San Lucas 8

Ʉʉin Jesús jãhoogjerr khʉʉn

1Maigmua maau Jesús phoborpierr nʉrrʉmua ĩchab phobor chaaur didam khapan khaba khekhedʉm eem magwe nʉrrajim aajem, maach peerdʉajem iek jaauwai. Mag jaau nʉrrʉmua, —Ẽwandamta ya thumaam khʉʉn porkhaimʉʉ sim. Pãar peerdʉm khõsi nʉm khai, irigta ʉdʉraa pãach phẽethʉgpibat aajeejim anʉm, ichta pãach Porkhamkhĩir.

I dʉi ĩchab wenʉrrajim aajem ichdeu doce jʉr autarr khʉʉn, 2maimua ĩchab ʉʉin ichdeu am mor eem mepeen jʉr werpnaa sĩi khajapham khamor machagau sĩsid arr monaaukhapʉimatarr khʉʉnjã agjo. Chi ʉʉin mag i dʉi wenʉrrarr khʉʉn, dau ãb María ajim aajem ĩchab am den Magdalena aajerr. Ich mag ʉʉi mor eem ajim aajem Jesuu mepeen siete jʉr werptarr. 3Ãbakhai Juana ajim aajem, woun Chuza anʉm ʉʉi. Ich mag woun Chuza anʉmuata rey Erodes nem thum ich denjo khaphʉ aajeejim anaabá. Maimua ãb agjo nʉrraajeejim aajem, Susana anʉm. Maimua mag tag ʉʉin khapan agjo thʉnaajim aajem, amach di aarmua nemdam aibee nʉm iiu, i jãhog wai wenʉrraajerr khʉʉn.

Wounau nemjĩir dau phothurtarr ag nem ĩgkhaa

(Mt. 13:1-9; Mr. 4:1-9)

4Mag Jesús phoborpierr maach peerdʉajem iek jaau nʉrrʉm jaar, khãai ãb phoborpierram khʉʉn i aig beejierram aajem. Maimua thum ãbam aig biirdʉbaadeewai amag nem ĩgkhamamua magjim anʉm:

5—Biek ãb woun nemjĩir dau phoon majim aajem. Maimua mag mawia pho nʉrrʉmua ãaur chi nemjĩir daudam bʉ diichjem ee burrtarr bʉʉu jẽb ee joothʉgmam dʉi nemchaain beewia sĩi khokhʉʉipʉijim aajem. 6Maimua ãaurag mokpor jojoodog ee burrtarr tharrphejim anʉm, mamʉ mag perasom jẽb durrkhu ʉ̃rʉʉ sĩerr aawai jẽb jʉsarm gaaimua pod khaar khaba, sĩi phua khechjim aajem. 7Mag pho nʉrrʉmua ĩchab ãaur khʉʉn miudo arr ee burrjim aajem. Mamʉ chi miuta ʉ̃rpabaadeewai nemjĩirdam õt khaba, sĩi ich magpai aphʉʉ nʉisijim aajem. 8Maagwai tagam khʉʉn jẽb wajaug ee burrjim aajem. Makhʉʉnan chadau oberwia chebaadeewai khaarpierr bich thʉʉ jopmajim aajem.

Mag jaaumamua, aig narr khʉʉnag, —Keena, jʉ̃g ʉ̃rʉʉnaa chamʉg nem ĩgkhaadam mua jaau chirʉm ajapha ũrbat ajim anʉm.

Jãgwi ejemploouta mag nem jaaujeejĩ

(Mt. 13:10-23; Mr. 4:10-20)

9Magbaawai i khapeenau irig jeeumamua, —Cha pua nem ĩgkhaadam jaau dichdimam, ¿khan aawaíuma? Marau pod khaugba abarm, marag jaaubá ajierram anʉm.

10Magbaawai ichdeu magjim anʉm amag:

—Pãrau khaugam khõsi ũr naawai, mʉchdeun warre pãrag khaphʉ apiejem, jãgata Ẽwandam õor thãar ee sĩeicheejẽ. Mamʉ warm khʉʉnagan sĩi khajapham nem ĩgkhaadamjopaita ĩgkhaajemgui ajim anʉm, amau oo nʉmta oobamjo amkhĩir, maimua ũr nʉmjã bʉ̃ʉrjã khaugbamjo amkhĩir.

