San Lucas 3
3
Juan õor por choomieu Ẽwandam iek jaau nʉrrarr
(Mt. 3:1-12; Mr. 1:1-8; Jn. 1:19-28)
1Woun Tiberio anʉm reikhabaaderr aigmua quince años aadem ee, gobernadornaan jayap naajim aajem:
Judea durr: Poncio Pilato
Galilea durr: Erodes
Iturea durr Traconite durr dʉi: Felipe (Erodes naam, aai gaaimua)
Abilinia durr: Lisanias
2Makhʉʉn chi gobernadornaankha nʉm jaar ĩchab phadnaan porkha narr khʉʉn Anás ajim aajem Caifás dʉi. Ich mag jaarta ĩchab Ẽwandamau jooi Zacarías iewaa Juan õor chukag ee sĩerrag jaaujim aajem, ich iek õor ee jajawag mamkhĩir. 3Ẽwandamau ichig mag jaaubaawai chadcha petawia dojã Jordán igaau khĩeb jajawagmamua maagjeejim anʉm: “Pãar pekau pooma naawai pãach khaibag ãsie ewag khĩirjuwia Ẽwandamag chugpaapi jeeubat. Mag jeeubaa Ẽwandamau pãach khaibag chugpaabapäaiwaita mua pãar por choopʉimajugui” aajeejim anʉm.
4I mag nʉrraju igwia warrgarwe Ẽwandam i jaaumie Isaías a thʉ̃ʉrjerrau mʉg phã pʉajim:
“Woun ãb ajappai õor barba aajem aar sĩejemuata ich aar õor barbaimaawai,
‘Maach Por ya beeimʉʉ sim’ aju.
‘I beeju nawe pãach thãar khĩir khaugbat’ aju, ‘thãraucha khõsi i iek ʉkhaag.
5Pari mag ʉkhaagan pãach khaibagau pãach thãar jãg sĩi durr dapag eem do khõrgjo ãkhãrag sĩsidʉmjã jẽb dau dʉii paa nʉmjo ajaug paapʉipetat’ aju.
‘Pãach khĩirjug khʉd jũjũrkhimjo sĩsidʉmjã khʉd khajapha wʉʉinaa bubuchdog dau dʉii jiirthẽubapʉimjo abat’ aju.
6Mag thum ajaug paapʉiwia khĩir khaug nʉisiewain chadau Ẽwandamau maach peerdʉju pʉibarm thumaam khʉʉnau khĩircha ooju” a phã sim. (Is. 40:3-5)
Ich mag Juanau maach thãarta khʉd wʉʉi nʉmjo waupi jaau nʉrrarran, warrgarwejã irua mag jaau nʉrraju ya chi phãm arr aawaita nassi pawi chadcha mag jaau nʉrrajim aajem. 7Mag ũrwia irig amach por choomkhĩir õor pom bee thʉnʉm khʉʉnag maagjeejim anʉm ichdeu:
—Chi khaibagnaan, ¿khaíu pãrag jaauwai Ẽwandamau maach i agkham ed sĩi por chootarr gaaimuapaita pãar i jua machag ãwatbaju a jaaujĩ? 8Sĩi pãach por choopi nʉmuapai chan irua pãar aubam. Ẽwandam jua machgau dau aphʉʉ amapha nʉm khai, pãach khaibag thumaa ãsie ewag khĩirjuwia, Ẽwandamag isegpi jeeuwia, chadcha Ẽwandam iek ʉkhaajem khʉʉnjo abat ajim anʉm, pãach khapeen dʉijã. Oob pãrau chikhamnaan denjo, pãachjã warrgar pãach jooi Abrán khararrjo Ẽwandam dʉi khapeerkha nʉm awi, “Maran Abrán chaainau; mag i chaainkha nʉmta, ¿jãga Ẽwandamau mag maar dau aphʉʉ apibarju?” a khĩirjumiet. Sĩi mag Abrán chaainkha nʉm gaaimuapaita mag ʉ̃gthar obeerjem akhiin, mokdau mʉg thʉnʉmjã Ẽwandamau õrag paapʉiwia makhʉʉnjã ĩchab Abrán chaainau aju aai sim. Abrán chaai chaar awiajã ichiita Ẽwandam jua machag ãwatab khaba ãwatju. Mag khõch khaba nʉm khai, pãach khaibagta warre Ẽwandamag isegpi jeeubat ajim anʉm. 9Pãrau khaphʉ naabá, nemjĩir khaigbamʉn thu werpmaajem. Ich agjota simgui ajim anʉm ĩchab Ẽwandamaujã pãar dʉi. Ya irua pãar chachimʉʉ sim. Ar õor amach khaibag isegwia Ẽwandamag chugpaapi jeeuba nʉm khʉʉnan pa thupʉiwia jʉser aadee orpʉi nʉmjota ajugui ajim anʉm, ich Ẽwandamau am dʉi.
