Hechos 7
7
Estebanau ich khaigper iekha khitʉm ee thõopʉitarr
1Mag chi seukha narr khʉʉnau mag jaaubaawai chi phadnaan porou chi Estebanag, —¿Pʉ igwia cha amau jaau nʉm iek thum chadcharam iekhá? a jeeujim aajem.
2Magbaawai Estebanau thum aig narr khʉʉnag ũrmkhĩir iekhamamua, —Khodamnaan, pãar chadcha mua mʉch dennaanjo khõsi chitʉm, mʉ iek ũrbat ajim anʉm. Maimua iekhabaadewi, Maach jooin Abrán khararr Mesopotamia sĩewi deeum durr Arán anʉmʉg joobaan maju nawe maach Ẽwandam cha ʉ̃gthaa phuu nʉmua dau daau irig ich oopijim aajem. 3Mag ich oopiwia irig, “Pʉch durr iseg pʉawi pʉch khodnaanagjã ooba petá” ajim aajem, “deeum durr mʉchdeu pʉchig jaaubarm aar. Mam mua pʉ joobamkhĩir deeum durr jʉr deejugui” ajim aajem, Ẽwandamau Abranag. 4Magbaawai chadcha jooi Abrán Caldea durrmua mawia jũrr deeum durr Arán anʉm ee sĩeimajim aajem. Maig simta i aai meebaadeewai mau cha maach nʉm durr Ẽwandamau irig beepijimgui ajim anʉm. 5Magtarr aigmua anaabá, ĩs ewag pawiajã agtha ich mʉg durr gaai wenʉrrʉm. Ẽwandamau ich jooi Abranagcha chan, “Bʉchkhunpaijã mʉg jẽb mʉgpierr pʉ deneu” abajim; “mamʉ ichiita deeb khaba deejugui” ajim aajem. Mag irig deebarm durr i meebaawai jũrr i chaainauta jʉ̃aju ajim anʉm. Mamʉ maagwai jooi agtha chaai ãbjã chukhu ajim anaabá, mag jẽb jʉ̃ag. 6Magtarr khur deeu Ẽwandamau ich garmua Abranag iek dee simua, “Abrán” ajim anʉm. “Pʉ chaain ewagam khʉʉnau chaain oomam khʉʉn mʉg atag paawai chikhamnau amach durr phe arrwi sĩi cuatrocientos años chikhamnaan chogkha wenʉrrajugui” ajim anʉm Estebanau, Ẽwandamau Abranag iekhatarr igwia. “Mag nʉisimʉn, warm khʉʉnau am dʉi amachdeu ampierr dau aphʉʉ am wai wenʉrrajugui” ajim anʉm, Ẽwandamau. 7“Mamʉ amau mag pʉ chaain sĩi amach chogkha wai nʉm jũrr, mʉchdeucha mua am dʉi ag iek eudʉ aujugui” ajim aajem ich Ẽwandamaucha, “mʉchdeu khap am dʉi aag. Magbarm aigmua warm khʉʉn jua eemua am peerdʉ athaawain chadau deeu mammua beewi mʉg durr gaai amau mʉrʉg jeeu wenʉrrajugui” a jaaumajim aajem Estebanau, Ẽwandamau Abranag iekhatarr jaauwi.
8Magta warrgarwe Ẽwandamau Abrán dʉi iek deetarr jaaumajim aajem Estebanau. Mag jaaumamua ichdeupai magjim aajem:
’Mag ich iek deetarr thumaam khʉʉnag khap amkhĩirta ĩchab emkhoi chaain atham aigmua seman ãb aadeewaijã meheudam phʉʉrbichpi jaaujiebma. Mag phʉʉrbich nʉmta Ẽwandam dʉi iek deetarr ag dauchach ajimgui ajim aajem. Mag iekhatarr aawai Abranau ich iewaa Isá autarr aigmua ocho días aadeewai chadcha ich Ẽwandamau jaautarrjo i meheudam phʉʉrbichpʉijim anaabá. Maagwai jooipawi Isaaujã ich chaai Jacob paarpaawai, ich agjo awi Jacooujã ich chaain doce ootarr khʉʉn den thum ich mag phʉʉrbichpʉimajim aajem. Mag Jacoou chaain doce ootarr khʉʉn gaaimuata Ẽwandamau mʉg maach israelnaan thʉnʉm thum ompaa aujim, a jaaumajim aajem Estebanau, Ẽwandamau Abrán dʉi iek deetarr igwia.