11Maimua amag, —Mua pãrag jaaukhimgui ajim anʉm, ich Jesuu. Pãrau pãachig jaaupi nʉmʉn mʉgaugui ajim anʉm: Chi nemjĩir dau wounau phothurtarr, Ẽwandam iek õrag jaau nʉmta jaau simgui ajim anʉm. 12Maagwai chi nemjĩir dau khʉdjã ee burrmarr, õor Ẽwandam iek sĩi par jʉ̃gʉupai ũurjem khʉʉnaugui ajim anʉm. Amau Ẽwandam iek jaau nʉm ũr nʉm, mamʉ meperau beewia khũgurbaicheewai ũrba arrjo thãar ee Ẽwandam iek chukhu thʉba nʉm, khʉdjã eem nemjĩir dau nemchaainau khopʉitarrjo. 13Maagwai mokpor jojoodog ee nemjĩir dau burrmarr, ar maach khapeenau Ẽwandam iek ũurwai onee ʉkhaajem khʉʉnaugui ajim anʉm. Mamʉ thãraucha ʉkha nʉm khaba aawai, nemjĩir dau pod khaar khaba aajemjo khũchpai ʉkhawia iseg pʉajem. Maagwai ʉkha nʉm anʉmta mag iek ajapham gaaimua meperau khaigba aicheewai deeu Ẽwandam iekta isegwia warr amach naajerrjo wenʉrram khõsi nʉmgui ajim anʉm. 14Maagwai nemjĩir dau sirphʉg dʉi oberwia õt khaba bãautarr, jũrr ar maach khapeen ihãsisisdom khʉʉnta jaau simgui ajim anʉm. Amau Ẽwandam iek ũrm khõsi ũr nʉm, mamʉ deeu amach khĩirjug eepai, “Jãgʉm gaaimua pod mʉ phatkhon auba khãijã chitaju,” wa magbam khai, “Mua chadcha ʉkhakhiinjã pod parhooba mʉchdeu ampierr abaju” a khĩirjuajem. Mag gaaimua mag nemjĩirdam aphʉʉ bãauwia pod cheba arrjo ĩchab Ẽwandam athee nem ajapha wawaagjã podba, sĩi serbiibata nʉmgui ajim anʉm. 15Mamʉ jũrr chi nemjĩir jẽb ajaug ee burrtarr, ar õrau Ẽwandam iek amach thãraucha ʉkhaa chaar ʉkhaajem khʉʉnta jaau simgui ajim anʉm. Magʉm khʉʉnau sĩi par jʉ̃gʉupai ũrba aajem. Amachdeu ʉkha nʉm gaaimua dau aug wauju akhiinjã, majã am gaai mas khaba simgui ajim anʉm, Ẽwandam athee nem ajapha waum khõchgau.

Lámpara ag ejemplo

(Mr. 4:21-25)

16’Ya pãachig jaaubaawai pãrau khaphʉ nʉisim, mamʉ ĩchab mʉg pãachdeu ũrbarmjã pãrau sĩi pãach atheepai wai naaju aai khaba nʉmgui ajim anʉm. ¿Khaíu õtdau paanaa bathẽe eegar wa sĩi nem bʉ ee khãijã ausĩiujẽ? Õtdaun paanaa warre dijã garta ausĩiujemgui ajim anʉm, thumaam khʉʉn dau araraa amkhĩir. 17Ĩswe chan õrau agtha ajap khaugba nʉm, jãga Ẽwandamau õor peerdʉ auju. Mamʉ mʉg atagta amach daúacha õt bʉʉg nem waibeenaa oo nʉmjo amau khap aju. Chi mag khaugba nʉm khʉʉnan agtha khĩchag ee nem oo nʉmjota nʉm, bʉ̃ʉrjã khaugba. 18Ajapha khĩirjubat ajim anʉm, jãga pãrau ũr nʉ. Ar chi thãar onee ũrm khõsi ũr nʉm khʉʉnag Ẽwandamau warag khĩirjug deeju, ich iek khapcha amkhĩir. Mamʉ ar ũrmaphapai ũr nʉm khʉʉn khĩirjug eemʉn, cha mua jaau chirʉm deeu Ẽwandamau ich iek sĩepiba khecheu aujugui ajim anʉm, ũrmapha naawai.

