San Mateo 24
24
Aai i jeeujem di õrau pogueupʉiju Jesuu jaautarr
(Mr. 13:1-2; Lc. 21:5-6)
1Jesuu Aai i jeeujem deg mag õrag nem jaau sĩi awia oberbaadeeu mag chi Aai i jeeujem di ig iyʉʉ nʉmuata marau irig jaau naajim, di pooma sĩi joothʉthʉʉd eu dʉnʉm. 2Magbaawai ichdeu marag magjim:
—Pãrau jãg di wajapha eu dʉnʉm oo naabá. Jãg thʉnʉm chan mok por ãbjã ãbam ʉ̃r ich jãg ajapha joothʉthʉʉd sĩerrabam. Jãg thʉnʉmʉn sĩi thumaa õrau pogueupʉijuuta jãg dʉnʉmgui ajim.
Ẽwandamau maach i agkhaimʉʉ paawai nem oomaju jaautarr
(Mr. 13:3-23; Lc. 21:7-24; 17:22-24,37)
3Mag Aai i jeeujem degmua oberwi ereubaadeeu jũrr Olivo durrsĩig wetjim. Maimua barwi maar na jupbaimaawai maach chi khapeenjã dʉi i bigaau ohood aimajim. Maimuata marau irig jeeu naajim:
—¿Jãagwaichata mag pʉchdeu jaau simjo mag Aai i jeeujem di pogueupʉijuma? Maimua mag pʉ deeu beeju anʉmjã, ¿khan gaaimuata mag pʉ deeu beeju dakpapakhamjã marau khap ajuma? anaajim.
4Magbaawai jaaubaademua ichdeu marag, —Khĩir khaphʉ aajeet keena; oob chikhamnag ʉdʉraa pãach khũgurpimiet ajim. 5Mʉg atag paawai õor pom sĩi chikham khũgurm khõchgau amach iekpai mʉ iek gaai thʉwia, “Mʉʉta ag Cristoou Ẽwandamau pʉiju aajerr” a iekha nʉrrjee aju. Mag nʉrrjeem gaaimua õor pom khũgur aumaju ajim. 6Juurhi phiidʉju theeg jajaaukhamjã pãrau ũrjugui ajim. Mamʉ pãachdeu mag ũurwai oob jãphierrmiet. Ichiita jerrba chadcha ich mag aju. Magjup mamʉ ma chan agtha Ẽwandamau pãar i agkha nʉm khabamgui ajim. 7Magbaademʉn durr mʉg wejom ee durr chaauram khʉʉn dʉi werbʉphoo aadeju, amachta jũrr chikham khãai ʉ̃rpai am khõchgau. Magbaadeewai jãdau theeg aadem dʉi ʉʉur theegjã duuimaju, durrpierr. 8Pari mamagkhamʉn maan sĩi warrpem Jooirau õor dau aug waupi simʉugui ajim.
9’Ya magbaadeewai pãar chi mʉ iek ʉkha durrum khʉʉn thethemnaanau pʉrnaa amachjom khʉʉnag pãar pʉr deemaju, pãar dʉi amachdeu ampierr amkhĩir. Mag pʉr deebaa pãar gaai mas waunaa pãar thõojã thõomajugui ajim. Mag nʉm dʉi ĩchab thumaam khʉʉnau pãar oomappha aju mʉ iek ʉkha durrum gaaimua. 10Mag jaar paawai õor pom mʉ iek ʉkha thʉnarr amachdeu ʉkha narr iek isegwi deeu ewag wetju, warr amach narrjo. Magbaadee wir aig amach eepaijã chikham oomapnaa wir aig chikham thõomaju ajim. 11Ẽwandam iita jaau nʉm anʉm khʉʉn khapaana oberdʉtkhaju. Pari mag thʉnʉm sĩi õor khũguraagpaita mag wenʉrraju aawai õor pom khũgurmajujã jaaujim. 12¡Aay, mag ed gaaita nem khaigbam pomaata thʉnʉisijupa! Ya mag nem khaigbamta ʉ̃rpai aadeewai õrau amach khapeen kha khõsi aajerrjã tag khõchkhaba aphobaadeju. 13Pari warm khʉʉn mag thʉnʉm ee, ʉu ichdeu mʉ iek ʉkhatarr gaaita ogdʉba kherʉm wounan ʉu peerdʉjugui ajim. 14Ẽwandamau mʉg durr i agkhaju nawe, durrpierr thumaam khʉʉnag mʉg iek wajapham õor peerdʉ aaujem jaaudubju. Mag jaaubaawai thumaam khʉʉnau ũrbaawain chadau warre ich Jooirau mʉg durr jua khẽgkhapʉiju a jaaumajim.