10Mag jaaumam ũrwia, õrau irig —¿Magan maraujã jãga aju aai nʉ, Ẽwandam jua machag ãwatmaaugau? a jeeujierram aajem.
11Magbaa ichdeu magjim anʉm amag:
—Khajũa theg jũaju paraa nʉm khʉʉnau bʉ̃ʉrjã jũaju chukhu khitheem khʉʉnag deepetat. Maagwai agjo nem khoojemdam wai nʉm khʉʉnau ĩchab chukhum khʉʉn dʉi jig khobat ajim anʉm.
12Maig ĩchab beejierram aajem gobierno den debpaar jeeujem khʉʉn, agjo amach por choopʉimamkhĩir. Mag beewia makhʉʉnaujã irig jeeumamua, —Maestro, maraujã ¿jãga aju aai nʉ? ajierram anʉm.
13Magbaawai ichdeu amag, —Oob leíu jaau sim khãyau athuucha õor jua eem phatkhon jeeumiet ajim anʉm.
14Maimua jũrr soldaaun beewia, makhʉʉnaujã irig, —Magbaa maraujã ¿jãgajuma? aichejierram anʉm.
Magbaa ich Juanau magjim anʉm chi soldaaunag:
—Oob tag chikham jua eem nem ajués khechthʉg aumiet. Wa pãachta emkhooin awia chikham khũgur jãphierrpinaa khãijã chikham phatkhondam au chithee amiet. Maimua oob pãrau, “Mʉrʉgan bʉ̃rʉʉta phaagjem, muan waragta ig chirʉm” amiet ajim anʉm. Pãachig phag nʉmdam dʉipai onee nʉisit a jaaumajim aajem.
15Mamagkham ũrwia, õrau jũrr amach khapeenag, “Ĩsin ich mʉ khãijãa Ẽwandamau nawe pʉiju a jaaujerrá agam” aajeejim anʉm.
16Amau mag iekha nʉm Juanau ag nawe ũr wai sĩerr aawai thumaam khʉʉn jʉ̃g daar magjim anʉm:
—Mua pod pãar thãar ajaug paa aubam. Muan sĩi dodamaupaita pãar por choo chirʉmgui ajim anʉm. Mamʉ ẽudee ãb urumta mʉ khãyaujã jua theeg ʉ̃rcha sim. Jãguan chad ich Akhaarjã pãrag deewia pãar khaibagjã õtdau ee warre orbapʉimjota aju. Mʉ chan mʉg chirʉm aig sĩi i chogkhaagpaijã serbiibata chirʉmgui ajim anʉm. 17Magnaa amag, Khĩir khaphʉ abat, Ẽwandaman ya beeimʉʉ simgui ajim anʉm. I beem ed i iek ʉkha nʉm khʉʉnan arrozdo pom wejorr phierrwia ajapha ãkha thʉnʉʉubarmjota aju. Maagwai ar i iek ʉkhamapha arr khʉʉn, jũrr chi arroz bʉ thʉʉtarrta sĩi ãbamʉg päardʉnaa orbapʉimjo aju. Makhʉʉnan bʉ̃ʉrjã õtdau thõo khaugba sĩerrʉm eeta ich Ẽwandamaucha barkhʉʉipʉiju a jaaujeejim anʉm, Juanau ich aig bee nʉm khʉʉnag.
18Mag jaautarr aigmuajã ich mag iek khĩir pogkhe jaau khitʉmua õor wawiejeejim anaabá, jãga thumaam khʉʉn Ẽwandamau peerdʉ auju aai sĩ.
