ܡܪܩܘܣ 2
2
ܝܼܫܘܿܥ ܒܲܣܘܼܡܹܐ ܚܲܕ ܫܦܝܼܠܵܐ
ܡܬܝ 9:1‐8؛ ܠܘܩܐ 5:17‐26
1ܡܸܢܕܪܸܫ ܥܒ݂ܝܼܪܹܗ ܝܼܫܘܿܥ ܠܟܦܲܪܢܵܚܘܿܡ ܡ̣ܢ ܒܵܬ݇ܪ ܚܲܕ݇ܟܡܵܐ ܝܵܘܡܵܢܹ̈ܐ، ܘܟܲܕ ܫܡܝܼܥ ܠܗܘܿܢ ܕܓܵܘ ܒܲܝܬܵܐ ܝܗ݇ܘܵܐ، 2ܓ̰ܡܝܼܥ ܠܗܘܿܢ ܟܸܢܫܹ̈ܐ ܪܵܒܵܐ ܗܵܕܵܐ ܕܠܲܝܬ ܗ݇ܘܵܐ ܕܘܼܟܵܐ، ܐܘܼܦ ܠܵܐ ܩܵܕ݇ܡ ܬܲܪܥܵܐ، ܘܗܲܡܙܸܡ ܗ݇ܘܵܐ ܐܸܠܲܝܗܝ ܗܹܡܸܙܡܵܢ. 3ܗ̇ܝܓܵܗ ܐ݇ܬܹܐ ܠܗܘܿܢ ܘܡܘܼܐܬܹܐ ܠܗܘܿܢ ܠܟܸܣ ܠܹܗ ܚܲܕ ܫܦܝܼܠܵܐ، ܦܝܼܫܵܐ ܛܥܝܼܢܵܐ ܒܝܲܕ ܐܲܪܒܥܵܐ ܐ݇ܢܵܫܹ̈ܐ. 4ܘܐܝܼܡܲܢ ܕܠܵܐ ܡܨܹܐ ܠܗܘܿܢ ܩܲܪܒܸܢܝܼ ܗ݇ܘܵܘ ܠܟܸܣ ܝܼܫܘܿܥ ܡ̣ܢ ܟܸܢܫܵܐ، ܓܘܼܠܹܐ ܠܗܘܿܢ ܠܐ݇ܓܵܪܹܐ ܐܲܝܟܵܐ ܕܝܼܗ݇ܘܵܐ ܝܼܫܘܿܥ، ܘܡܘܼܨܠܹܐ ܠܗܘܿܢ ܠܫܘܝܼܬܵܐ ܕܥܲܠܘܼܗ̇ ܝܗ݇ܘܵܐ ܗ̇ܘ ܫܦܝܼܠܵܐ. 5ܟܲܕ ܚܙܹܐ ܠܹܗ ܝܼܫܘܿܥ ܗܲܝܡܵܢܘܼܬܲܝܗܝ، ܐ݇ܡܝܼܪܹܗ ܠܗ̇ܘ ܫܦܝܼܠܵܐ، ”ܒܪܘܿܢܝܼ، ܦܘܼܚܠܹܐ ܝܢܵܐ ܐܸܠܘܼܟ݂ ܚܛܝܼܵܬܘܼ̈ܟ݂.“
6ܐܝܼܢܵܐ ܚܲܕ݇ܟܡܵܐ ܣܵܦܪܹ̈ܐ ܕܝ݇ܬܝܼܒܹܐ ܝܗ݇ܘܵܘ ܬܵܡܵܐ، ܒܸܚܫܵܒ݂ܵܐ ܝܗ݇ܘܵܘ ܒܠܸܒܲܝܗܝ، 7”ܩܵܡܘܿܕܝܼ ܒܸܓܕܵܦܵܐ ܝܠܹܗ ܐܵܗܵܐ؟ ܡܵܢܝܼ ܡܵܨܹܐ ܦܲܚܸܠ ܚܛܝܼܵܬܹ̈ܐ ܐܸܠܵܐ ܐܲܠܵܗܵܐ ܐܲܚܟ̰ܝܼ؟