San Lucas 4

Dosãtau Jesús khũgur auju ẽkhatarr

(Mt. 4:1-11; Mr. 1:12-13)

1Mag por choowia Jesús Ẽwandam Akhaar ich gaai phẽs wai sim petajim aajem Jordán eemua, mag ich por chootarr aigmua. Mag mamta ich ag Ẽwandam Akharaupai Jordán igaau durr õor chukag chʉʉi i warrjim aajem. 2Mam cuarenta días sĩejim aajem, bʉ̃ʉrjã thach khoba. I mag sim ee dosãtau beewia i khĩirjug meerkha Jooi dau na ʉu khabam nem waupiju ẽkhaajeejim anaabá. Mag cuarenta días dichdimaawaita eeupemjo Jesús jãsoo aadejim aajem. Mag i jãsoo aadem ee, dosãtau i khũgur auju khĩirjuwia 3irig, —Chadcha pʉ Ẽwandam Iewaa khai, mʉg mokdau panag paabapʉi ajim anʉm.

4Magbaawai Jesuu magjim anʉm:

—Ẽwandam iek phã sim gaai jaauwai, “Sĩi thach khoju appai khap amkhĩir irua maach ompaabajim” a sim. [“Irua maach ompaatarran, mag thach appai khĩirjuju khãyau ich ipierraa wenʉrramkhĩirta maach ompaajim” a phã simgui ajim anʉm.]

5Maimua Ẽwandamau ʉdʉraa warag dosãtag Jesús warrpijim aajem, durrsĩ pom sim gaai. Mag warrwia mag durr pom ʉ̃gthaa sim gaaimuapai, seukhabarmjo abarm ee, mʉg jẽb gayam durr warpham magwe thum irig oopijim anaabá. 6Mag oopiwia magjim anʉm, chi dosãt garmua irig:

—Mua pʉrʉgta durr mʉg wejom dʉi ag gaai nem thʉnʉmpa thum deejugui ajim anʉm, pʉchta thumaam khʉʉn porkhanaa thʉ̃rphoo chirsimkhĩir. Mua mʉchdeu deem khõsim khʉʉnag deeju aai chirʉmgui ajim anʉm, mʉch den aawai. 7Mamʉ magaagan sĩi jĩeporou phõbkhanaa mʉrʉgta Ẽwandamagamjo jeeubá ajim anaabá. Pua mʉrʉg mag jeeumʉn, mʉg durr thumwe pʉch deneu ajim anʉm chi dosãtau.

8Magbaawai Jesuu chi dosãtag, —Ẽwandam iek phã sim gaai jaauwai, “Pãar Poron Ẽwandamau; ãba irigpaita jeeubat, maimua ãba i iekpaita ipierraa abat” a simgui ajim anʉm.

9Maimua Ẽwandamau deeu ʉdʉraa dosãtag Jesús warrpijim aajem, jũrr Jerusalén phoborog. Mam barwia Aai i jeeujem di nem pom dʉnʉm ʉ̃r chi sĩ gaai warrwia magjim anʉm chi dosãt garmua Jesuug:

—Pʉ chadcha Ẽwandam Iewaa khai, magan mʉg ee baubaad ajim anʉm. Pʉ chig aba khabahab. 10Ẽwandam iek phã sim gaai “Ich Ẽwandamau ich chognaan pʉiju” a sĩebahab, “pʉ thʉa wenʉrramkhĩir.” 11Maagwai mʉg ee pʉ baudʉkhiinjã, amau sĩi amach jua eeta pʉ jãau aubajup, buju aimaau pʉ chig am ugua. ¡Baubaad! ajim anʉm, chi meperau Jesuug.

12Magbaawaita Jesuu magjim anʉm:

—Mamʉ ĩchab Ẽwandam iek phã sim gaai jaauwai, “Ẽwandamau chadcha pãach thʉaju awi oob nem parhoob amiet” a sĩebahab ajim anʉm, chi meperag.