19-20Mag jaar chi gobernador Erodeeu ich naam Felipe ʉʉi Erodías anʉm khecheu auwia ag dʉi sim khaug athaawai Juanau irig iekhajim aajem. Mamʉ mag irig iekhatarr chan mag sĩi ich wach ʉʉi dʉi sim atheepaijã khaba, ich nem parhooba khaigba waaujem kõitpata irig iekhajim anaabá. Mamʉ magʉmjã bʉ̃ʉrjã i iek ũrba, warag chi Erodeeu Juan cárcel deg phãar sĩupijim anaabá.
Juanau Jesús por chootarr
(Mt. 3:13-17; Mr. 1:9-11)
21Mamʉ mag Erodeeu chi Juan cárcel deg phãarpiju nawejã õor pom por choojerr aawai, khãai ãb Jesujã beewia Juanag ich por choopibaawai, ĩchab i por choopʉijim aajem. Mag ich por choo aaipabaadeewai Ẽwandamag jeeujim anaabá. Mag ich Ayag jeeu sim eeta edaujã weeudʉ joisim eemua 22Ẽwandam Akhaar duburjo khitʉmta dau daau beewia i ʉ̃r jupchejim anʉm. Mag jupbaichem dʉi edjã eemua woun iekjo, “Iewaa, pʉʉta mʉ Chaai mʉchdeu jãsehne wai chitʉmʉu, pʉ gaaimua mʉ onee chiraajem” abarmjã ũrjim anaabá.
Jooin Jesucristo dau naweram khʉʉn
(Mt. 1:1-17)
23Jesuu warrpem Ẽwandam iek õrag jaauwai treinta añosjo sĩejim aajem. Iin Ẽwandam Iewaa ajieb mamʉ, õraun José iewaa chaarpii aajeejim. Ich Jesús bãaurrjooi Joseeta Elí iewaa ajim aajem.
Maagwai Elí Matat iewaa ajim;
24Matat Leví iewaa;
Leví Melqui iewaa;
Melqui Jana iewaa;
Jana José iewaa;
25José Matatías iewaa;
Matatías Amós iewaa;
Amós Nahúm iewaa;
Nahúm Esli iewaa;
Esli Nagai iewaa;
26Nagai Maat iewaa;
Maat Matatías iewaa;
Matatías Semei iewaa;
Semei Josec iewaa;
Josec Judá iewaa;
27Judá Joanán iewaa;
Joanán Resa iewaa;
Resa Zorobabel iewaa;
Zorobabel Salatiel iewaa;
Salatiel Neri iewaa;
28Neri Melqui iewaa;
Melqui Adi iewaa;
Adi Cosam iewaa;
Cosam Elmadam iewaa;
Elmadam Er iewaa;
29Er Jesús iewaa;
Jesús Eliezer iewaa;
Eliezer Jorim iewaa;
Jorim Matat iewaa;
30Matat Leví iewaa;
Leví Simeón iewaa;
Simeón Judá iewaa;
Judá José iewaa;
José Jonam iewaa;
Jonam Eliaquim iewaa;
31Eliaquim Melea iewaa;
Melea Mena iewaa;
Mena Matata iewaa;
Matata Natán iewaa;
32Natán David iewaa;
David Isaí iewaa;
Isaí Obed iewaa;
Obed Booz iewaa;
Booz Sala iewaa;
Sala Naasón iewaa;
Naasón Aminadab iewaa;
33Aminadab Admin iewaa;
Admin Arni iewaa;
Arni Esrom iewaa;
Esrom Fares iewaa;
Fares Judá iewaa;
34Judá Jacob iewaa;
Jacob Isá iewaa;
Isá Abrán iewaa;
Abrán Taré iewaa;
Taré Nacor iewaa;
35Nacor Serug iewaa;
Serug Ragau iewaa;
Ragau Peleg iewaa;
Peleg Eber iewaa;
Eber Sala iewaa;
36Sala Cainán iewaa;
Cainán Arfaxad iewaa;
Arfaxad Sem iewaa;
Sem Noé iewaa;
Noé Lamec iewaa;
37Lamec Matusalén iewaa;
Matusalén Enoc iewaa;
Enoc Jared iewaa;
Jared Mahalaleel iewaa;
Mahalaleel Cainán iewaa;
38Cainán Enós iewaa;
Enós Set iewaa;
Set Adán iewaa;
Adán Ẽwandam iewaa, ich Ẽwandamaucha i omparr aawai.
Currently Selected:
San Lucas 3: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