“ 8ܝܼܫܘܿܥ ܗܲܪ ܒܗ̇ܝ ܥܕܵܢܵܐ ܝ݇ܕܝܼܥ ܠܹܗ ܒܪܘܼܚܹܗ ܕܗܲܕܟ݂ܵܐ ܒܸܚܫܵܒ݂ܵܐ ܝܗ݇ܘܵܘ ܒܓܵܢܲܝܗܝ، ܐ݇ܡܝܼܪܹܗ ܐܸܠܲܝܗܝ، ”ܩܵܡܘܿܕܝܼ ܒܸܚܫܵܒ݂ܵܐ ܝܬܘܿܢ ܗܲܕܟ݂ܵܐ ܒܠܸܒܵܘܟ݂ܘܿܢ؟ 9”ܐܲܝܢܝܼ ܝܠܹܗ ܒܘܼܫ ܦܫܘܼܩܵܐ ܠܹܐܡܵܪܵܐ ܠܫܦܝܼܠܵܐ، ’ܦܘܼܚܠܹܐ ܝܢܵܐ ܐܸܠܘܼܟ݂ ܚܛܝܼܵܬܘܼ̈ܟ݂،‘ ܝܲܢ ܠܹܐܡܵܪܵܐ، ’ܩܘܼܡ، ܫܩܘܿܠ ܫܘܝܼܬܘܼܟ݂ ܘܚܕܘܿܪ؟‘ 10”ܐܝܼܢܵܐ ܕܝܵܕܥܝܼܬܘܿܢ ܕܒܪܘܿܢܵܐ ܕܐ݇ܢܵܫܵܐ ܐܝܼܬ ܠܹܗ ܫܘܼܠܛܵܢܵܐ ܥܲܠ ܐܲܪܥܵܐ ܕܦܲܚܸܠ ܚܛܝܼܵܬܹ̈ܐ،“ ܗ̇ܝܓܵܗ ܐ݇ܡܝܼܪܹܗ ܠܫܦܝܼܠܵܐ، 11”ܐܸܠܘܼܟ݂ ܒܹܐܡܵܪܵܐ ܝܘܸܢ: ܩܘܼܡ، ܫܩܘܿܠ ܫܘܝܼܬܘܼܟ݂ ܘܙܹܠ݇ ܠܒܲܝܬܘܼܟ݂.“ 12ܘܗܲܪ ܒܗ̇ܝ ܥܕܵܢܵܐ ܩܝܼܡ ܠܹܗ، ܫܩܝܼܠ ܠܹܗ ܫܘܝܼܬܹܗ ܘܦܠܝܼܛ ܠܹܗ ܩܵܕ݇ܡ ܥܲܝܢܹ̈ܐ ܕܟܠܲܝܗܝ، ܗܲܕܟ݂ܵܐ ܕܥܲܓ̰ܒܝܼ ܗ݇ܘܵܘ ܟܠܲܝܗܝ، ܘܫܲܒܚܝܼ ܗ݇ܘܵܘ ܠܐܲܠܵܗܵܐ، ܒܹܐܡܵܪܵܐ، ”ܗܲܪ ܠܹܐ ܝܘܲܚ ܚܸܙܝܹܐ ܗܲܕܟ݂ܵܐ ܡܸܢܕܝܼ.“
ܡܲܬܲܝ ܒܸܬܒܵܥܵܐ ܠܝܼܫܘܿܥ
ܡܬܝ 9:9‐13؛ ܠܘܩܐ 5:27‐32
13ܘܦܠܝܼܛ ܠܹܗ ܝܼܫܘܿܥ ܡܸܢܕܪܸܫ ܠܟܸܣ ܝܵܡܵܐ، ܘܟܠܹܗ ܟܸܢܫܵܐ ܒܹܐܬܵܝܵܐ ܝܗ݇ܘܵܘ ܠܟܸܣ ܠܹܗ، ܘܡܲܠܘܼܦܲܝ ܝܗ݇ܘܵܐ. 14ܘܟܲܕ ܒܸܥܒ݂ܵܪܵܐ، ܚܙܹܐ ܠܹܗ ܠܠܹܘܝܼ ܒܪܘܿܢܵܐ ܕܚܲܠܦܲܝ ܝ݇ܬܝܼܒ݂ܵܐ ܓܵܘ ܒܹܝܬ ܡܵܟ݂ܣܹ̈ܐ، ܘܐ݇ܡܝܼܪܹܗ ܐܸܠܹܗ، ”ܬܵܐ ܒܵܬ݇ܪܝܼ.“ ܘܩܝܼܡ ܠܹܗ ܐ݇ܙܝܼܠ ܠܹܗ ܒܵܬ݇ܪܹܗ.