9Mag jajawagmamua, —Mag Jacob chaainaupaita amach eeumdam José a thʉ̃r sĩerr amach ayau amach khãai ʉ̃rcha jãsene wai sim oobaa iekkhõr wauwi Egipto durram wounag perpʉijierramgui ajim aajem, amach aai meer. 10Mag i perpʉijierrab mamʉ, Ẽwandamau ʉu i eeg oojim anaabá, mag phithurg au simjã thum ãwatamkhĩir. Mag nʉm dʉi ĩchab ich Ẽwandamau warag irig khĩirjug deewi, rey Faraonaujã irua nem wau sim ich dawagaa oobaadee, warag Egipto durram gobernador khapiwia irigta ich nem thum jaaujim aajem ich denjo amkhĩir, a jaaumajim aajem Estebanau.
11Mag jaaumamua ĩchab, —Mag ich Joseeta gobernador khabaadem ee, Egipto durr jãdau theega thʉnaawai Canaan durrjã ich agjo thʉnaajimgui ajim anʉm. Mag jaar wajappha õor dau aug ajim aajem, jãdaúa. Magbaadee maach jooin Canaanpienau pod khojudam aujujã khaugba aadejim anaabá, chukhu aadee. 12Mag nʉm ee jooi Jacoou ũurwai, Egipto durr trigo per nʉm a ũrbaa, aar ich chaain pʉijim aajem, khojudam per aumkhĩir. Ma, warrpem am khoju authurtarr ajim aajem. 13Pãrau khaphʉ nʉmgui ajim anʉm, mag khur deeu ereubaadeeuta Joseeu ich khaugpijim aajem, ich naam khʉʉnag. Magbarm aigmuata ĩchab chi faraonaujã khaphʉ aadejim aajem José ebreonaankha sim. 14Mag, Joseeu ich naam khʉʉnag ich khaugpiwi ich aaijã thum ich chaainpa wai beepijim aajem, ich aig. Mag ich aar jaaubaimaawai jooi ich chaain thum beeju aadewi warag amach thum chi khapanag setenta y cinco beejierram a jaaumajim aajem Estebanau. 15Mag, jooi Jacob Egipto durr ich chaai sim aar joobaan kheerbaadewi khitʉʉ awia, ich aarpai appawia, ewag pawi chi chaainjã ãhãbdo omamua doce narr khĩeb amach thumwe ojierram aajem. 16Mag, jooin mee nʉmpierr deeum durr Siquem anʉmta aukheraan arrjeejim aajem. Mag am aukhermarr jẽbdi, am tathooi khararr Abranau Siquem durr aawai woun ãb Amor aajerr chaain jua gaai per autarraugui a jaaumajim aajem Estebanau, warrgarm khʉʉn jooin jaaumamua.
17Mag jaaumamua ich Estebanaupai magjim aajem: —Mag Ẽwandam jooi Abrán dʉi iyʉʉ naawai ichigcha durr jʉ̃apiba i chaainagta deeju a jaautarrjo, chadcha ag khur nassi pawiata ya amag ich Ẽwandamau mag durr jʉ̃apiju gayaa aadem ee, ich jooi Jacob khararr chaain ewagam khʉʉnta khapaana thʉnʉisijim aajem, Egipto durr. 18Mag ya am khapan aphobaadem ee, Egipto durr deeum woun bʉ̃ʉrjã José khaugba aajerrta jũrr reikha sĩsijim aajem. 19Mag reíu maach jooin eugar khaigba khĩirjuwia am dʉi ichdeu ampierr aajeejim anʉm. Mag sim gaaimua maach jooin ʉʉinau emkhoi chaaindam oomam thum ajués chi ãdnaan jua eem khecheu arrwi pabʉ ee deen mapi jaaujeejim anaabá.
