ܡܪܩܘܣ 16
16
ܩܝܵܡܬܵܐ ܕܝܼܫܘܿܥ ܡܫܝܼܚܵܐܡ̣ܢ ܓܵܘ ܡܝܼܬܹ̈ܐ
ܡܬܝ 28:1‐8؛ ܠܘܩܐ 24:1‐12؛ ܝܘܚܢܢ 20:1‐10
1ܟܲܕ ܥܒ݂ܝܼܪܵܗ̇ ܫܲܒܬܵܐ، ܡܲܪܝܲܡ ܡܲܓ݂ܕܠܵܝܬܵܐ ܘܡܲܪܝܲܡ ܝܸܡܵܐ ܕܝܲܥܩܘܿܒ݂، ܘܫܵܠܘܿܡ، ܙܒ݂ܝܼܢܗܘܿܢ ܒܸܣܡܹ̈ܐ ܕܐܵܬܝܼ ܗ݇ܘܵܘ ܘܡܵܫܚܝܼ ܗ݇ܘܵܘ ܠܝܼܫܘܿܥ. 2ܘܒܨܲܦܪܵܐ ܕܚܲܕܒܫܲܒܵܐ، ܒܙܪܵܩܵܐ ܕܫܸܡܫܵܐ، ܐ݇ܬܹܐ ܠܗܘܿܢ ܠܒܹܝܬ ܩܒ݂ܘܼܪܵܐ. 3ܘܐܵܡܪܝܼ ܗ݇ܘܵܘ ܓܵܘ ܓܵܢܲܝܗܝ، ”ܡܵܢܝܼ ܒܸܬ ܡܲܚܕܸܪ ܐܸܠܲܢ ܠܟܹܐܦܵܐ ܡ̣ܢ ܬܲܪܥܵܐ ܕܒܹܝܬ ܩܒ݂ܘܼܪܵܐ؟“ 4ܐܝܼܢܵܐ ܐܝܼܡܲܢ ܕܚܝܼܪܗܘܿܢ ܚܙܹܐ ܠܗܘܿܢ ܠܟܹܐܦܵܐ، ܕܝܼܗ݇ܘܵܐ ܓܘܼܪܵܐ، ܡܘܼܚܕܸܪܵܐ. 5ܥܒ݂ܝܼܪܗܘܿܢ ܠܒܹܝܬ ܩܒ݂ܘܼܪܵܐ ܘܚܙܹܐ ܠܗܘܿܢ ܥܠܲܝܡܵܐ ܝ݇ܬܝܼܒ݂ܵܐ ܡ̣ܢ ܝܲܡܝܼܢܵܐ، ܠܒ݂ܝܼܫܵܐ ܠܒ݂ܝܼܫܬܵܐ ܚܘܵܪܬܵܐ، ܘܙܕܝܼܥ ܠܗܘܿܢ. 6ܐܝܼܢܵܐ ܗ̇ܘ ܐ݇ܡܝܼܪܹܗ ܐܸܠܲܝܗܝ، ”ܠܵܐ ܙܵܕܥܝܼܬܘܿܢ، ܠܝܼܫܘܿܥ ܢܵܨܪܵܝܵܐ ܒܸܛܥܵܝܵܐ ܝܬܘܿܢ، ܗ̇ܘ ܕܦܝܼܫ ܠܹܗ ܙܩܝܼܦܵܐ. ܩܝܼܡ ܠܹܗ، ܠܹܐ ܝܠܹܗ ܠܐܲܟ݂ܵܐ. ܚܙܹܝܡܘܼܢ، ܐܵܗܵܐ ܝܠܵܗ̇ ܕܘܼܟܵܐ ܕܡܘܼܬܸܒ݂ ܠܗܘܿܢ ܐܸܠܹܗ. 7”ܐܝܼܢܵܐ ܙܹܠ݇ܡܘܼܢ ܘܐ݇ܡܘܿܪܘܼܢ ܠܬܲܠܡܝܼܕܘܼ̈ܗܝ ܘܠܫܸܡܥܘܿܢ ܟܹܐܦܵܐ، ܕܐ݇ܙܝܼܠ ܠܹܗ ܡ̣ܢ ܩܵܕ݇ܡ ܕܝܼܵܘܟ݂ܘܿܢ ܠܓܠܝܼܠܵܐ. ܬܵܡܵܐ ܒܸܬ ܚܵܙܹܝܬܘܿܢ ܠܹܗ ܕܵܐܟ݂ܝܼ ܕܐ݇ܡܝܼܪܹܗ ܐܸܠܵܘܟ݂ܘܿܢ.“ 8ܐܝܼܡܲܢ ܕܫܡܝܼܥ ܠܗܘܿܢ، ܦܠܝܼܛ ܠܗܘܿܢ ܘܐ݇ܙܝܼܠ ܠܗܘܿܢ ܡ̣ܢ ܩܲܒ݂ܪܵܐ، ܒܥܘܼܓ̰ܵܒܵܐ ܘܪܲܬܪܲܬܬܵܐ، ܘܠܐ݇ܢܵܫܵܐ ܡܸܢܕܝܼ ܠܵܐ ܐ݇ܡܝܼܪܗܘܿܢ ܣܵܒܵܒ ܒܸܙܕܵܥܵܐ ܝܗ݇ܘܵܘ.
