ܡܬܝ 4

ܣܵܛܵܢܵܐ ܓ̰ܲܪܘܼܒܹܐ ܠܝܼܫܘܿܥ

ܡܪܩܘܣ 1‏:12‏‐13؛ ܠܘܩܐ 4‏:1‏‐13

1ܗ̇ܝܓܵܗ ܦܝܼܫ ܠܹܗ ܠܘܼܒܠܵܐ ܝܼܫܘܿܥ ܒܝܲܕ ܪܘܼܚܵܐ ܠܒܲܪܝܼܵܐ ܕܦܵܐܹܫ ܓ̰ܘܼܪܒܵܐ ܒܐܵܟܹܠܩܲܪܨܵܐ. 2ܘܨܝܼܡ ܠܹܗ ܐܲܪܒܥܝܼ ܝܵܘܡܵܢܹ̈ܐ ܘܐܲܪܒܥܝܼ ܠܲܝܠܵܘܵܬܹ̈ܐ، ܘܒܚܲܪܬܵܐ ܟܦܝܼܢܹܗ. 3ܘܩܘܼܪܒܸܢܹܗ ܓ̰ܲܪܒܵܢܵܐ ܘܐ݇ܡܝܼܪܹܗ ܐܸܠܹܗ، ”ܐܸܢ ܒܪܘܿܢܵܐ ܕܐܲܠܵܗܵܐ ܝܘܸܬ، ܦܩܘܿܕ ܠܐܲܢܹܐ ܟܹܐܦܹ̈ܐ ܕܗܵܘܝܼ ܠܲܚܡܵܐ.“ 4ܐܝܼܢܵܐ ܗ̇ܘ ܓ̰ܘܼܘܸܒ ܠܹܗ ܘܐ݇ܡܝܼܪܹܗ، ”ܦܝܼܫܬܵܐ ܝܠܵܗ̇ ܟܬܝܼܒ݂ܬܵܐ:

ܠܹܐ ܝܠܵܗ̇ ܐܲܚܟ̰ܝܼ ܒܠܲܚܡܵܐ ܕܟܹܐ ܚܵܝܹܐ ܒܲܪܢܵܫܵܐ، ܐܸܠܵܐ ܒܟܠ ܗܹܡܸܙܡܵܢ ܕܦܵܠܛܵܐ ܡ̣ܢ ܦܘܼܡܵܐ ܕܐܲܠܵܗܵܐ.“#ܬܢܝܢ ܢܡܘܣܐ 8‏:3

5ܗ̇ܝܓܵܗ ܠܘܼܒܸܠ ܠܹܗ ܐܸܠܹܗ ܐܵܟܹܠܩܲܪܨܵܐ ܠܡܕܝܼܢ݇ܬܵܐ ܩܲܕܝܼܫܬܵܐ، ܘܡܘܼܟܠܹܐ ܠܹܗ ܐܸܠܹܗ ܥܲܠ ܟܸܢܦܵܐ ܕܗܲܝܟܠܵܐ. 6ܘܐ݇ܡܝܼܪܹܗ ܐܸܠܹܗ، ”ܐܸܢ ܒܪܘܿܢܵܐ ܕܐܲܠܵܗܵܐ ܝܘܸܬ، ܪܲܦܝܼ ܓܵܢܘܼܟ݂ ܠܠܬܸܚܬ؛ ܣܵܒܵܒ ܦܝܼܫܬܵܐ ܝܠܵܗ̇ ܟܬܝܼܒ݂ܬܵܐ:

ܒܸܬ ܦܵܩܹܕ ܠܡܲܠܲܐܟ݂ܘܼ̈ܗܝ ܒܘܼܬ ܕܝܼܘܼܟ݂، ܘܒܸܬ ܛܵܥܢܝܼ ܠܘܼܟ݂ ܥܲܠ ܐܝܼܕܵܬܲܝ̈ܗܝ، ܕܠܵܐ ܬܲܪܩܸܠܵܐ ܐܲܩܠܘܼܟ݂ ܒܟܹܐܦܵܐ.“#ܡܙܡܘܪ̈ܐ 91‏:11‏‐12