15ܟܲܕ ܝ݇ܬܝܼܒ݂ܵܐ ܝܗ݇ܘܵܐ ܠܣܘܼܦܪܵܐ ܓܵܘ ܒܲܝܬܵܐ ܕܠܹܘܝܼ، ܪܵܒܵܐ ܡܵܟ݂ܣܹ̈ܐ ܘܚܲܛܵܝܹ̈ܐ ܝ݇ܬܝܼܒܹܐ ܝܗ݇ܘܵܘ ܥܲܡ ܝܼܫܘܿܥ ܘܥܲܡ ܬܲܠܡܝܼܕܘܼ̈ܗܝ، ܣܵܒܵܒ ܪܵܒܵܐ ܝܗ݇ܘܵܘ ܐܵܢܝܼ ܕܐ݇ܬܹܐ ܠܗܘܿܢ ܒܵܬ݇ܪܹܗ. 16ܐܝܼܢܵܐ ܣܵܦܪܹ̈ܐ ܘܦܪ̈ܝܼܫܹܐ، ܟܲܕ ܚܙܹܐ ܠܗܘܿܢ ܠܝܼܫܘܿܥ ܒܹܐܟ݂ܵܠܵܐ ܥܲܡ ܡܵܟ݂ܣܹ̈ܐ ܘܚܲܛܵܝܹ̈ܐ، ܐ݇ܡܝܼܪܗܘܿܢ ܠܬܲܠܡܝܼܕܘܼ̈ܗܝ، ”ܩܵܡܘܿܕܝܼ ܒܹܐܟ݂ܵܠܵܐ ܝܠܹܗ ܥܲܡ ܡܵܟ݂ܣܹ̈ܐ ܘܚܲܛܵܝܹ̈ܐ؟“ 17ܟܲܕ ܫܡܝܼܥ ܠܹܗ ܝܼܫܘܿܥ ܐܵܗܵܐ، ܐ݇ܡܝܼܪܹܗ ܐܸܠܲܝܗܝ، ”ܠܹܐ ܝܢܵܐ ܣܢܝܼܩܹܐ ܠܐܵܣܝܵܐ ܐܵܢܝܼ ܕܝܼܢܵܐ ܒܚܘܼܠܡܵܢܵܐ، ܐܸܠܵܐ ܐܵܢܝܼ ܕܡܪܝܼܥܹܐ ܝܢܵܐ. ܠܵܐ ܐ݇ܬܹܐ ܠܝܼ ܕܩܵܪܹܝܢ ܠܙܲܕܝܼܩܹ̈ܐ ܐܸܠܵܐ ܠܚܲܛܵܝܹ̈ܐ.“
ܒܘܼܩܵܪܵܐ ܒܘܼܬ ܨܵܘܡܵܐ
ܡܬܝ 9:14‐17؛ ܠܘܩܐ 5:33‐39
18ܐ݇ܬܹܐ ܠܗܘܿܢ ܠܟܸܣ ܠܹܗ ܬܲܠܡܝܼ̈ܕܹܐ ܕܝܘܿܚܲܢܵܢ ܘܕܦܪ̈ܝܼܫܹܐ ܕܝܼܗ݇ܘܵܘ ܨܝܼܡܹܐ، ܘܒܘܼܩܸܪܗܘܿܢ ܡܸܢܹܗ، ”ܩܵܡܘܿܕܝܼ ܬܲܠܡܝܼ̈ܕܹܐ ܕܝܘܿܚܲܢܵܢ ܘܕܦܪ̈ܝܼܫܹܐ ܟܹܐ ܨܵܝܡܝܼ ܐܝܼܢܵܐ ܬܲܠܡܝܼ̈ܕܹܐ ܕܝܼܘܼܟ݂ ܠܹܐ ܨܵܝܡܝܼ؟