ܝܼܫܘܿܥ ܡܲܚܙܘܼܝܹܐ ܓܵܢܹܗ ܠܡܲܪܝܲܡ ܡܲܓ݂ܕܠܵܝܬܵܐ
ܡܬܝ 28:9‐10؛ ܝܘܚܢܢ 20:11‐18
9ܒܨܲܦܪܵܐ ܕܚܲܕܒܫܲܒܵܐ ܐܝܼܡܲܢ ܕܩܝܼܡ ܠܹܗ ܝܼܫܘܿܥ، ܦܝܼܫ ܠܹܗ ܚܸܙܝܵܐ ܩܵܕ݇ܡܵܝܬܵܐ ܠܡܲܪܝܲܡ ܡܲܓ݂ܕܠܵܝܬܵܐ، ܗ̇ܝ ܕܦܘܼܠܛܵܐ ܝܗ݇ܘܵܐ ܡܸܢܘܼܗ̇ ܫܲܒ݂ܥܵܐ ܫܹܐܕܹ̈ܐ. 10ܘܗ̇ܝ ܐ݇ܙܝܼܠ ܠܵܗ̇ ܘܐ݇ܡܝܼܪܵܗ̇ ܠܐܵܢܝܼ ܕܗܘܝܼܹܐ ܝܗ݇ܘܵܘ ܥܲܡܹܗ، ܘܐܵܢܝܼ ܒܸܥܒ݂ܵܕܵܐ ܝܗ݇ܘܵܘ ܬܵܥܙܝܼ ܘܒܸܒܟ݂ܵܝܵܐ. 11ܘܐܝܼܡܲܢ ܕܫܡܝܼܥ ܠܗܘܿܢ ܕܐ݇ܡܝܼܪܵܗ̇ ܚܵܝܵܐ ܝܠܹܗ ܘܦܝܼܫ ܠܹܗ ܚܸܙܝܵܐ ܐܸܠܘܼܗ̇، ܠܵܐ ܗܘܼܡܸܢܗܘܿܢ.
ܝܼܫܘܿܥ ܦܝܵܫܵܐ ܚܸܙܝܵܐܠܬܪܹܝ ܬܲܠܡܝܼ̈ܕܹܐ
ܠܘܩܐ 24:13‐35
12ܡ̣ܢ ܒܵܬ݇ܪ ܐܵܗܵܐ، ܦܝܼܫ ܠܹܗ ܚܸܙܝܵܐ ܠܬܪܹܝ ܡܸܢܲܝܗܝ ܒܕܡܘܼܬܵܐ ܐ݇ܚܹܪ݇ܬܵܐ، ܟܲܕ ܒܹܐܙܵܠܵܐ ܠܚܕܵܐ ܡܵܬܵܐ. 13ܐܲܢܹܐ ܬܪܹܝ ܐ݇ܙܝܼܠ ܠܗܘܿܢ ܘܡܘܼܚܒܸܪܗܘܿܢ ܠܐܵܢܝܼ ܬܲܠܡܝܼ̈ܕܹܐ ܐ݇ܚܹܪ̈݇ܢܹܐ، ܘܐܘܼܦ ܐܸܠܲܝܗܝ ܠܵܐ ܗܘܼܡܸܢܗܘܿܢ.