20’Mag emkhoi chaaindam juau khech nʉm jaarta Moisejã thaabajim aajem. Mag chaai thaaba sĩsim Ẽwandamau oowai i dawagaa khitajim anaabá. Mag chaai ed thãrjuppai chi dennaanau amach dʉi wai naawi 21ya amachdeu pod meer wai naaju khaugba aadee, dikhu chaaur warphaa sirphʉg ee deethurjierram aajem. Mag deebathurm ee, rey kha jerag domeraan nʉrrʉmua oobaimaawai, dau aug khaugwia, degag arrwi, ich chaaijo bãaupʉijim aajem. 22Mag, Moisés Egiptopien jua ee bãau sĩewai amachjo nem thum khaphʉ mag gaaimua nem iek theegnaa thʉ̃rphoo sĩerrajimgui a jaaumajim aajem ĩchab Estebanau.
23’Maimua ya ich cuarenta años aadeewai, “Mʉch jooin durr israelnaan ookhemgui” awi, chadcha am oon beejim anaabá, chi Moisés. 24Mag beewi oo uraa aawai, Egiptopierrta israeldam dʉi ãaudʉdʉt khajim anʉm. Moiseeu oowai mag jãau nʉmua Egiptopierr garmua israeldam gaai mas waumam oobaa, ich meeun peerdʉ awaag awi chi Egiptopierrta thõopʉijim aajem. 25Magtarran, irua khĩirjuawai mag ichdeu õor thõobarm oowia chi israelnaanau iita amach peerdʉ aumkhĩir Ẽwandamau pʉibarm khaphʉ ajupii awi ajim anaabá; mamʉ warm khʉʉnau pod mag khĩirju aubajierram aajem. 26Maimua agtarr noram deeu dau numí jũrr amach israelnaan appai jãau nʉm ooimajim aajem. Magbaa tag jãaum ugua, khecheu auwi ithũu amag, “Keena, dich meeun appai ¿khantheeta pãar jãagjerrá? Jãg chan ʉu khaba simgui” ajim anʉm. 27Magbaawai mag ich khapeer podmarr garmua chi Moisés sĩepʉinaa, “¿Khaíu pʉrʉg jaauwai mag pʉʉta maar por aawai puata maar khaigperju aai chirʉm a jaaujĩ?” ajim aajem. 28“¿Wa norr pʉchdeu Egiptopierr thõotarr aawai mʉjã pua agjota thõopʉim ig chirʉ́wa?” ajim anaabá. 29Warmua ichig magbaawai Moiseeu obʉgba, deeum durr Madian anʉmʉg dʉr mawia, mam sĩeimajim aajem. Maig chikham durr ʉʉi auwia ag dʉi chaain numí oojimgui a jaaumajim aajem Estebanau.