15Mag ich Jesuu jajawagmamua magjim: —Khĩir eyaa abat, Ẽwandam i jaaumie Daniel khararrau phã pʉarr gaai jaauwai Aai i jeeujem deg ierr ich Ẽwandam sĩejem aarcha ogkhaba dubwi ãbmua parhooba ichdeu am aig aju jaautarr. Magtarr aawai chi ũr nʉm khʉʉnau wajapha khaphʉ abat ajim: chadcha Danielau jaautarrjo woun ãb chi khaigbamta Ẽwandam awi ya Aai i jeeujem deg sĩeichem oobaawai 16mʉg chi Judea durr nʉm khʉʉn warag pabʉ ee durr dapag ee dʉrbat ajim. 17Maagwai ich diheu ʉ̃r ʉ̃gthaa khãijã sim khai, oob ich nem awaan awi ierrag mam. 18Wa magba di chaaur ich phidag ee khãijã sim khai, oob tag degag mam, ich khajũajom khãijã awaan awi. 19Mamʉ ¡eh, apdurr mag jaar ʉʉin jõor khitheem khʉʉn maimua ar sĩi chaain daumeraa wai khitheem khʉʉn! 20Edau khõrgkham ee wa jua ʉ̃i nʉm ed khãijã pãach mag dau aphʉʉ dʉr wenʉrram ugua, Ẽwandamagta jeeu durruu abatgui ajim. 21Mag jaar mag wajapha õor dau aug waujujo chan mʉg durr ompaatarr aigmua ewagjã mag ooba, ni mag dichtarr khurjã agjo chan dau aug waubajugui ajim. 22Mag Ẽwandamau õor dau aug waubaadem ideu ich mag sĩukhiin, õor ãbjã peerdʉbaju. Mamʉ ichdeu jʉr auwia ich iek ʉkha durrum khʉʉn ichdeu khõsi phe wai sim gaaimua, irua ich mag wai sĩi abajugui ajim.
23’Mamagkham ee ãbmua khãijã pãachig, “Oobat, chamʉʉta warrgarwe Ẽwandamau pʉiju aajerrauwai”, wa magbam khai, “Pãade oobat, ar sĩ; jãata aruuwai” aawai oob ʉkhamiet. 24Mua mag chirʉmʉn, amach iiupaita amta Ẽwandamau pʉijim anʉm khʉʉn dʉi Ẽwandam i jaaumien anʉm khʉʉn khapan sĩi seukha chikham khũgur wenʉrraju aawaita mag chirʉmgui ajim, khap amkhĩir. Makhʉʉnaun chadcha Ẽwandamauta amach pʉijim amkhĩir, ag na õrau ooba aajempa õor dauderraa wau wenʉrraju. Mag nem wau wenʉrrʉmua ich Ẽwandamaucha jʉr auwi ich iek ʉkhapi autarr khʉʉnpa khũgur ẽkhaju ajim. 25Chadcha magju aawai ag nawe khap amkhĩir ya mua pãrag jaau chirʉmgui ajim. 26Ya mag khaphʉ naawai ãbmua khãijã pãachig, “Õor maba aajem aarta sim” a jaauwai oob aar oon wetmiet ajim. Wa magbam khai, “Mʉig simta ich oopiba sim” a jajaaukhawiajã oob ʉkhamiet ajim. 27Mʉch chi Emkhooi Iewaa beewain, thumaam khʉʉnauta mʉ oojugui ajim, ich jãg edau obeerjem garmua ed burrjemʉg sĩi pagthʉm dau phʉr jẽer athaawai edjã thum arar atham oojemjo. Magua õrau mag pãachig ya barbaichem a jaauwaijã oob ʉkhamiet ajim. 28Pãrau khaphʉ nʉm, nemmí sim aig ãkõs ich khĩrau jupcheejem. Ich agjota abajup ajim ĩchab muajã mʉch iek ʉkha nʉm khʉʉn dʉi; am phe arraag mʉch beem ed am aigta dau daau urum thumaam khʉʉnau mʉ oojugui a jaaumajim ich Jesuu.