13Ich mag warag chi dosãtau Jesuug ich ipierraa amkhĩir nem khĩirpierr jajaaukham bʉ̃ʉrjã podba abaawai, seukha chi khũgur petajim aajem ichta.

Jesuu warrpem Galilea durr Ẽwandam iek jaaubaaderr

(Mt. 4:12-17; Mr. 1:14-15)

14-15Jesús agtha Ẽwandam Akhaar ich gaai phẽs wai sim majim aajem deeu Galilea durr, ich berrag. Mag barwia judionaan Ẽwandam iek jaaujem di sĩsidʉmpierr jaaujeejim aajem. Maagwai durr chaauram khʉʉnaupa irua jaau nʉrrʉm khakhapdo aphobaadeewai thumaam khʉʉnau i igar nʉmua, “Ʉuta mag jaau nʉrrabahab” aajeejim aajem.

Jesús Nazaret phobor ee

(Mt. 13:53-58; Mr. 6:1-6)

16Maimua Nazareeg beejim aajem, ich bãautarr phoborog. Mag beewia jua ʉ̃ʉijem ed pabaadeewai judionaan Ẽwandam iek jaaujem deg dubjim aajem, ag na ich duubjerrjo. Mag dubwia, õrag ũrmkhĩir Ẽwandam iek thʉ̃raag phiidʉ dʉnʉisijim aajem. 17Mag i dʉnʉisiewai ãbmua irig ʉapʉijim aajem, jooingarm ẽsap chi pʉʉrthʉm, Ẽwandam i jaaumie Isaías khararrau phãtarr. Maimua chi ẽsap pʉʉrthʉm gaai jʉrnaa thʉ̃rbaadejim anʉm. Irua thʉ̃r sĩerr aig mag sĩejim aajem:

18“Ẽwandamauta mʉ jʉr autarr aawai ich Akhaar mʉ gaai phẽs wai sim, aphʉʉm khʉʉnag jãga ichdeu am peerdʉ auju a jaaumkhĩir.

Irua mʉ pʉitarran, õor amach khaibag ee presonaanjo nʉm khʉʉnag, ‘Ya pãar oberm iek oberju aai nʉm’ a jaaumkhĩir ajim;

dau khĩsumjo nʉm khʉʉnagjã, ‘Ya pãrau wajapha ooju aai nʉm’ a jaaumkhĩir;

chikhamnau dau aphʉʉ waaujem khʉʉn dau aug khaugwia peerdʉ aumkhĩir;

19maimua õrag, ‘Ĩs chad mʉg jaarta Ẽwandamau pãar dʉi nem ajapcha aju ed barbaichem’ a jaaumkhĩirta mʉ pʉijim” ajim anʉm, thʉ̃rmamua. (Is. 61:1-2)

20Maimua thʉ̃r aaipabaadeewai ichig chi ẽsap pʉʉrthʉm deetarrag deeu ʉapʉiwia oo sĩsijim aajem, ichdeu thʉ̃r sĩerr iekpai jawaag. Magbaawai thum aig narr khʉʉnau ãba irigta eerpapaad thʉnʉisijim anaabá. 21Mag ichig eerpapaad aphobaadeewai amag magjim anʉm:

—Ĩsta chadcha pãach thumaam khʉʉn dakhĩir mʉg Ẽwandam iek phã sim gaai ichdeu jaautarrjoo abarmgui ajim anaabá.

22Mag ũrwia thumaam khʉʉnau i wajapha ig iyʉʉ naajim anʉm. Mag nʉm dʉi irua iekdam ũrimʉ iekhamam ũrwia thum jʉ̃gderraa aphobaadejim anaabá. Mag ũrwia, jũrr amach wir aigpai, —Keena, ¿mʉg woun José iewaa khabamá? ¿Khani mag iekha oo simma? anaajim anaabá.