30Mag jaaumamua, —Agtarr khur nʉʉ awia cuarenta años nʉm ee, khãai ãb ich Moisés durrsĩ Sinaí anʉm dakha õor chukag ee sĩejim aajem. Mag i maig simta, Ẽwandam chog ʉ̃gtharmua beewi irig ich oopijim aajem, pabʉdam neneree khitʉm uurdʉ thʉnʉm eemua. 31Mag ich dauderraa abaawaita agʉgaacha manaa oog abarm ee, mag eemua maach Por Ẽwandamau ich khaugpieg irig, 32“Moisés, mʉʉta pʉ jooin warrgarm khʉʉn Ẽwandamaugui” ajim anʉm: “Abrán khararr Ẽwandam, Isá khararr Ẽwandam, maimua Jacob khachitarr Ẽwandam.” Ẽwandamau ichig magbarm ũrbaa Moisés jãphierr ajaugau kha duui thʉnʉmua pod mag õtdau uu thʉnʉmʉgjã tag oobajim anaabá. 33Magbaawai maach Por Ẽwandamau deeu iekhamamua irig, “Mʉʉn Ẽwandamau. Pʉch zapat ẽer athá, pʉ mʉ khĩirpheeta oo dʉnaabahab” ajim anʉm. 34“Mua mʉch chaain chikhamnaan jua machgau Egipto durr aphʉʉ durrum khaphʉnaa am chaigpa nʉm iek dakkha thʉnʉmjã mʉchdeu ũr chiraawai pʉrʉg jawaanta beejimgui” ajim anʉm, “pʉ gaaimua mʉchdeu am peerdʉ awaag.” Maagwai, “Petá Egiptoog” ajim anʉm Ẽwandamau Moiseeg.
35Magnaa ich Estebanaupai ich iek ũr narr khʉʉnag, —Maadeu khaphʉ nʉmgui ajim anʉm, ich ag Moisés khabajieb, ar Ẽwandamau maach jooin israelnaan porkhapiwi Egiptopien jua eemua deeum durr am phe arramkhĩir pʉitarr. Magju naweran amau chadcha i isegwia irig, “¿Khaíu pʉrʉg jaauwai mag pʉʉta maar por aawai maar khaigperju aai chirʉ́?” ajierram anaabá. Mamʉ magarr ãba, ichiita Ẽwandamau irigta am porkhapijim aajem. Mag am porkhaju jawaan beemkhĩir ajim aajem, Ẽwandamau ich chog pʉibaawai mag pabʉ uurdʉ thʉnʉm eemua irig iekhachetarr. 36Mag, chadcha Moiseeuta Egipto durrjã õor dakhĩir ag na amau ooba aajempa wau nʉrrʉmua am phe arrwi, phũas Phur anʉm eejã phe wai dichwi, õor chukag durrjã cuarenta años ag na amau ooba aajem nempa ich mag ichdeuta wau nʉrrajim aajem. 37Ich ag Moiseeu ajim anaabá, ĩchab Jesús igwia israelnaanag, “Ẽwandamau mʉ pʉiwi cha mʉ pãar ee chitʉmjo, ĩchab mʉg atagjã deeum ich i jaaumie ãb pʉiju” a jaautarr. 38Ĩchab õor chukag durr israelnaan thum durrsĩ Sinaí anʉm bʉkhʉrr ãba biirdʉ thʉnaawaijã ich ag Moiseeta am dʉi sĩejim aajem, mag durrsĩ gaai Ẽwandam chogau ichig jaautarr jũrr maach jooinag jawaag. Mag, irigta nacha Ẽwandamau ich iek bʉ̃ʉrjã chugpaa khaugba sĩerrʉm phã deejim aajem, mag phã deebaawai ĩs ewag pawijã i gaaimua ag iek ich mag wai nʉisimkhĩir.
39’Mamʉ maach jooinau irua nem jaau sim ʉkhamaaugau, warag i ichaaur ajierram aajem, deeu amach durr Egiptoog wetam khõchgau. Mag nʉm iekhauta agtha Moisés mag durrsĩ Sinaí anʉm gaai simichjã 40Aarón aar wetwia, “Moiseeu sĩi Egipto durrmua maar phe au beewi jamaga petam khai marau bʉ̃ʉrjã khaugbamgui” aimajierram anaabá. “Maagwai marau pʉrʉg maach athee nem inag den ẽwandamkha wau deepi nʉmgui” ajim anʉm, “deeu ewag Egiptoog weetwaijã maguata maach jaau warramkhĩir.” 41Maimua chadcha amach juau phĩr den phakdamkha waunaa, nemchaain khechwia, agʉgta Ẽwandamagamjo jeeuphobaadejim aajem. Magbaawaita onee nʉisijim anaabá, mag amach juau phakkha wautarrag jeeu nʉmua. 42Magbaawai Ẽwandamau warran am dʉi sĩerrjã tag amag ooba, warag amachdeu ampierr apibaawai, edaúgjã jeeunaa phĩdagagpa jeeuphobaadejim aajem. Amachdeu ag nawe mag nem parhoobamʉg jeeujerr aawaita ich Ẽwandamaucha amag,
“Israelnaan, ¿pãar cuarenta años sĩi õor chukag durr pãach ap aajeewai pãrau nemchaain khechwia mʉrʉgta jeeujeejĩ?” a iekhajim anʉm.