Jãga Emkhooi Iewaa deeu beeju aajẽ
(Mr. 13:24-37; Lc. 21:25-33; 17:26-30,34-36)
29Mag jajawagmamua ĩchab, —Mag ich Ẽwandamau wajap õor dau aug waupiwi ya tag magba aadem ee, mʉg ãsdawam edau khĩjugui ajim. Magbaawai edau chi edaramjã araraa wʉʉ jẽerba warag khĩbaadem dʉi phĩdagjã edjã eemua sĩi khʉijugui ajim. Magbaawai edjã ee nem sĩsidʉmjã sĩi parhooba amach nʉnʉid arr chaaurta aaidʉ jorrjee thʉnʉisijugui ajim. 30Magbaadem eeta edjã eejã mʉch chi Emkhooi Iewaa urum dauchach dawaa oopijugui ajim. Mag oowi durrpierram khʉʉn jãphierr nʉm iekhau icharaucha bĩe nʉmuata mʉch chi Emkhooi Iewaa nem jua theeg thumaam khʉʉn Porkha urum oojurau. 31Mag urumua mʉch chognaanag nem jẽbag churo iekjo trompeta sirpijugui ajim, mag sirbarmua mʉchdeu jʉr auwia mʉch iek ʉkhatarr khʉʉn thumaa durrpierram khʉʉn ãbam aig biirdʉ awaag.
32Mag jaaumamua ich Jesuupai, —Khap amkhĩir pãrag jaaukhimgui ajim: Pãrau khaphʉ nʉm, mʉig Israel durr higo bʉ̃ jãga aajẽ. Ya jãata kher khukhuur aademʉn thumaam khʉʉnau ya chadcha dochʉumie burrju dakpapakham aajem. 33Ich agjota ajugui ajim ĩchab mʉch chi Emkhooi Iewaa beeju gaai paawaijã. Cha mʉchdeu jaau chirʉm thum ich ag ee obebergmam pãach daúa oobaawai khaphʉ abat, ya mʉch chi Emkhooi Iewaajã deeu beeimʉʉ chirʉmgui ajim. 34Mua pãrag mag Aai i jeeujem di õrau pogueupʉiju a chirʉmʉn, cha õor thʉnʉm khʉʉn khechju nawe cha mʉchdeu jaau chirʉmjo thumaa chadcha ajugui a jaaujim. 35Edaujãjã mʉg jẽb dʉi thum chukhu aadeju, mamʉ cha mua pãrag jaau chirʉm chan seukhaawai khabam. Jãan thumaa ich ag ee oberjugui ajim. 36Mamʉ mag mʉ beeju ed chan ni ãbmuajã khaugbam. Ʉ̃gthar Ẽwandam chognaanaujã khaugba, ni mʉchdeujã khaugba, ãba ich mʉ Ayaupaita mag mʉ beeju orajã khaphʉ simgui ajim, ich Jesuu.