Jesús eeugpeenau amach ãd dʉimua i dʉi iekham ig narr

(Mt. 12:46-50; Mr. 3:31-35)

19Mag nʉm ee ich Jesús ãd ich chaain dʉi i aig beejierram aajem. Mamʉ õor pom wejom khurau pod i sim aarcha dubba, daaugajãrpai naaichejim anaabá. 20Magbaawai õrau irig, —Pʉ eeugpeen pʉ ãd dʉi daaugajãr nʉm. Am iek pʉ dʉi oom khõsi nʉm aajem ajierram anʉm.

21Mamʉ magbaawai ichig mag jaauchetarr khʉʉnag Jesuu magjim:

—Mʉrʉgan mʉig Ẽwandam iek ũrwia ag ipierraa nʉm khʉʉnta ĩchab mʉ eeugpeenjonaa mʉ ãdjo sĩsidʉmgui ajim anʉm.

Jesuu phũ dʉi phũas thumbapitarr

(Mt. 8:23-27; Mr. 4:35-41)

22Maimua biek ãb Jesuu ich khapeenag, “Dokhĩrag wettarrau” awia, chadcha dojãrr paaukhabaadejim aajem. 23Maimua ya am mag dojãrr khodjorrom ee, ich Jesús khãibaadejim anʉm. Mag i khãi jorromta, phũhãd pom beewia phũasdau dapag baupa aadeewai sosookhamua japau ãwatbajujo aadejim anaabá. 24Amachdeu mag oophobaadeewai i khãi jorrom aar mawia, —¡Maestro, phiidʉbaad! Ya maachin khoogpamgui ajierram anʉm.

Magbaawai phiidʉwia, phũ theeg thʉnʉmʉg meeurrau sĩunaa, ĩchab chi phũasagjã meeurrau sĩubaawai, tag phũjã weba phũasdaujã baupa khaba, warre sĩi dojã meuu joisijim anaabá. 25Maimua jũrr ichdeu amag, —Keena ajim anʉm, ¿mʉg pãar mʉ dʉi khodjorromjã nem okhota nʉ? Jãgan pãrau chan mʉ pãach dʉi chitʉmjã khaugbata naab ajim anʉm, jãgcha jãphierraag.

Mag amach dakhĩir phũ dʉi phũaspa warre thumba atham oobaawai jãphierrnaa dauderraa nʉmua amach appai okharii, —Keena, ¿khanim wounta mʉg phũugjã iekhanaa phũasagjã iekhaawai i ipierraa aajẽma? ajierram anʉm.

26Mag wetmamua khodjorroo awia Gerasa durr barjierram aajem, ich ag thʉrrdo eepai thoom igar Galilea khĩirphee.

Jesuu woun ãb dosãt dau eerpamieu baarjerr monaautarr

(Mt. 8:28-34; Mr. 5:1-20)

27Mag Gerasa durr barimawia Jesús durrpabaadeewai i khĩirphee woun ãb phobor eemua oberchejim aajem. Mag woun ich warrgarwe dosãt beneu sĩpwia ich mag bar nʉrraajeejim anaabá. Mag gaaimua nawe degmua mawi, tag degjã khaba, ãba ujã ʉ̃rpai khãinaa, khajũa kharraa ich mag sĩerrajim aajem. 28-29Mag wounau Jesús oo athaawai degolp wiiu a i bʉkhʉrr phõbkhabaimawia chaigpamamua thet irig magjim anʉm:

—Jesús, Cha Ʉ̃gthaa Phuu Nʉm Iewaa, ¿khantheeta pua mʉ mʉgbaichema? Oob mʉ chig a chiram ajim anʉm, chi mepeer garmua Jesuu ichig woun mor eemua oberpi jaaubaawai.

Mag chi mepeer ajap thierrpa sĩerr aawai ʉ̃iba baarjeejim anaabá. Mag barbaadeewai parii cadenau jʉ̃naa grillos anʉm eejã bʉ khõokha sĩsiukhamjã i atheem khaba aajeejim anʉm. Sĩi warag caden thʉrreupʉiwia õor chukag aar warp warrjeejim anaabá, chi meperau.

30Maimua Jesuu irig, —¿Pʉ khan a thʉ̃ʉrjẽ? ajim anʉm.

Magbaa chi wounau, —Mʉʉn “Mepeen Phobor” a thʉ̃ʉrjemgui ajim anʉm.

