San Lucas 7
7
Jesuu capitán chog monaautarr
(Mt. 8:5-13)
1Mag õor pom wejorrag iek jaau o dichtarr khur Capernaum phoborog petajim aajem. 2Mag Capernaum phobor ee capitán ãb sĩejim aajem, soldaaun por. Mag capitán chog ãb irua ʉ̃rcha daupii aajerrta mor mas parhba tag ãwatbajujo thʉnaajim anaabá. 3Mag nʉm ee chi capitanau ũurwai Jesuu õor monaau nʉrrʉm a ũrbaadeewai, judionaan ee jooin chi thethem khʉʉn jʉrwia pʉijim aajem Jesús aar, makhʉʉnau chi Jesuug chaigpa phobaadeewai ich chog monaaupäain ich di aar mamkhĩir. 4-5Mag chadcha ereuwia, chi Jesús sim aar bardʉtkhaimawia, mag capitán chog mor mas simta phʉʉrba jajaau nʉʉ awia, chaigpa nʉmua irig magjierram anʉm:
—Pua capitán di aar i chog monaaun makhiin ʉu akham. I chan maachjo judío khabam, mamʉ maach meeun kha khõsi sĩerrʉmgui ajierram anʉm. Irua maar Ẽwandam iek jaaujem dijã par eu deejim, ich phatkhonau. Jãgʉm wounaan di aran chadcha pʉ maju aai chirʉm. Pua khõs akhiin maran pʉ awaanta beejimgui ajierram anʉm irig.
6Magbaawai chadcha am dʉi majim aajem. Mamʉ ya chi aaunaan wai nʉm di dakha wetum ee, chi capitanau ich aig narr khʉʉn dʉi iek jaaupʉijim aajem, Jesús aar. Magbaawai wetwi barimawia irig, —Capitán iek, pʉ mapimaaugau khabam aajem, mamʉ i iek í Ẽwandam dau na ʉu khaba chirʉm aajem, pʉ i di aar maag. 7Ich mag chirʉm khap, ichcha pʉ aig beeba abarm aajem, pod pʉ dʉi khĩircha iyʉʉ aju khaba aawai. Mamʉ pua khõs akhiin, ich maupaimua ich chog monaaupi naajim. I iek pʉch iiu aawai chadcha monaauju aajem. 8I iek iruajã ich gaaita khaphʉ chitʉm aajem, ichjã ĩchab ich pornaan jua eegpai chitaawai. Mag chirab mamʉ, iruajã ĩchab soldaaun ich jua eegar phe wai chirʉm aajem. Makhʉʉnag ãbamʉg khãijã “Pet” aawai maajem aajem, ipierraa. Maimua deeumʉgjã “Pidú” aawai beejem aajem. Maimua ich chogagjã “Mʉgta abá” abaawai i ipierraa aajem aajem. Magua, maupaimua pua i chog monaaupi jaaumʉn, chadcha monaauju irua khaphʉ chirʉm aajem a jaauchejierram aajem, Jesús aig.
9Capitán judío khaba simuata mag iek jaaupʉitarr warm khʉʉnau ichig jaaubaichem ũrbaawai Jesús jʉ̃gderraa aademua ich ẽudee õor pos wenʉrrarr khʉʉnagta, —Keena, pãade oobat. Mʉg maach israelnaan ee mʉg woun denjo ʉkha nʉm chan agtha mua ooba chitʉmgui ajim anʉm.
10Maimua chi iek jawaan beetarr khʉʉn deeu ewag wetwia di aar ooimaawai, maig warppaimua am barju nawe Jesuu monaaupʉitarr aawai mag chi capitán chog mor mas kherarr monakkha kherʉm ooimajierram anaabá.
Khoopaa ũan chaai chi meem Jesuu phiriu autarr
11Jesús Capernaum phobor ee mag capitán chog monaaupʉiwia oberaau phobordam Naín anʉmʉg petajim aajem. Mag i mam dʉi i khapeen khapan wetmam ee, agjo deeum khʉʉn pom pos wetmajim aajem. 12Mag mamua phobor ee dubaag puertdi sim aig dakha pachenaa oowai õor binaan bepaan warrumta oo athajim anʉm. Ma, khoopaa ũan chaai ichta ãbpai khitarr ajim aajem. Mag binaandam arrum dʉi ĩchab ag phobor eem khʉʉn õor khapaana wedurajim anʉm. 13Maimua aar barwia maach Por Jesuu khoopaa ũan ich chaai athee dau aphʉʉ kherʉm oobaawai irig, —Oob bĩem ajim anʉm.
14Magnaa warag aig beewia chi binaan arrum pa gaai pʉrbaicheewai chi arrmaa arr khʉʉn dʉnʉisijierram aajem. Magbaawai chi binaan ẽwan sĩerrag, —Mʉ iekhau phiidʉbaad ajim anʉm.