37’Jooingar Noé khararr jaar dohãdau õor opäaiwai thʉnaajerrjo thʉnaaju ĩchab mʉg atag mʉch chi Emkhooi Iewaa bee nʉm jaarjã. 38Jooi Noé sim jaar mag dohãd pom beeju nawe, agtha õor phiestajã waunaa, thachjã khonaa, dojã donaa, sĩi jua pʉr khodthʉnaajim, bʉ̃ʉrjã amach ojujã khĩirjuba. 39Mamʉ am mag onee bʉ̃ʉrjã amach chig ajujã khĩirjuba nʉm ee, dohãd pom beewi, jẽb ierrpawi, thumaa odubjierram. Mʉch chi Emkhooi Iewaa bee nʉm jaarjã ich agjota ajugui ajim. Amau bʉ̃ʉrjã amach chig aju khĩirjuba nʉm ee, degolp mʉʉn dʉnʉʉucheju a jaaujim. 40Mag mʉ pierrum dʉicha emkhooin numí pabʉ ee amach phidag ee naaju: mag numí nʉm eem ãb mua arrwi ãb werpʉajugui ajim. 41Ʉʉinjã ĩchab numí ãbam molin gaai ba naaju: mamʉ mua ãbpai mʉch dʉi arrwi ãbakhai werpʉajugui ajim.
42’Pãrau mʉ pãach Porkha barcheju ed bʉ̃ʉrjã khaugba naawai pãachjã agjo thʉbagkham uguata muan pãragan, wajapha khĩir khaug nʉisit a chirʉmgui ajim. 43Pãrau khaphʉ nʉm, ãbmua khãijã ich di aig nem jĩgmienau nem jĩgkhaan beeju ora khaphʉ akhiin, khãijã khãiba ich mag dau phug eeju ʉdʉʉr ich nem jĩgkhapiba. 44Magua muan pãragjã ich agjota, ajapha khĩir khaug nʉisit a chirʉm. Pãrau ãbmuajã mʉ beeju ora khaugba nʉm. Pãrau mʉ da beebajupii nʉm ee, mʉch chi Emkhooi Iewaan degolp dʉnʉʉuchejugui ajim marag ichdeucha jaaumamua.
Chi chogau ichig nem jaau pʉarr thum wautarr
(Lc. 12:41-48)
45Mag jajawagmamua ĩchab ich Jesuupai deeu ich bee nʉm ora jãga naaju aai nʉm khap amkhĩir awi magjim: —Khanim nemjo patrón ãb simua ich chaaug maagpaawai ich chog ãb simʉg warm khʉʉn porkhapinaa ich magʉgpai ich nem thumaa jaau pʉabajem. 46Maimua mawia mam sĩi awia deeu beewi ichdeu jaau pʉarrjo phidkha sim oobaicheewai, ¿mag jooi ich chog dʉi onee sim dʉi chi chogjã onee abaju khai? ajim. 47Mag ajapha phidkha sim oobaicheewai jooirau warag ich nem thum magʉgta thʉsĩepʉijugui ajim, ich denjo khap amkhĩir. 48Mamʉ magba, mag ichig nem jaautarrjã ich odegpai “Mʉ patrón chan da beebam” awi 49nem khaibag ich khapeen jũrr ich jua eegpaim dʉi ichdeu ampierr anaa, nagjã ichdeu dom aig donaa, thachjã ichdeu khom aig khomʉn, 50-51chi dikhʉ bʉ̃ʉrjã irua nʉba sim ee pierrwai, mamagkham oobaichee, jũrr ichdeu warm khʉʉn dʉi aajerr khãaijã i gaai athuucha wʉnaa, phidag eemuajã barpʉinaa, chi khaigbacharam khʉʉn dʉi ãba sĩujugui ajim. Magbaawai gaai machgau icharaucha bĩemamua i agäa agäa abarjugui ajim. Magnaa maachigta, Maguata pãraujã mʉ deeu beeju khaphʉ naawai mag ichig nem jaau pʉarr thum wau sĩerrjota aju aai nʉmgui ajim, pãach khapeen dʉi, ich Jooirau khõsimjo.
Currently Selected:
San Mateo 24: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
San Mateo 24
24
Aai i jeeujem di õrau pogueupʉiju Jesuu jaautarr
(Mr. 13:1-2; Lc. 21:5-6)
1Jesuu Aai i jeeujem deg mag õrag nem jaau sĩi awia oberbaadeeu mag chi Aai i jeeujem di ig iyʉʉ nʉmuata marau irig jaau naajim, di pooma sĩi joothʉthʉʉd eu dʉnʉm. 2Magbaawai ichdeu marag magjim:
—Pãrau jãg di wajapha eu dʉnʉm oo naabá. Jãg thʉnʉm chan mok por ãbjã ãbam ʉ̃r ich jãg ajapha joothʉthʉʉd sĩerrabam. Jãg thʉnʉmʉn sĩi thumaa õrau pogueupʉijuuta jãg dʉnʉmgui ajim.