7ܐ݇ܡܝܼܪܹܗ ܐܸܠܹܗ ܝܼܫܘܿܥ، ”ܡܸܢܕܪܸܫ ܦܝܼܫܬܵܐ ܝܠܵܗ̇ ܟܬܝܼܒ݂ܬܵܐ:

ܠܵܐ ܓ̰ܲܪܒܸܬ ܠܡܵܪܝܵܐ ܐܲܠܵܗܘܼܟ݂.“#ܬܢܝܢ ܢܡܘܣܐ 6‏:16

8ܡ̣ܢ ܒܵܬ݇ܪ ܐܵܗܵܐ، ܡܸܢܕܪܸܫ ܠܘܼܒܸܠ ܠܹܗ ܐܸܠܹܗ ܐܵܟܹܠܩܲܪܨܵܐ ܠܚܲܕ ܛܘܼܪܵܐ ܪܵܒܵܐ ܪܵܡܵܐ، ܘܡܘܼܚܙܹܐ ܠܹܗ ܐܸܠܹܗ ܟܠܲܝܗܝ ܡܲܠܟܘܵܬܹ̈ܐ ܕܕܘܼܢܝܹܐ ܘܚܸܩܪܲܝܗ‌ܝ؛ 9ܘܐ݇ܡܝܼܪܹܗ ܐܸܠܹܗ، ”ܒܸܬ ܝܵܗ݇ܒܹܢ ܐܸܠܘܼܟ݂ ܟܠܲܝܗܝ ܐܲܢܹܐ، ܐܸܢ ܢܵܦܠܹܬ ܘܣܵܓ݂ܕܹܬ ܐܸܠܝܼ.“ 10ܗ̇ܝܓܵܗ ܐ݇ܡܝܼܪܹܗ ܐܸܠܹܗ ܝܼܫܘܿܥ، ”ܛܠܘܿܩ، ܝܵܐ ܣܵܛܵܢܵܐ، ܣܵܒܵܒ ܦܝܼܫܬܵܐ ܝܠܵܗ̇ ܟܬܝܼܒ݂ܬܵܐ:

ܠܡܵܪܝܵܐ ܐܲܠܵܗܘܼܟ݂ ܣܵܓ݂ܕܹܬ، ܘܐܸܠܹܗ ܒܢܲܦ̮ܫܹܗ ܦܵܠܚܹܬ.“#ܬܢܝܢ ܢܡܘܣܐ 6‏:13

11ܗ̇ܝܓܵܗ، ܫܒ݂ܝܼܩ ܠܹܗ ܐܸܠܹܗ ܐܵܟܹܠܩܲܪܨܵܐ، ܘܗܵܐ، ܡܲܠܲܐܟܹ̈ܐ ܐ݇ܬܹܐ ܠܗܘܿܢ ܘܥܒ݂ܝܼܕ ܠܗܘܿܢ ܚܸܠܡܲܬ ܐܸܠܹܗ.

ܡܫܝܼܚܵܐ ܫܲܪܘܼܝܹܐ ܠܡܲܟܪܘܼܙܹܐ

ܡܪܩܘܣ 1‏:14‏‐15؛ ܠܘܩܐ 4‏:14‏‐15

12ܐܝܼܡܲܢ ܕܫܡܝܼܥ ܠܹܗ ܝܼܫܘܿܥ ܕܦܝܼܫ ܠܹܗ ܕܒ݂ܝܼܩܵܐ ܝܘܿܚܲܢܵܢ، ܫܘܼܢܹܐ ܠܹܗ ܠܓܠܝܼܠܵܐ. 13ܘܫܒ݂ܝܼܩܵܐ ܠܹܗ ܢܵܨܪܲܬ، ܐ݇ܬܹܐ ܠܹܗ ܘܥܡܝܼܪܹܗ ܓܵܘ ܟܦܲܪܢܵܚܘܿܡ، ܕܝܼܠܵܗ̇ ܥܲܠ ܡܲܪܙܵܐ ܕܝܵܡܵܐ، ܓܵܘ ܬܚܘܼܡܵܐ ܕܙܒ݂ܘܿܠܘܿܢ ܘܕܢܲܦ̮ܬܵܠܝܼ. 14ܗܲܕܟ݂ܵܐ ܕܦܵܐܹܫ ܬܘܼܡܸܡܵܐ ܡܸܢܕܝܼ ܕܦܝܼܫ ܠܹܗ ܐ݇ܡܝܼܪܵܐ ܒܐܹܫܲܥܝܵܐ ܢܒ݂ܝܼܵܐ ܕܐ݇ܡܝܼܪܹܗ:

15ܐܲܪܥܵܐ ܕܙܒ݂ܘܿܠܘܿܢ، ܐܲܪܥܵܐ ܕܢܲܦ̮ܬܵܠܝܼ، ܕܝܼܠܵܗ̇ ܥܲܠ ܐܘܼܪܚܵܐ ܕܝܵܡܵܐ، ܥܸܒ݂ܪܵܐ ܕܝܘܿܪܕܢܵܢ، ܓܠܝܼܠܵܐ ܕܐܸܡܘܵܬܹ̈ܐ.

16ܥܲܡܵܐ ܕܝ݇ܬܝܼܒ݂ܵܐ ܝܠܹܗ ܓܵܘ ܚܸܫܟܵܐ ܚܙܹܐ ܠܹܗ ܒܲܗܪܵܐ ܓܘܼܪܵܐ، ܘܐܵܢܝܼ ܕܝ݇ܬܝܼܒܹܐ ܝܢܵܐ ܒܐܲܪܥܵܐ ܘܒܛܸܠܵܠܹ̈ܐ ܕܡܵܘܬܵܐ، ܙܪܝܼܩ ܠܹܗ ܒܲܗܪܵܐ ܥܲܠܲܝܗܝ.#ܐܫܥܝܐ 9‏:1‏‐12 17ܡ̣ܢ ܗ̇ܝ ܥܕܵܢܵܐ ܫܘܼܪܹܐ ܠܹܗ ܝܼܫܘܿܥ ܡܲܟܪܘܼܙܹܐ ܘܒܹܐܡܵܪܵܐ، ”ܬܲܘܸܒܘܼܢ، ܣܵܒܵܒ ܩܘܼܪܒܸܢܬܵܐ ܝܠܵܗ̇ ܡܲܠܟܘܼܬܵܐ ܕܫܡܲܝܵܐ.“

ܐܲܪܒܥܵܐ ܬܲܠܡܝܼ̈ܕܹܐ ܩܲܕ݇ܡܵܝܹ̈ܐܦܝܵܫܵܐ ܩܸܪܝܹܐ

ܡܪܩܘܣ 1‏:16‏‐20؛ ܠܘܩܐ 5‏:1‏‐11

18ܟܲܕ ܒܸܚܕܵܪܵܐ ܝܗ݇ܘܵܐ ܝܼܫܘܿܥ ܥܲܠ ܡܲܪܙܵܐ ܕܝܵܡܵܐ ܕܓܠܝܼܠܵܐ ܚܙܹܐ ܠܹܗ ܬܪܹܝ ܐܲܚܘܿܢܘܵܬܹ̈ܐ، ܫܸܡܥܘܿܢ ܕܦܝܼܫ ܠܹܗ ܩܸܪܝܵܐ ܟܹܐܦܵܐ ܘܐܲܢܕܪܹܐܘܿܣ ܐܲܚܘܿܢܘܼܗܝ، ܒܸܕܪܵܝܵܐ ܓܲܪ̈ܕܲܝܗܝ ܓܵܘ ܝܵܡܵܐ، ܣܵܒܵܒ ܨܲܝܵܕܹ̈ܐ ܝܗ݇ܘܵܘ. 19ܐ݇ܡܝܼܪܹܗ ܐܸܠܲܝܗܝ، ”ܬܹܝܡܘܼܢ ܒܵܬ݇ܪܝܼ ܘܒܸܬ ܥܵܒ݂ܕܹܢܵܘܟ݂ܘܿܢ ܨܲܝܵܕܹ̈ܐ ܕܒܢܲܝ̈ܢܵܫܵܐ.“ 20ܘܗܲܪ ܒܗ̇ܝ ܥܕܵܢܵܐ ܫܒ݂ܝܼܩ ܠܗܘܿܢ ܓܲܪ̈ܕܲܝܗܝ ܘܐ݇ܙܝܼܠ ܠܗܘܿܢ ܒܵܬ݇ܪܹܗ. 21ܘܟܲܕ ܥܒ݂ܝܼܪܹܗ ܡ̣ܢ ܬܵܡܵܐ، ܚܙܹܐ ܠܹܗ ܬܪܹܝ ܐܲܚܘܿܢܘܵܬܹ̈ܐ ܐ݇ܚܹܪ̈݇ܢܹܐ، ܝܲܥܩܘܿܒ݂ ܒܪܘܿܢܵܐ ܕܙܲܒ݂ܕܲܝ ܘܝܘܿܚܲܢܵܢ ܐܲܚܘܿܢܘܼܗܝ، ܓܵܘ ܓܵܡܝܼ ܥܲܡ ܙܲܒ݂ܕܲܝ ܒܵܒܲܝܗܝ ܬܲܪܘܼܨܹܐ ܓܲܪ̈ܕܲܝܗܝ؛ ܘܩܸܪܝܲܝ ܠܹܗ. 22ܘܗܲܪ ܒܗ̇ܝ ܥܕܵܢܵܐ ܫܒ݂ܝܼܩ ܠܗܘܿܢ ܠܓܵܡܝܼ ܘܠܒܵܒܲܝܗܝ ܘܐ݇ܙܝܼܠ ܠܗܘܿܢ ܒܵܬ݇ܪܹܗ.