“ 19ܘܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܩܵܡܘܿܕܝܼ ܟܹܐ ܡܵܨܝܼ ܐܲܪ̈ܚܹܐ ܕܚܠܘܼܠܵܐ ܨܵܝܡܝܼ ܟܡܵܐ ܕܚܸܬܢܵܐ ܥܲܡܲܝܗܝ ܝܠܹܗ؟ ܠܵܐ، ܠܹܐ ܡܵܨܝܼ ܟܡܵܐ ܕܗ̇ܘ ܥܲܡܲܝܗܝ ܝܠܹܗ. 20”ܐܝܼܢܵܐ ܒܸܬ ܐܵܬܝܼ ܝܵܘܡܵܢܹ̈ܐ ܐܝܼܡܲܢ ܕܦܵܐܹܫ ܫܩܝܼܠܵܐ ܚܸܬܢܵܐ ܡܸܢܲܝܗܝ، ܗ̇ܝܓܵܗ ܒܸܬ ܨܵܝܡܝܼ.
21”ܐ݇ܢܵܫܵܐ ܠܹܐ ܚܵܐܹܛ ܥܵܪܵܝܬܵܐ ܚܲܕܬܵܐ ܥܲܠ ܠܒ݂ܝܼܫܬܵܐ ܒܠܝܼܬܵܐ، ܘܐܸܢ ܠܵܐ، ܒܸܬ ܓܵܪܫܵܐ ܥܵܪܵܝܬܵܐ ܡ̣ܢ ܠܒ݂ܝܼܫܬܵܐ، ܘܒܸܬ ܙܵܐܹܕ ܦܸܪܛܵܐ. 22”ܘܐܘܼܦ ܚܲܕ ܠܹܐ ܕܵܪܹܐ ܚܲܡܪܵܐ ܚܵܕ݇ܬܵܐ ܓܵܘ ܓܘܼܕܹ̈ܐ ܒܸܠܝܹ̈ܐ، ܘܐܸܢ ܠܵܐ، ܚܲܡܪܵܐ ܒܸܬ ܒܵܙܹܥ ܠܗܘܿܢ ܓܘܼܕܹ̈ܐ، ܘܓܘܼܕܹ̈ܐ ܒܸܬ ܚܵܪܒ݂ܝܼ ܘܚܲܡܪܵܐ ܫܵܦܹܟ݂؛ ܐܸܠܵܐ ܟܹܐ ܕܵܪܝܼ ܚܲܡܪܵܐ ܚܵܕ݇ܬܵܐ ܓܵܘ ܓܘܼܕܹ̈ܐ ܚܵܕ݇ܬܹ̈ܐ.“
ܒܪܘܿܢܵܐ ܕܐ݇ܢܵܫܵܐ ܡܵܪܵܐܕܫܲܒܬܵܐ ܝܠܹܗ
ܡܬܝ 12:1‐8؛ ܠܘܩܐ 6:1‐5