Irua mag sĩerran, ben pom ich mor ee dubche thʉnʉm wai nʉrraajerr aawaita mag sĩejim anaabá. 31Magbaawai chi mepeen woun mor ee mag thʉnarrau Jesuug, —Oob warre khĩmie durr chan maar pʉi chiram. 32Mag khãyau ar khũsnaan phathau kho wenʉrrʉm eeta ideu maar dubpibá ajierram anʉm, ag dakha khũsnaan khapan thʉnarr aawai.

Magbaawai Jesuu amag ʉdʉraa khũsnaan eeta dubpijim anaabá. 33Magbaa chadcha woun mor ee mepeen pom mag thʉnarr oberdʉtkhawia jũrr khũsnaan ee naaimaawai, khũsnaanta parhooba khaphig phobaadewia ithurmʉg ʉ̃rmua thʉrrdo pom wejom ee dʉrbagkha sĩi khẽu khuurbʉ khechjierram aajem. 34Magbaa chi khũs thʉa narr khʉʉnau amachdeu mag oobaawai jãphierrwia phoborog khaphig phobaadejim anʉm, õrag jawaan. Mag wetumua ĩchab phobor chaauraa di nʉnʉidʉm eem khʉʉnagjã jaaumajierram aajem. 35Mag phobor ee jaaubaimaawai, chadcha aar oon weetwai, chi woun mor ee ben pom wai sĩerr wajapha khajũa jũanaa, ag na magba aajerrjo, sĩi ya maach khĩir ich mʉg Jesús khĩirphee jup sim ooimajierram anaabá. Amachdeu mag oobaimaawai jãphierraa aphobaadejim anʉm. 36Magtarr chi ootarr khʉʉnau jũrr chi oon bee nʉm khʉʉnag jaau naajim anʉm, jãga mag woun dosãtau mag wai nʉrraajerrta ʉu Jesuu monaaupʉijĩ.

37Magbaawai Gerasa perasom khʉʉn pom aig thʉnarr khʉʉnau jãphierr nʉmua Jesuug chawag mapi jaau naajim anʉm, amach ee sĩepiba.

Mag chadcha, Jesús jap ee pabaadejim aajem, deeu amach berrag wetaag. 38Mamʉ mag am wetaagpam ee, chi woun mag dosãt beneu baarjerrau Jesuug jejeeu aajeejim anaabá, i dʉi maag. Mamʉ Jesuu i arrba warag irig, 39—Pʉch diigta petá, maimua thumaam khʉʉnag jaaupet ajim anʉm, jãga Ẽwandamau ʉu pʉ eeg oowi pʉ monaaubar.

Ichig magbaawai chadcha phobor ee petawia ich mag jajawag majim aajem thumaam khʉʉnag, jãga Jesuu i dau aug khaugwia ich ben chugpaapʉitarr.

Jairo kha, maimua ʉʉi ãbmua Jesús khajũahidam gaaipai pʉrtarr

(Mt. 9:18-26; Mr. 5:21-43)

40Mag Jesús deeu ich khapeen dʉi jap ee pawia Galilea durr barimaawai õor pom sĩi i nʉ khodthʉnaajim aajem. Mag i barbaimam oobaawai thumaam khʉʉnau irig, “Ʉu pʉ beejim” anaajim anʉm. 41-42Mag i barbaimam ee, woun ãb judionaan Ẽwandam iek jaaujem di thʉajem Jairo a thʉ̃r sĩerr i aig beejim aajem. Mag woun chan tag chaaijã chukhu, ãba chaai ʉʉikhaardam doce añosjo sĩerrdam appai khitʉmta ya meemaa ajim anʉm. Mag tag chaaijã chukhu ãbpai khitʉm meemaa aawaita Jesús bʉkhʉrr phõbkhanaa o bʉ̃rʉʉ aichejim anʉm, ich di aar arrwia mag ich chaai mor mas kherʉm monaaupʉimkhĩir. Mag ich aig o bʉ̃rʉʉ aicheewai, ya agʉg wetumta, warag õrau am phẽeudʉ arrmaa ajim anʉm, pod majujã khaba. 43Mamʉ õor pom mag thʉnʉm ee, ĩchab ʉʉi ãb sĩejim aajem, doce años sĩi phõmieu bar sim. Mag ʉʉirau ich phatkhondam thum gastaapʉiwia sĩejim anaabá, doctornaanag ich ewaupi simua. Mamʉ ãbmuajã pod i monaau auba aajeejim aajem. 44Mag ʉʉi mag simua Jesús eugarmua beewia i khajũahidam gaaipai pʉrchejim anʉm. Mag irua pʉrbarm bʉrre chi phõmie thʉbabaadeewai warre ich mag monaau sĩsijim anaabá. 45Magbaawai Jesuu, —¿Khaíuta mʉ gaai pʉrbaichema? ajim anʉm.

