐ ܢܛܝܼܪܵܐ ܘܐ݇ܣܝܼܪܵܐ ܒܩܵܘܕܹ̈ܐ ܘܒܫܹܫܠܵܬܹ̈ܐ، ܐܝܼܢܵܐ ܟܹܐ ܩܵܛܹܥ ܗ݇ܘܵܐ ܠܐܸܣܘܼܪ̈ܘܼܗܝ، ܘܟܹܐ ܦܵܐܹܫ ܗ݇ܘܵܐ ܠܘܼܒܠܵܐ ܒܝܲܕ ܫܹܐܕܵܐ ܠܒܲܪܝܼܵܐ. 30ܒܘܼܩܸܪܹܗ ܡܸܢܹܗ ܝܼܫܘܿܥ، ”ܡܘܿܕܝܼ ܝܠܹܗ ܫܸܡܘܼܟ݂؟“ ܘܗ̇ܘ ܓ̰ܘܼܘܸܒ ܠܹܗ، ”ܠܸܓ݂ܝܘܿܢ.“ ܣܵܒܵܒ ܪܵܒܵܐ ܫܹܐܕܹ̈ܐ ܥܒ݂ܝܼܪܹܐ ܝܗ݇ܘܵܘ ܒܝܼܹܗ. 31ܘܛܠܝܼܒ ܠܗܘܿܢ ܡܸܢܹܗ ܕܠܵܐ ܦܵܩܹܕ ܠܗܘܿܢ ܕܐܵܙܠ݇ܝܼ ܠܥܘܼܡܩܵܐ ܕܠܵܐ ܬܝܵܡܵܐ.

32ܐܝܼܬ ܗ݇ܘܵܐ ܬܵܡܵܐ ܒܸܩܪܵܐ ܓܘܼܪܬܵܐ ܕܚܙܘܼܪܹ̈ܐ ܒܸܪܥܵܝܵܐ ܒܛܘܼܪܵܐ. ܛܠܝܼܒ ܠܗܘܿܢ ܡܸܢܹܗ ܐܵܢܝܼ ܫܹܐܕܹ̈ܐ ܕܝܲܗ݇ܒܸܠ ܠܗܘܿܢ ܦܣܵܣܵܐ ܕܥܵܒ݂ܪܝܼ ܓܵܘ ܚܙܘܼܪܹ̈ܐ. ܘܝܘܼܗ݇ܒܸܠ ܠܹܗ ܦܣܵܣܵܐ ܐܸܠܲܝܗܝ. 33ܘܦܠܝܼܛ ܠܗܘܿܢ ܫܹܐܕܹ̈ܐ ܡ̣ܢ ܕܗ̇ܘ ܐ݇ܢܵܫܵܐ ܘܥܒ݂ܝܼܪܗܘܿܢ ܓܵܘ ܚܙܘܼܪܹ̈ܐ، ܘܪܚܝܼܛ ܠܵܗ̇ ܗ̇ܝ ܒܸܩܪܵܐ ܠܫܸܢܵܐ ܠܠܬܸܚܬ ܒܝܵܡܵܐ، ܘܚܢܝܼܩ ܠܗܘܿܢ. 34ܐܝܼܡܲܢ ܕܚܙܹܐ ܠܗܘܿܢ ܪ̈ܵܥܝܹܐ ܡܸܢܕܝܼ ܕܗܘܹܐ ܠܹܗ، ܪܚܝܼܛ ܠܗܘܿܢ ܘܗܘܼܩܹܐ ܠܗܘܿܢ ܓܵܘ ܡܕܝܼܢ݇ܬܵܐ ܘܓܵܘ ܡܵܬܘܵܬܹ̈ܐ. 35ܘܦܠܝܼܛ ܠܗܘܿܢ ܐ݇ܢܵܫܹ̈ܐ ܕܚܵܙܝܼ ܡܸܢܕܝܼ ܕܗܘܹܐ ܠܹܗ، ܘܐ݇ܬܹܐ ܠܗܘܿܢ ܠܟܸܣ ܝܼܫܘܿܥ، ܘܚܙܹܐ ܠܗܘܿܢ ܠܗ̇ܘ ܐ݇ܢܵܫܵܐ ܕܦܠܝܼܛ ܠܗܘܿܢ ܡܸܢܹܗ ܫܹܐܕܹ̈ܐ، ܠܒ݂ܝܼܫܵܐ ܘܗܵܘܢܹܗ ܒܪܹܫܹܗ ܘܝ݇ܬܝܼܒ݂ܵܐ ܠܟܸܣ ܐܲܩܠܵܬܹ̈ܐ ܕܝܼܫܘܿܥ، ܘܙܕܝܼܥ ܠܗܘܿܢ. 36ܘܐܵܢܝܼ ܕܚܙܹܐ ܠܗܘܿܢ ܗܘܼܩܹܐ ܠܗܘܿܢ ܐܸܠܲܝܗܝ ܕܵܐܟ݂ܝܼ ܦܝܼܫ ܠܹܗ ܒܣܝܼܡܵܐ ܗ̇ܘ ܕܐܝܼܬ ܗ݇ܘܵܐ ܒܝܼܹܗ ܫܹܐܕܵܐ. 37ܘܛܠܝܼܒ ܠܗܘܿܢ ܡܸܢܹܗ ܟܠܲܝܗܝ ܐ݇ܢܵܫܹ̈ܐ ܕܐܲܬܪܵܐ ܕܓܸܕܪ̈ܵܝܹܐ ܕܐܵܙܹܠ ܡ̣ܢ ܠܟܸܣ ܠܲܝܗܝ، ܣܵܒܵܒ ܙܕܘܼܥܬܵܐ ܓܘܼܪܬܵܐ ܕܒ݂ܝܼܩܲܝ ܠܵܗ̇. ܘܗ̇ܘ ܐ݇ܣܝܼܩ ܠܹܗ ܠܓܵܡܝܼ ܘܕܝܼܪܹܗ.