15Magbaawai ag bʉrre chi mee kherarrdam phiidʉwia ʉu deeu iyʉʉ aadejim anaabá. Magbaa Jesuu chi ãdagta, —Ar kherʉm, pʉch chaai athaad ajim anʉm.
16Magbaawai thumaam khʉʉn jãphierr nʉm iekhau Ẽwandamag jeeumamua, “Chadcha Ẽwandam, ʉu pua maar eeg oo chirʉm. Ʉu pua jãg chaai chi meem arr phiriu atham” ajierram anʉm. Magnaa ĩchab amach wir aigpai, “Keena, ĩsin chadchata maach ee jooingarmjo Ẽwandam i jaaumie sĩeichechem” khajierram aajem.
17Mag Jesuu chaai phiriu autarr Judea durr thumaam khʉʉnau khakhapdo aphobaadeewai ichta warag thʉ̃rphoo sĩsijim anaabá.
Juan õor por choomieu ich khapeen numí chogtarr
(Mt. 11:2-19)
18Juanaujã ĩchab Jesuu mag nʉrrʉm thum khaphʉ aadejim aajem, ich khapeenau ich sim aar jaaubaimaawai. Magbaawai ich khapeen numí thʉ̃rkha auwia 19Jesús aar pʉijim aajem, makhʉʉnau irig “¿Pʉʉta chadcha nawe Ẽwandam i jaaumienau beeju a jaaujerrá, wa ar khabam khai warag ich jãg nʉag?” a khap jeeumkhĩir. 20Magbaawai chadcha ereuwia Jesús sim aar barwia irig maguimajierram anʉm:
—Juan chi õor por choomieu maar pʉ aig pʉijim, ichig jaaupʉimkhĩir. ¿Pʉʉta chadcha nawe Ẽwandam i jaaumienau beeju a jaaujerrá, wa marau deeumta nʉju aai nʉwa? Marag ajapha jaaubá marau khap aag aimajierram anʉm irig.
21Magbaawai, —Pãrag oopikhimgui awi, am dakhĩir Jesuu khamor machag sĩsidʉm pom monaaunaa ben khaigbam wai sĩsid arr khʉʉnjã monaaupʉimajim anaabá. Mag nʉm dʉi ĩchab õor dau khaugba khithee arr khʉʉnjã dau monaaumajim aajem. 22Maimuan chadau magjim anʉm, chi Juanau chogtarr khʉʉnag:
—Ereubaadewia Juan aar jaaubaimat, pãach jʉ̃gʉucha ũrwia pãach daúacha mʉg oobarm. Irig, “Dau khaugba khekhed arr khʉʉn dau ajapha thʉnʉm abat; bʉ wedʉ wedʉ sĩsid arr khʉʉnjã ya ajapha nʉrrjeem; kach khĩsu arr khʉʉnaujã ajapha ũr sĩsidʉm; chi meem arr khʉʉnjã deeu iiu nʉrrjeem; maimua aphʉʉm khʉʉnagjã ĩchab õor peerdʉajem iek jaau chirʉm” a jaaubaimat ajim anʉm. 23Ĩchab irig, “Chi mʉ iek ʉkhawia ogdʉba mʉ gaai ʉkha chirʉm wounan i onee ich mag chitaju” a jaaubaimat ajim anʉm, mag ichig jeeuwimarr khʉʉnag.
24Maimua chi Juanau chogpʉitarr khʉʉn ereu phobaadeewai chi Juan igwiata Jesuu õrag magjim anʉm:
—Pãrau Jordán igaau woun õrag Ẽwandam i jaau nʉrrʉm oon weetwai, ¿sĩi woun iek theeg chukhu phũu choomaar sõsõii jũurba ahau aajemjokhamta oon wetjierrá? Magʉm woun khabajimgui ajim anʉm. 25Magan ¿khanim wounta oon wetjierráma? ¿Woun khajũa ajappha jũa simta oojupii awia oon wetjierrá? Pãrau khaphʉ nʉmgui ajim anʉm, khajũa ajapha jũanaa thach biwaa khoojem khʉʉnan sĩi phobor ee di ooimʉm eeta naajem, reinaan dʉi ãba. 26Mamʉ pãrau magjomta ooimabajierram. Pãrau ooimatarran woun ãb Ẽwandam i jaau nʉrrʉm ajim. Mamʉ mua pãrag jaaukhimgui ajim anʉm: Juan chan warrgar Ẽwandam i jaaujerr khʉʉnjopai khaba, am khãyaujã ʉ̃rʉʉchata sim. 27I igwia Ẽwandamau ich i jaaumienag warrgarwe ich iek phãpitarr gaai jaauwai:
“Jãata irua mʉ na pʉiju ajim, ichdeuta mʉ na mʉ maju ee õrag jaaumaawai thumaam khʉʉnau mʉ iek ũrm khõsi sĩi mʉ nʉ naamkhĩir.” (Mal. 3:1)
28’Magua muajã pãrag mag chirʉmgui ajim anʉm ich Jesuu: Warrgar Ẽwandam i jaaujerr khʉʉn eejã Juan chi õor por choomie khãyau ʉ̃rʉʉcharam chan ãbjã chukhu ajim. Mamʉ chi mʉ iek ũrwia, mua nem waubarmjã khaphʉnaa, Ẽwandamta ich thãar ee au sim wounan chad, maadeu nem igba khitawiajã, Juan khãyaujã khapcha aju, jãga Ẽwandam ichdeu õor peerdʉ atham thãar ee sĩeicheejẽ.