23ܟܲܕ ܒܸܚܕܵܪܵܐ ܝܗ݇ܘܵܐ ܝܼܫܘܿܥ ܒܝܵܘܡܵܐ ܕܫܲܒܬܵܐ ܓܵܘ ܚܲܩܠܵܢܹ̈ܐ، ܫܘܼܪܹܐ ܠܗܘܿܢ ܬܲܠܡܝܼܕܘܼ̈ܗܝ ܒܸܫܠܵܓܵܐ ܫܸܒܠܹ̈ܐ.#ܬܢܝܢ ܢܡܘܣܐ 23:25 24ܘܐ݇ܡܝܼܪܗܘܿܢ ܐܸܠܹܗ ܦܪ̈ܝܼܫܹܐ، ”ܚܙܝܼ، ܩܵܡܘܿܕܝܼ ܒܸܥܒ݂ܵܕܵܐ ܝܢܵܐ ܡܸܢܕܝܼ ܕܠܹܐ ܝܠܹܗ ܩܵܢܘܿܢܵܝܵܐ ܠܸܥܒ݂ܵܕܵܐ ܒܫܲܒܬܵܐ؟“ 25ܐܝܼܢܵܐ ܗ̇ܘ ܐ݇ܡܝܼܪܹܗ ܐܸܠܲܝܗܝ، ”ܗܵܐ ܠܹܐ ܝܬܘܿܢ ܩܸܪܝܹܐ ܡܘܿܕܝܼ ܥܒ݂ܝܼܕ ܠܹܗ ܕܵܘܝܼܕ ܐܝܼܡܲܢ ܕܗ̇ܘ ܘܐܵܢܝܼ ܕܥܲܡܹܗ ܣܢܝܼܩ ܠܗܘܿܢ ܘܟܦܝܼܢܗܘܿܢ؟ 26”ܕܵܐܟ݂ܝܼ ܥܒ݂ܝܼܪܹܗ ܠܒܲܝܬܵܐ ܕܐܲܠܵܗܵܐ، ܒܥܕܵܢܵܐ ܕܝܼܗ݇ܘܵܐ ܐܲܒ݂ܝܼܬܲܪ ܓܘܼܪܵܐ ܕܟܵܗܢܹ̈ܐ، ܘܠܲܚܡܵܐ ܕܦܵܬܘܿܪܵܐ ܕܡܵܪܝܵܐ ܐ݇ܟ݂ܝܼܠ ܠܹܗ، ܗ̇ܘ ܕܠܹܐ ܝܗ݇ܘܵܐ ܩܵܢܘܿܢܵܝܬܵܐ ܐܸܠܹܗ ܠܹܐܟ݂ܵܠܵܐ ܫܒ݂ܘܿܩ ܡ̣ܢ ܠܟܵܗܢܹ̈ܐ. ܘܝܘܼܗ݇ܒܸܠ ܠܹܗ ܐܘܼܦ ܠܐܵܢܝܼ ܕܝܼܗ݇ܘܵܘ ܥܲܡܹܗ.“#ܐ. ܫܡܘܐܝܠ 21:1‐6 27ܘܐ݇ܡܝܼܪܹܗ ܐܸܠܲܝܗܝ، ”ܫܲܒܬܵܐ ܦܝܼܫܬܵܐ ܝܠܵܗ̇ ܒܪܝܼܬܵܐ ܩܵܐ ܒܲܪܢܵܫܵܐ، ܠܵܐ ܒܲܪܢܵܫܵܐ ܩܵܐ ܫܲܒܬܵܐ. 28”ܒܪܘܿܢܵܐ ܕܐ݇ܢܵܫܵܐ ܗܲܕܟ݂ܵܐ ܐܘܼܦ ܡܵܪܵܐ ܕܫܲܒܬܵܐ ܝܠܹܗ.“
Currently Selected:
ܡܪܩܘܣ 2: ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