38ܗ̇ܘ ܐ݇ܢܵܫܵܐ ܕܦܠܝܼܛ ܠܗܘܿܢ ܡܸܢܹܗ ܫܹܐܕܹ̈ܐ ܛܠܝܼܒ ܠܹܗ ܡܸܢܹܗ ܕܦܵܐܹܫ ܗ݇ܘܵܐ ܥܲܡܹܗ. ܐܝܼܢܵܐ ܝܼܫܘܿܥ ܐ݇ܡܝܼܪܹܗ ܐܸܠܹܗ، 39”ܕܘܼܪ ܠܒܲܝܬܘܼܟ݂ ܘܗܲܩܝܼ ܡܘܿܕܝܼ ܥܒ݂ܝܼܕ ܠܹܗ ܐܸܠܘܼܟ݂ ܐܲܠܵܗܵܐ.“ ܘܗ̇ܘ ܐ݇ܙܝܼܠ ܠܹܗ ܘܗܘܼܩܹܐ ܠܹܗ ܒܟܠܵܗ̇ ܡܕܝܼܢ݇ܬܵܐ ܡܸܢܕܝܼ ܕܥܒ݂ܝܼܕ ܠܹܗ ܐܸܠܹܗ ܝܼܫܘܿܥ.

ܝܼܫܘܿܥ ܒܲܣܘܼܡܹܐ ܒܲܟ݂ܬܵܐ ܡܪܝܼܥܬܵܐ ܘܡܲܚܘܼܝܹܐ ܒܪܵܬܵܐ ܡܝܼܬܬܵܐ

ܡܬܝ 9‏:18‏‐26؛ ܡܪܩܘܣ 5‏:21‏‐43

40ܐܝܼܡܲܢ ܕܕܝܼܪܹܗ ܝܼܫܘܿܥ، ܩܘܼܒܸܠ ܠܹܗ ܐܸܠܹܗ ܟܸܢܫܵܐ ܪܵܒܵܐ، ܣܵܒܵܒ ܟܠܲܝܗܝ ܒܸܣܦܵܪܵܐ ܝܗ݇ܘܵܘ ܐܸܠܹܗ. 41ܘܐ݇ܬܹܐ ܠܹܗ ܚܲܕ ܐ݇ܢܵܫܵܐ ܫܸܡܹܗ ܝܘܿܐܵܪܵܫ، ܓܘܼܪܵܐ ܕܟܢܘܼܫܬܵܐ، ܘܢܦܝܼܠ ܠܹܗ ܩܵܕ݇ܡ ܐܲܩܠܵܬܹ̈ܐ ܕܝܼܫܘܿܥ ܘܛܠܝܼܒ ܠܹܗ ܡܸܢܹܗ ܕܥܵܒܹܪ ܗ݇ܘܵܐ ܠܒܲܝܬܹܗ، 42ܣܵܒܵܒ ܐܝܼܬ ܗ݇ܘܵܐ ܠܹܗ ܒܪܵܬܵܐ ܝܼܚܝܼܕܵܝܬܵܐ ܒܲܪ݇ܬ ܬܪܸܥܣܲܪ ܫܸܢܹ̈ܐ ܘܩܘܼܪܒܸܢܬܵܐ ܝܗ݇ܘܵܐ ܠܸܡܝܵܬܵܐ.