29’Pãrau khaphʉ nʉmgui ajim anʉm, chi Juanau jaau nʉrrʉm ũr narr khʉʉn ee thumaam khʉʉnau debpaar jeeujem khʉʉnaupa amach khaibag ãsie ewag khĩirjuwia irig por choopi nʉmua Ẽwandamagta, “Ẽwandam, chadcha puata maar thãar khap chirʉm. Ʉu pua Juanag jaaupiwia marag pʉch iek khaugpibarm” aajeejim. 30Mamʉ chi Moiseeu Ẽwandam iek phãtarr ajapcha ʉʉrkhaajem khʉʉnau chi machnaan dʉimua chan magba, Ẽwandamau am thãar eejã warm khʉʉn dʉímjo am ig sim warag isegjierram. Mag gaaimua warag Juanagjã amach por choopibajierramgui ajim anʉm, amachta ajapcha nʉm awia.
31Maimua maach Por Jesuu mag jaaumamua magjim aajem: —Pãar ĩsim khʉʉn, ¿jãga nʉm abarí? Mua pãrag jaaukhim: 32Pãar ar Juan isegwi mʉjã iseg nʉm khʉʉnan, chaain jemkha nʉmua amach khapeen dʉi khĩir auphobaademjota nʉmgui ajim anʉm. Warm khʉʉn garmua, “Maar dʉi karris sir nʉm gaai onee jemkhabahut” aawaijã jemkhamapha nʉm. Maimua jũrr, “Magan sĩi okhĩirjuu õor mee wai nʉm aiguimjo ohoodo abat” aawaijã magjã khõchkhaba nʉm. Pãarjã magta naawai, ¿khani khõsi nʉmma? 33Pãar ee Juan chi õor por choomie nʉrraajeewai irua ajap thach khoba sʉrkhaajeejim, Ẽwandamag jewaag. Magʉm vino chará bʉ̃ʉrjã dobajim. Mamʉ mag oowai pãrau, “Jãan mepeer dʉi khapeerkha sĩewaita sĩi ich jãg aai thach khoba nʉrraajem” a iekhaajem pãrau. 34Mamʉ ĩs mʉch chi Emkhooi Iewaa chaar beewia pãach dʉi parhooba thachdam khonaa vinodamjã do khitaawai jũrr magjã khõchkhaba, warag pãrau mʉ eugar thach bipom khonaa vino pigjã chitʉm aajem. Magnaa gobierno debpaar jeeu nʉmua õor khũguurjem khʉʉn dʉijã khapeerkhanaa pekau pom sĩsidʉm khʉʉn dʉipa khapeerkha chitʉm a iekhaajerramgui ajim anʉm, mʉjã iseg nʉm iekhau. 35Magnaa amag, Mamʉ ar chi Ẽwandamau khĩirjug deetarraucha khĩirju nʉm khʉʉnau chan magba, amau chadcha khaphʉ nʉmgui ajim anʉm, chijã khʉʉnta ich Ẽwandamaucha pʉitarr khʉʉn agá.
Jesús Simón chi fariseo deg
36Biek ãb chi ajapcha Moiseeu Ẽwandam iek phã pʉatarr ʉʉrkhaajem khʉʉn eem woun ãb Simón anʉmua Jesús ich dʉi ãba thach khomkhĩir ich di aar eeurrjim aajem. Magbaawai chadcha mag woun di aig beewia, ich atheem thoi kherʉm aig jupwia, dijã ee ãba phʉʉr khophobaadejim aajem. 37Maagwai ag phobor ee sĩejim aajem, kachaloo ʉʉi ãb parhoobam emkhooin dʉi sĩerrarr. Mag ʉʉirau Jesús Simón di aig thach kho sim khaug athaawai jʉ̃gdee didam durrkhudau alabastro anʉm den boteedidam wau khitʉm dʉi beejim aajem i aig. 38Mag beewia i eugarmua i bʉkhʉrr phõbkhachewia bĩemamua i bʉ ʉ̃r ich daucho theutkhamam ich porbʉʉupai jãrpʉimajim anʉm. Magnaa i bʉ ʉ̃ʉ au, ʉ̃ʉ aunaa, jʉ̃gdeeu choomajim anaabá, i bʉ gaai.