Ẽwandamau maach i agkhaimʉʉ paawai nem oomaju jaautarr
(Mr. 13:3-23; Lc. 21:7-24; 17:22-24,37)
3Mag Aai i jeeujem degmua oberwi ereubaadeeu jũrr Olivo durrsĩig wetjim. Maimua barwi maar na jupbaimaawai maach chi khapeenjã dʉi i bigaau ohood aimajim. Maimuata marau irig jeeu naajim:
—¿Jãagwaichata mag pʉchdeu jaau simjo mag Aai i jeeujem di pogueupʉijuma? Maimua mag pʉ deeu beeju anʉmjã, ¿khan gaaimuata mag pʉ deeu beeju dakpapakhamjã marau khap ajuma? anaajim.
4Magbaawai jaaubaademua ichdeu marag, —Khĩir khaphʉ aajeet keena; oob chikhamnag ʉdʉraa pãach khũgurpimiet ajim. 5Mʉg atag paawai õor pom sĩi chikham khũgurm khõchgau amach iekpai mʉ iek gaai thʉwia, “Mʉʉta ag Cristoou Ẽwandamau pʉiju aajerr” a iekha nʉrrjee aju. Mag nʉrrjeem gaaimua õor pom khũgur aumaju ajim. 6Juurhi phiidʉju theeg jajaaukhamjã pãrau ũrjugui ajim. Mamʉ pãachdeu mag ũurwai oob jãphierrmiet. Ichiita jerrba chadcha ich mag aju. Magjup mamʉ ma chan agtha Ẽwandamau pãar i agkha nʉm khabamgui ajim. 7Magbaademʉn durr mʉg wejom ee durr chaauram khʉʉn dʉi werbʉphoo aadeju, amachta jũrr chikham khãai ʉ̃rpai am khõchgau. Magbaadeewai jãdau theeg aadem dʉi ʉʉur theegjã duuimaju, durrpierr. 8Pari mamagkhamʉn maan sĩi warrpem Jooirau õor dau aug waupi simʉugui ajim.
9’Ya magbaadeewai pãar chi mʉ iek ʉkha durrum khʉʉn thethemnaanau pʉrnaa amachjom khʉʉnag pãar pʉr deemaju, pãar dʉi amachdeu ampierr amkhĩir. Mag pʉr deebaa pãar gaai mas waunaa pãar thõojã thõomajugui ajim. Mag nʉm dʉi ĩchab thumaam khʉʉnau pãar oomappha aju mʉ iek ʉkha durrum gaaimua. 10Mag jaar paawai õor pom mʉ iek ʉkha thʉnarr amachdeu ʉkha narr iek isegwi deeu ewag wetju, warr amach narrjo. Magbaadee wir aig amach eepaijã chikham oomapnaa wir aig chikham thõomaju ajim. 11Ẽwandam iita jaau nʉm anʉm khʉʉn khapaana oberdʉtkhaju. Pari mag thʉnʉm sĩi õor khũguraagpaita mag wenʉrraju aawai õor pom khũgurmajujã jaaujim. 12¡Aay, mag ed gaaita nem khaigbam pomaata thʉnʉisijupa! Ya mag nem khaigbamta ʉ̃rpai aadeewai õrau amach khapeen kha khõsi aajerrjã tag khõchkhaba aphobaadeju. 13Pari warm khʉʉn mag thʉnʉm ee, ʉu ichdeu mʉ iek ʉkhatarr gaaita ogdʉba kherʉm wounan ʉu peerdʉjugui ajim. 14Ẽwandamau mʉg durr i agkhaju nawe, durrpierr thumaam khʉʉnag mʉg iek wajapham õor peerdʉ aaujem jaaudubju. Mag jaaubaawai thumaam khʉʉnau ũrbaawain chadau warre ich Jooirau mʉg durr jua khẽgkhapʉiju a jaaumajim.