43Mamʉ chadcha ichigpai jeeuba aajerr aawai, “Magjuga” ajim anʉm ich Ẽwandamaupai.
“Mag khãyau pãrau sĩi Molocta pãach ẽwandam awi ich dipa pãach dʉi wai wenʉrraba aajeejieb, ãbakhai agjo pãach ẽwandam Renfán anarr ag phĩdagpa dʉi ãba, akhʉʉnagta jewaag.
Jãgtarr jũrr pãar pãach kha ukhurm khʉʉnau durr chaaur warp Babilonia atag pʉrkha maawai, mua pãar ʉdʉraa phe arrpijugui” ajim anʉm ich Ẽwandamau. (Am. 5:25-27)
44Maimua ich Estebanaupai mag iekhakhagmamua, —Pãade ũrbat ajim anʉm amag. Maach jooinau Aai i jeeujem degta Ẽwandamau Moiseeg ich iek phã deetarr ãkhaajerr aawai õor chukag durr amach wenʉrraajeewaijã amach wenʉrrʉmpierr amach dʉi wai wenʉrraajeejimgui ajim anʉm. Mag di ich Ẽwandamau Moiseeg jãga euju aai sĩ a jaautarrjo eu sĩejim aajem, magreunaa deeu eu ahau aju ayaa. 45Maach jooinau mag di amach dennaanau juagam nemdam pʉatarrjo oo wai wenʉrraajerr aawai, Josué dʉi beetarr khʉʉnaujã amachdeu chikham durr jʉ̃athʉg aucheewai amach dʉi waibeejierram aajem. Mag maach jooinau durr jʉ̃athʉg athaicheewai chi durr khʉʉn chaarta Ẽwandamau chawag jʉr werppʉijim anaabá. Magtarr aigmua ewag pawiajã ich mag durr gaai jooba wenʉrrʉmua khʉd Davidjã reikha sĩsijim anʉm. 46Mag rey David Ẽwandamau ʉu eeg oojeejim aajem. Maagwai ich Davidaucha warrgar jooi Jacob khararr ag Ẽwandamag jeeumamua, “Mua pʉ athee di eu deekhimgui” ajim anʉm, “ag ee pʉch jooba chitamkhĩir.” 47Mamʉ Ẽwandamau irig eupiba jaautarr aawai i iewaa Salomonauta irua euju arr di eujim aajem. 48I athee awi mag di eu deejieb mamʉ, Jooi cha ʉ̃gthaa phuu nʉm chan juau di eutarr ee joobaba khitʉm. Ich mag sĩerrʉm khap, ich Ẽwandamaucha ich i jaaujerr khʉʉnag phãpitarr gaai mag sim:
49“Edaujãata mʉ juupjem porkhauu; maagwai mʉg jẽb sĩi mʉ bʉ dʉnʉʉujemʉu.
Mag simta, ¿khan di khĩirta pãrau mʉ athee eu deeju ẽkha nʉ? ajim anʉm.
¿Wa pãrau khĩirjuawai mag mʉrʉg di eu deebarm ee sĩi mʉ jua ʉ̃i oo chiraju aai chirʉ́wa?