ܡܫܝܼܚܵܐ ܡܲܟܪܘܼܙܹܐܘܒܲܣܘܼܡܹܐ ܡܲܪ̈ܥܵܢܹܐ

ܠܘܩܐ 6‏:17‏‐19

23ܒܸܚܕܵܪܵܐ ܝܗ݇ܘܵܐ ܝܼܫܘܿܥ ܒܟܠܹܗ ܓܠܝܼܠܵܐ ܘܡܲܠܘܼܦܹܐ ܝܗ݇ܘܵܐ ܓܵܘ ܟܢܘܼܫܝܵܬܲܝ̈ܗܝ ܘܡܲܟܪܘܼܙܹܐ ܐܹܘܲܢܓܲܠܝܼܘܿܢ ܕܡܲܠܟܘܼܬܵܐ ܘܒܲܣܘܼܡܹܐ ܟܠ ܟܹܐܒ݂ܵܐ ܘܟܠ ܡܲܪܥܵܐ ܕܓܵܘ ܥܲܡܵܐ. 24ܦܝܼܫ ܠܵܗ̇ ܫܡܝܼܥܬܵܐ ܒܘܼܬ ܕܝܼܹܗ ܓܵܘ ܟܠܵܗ̇ ܣܘܼܪܝܼܵܐ، ܘܡܘܼܐܬܹܐ ܠܗܘܿܢ ܠܟܸܣ ܠܹܗ ܟܠܲܝܗܝ ܐܵܢܝܼ ܕܓ̰ܲܢܓ̰ܘܼܪܹܐ ܝܗ݇ܘܵܘ ܒܡܲܪ̈ܥܹܐ ܦܪ̈ܝܼܫܹܐ ܘܡܘܼܠܝܸܨܹܐ ܒܬܘܼܫܢܵܩܹ̈ܐ، ܘܐܵܢܝܼ ܕܐܝܼܬ ܗ݇ܘܵܘ ܒܝܼܲܝܗܝ ܫܹܐܕܹ̈ܐ، ܘܒܲܪ ܐܸܓܵܪܹ̈ܐ، ܘܫܦܝܼܠܹ̈ܐ، ܘܒܘܼܣܡܲܝ ܠܹܗ. 25ܘܐ݇ܙܝܼܠ ܠܗܘܿܢ ܒܵܬ݇ܪܹܗ ܪܵܒܵܐ ܟܸܢܫܹ̈ܐ ܡ̣ܢ ܓܠܝܼܠܵܐ ܘܡ̣ܢ ܐܘܼܚܕܵܢܵܐ ܕܥܸܣܪܲܬ ܡܕܝܼܢܵܬܹ̈ܐ ܘܡ̣ܢ ܐܘܿܪܸܫܠܸܡ ܘܡ̣ܢ ܝܼܗܘܼܕ، ܘܡ̣ܢ ܥܸܒ݂ܪܵܐ ܕܝܘܿܪܕܢܵܢ.

Currently Selected:

ܡܬܝ 4: ABTAB

Highlight

Copy