23Magbaawai Jesuu magjim anʉm:

—Pãrau mʉchig “Chadcha médico khai, pʉchdeupai pʉch monaaubapʉi” a iekhaju mua khaphʉ chirʉmgui ajim anʉm. Magnaa amag, Pãrau ũurwai Capernaum durr mua nem khĩir pogkhe waaujem anaawai, mʉigjã magan agjo waupi jaaujugui ajim anʉm, mʉ iek ʉkhamapham iekhau. 24Mamʉ keena, pãade oobat, muajã mag chirʉmgui ajim anʉm: Chi mʉg Ẽwandam iek jaau wenʉrraajem khʉʉn chan dich do ee ãba naajem khʉʉnau ãbjã kha khõchkhaba aajemwai. 25Mʉch seukha chirʉm am ugua pãrag jaaukhim: Pãrau khĩir eyaa nʉmgui ajim anʉm, jooingar Ẽwandam iek jaaumie Elías khararr monakha aawai Israel durr año thãrjup awia jãrr bʉ̃ʉrjã noseg cheba arr anʉm. Mag gaaimua Judea durr thum jãdau theega burrtarr anʉmjã pãrau ũurjem. ¿Pãrau khĩirjuawai mag jaar ĩchab khoopaa ũanaan dau aphʉʉm chukhu ajĩ Israel durr? Chukhu ajim aju aai khaba nʉm; khapan thʉnaajim. 26Mamʉ magʉmjã ni iwiir ãbam aarjã Ẽwandamau Elías pʉibajim. Mamag pʉiju khãyau Sidón durr phobor Sarepta anʉm ee khoopaa ʉʉi ãb sĩerr aarta Ẽwandamau pʉijimgui ajim anʉm, magʉgta i jãhogamkhĩir. ¿Jãgwi? Ich durram khʉʉn eepai pʉimuan i khõchkhabaju khaphʉ arr aawaima. Maguata warag deeum durragta pʉijimgui ajim anʉm, ich meeun khabam ee. 27Ĩchab khĩir eyaa abat: Israel durr Ẽwandam iek jaaumie Eliseo khararr monakha aawai ĩchab õor kokobé beneu bar sĩsidʉm khapaana thʉnaajim. Mamʉ mag thʉnarr khʉʉn iwiir ãbjã Ẽwandamau irig monaaupi jaauba, ãba Siria durr woun Naamán aajerr appaita monaaupijim. ¿Jãgwi? Ẽwandamau oowai amach israelnaan eepai pʉimuan, amach eempai aawai bʉ̃ʉrjã amach khamor machag monaauju khĩirjubaju ich Ẽwandamau khaphʉ sĩerr aawaima ajim anʉm ich Jesuu.

28Jesuu mag iekhabarm ũrbaawai aig narr khʉʉn thum i dʉi meeukha phobaadejim anaabá, amach khĩir iekhabapäaiwai. 29Mag meeukha nʉmua warag phiidʉtkha phobaadewia, phobor eemua jʉrpʉiwia, ich ag phobor eepai durrsĩ gaai durr por waaidʉ i warrjierram aajem, mammua ithurmʉg ee i sĩepäaig. 30Mamʉ mag nʉm ee sĩi am jãrr dichwia petajim aajem.

Jesuu woun ãb dosãt beneu baarjerr monaautarr

(Mr. 1:21-28)

31Maimua magtarr khur deeu Jesús Galilea durr phobor Capernaum anʉmʉg beejim aajem. Mag beewia õor jua ʉ̃ʉijem ed pabaadeewai õrag jaaujeejim aajem. 32Mag irua jaau sim aig i iek ũrwia õor jʉ̃gderraa thʉnaajim anʉm, chi khaphʉm khaphʉm aajem khʉʉn khãyaujã ichdeuta jaau khaphʉcha jaaumam ũrwia.

33Mag judionaan Ẽwandam iek jaaujem deg ĩchab sĩejim aajem, woun ãb mor ee ben khaigbam wai sim. Mag wounau Jesús oobaadeewai chi ben i mor ee simuata thet äa anaa, 34—¡Jesús, Nazaretpierr! Ideu maar sĩi khajapha sĩubá ajim anʉm. Pʉʉn warre maar opäainta urum. Mua pʉ khaphʉ chirʉm, pʉ jammua urú. Pʉ Ẽwandam Iewaa ʉ̃gtharmua beetarr khabahab, warrgurwe Ẽwandamau pʉiju jaaujerr ajim anaabá, chi mepeer garmua.