50Nem thum mʉg thʉnʉm mua mʉch juau wautarr khabahab” ajim anʉm maach Porou. (Is. 66:1-2)
51Maimua warag iekhamamua ich dʉi ijẽjẽbkharr khʉʉnag magjim aajem ich Estebanau: —Pãrau mag khaphʉ nʉmta, bʉ̃ʉrjã iekhaawaijã ũrba, jʉ̃g khĩchagnaa thãar theegjã sĩerrjee khabahab ajim anʉm, Ẽwandam khaugbam khʉʉnjo. Magnaata warag Ẽwandam Akhaar ichaaur ʉkha sĩerrjeemgui ajim anʉm, warrgar pãach jooinau aajerrjo. 52Magnaa amag, ¿Warrgar Ẽwandam i jaaujerr khʉʉn eem ãb khãijã pãar jooinau daupii wai naajĩ? a jeeujim anʉm Estebanau. ¡Daupii aju abá! ajim anʉm ichdeupai deeu. Amachdeuta khechpʉibajieb ajim anʉm, ar warrgarwe sĩi Cristo igwia woun ãb thumaam khʉʉn khãaijã chi ajapcharam beeju a jaau durrarr khʉʉnjã. Maimua amau mag jaau durrarr ya chadcha pierrwaijã jũrr pãachdeuta i pʉr deewi warre thõopi jaaubajierrab. 53Pãrau chan Ẽwandamau ich chognaan gaau ich iek jaaupʉitarr phã wai nʉmjã ag gaai jaau simjo i ipierraajã khaba sĩerrjeemgui ajim anʉm amach khĩircha.
Magta iekhajim aajem Estebanau, ichdeupai ich kõit iekha khitʉmua.
Esteban thõotarr
54Chi phadnaan porou aig narr khʉʉn dʉimua ũurwai Estebanau mag iekhabapʉim ũrbaawai warre i dʉi meeukha phobaadejim anaabá. 55Mamʉ Estebanau ich gaai Ẽwandam Akhaar phẽs wai sĩerr aawai ĩchab magʉmjã igbajim aajem. Mag nʉm ee irua ʉ̃gthaag oowai, Ẽwandamta edjã weeudʉ wejom ee ich wajaugau bʉ̃ʉmjo sim oo athajim anaabá. Maagwai i bigaau Jesuuta ĩchab ich Ẽwandamjo nem jua theeg oo dʉnʉmjã oojim aajem. 56Ichdeu mag oobaawai warm khʉʉnag, —¡Pãadeu mʉ daupierr oobat! ajim anʉm, ar edjã weeudʉ wejom ee Emkhooi Iewaa Ẽwandam juachaar gar oo dʉnʉm.
57Mamʉ Estebanau magbarm ũrbaawai chará, i iekhamam ũrmaaugau, warag juau kach phãarphobaadejim anaabá. Magnaa thum ãba sereu phobaadewi warag irigta audimajierram anʉm. 58Maimua i pʉrphobaadewi, phobor igaau arrnaa, jũrram khʉʉnau mokou barphobaadejim aajem, i thõopäaig. Maagwai warrcha chi thethem khʉʉnag i khĩir seukha iekha narr khʉʉnau amach khajũa ʉ̃rʉm ẽerkhanaa, woun ãb Saulo anʉmʉg phedeejierram aajem, amach mamagkhamich pʉrmkhĩir. 59Jũrram khʉʉnau mag ich mokou bar wai nʉm ee, chi Estebanau warag Ẽwandamag jeeu khitʉmua, —Jesús, chadcha pʉʉta mʉ Porou. Nau mʉ thõbaadeewai mʉ akhaardam pʉch aar athá ajim anaabá.
60Mag Ẽwandamag jeeu dichwia, jĩeporou jẽkhʉt phõbkhanaa thet, —Señor ajim anʉm, amau mʉ dʉi mʉg khaigba nʉm paarjã oob pua amag mʉgtarr iek eudʉ chitamgui ajim anʉm.
Mag iekha khitʉm ee, warag chaaupabaadejim aajem.
Currently Selected:
Hechos 7: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