ܝܼܫܘܿܥ ܫܲܕܘܼܪܹܐܠܬܲܠܡܝܼ̈ܕܹܐ ܕܡܲܟܪܸܙܝܼ
ܡܬܝ 28:16‐20؛ ܠܘܩܐ 24:36‐49؛ ܝܘܚܢܢ 20:19‐23؛ ܣܘܥܪ̈ܢܐ 1:6‐8
14ܒܚܲܪܬܵܐ ܦܝܼܫ ܠܹܗ ܚܸܙܝܵܐ ܠܚܲܕܸܥܣܲܪ ܟܲܕ ܝ݇ܬܝܼܒܹܐ ܠܣܘܼܦܪܵܐ، ܘܠܝܼܡܲܝ ܠܹܗ ܥܲܠ ܒܵܨܘܿܪܘܼܬܵܐ ܕܗܲܝܡܵܢܘܼܬܲܝܗܝ ܘܠܩܸܫܝܘܼܬܵܐ ܕܠܸܒܲܝܗܝ ܕܠܵܐ ܗܘܼܡܸܢܗܘܿܢ ܠܐܵܢܝܼ ܕܚܙܹܐ ܠܗܘܿܢ ܐܸܠܹܗ ܩܝܼܡܵܐ. 15ܐ݇ܡܝܼܪܹܗ ܐܸܠܲܝܗܝ، ”ܙܹܠ݇ܡܘܼܢ ܠܟܠܹܗ ܥܵܠܡܵܐ ܘܡܲܟܪܸܙܘܼܢ ܐܹܘܲܢܓܲܠܝܼܘܿܢ ܒܟܠܵܗ̇ ܒܪܝܼܬܵܐ. 16”ܗ̇ܘ ܕܗܲܡܸܢ ܘܥܵܡܹܕ ܒܸܬ ܦܵܪܹܩ، ܘܗ̇ܘ ܕܠܵܐ ܗܲܡܸܢ ܒܸܬ ܦܵܐܹܫ ܕܝܼܢܵܐ، 17”ܘܐܵܢܝܼ ܕܗܲܡܸܢܝܼ ܒܸܬ ܥܵܒ݂ܕܝܼ ܢܝܼܫܲܢܩܹ̈ܐ: ܒܸܬ ܦܲܠܛܝܼ ܫܹܐܕܹ̈ܐ ܒܫܸܡܝܼ، ܘܒܸܬ ܗܲܡܙܸܡܝܼ ܒܠܸܫܵܢܹ̈ܐ ܚܵܕ݇ܬܹ̈ܐ، 18”ܒܸܬ ܫܵܩܠܝܼ ܚܘܼܵܘܵܬܹ̈ܐ، ܘܐܸܢ ܣܲܡܵܐ ܕܡܵܘܬܵܐ ܫܵܬܝܼ ܗܸܟ̃ ܠܹܐ ܚܲܙܕܸܓ ܠܗܘܿܢ، ܘܒܸܬ ܡܲܬܒ݂ܝܼ ܐܝܼܕܵܬܲܝ̈ܗܝ ܥܲܠ ܡܪ̈ܝܼܥܹܐ ܘܒܸܬ ܒܵܣܡܝܼ.“
ܣܘܼܠܵܩܵܐ ܕܝܼܫܘܿܥ
ܠܘܩܐ 24:50‐53؛ ܣܘܥܪ̈ܢܐ 1:9‐11
19ܡ̣ܢ ܒܵܬ݇ܪ ܕܗܘܼܡܙܸܡ ܠܹܗ ܡܵܪܲܢ ܝܼܫܘܿܥ ܥܲܡܲܝܗܝ، ܦܝܼܫ ܠܹܗ ܡܘܼܐܣܩܵܐ ܠܫܡܲܝܵܐ ܘܝ݇ܬܝܼܒ݂ ܠܹܗ ܡ̣ܢ ܝܲܡܝܼܢܵܐ ܕܐܲܠܵܗܵܐ. 20ܘܐܵܢܝܼ ܦܠܝܼܛ ܠܗܘܿܢ ܘܡܘܼܟܪܸܙ ܠܗܘܿܢ ܒܟܠ ܕܘܼܟܵܐ، ܘܡܵܪܲܢ ܟܹܐ ܗܲܝܸܪ ܗ݇ܘܵܐ ܠܗܘܿܢ ܘܡܲܩܘܹܐ ܗ݇ܘܵܐ ܗܹܡܸܙܡܵܢܲܝ̈ܗܝ ܒܢܝܼܫܲܢܩܹ̈ܐ ܕܥܵܒ݂ܕܝܼ ܗ݇ܘܵܘ.
Currently Selected:
ܡܪܩܘܣ 16: ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