35Magbaawai Jesuu chi beneg meeurraunaa, —Khĩu abá. Pʉchta warag jãg woun mor eemua oberbaad ajim anʉm.

Magbaawai chadcha chi mepeer oberbaademua warre chi wounta jẽkhʉt barwerppʉijim anaabá. Mamʉ magtarrjã chig aba, deeu khĩir eerdʉwia, warramjo monakha sĩsijim aajem. 36Mag oowia thumaam khʉʉn dauderraa nʉmua amach eepai, “¿Khanim wounaan juapa theegta jãg mepeenag obeerpi jaauwaijã i ipierraa ober nʉma? Keena, mʉig ag na maadeu mʉg chan ooba aajemwai” a iekhaphoo thʉnaajim anʉm.

37Jesuu magtarr sĩi ag bigaau phobordam nʉnʉidʉm eem magwe bĩi thʉnʉisijim aajem.

Jesuu Pedro phaauhũan monaautarr

(Mt. 8:14-15; Mr. 1:29-31)

38Maimua mag woun mor eem mepeer jʉr pʉawia Ẽwandam iek jaaujem degmua oberwia petajim aajem, Simón di aar. Maimua barimawia ooimaawai, Simón phaauhũanta khʉʉumieu mas thʉnʉm ooimajim anaabá. Magbaawai mag ũan monaaupʉimkhĩir, õrau Jesuug chaigpa naajim anʉm. 39Magbaawai i werba jẽer sim bigaau dʉnʉʉuwimawia chi khʉʉumieg khĩesir iekhabaawai warre chi khʉʉumie meeudʉbaadejim anaabá. Mag khʉʉumie meeudʉbaadeewai ag bʉrre phiidʉwia am jãhogaagpajim aajem.

Edau kheubaadem ee Jesuu õor pom monaautarr

(Mt. 8:16-17; Mr. 1:32-34)

40Maimua edau kheubaadeewai aaunaan paraa arr khʉʉnau amach aaunaan khamor machagpierr Jesús aig aubeemajierram aajem. Magbaawai Jesuu chi mor masim khʉʉn gaai pʉr oomamuapai thum monaaupʉimajim aajem. 41Mag pʉr oomamua õor mor ee ben paraa arrpa jẽu werpmajim anaabá. Chi mepeenaujã Ẽwandamau i pʉitarr khaphʉ narr aawai, “Pʉʉn Ẽwandam Iewaau” a ähäag oberdʉtkha maajeejim anʉm. Mamʉ Jesuu tag amag iekhapiba meeurrau sĩumajim aajem, õrag ich jaaum ugua.

Jesuu maach peerdʉajem iek Galilea durr jaau phʉʉrdʉ nʉrrarr

(Mr. 1:35-39)

42Maimua ya ãspabaadeewai aigmua chawag mawia õor chukag aar ich appai sĩeimajim anʉm. Mamʉ Capernaumpienau i jʉr wenʉrrʉʉ awia baau athaimaawai tag i chawag pʉimapha sĩi amach aigpaita sĩepim khõsi naajim aajem. 43Mamʉ ichdeu amag, —Mʉigpai chiraba mʉ chawag maju aai chirʉmgui ajim anʉm, ĩchab deeum phobor eejã õrag “Ẽwandamta ya thumaam khʉʉn Porkhaimʉʉ sim” a jaauwia, ĩchab am peerdʉju khĩirju nʉm khai, irigta ʉdʉraa amach Porkhapiju aai nʉm a jawaan, mag atheeta Ẽwandamau mʉ pʉitarr aawai.

44Mag jaauwia, Capernaumpai sĩeba, ich mag phoborpierr judionaan biirdʉajem deg Ẽwandam iek jaau nʉrraajeejim aajem, Galilea durr.

Currently Selected:

San Lucas 4: noaA

Highlight

Copy