Mamʉ ãbmuajã jaauba aawai Pedroou ich khapeen dʉimua, —Maestro, khaíu abarjugui ajim anʉm. Pʉch aig õor phẽeudʉdʉkham khʉʉnau khabahab, pua mag chirʉm.

46Mamʉ Pedroou ichig magbaawai warag Jesuu, —Ʉ̃hʉ̃, sĩi õor phẽeudʉdʉkhamua khabam. Mua khaphʉ chirʉmgui ajim anʉm, juau ogthomta ãbmua mʉig mʉ gaai pʉrbaichem. Mag pʉrbaicheewai Ẽwandam juapá mʉ gaai simua monaaubapʉimjã mua khaphʉ chirʉmgui ajim anʉm.

47Mamʉ chi ʉʉirau ũurwai ichdeu meraa pʉrchetarrta Jesuu mag ijẽb aadeewai, khĩir naau nʉm iekhau, bʉ duui beewia i bʉkhʉrr phõbkhachewia, meerba õor thumaam khʉʉn dakhĩir jaaubaadejim anaabá, khan atheeta irua mag i gaai pʉrchejĩ, maimua jãga mag pʉrbarm bʉrre i monaau ʉisijĩ. 48Magbaawai Jesuu irig, —Oob chigaa am ajim anʉm. Mua pʉch monaauju khaphʉ mʉ gaai pʉrchetarr gaaimua ʉu pʉ monaauwia peerdʉ ʉisim. Pʉch diig maju aai ʉmgui ajim anʉm irig.

49Mamʉ agtha mag i iekha oba nʉm ee, woun ãb beejim aajem, mag judionaan Ẽwandam iek jaaujem degam chi por Jairo anʉm di aarmua, i ẽudee. Mag beewia chi Jairoog, —Kake, ya aaunaanaujã pod ãwatba abarm. Ideu Maestro sĩubá. Ya par maach aar i mabajup aichejim anʉm.

50Mag jaaubaichem ũrbaawai Jesuu magjim anʉm chi Jairoog:

—Oob khĩirjum. Pua pʉch chaai ʉu oo wai chitaju. Sĩita ãba murua pʉch chaai monaauju khĩirjugta wai chirsí ajim anaabá.

51Maimua warag wetwia di aar barimajierram aajem. Mamʉ thuur kherʉm ee chi binaandam wai narr aar chan ich dʉi õor khapan dubpiba, ãba chi dubtarr khʉʉnan, Pedro, Juan, Santiago, maimua chi aai chi ãd dʉipaita ich dʉi dubpijim aajem. 52Mag barwia ooimaawai, thumaam khʉʉn sereeu icharaucha bĩe nʉm dʉi ĩchab ʉapeperkhamta ooimajim anaabá. Mag oobaimaawai Jesuu amag, —Oob bĩemiethʉ̃. I meeba sĩita i khãi sĩebahab ajim anʉm.

53Mamʉ irua magbaawai, aig narr khʉʉnau warag i wau iekha naajim anaabá, amachdeu chadcha chi chaai mee sim khaphʉ narr aawai. 54Mamʉ amau mag nʉmjã ũrba, warag dubwia chi binaan juadam gaai pʉrnaa, —¡Ʉʉikhaardam, phiidʉbaad! ajim anʉm.

55Magbaawai i akhaardam deeu i gaai kheraicheewai ag bʉrre phiidʉbaadejim anaabá. Mag phiidʉbaadeewai irig thachdam au deemkhĩir jaaujim aajem. 56Mag phiidʉbaadem oobaawai chi dennaan khĩir eu awia warre dauderraa nʉisijim anʉm. Maimua ichdeu magwia aig narr khʉʉnag, —Ĩs pãachdeu mʉg oobarm oob chikhamnag jaaumiet ajim anʉm.

Currently Selected:

San Lucas 8: noaA

Highlight

Copy