39Chi Jesús thʉ̃rpʉitarr wounau mag oobaawai ich odegpai, “Mʉg woun chadcha Ẽwandam i jaaumie chaar akhiin, irua warre khaug aukhamgui ajim anʉm, khanim ʉʉirauta jãg ich bʉ gaai pʉrbaiche. Majã pekau pooma simua ich gaai pʉr simta bʉ̃ʉrjã khaugba simgui” ajim anʉm ich odegpai.
40Magbaawai Jesuu chi Simonag, —Simón, pʉde mʉ iek ũrbarí ajim anʉm.
Magbaawai jũrr chi Simonau Jesuug, —Maestro, magan mʉrʉg jaaubarim ¿khan agá? ajim anʉm.
41Magbaawai Jesuu jaaubaadejim aajem irig. Mag jaaumamua, —Biek ãb wounau õor numiim khʉʉnag phatkhon prestaajimgui ajim anʉm: ãbakhaíg cien denarios deewia warmʉg diez denarios deejim. 42Mamʉ amau phagpʉyaag chukhu narr aawai, “Ideu mua sĩi ich jãg okhoopikhim; oob mʉrʉg phagmiet” ajim anʉm, chi morkhʉʉu.
Mag jaauwia Simonag, —¿Chijãgua pua khĩirjuawai ʉ̃rcha i daupii aju khai? a jeeujim aajem.
43Magbaawai Simonau, —Mua oowain chi phatkhon dʉrrcha paraa sĩerraujoo simgui ajim anʉm.
Magbaawai Jesuu jũrr irig, —Simón, maiguin chadcha pua ag eyaa jaaubarmgui ajim anʉm.
44Magnaa chi ʉʉirag eerpanaa Simonag magjim aajem:
—Simón, ¿pua mʉg ʉʉi oo chirabá? Pʉde khĩirjubarí. Pʉ di aig mʉ barcheewai pua mʉrʉg dodamjã joi deebajimgui ajim anʉm, mʉ bʉ sũgamkhĩir. Mag khãyau mʉg ʉʉirau ich dauchooupai mʉ bʉ ompʉiwia ich porbʉʉupai deeu jãrbapʉim. 45Mʉ barcheewai pua mʉ khĩir ʉ̃ʉnaa, “Pʉ ʉu beejimjã” abajimgui ajim anʉm. Mag khãyau mʉg ʉʉirau mʉ barchetarr aigmua ich mag mʉ bʉ ʉ̃ʉ ahaukham. 46Pua aceitedamaujã mʉ por phuurbajimgui ajim anʉm, mʉ barcheewai. Magtarr mʉg ʉʉirau jʉ̃gdeeuchata mʉ bʉ gaai choowia phuurpʉijimgui ajim anʉm. 47Ĩs mʉgbarm pʉde khĩirjubarí ajim anʉm, chi Simonag. Mʉg ʉʉirau mʉ dʉi mʉgbaichemʉn ich pekau pooma sĩerr thum chugpaabapʉim jũrrta “Ʉu ajim” a sim khabahab. Chi pekaujã bʉ̃rʉʉm khaba arr aawai ichdeu agjo dʉrrcha mʉ kha khõsi ʉm a sim khabahab ajim anʉm, jãg sim aig. Ich jãgta sĩebahab cha mua pʉrʉg nem ĩgkha chirʉmjã. Ãbmua khãijã ichig debpaar paar nʉm khʉʉnag tag phagpiba perdonaamʉn, chi debpaar poomacha sĩerr garmua ʉ̃rʉʉcha i daupii aju. Maagwai bʉ̃rʉʉpai paraa sĩerrau i daupii ajup mamʉ, warm denjocha khabaju. Magua ich perdonaatarrpierrpai sĩi irig “Ʉu ajim” ajugui ajim anʉm.
48Maimua jũrr chi ʉʉiragta oonaa, —Pʉ khaibag thum chugpaa sĩsimgui ajim anʉm.
49Magbaawai i dʉi ãba ohoodo narr khʉʉnau amach wir aigpai iyʉʉ nʉmua, —Keena, ¿mʉ chijãg woun agá, jãg pekaupa chugpaa sim? ajierram anaabá.
50Mamʉ amau mag khĩirju nʉmjã igba warag chi ʉʉiragta, —Oob khĩirjum. Ʉu pʉ peerdʉ ʉisimgui ajim anʉm, pʉchdeu ʉkhatarr gaaimua. Pʉch diig maju aai ʉmgui ajim anʉm.
Currently Selected:
San Lucas 7: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