ܘܟܲܕ ܝܼܫܘܿܥ ܒܹܐܙܵܠܵܐ ܝܗ݇ܘܵܐ، ܟܸܢܫܵܐ ܪܵܒܵܐ ܒܸܚܠܵܨܵܐ ܝܗ݇ܘܵܐ ܐܸܠܹܗ. 43ܘܐܝܼܬ ܗ݇ܘܵܐ ܚܕܵܐ ܒܲܟ݂ܬܵܐ ܕܝܼܗ݇ܘܵܐ ܒܹܐܙܵܠܵܐ ܕܸܡܵܐ ܡܸܢܘܼܗ̇ ܩܵܐ ܬܪܸܥܣܲܪ ܫܸܢܹ̈ܐ، ܘܚܘܼܪܸܓ̰ܬܵܐ ܝܗ݇ܘܵܐ ܟܠܹܗ ܡܸܢܕܝܼܘܼܗ̇ ܩܵܐ ܐܵܣܝܹ̈ܐ، ܘܐܘܼܦ ܚܲܕ ܠܹܐ ܝܗ݇ܘܵܐ ܡܸܨܝܵܐ ܠܒܲܣܘܼܡܘܼܗ̇. 44ܩܘܼܪܒܸܢܵܗ̇ ܡ̣ܢ ܒܵܬ݇ܪ ܚܲܨܵܐ ܕܝܼܫܘܿܥ ܘܕܩܝܼܪܵܗ̇ ܒܫܸܦܘܼܠܵܐ ܕܠܒ݂ܝܼܫܬܹܗ، ܘܗܲܪ ܒܗ̇ܝ ܥܕܵܢܵܐ ܟܠܹܐ ܠܵܗ̇ ܓ̰ܪܵܝܬܵܐ ܕܕܸܡܘܼܗ̇. 45ܘܐ݇ܡܝܼܪܹܗ ܝܼܫܘܿܥ، ”ܡܵܢܝܼ ܕܩܝܼܪܹܗ ܒܝܼܝܼ؟“ ܘܟܠܲܝܗܝ ܣܪܝܼܒ݂ ܠܗܘܿܢ ܠܕܩܵܪܬܵܐ ܕܒܝܼܹܗ. ܐܝܼܢܵܐ ܫܸܡܥܘܿܢ ܟܹܐܦܵܐ ܘܐܵܢܝܼ ܕܥܲܡܹܗ ܐ݇ܡܝܼܪܗܘܿܢ، ”ܪܲܒܝܼ، ܟܸܢܫܹ̈ܐ ܡܲܠܝܘܼܨܘܼܟ݂ ܝܼܢܵܐ ܘܒܸܚܠܵܨܘܼܟ݂، ܘܐܲܢ݇ܬ ܒܹܐܡܵܪܵܐ ܝܘܸܬ، ’ܡܵܢܝܼ ܕܩܝܼܪܹܗ ܒܝܼܝܼ؟‘“ 46ܐܝܼܢܵܐ ܝܼܫܘܿܥ ܐ݇ܡܝܼܪܹܗ، ”ܚܲܕ ܕܩܝܼܪܹܗ ܒܝܼܝܼ، ܣܵܒܵܒ ܐܵܢܵܐ ܝ݇ܕܝܼܥ ܠܝܼ ܚܲܝܠܵܐ ܦܠܝܼܛ ܠܹܗ ܡܸܢܝܼ.“ 47ܗ̇ܝ ܒܲܟ݂ܬܵܐ، ܐܝܼܡܲܢ ܕܚܙܹܐ ܠܵܗ̇ ܕܠܹܐ ܡܵܨܝܵܐ ܗ݇ܘܵܐ ܛܲܫܝܵܐ ܓܵܢܘܼܗ̇ ܡܸܢܹܗ، ܐ݇ܬܹܐ ܠܵܗ̇ ܒܸܪܓܵܕܵܐ ܘܢܦܝܼܠ ܠܵܗ̇ ܩܵܕ݇ܡܘܼܗܝ ܘܐ݇ܡܝܼܪܵܗ̇ ܩܵܕ݇ܡ ܟܠܹܗ ܟܸܢܫܵܐ ܩܵܡܘܿܕܝܼ ܕܩܝܼܪܵܗ̇ ܒܝܼܹܗ ܘܕܵܐܟ݂ܝܼ ܒܓ̰ܲܠܕܘܼܬܵܐ ܒܣܝܼܡ ܠܵܗ̇. 48ܐ݇ܡܝܼܪܹܗ ܐܸܠܘܼܗ̇ ܝܼܫܘܿܥ، ”ܦܘܼܫܝ ܠܸܒܵܢܬܵܐ ܒܪܵܬܝܼ، ܗܲܝܡܵܢܘܼܬܵܟ݂ܝ ܩܲܡ ܒܵܣܡܵܐ ܠܵܟ݂ܝ، ܙܹܠ݇ܝ ܒܫܠܵܡܵܐ.“

49ܘܗܹܫ ܝܼܫܘܿܥ ܗܲܡܙܘܼܡܹܐ، ܐ݇ܬܹܐ ܠܹܗ ܐ݇ܢܵܫܵܐ ܡ̣ܢ ܒܲܝܬܵܐ ܕܓܘܼܪܵܐ ܕܟܢܘܼܫܬܵܐ ܘܐ݇ܡܝܼܪܹܗ ܐܸܠܹܗ، ”ܡܝܼܬ ܠܵܗ̇ ܒܪܵܬܘܼܟ݂، ܠܵܐ ܥܲܓ̰ܸܙ ܠܡܲܠܦܵܢܵܐ.“ 50ܐܝܼܡܲܢ ܕܫܡܝܼܥ ܠܹܗ ܝܼܫܘܿܥ، ܐ݇ܡܝܼܪܹܗ ܠܒܵܒܵܐ ܕܒܪܵܬܵܐ، ”ܠܵܐ ܙܵܕܥܹܬ، ܐܲܚܟ̰ܝܼ ܗܲܡܸܢ، ܘܒܸܬ ܚܵܝܵܐ.“ 51ܘܥܒ݂ܝܼܪܹܗ ܠܒܲܝܬܵܐ، ܘܠܵܐ ܫܒ݂ܝܼܩ ܠܹܗ ܕܥܵܒܹܪ ܥܲܡܹܗ ܐ݇ܢܵܫܵܐ ܫܒ݂ܘܿܩ ܡ̣ܢ ܫܸܡܥܘܿܢ ܟܹܐܦܵܐ ܘܝܲܥܩܘܿܒ݂ ܘܝܘܿܚܲܢܵܢ، ܘܒܵܒܵܐ ܘܝܸܡܵܐ ܕܒܪܵܬܵܐ. 52ܘܟܠܲܝܗܝ ܒܸܒܟ݂ܵܝܵܐ ܝܗ݇ܘܵܘ ܘܒܸܥܒ݂ܵܕܵܐ ܬܵܥܙܝܼ ܥܲܠܘܼܗ̇. ܐܝܼܢܵܐ ܝܼܫܘܿܥ ܐ݇ܡܝܼܪܹܗ، ”ܠܵܐ ܒܵܟܹܝܬܘܿܢ، ܣܵܒܵܒ ܠܹܐ ܝܠܵܗ̇ ܡܝܼܬܬܵܐ ܐܸܠܵܐ ܕܡܝܼܟ݂ܬܵܐ ܝܠܵܗ̇.“ 53ܘܓܚܝܼܟ ܠܗܘܿܢ ܒܝܼܹܗ ܣܵܒܵܒ ܝܵܕܥܝܼ ܗ݇ܘܵܘ ܕܡܝܼܬܬܵܐ ܝܗ݇ܘܵܐ. 54ܦܘܼܠܸܛ ܠܹܗ ܝܼܫܘܿܥ ܠܟܠܲܝܗܝ ܠܒܲܕܲܪ، ܘܕܒ݂ܝܼܩ ܠܹܗ ܒܐܝܼܕܵܐ ܕܒܪܵܬܵܐ ܘܩܸܪܝܵܐ ܠܹܗ ܘܐ݇ܡܝܼܪܹܗ، ”ܒܪܵܬܵܐ، ܩܘܼܡܝ.“ 55ܘܕܝܼܪܵܗ̇ ܪܘܼܚܘܼܗ̇، ܘܗܲܪ ܒܗ̇ܝ ܥܕܵܢܵܐ ܩܝܼܡ ܠܵܗ̇. ܘܦܩܝܼܕ ܠܹܗ ܕܝܵܗ݇ܒ݂ܝܼ ܠܵܗ̇ ܡܹܐܟ݂ܘܼܠܬܵܐ ܠܹܐܟ݂ܵܠܵܐ. 56ܘܥܘܼܓ̰ܸܒ ܠܗܘܿܢ ܐܲܒ݂ܵܗܘܼ̈ܗ̇. ܐܝܼܢܵܐ ܗ̇ܘ ܦܩܝܼܕܲܝ ܠܹܗ ܕܠܐ݇ܢܵܫܵܐ ܠܵܐ ܐܵܡܪܝܼ ܡܸܢܕܝܼ ܕܗܘܹܐ ܠܹܗ.

Currently Selected:

ܠܘܩܐ 8: ABTAB

Highlight

Copy