15Mag ich Jesuu jajawagmamua magjim: —Khĩir eyaa abat, Ẽwandam i jaaumie Daniel khararrau phã pʉarr gaai jaauwai Aai i jeeujem deg ierr ich Ẽwandam sĩejem aarcha ogkhaba dubwi ãbmua parhooba ichdeu am aig aju jaautarr. Magtarr aawai chi ũr nʉm khʉʉnau wajapha khaphʉ abat ajim: chadcha Danielau jaautarrjo woun ãb chi khaigbamta Ẽwandam awi ya Aai i jeeujem deg sĩeichem oobaawai 16mʉg chi Judea durr nʉm khʉʉn warag pabʉ ee durr dapag ee dʉrbat ajim. 17Maagwai ich diheu ʉ̃r ʉ̃gthaa khãijã sim khai, oob ich nem awaan awi ierrag mam. 18Wa magba di chaaur ich phidag ee khãijã sim khai, oob tag degag mam, ich khajũajom khãijã awaan awi. 19Mamʉ ¡eh, apdurr mag jaar ʉʉin jõor khitheem khʉʉn maimua ar sĩi chaain daumeraa wai khitheem khʉʉn! 20Edau khõrgkham ee wa jua ʉ̃i nʉm ed khãijã pãach mag dau aphʉʉ dʉr wenʉrram ugua, Ẽwandamagta jeeu durruu abatgui ajim. 21Mag jaar mag wajapha õor dau aug waujujo chan mʉg durr ompaatarr aigmua ewagjã mag ooba, ni mag dichtarr khurjã agjo chan dau aug waubajugui ajim. 22Mag Ẽwandamau õor dau aug waubaadem ideu ich mag sĩukhiin, õor ãbjã peerdʉbaju. Mamʉ ichdeu jʉr auwia ich iek ʉkha durrum khʉʉn ichdeu khõsi phe wai sim gaaimua, irua ich mag wai sĩi abajugui ajim.
23’Mamagkham ee ãbmua khãijã pãachig, “Oobat, chamʉʉta warrgarwe Ẽwandamau pʉiju aajerrauwai”, wa magbam khai, “Pãade oobat, ar sĩ; jãata aruuwai” aawai oob ʉkhamiet. 24Mua mag chirʉmʉn, amach iiupaita amta Ẽwandamau pʉijim anʉm khʉʉn dʉi Ẽwandam i jaaumien anʉm khʉʉn khapan sĩi seukha chikham khũgur wenʉrraju aawaita mag chirʉmgui ajim, khap amkhĩir. Makhʉʉnaun chadcha Ẽwandamauta amach pʉijim amkhĩir, ag na õrau ooba aajempa õor dauderraa wau wenʉrraju. Mag nem wau wenʉrrʉmua ich Ẽwandamaucha jʉr auwi ich iek ʉkhapi autarr khʉʉnpa khũgur ẽkhaju ajim. 25Chadcha magju aawai ag nawe khap amkhĩir ya mua pãrag jaau chirʉmgui ajim. 26Ya mag khaphʉ naawai ãbmua khãijã pãachig, “Õor maba aajem aarta sim” a jaauwai oob aar oon wetmiet ajim. Wa magbam khai, “Mʉig simta ich oopiba sim” a jajaaukhawiajã oob ʉkhamiet ajim. 27Mʉch chi Emkhooi Iewaa beewain, thumaam khʉʉnauta mʉ oojugui ajim, ich jãg edau obeerjem garmua ed burrjemʉg sĩi pagthʉm dau phʉr jẽer athaawai edjã thum arar atham oojemjo. Magua õrau mag pãachig ya barbaichem a jaauwaijã oob ʉkhamiet ajim. 28Pãrau khaphʉ nʉm, nemmí sim aig ãkõs ich khĩrau jupcheejem. Ich agjota abajup ajim ĩchab muajã mʉch iek ʉkha nʉm khʉʉn dʉi; am phe arraag mʉch beem ed am aigta dau daau urum thumaam khʉʉnau mʉ oojugui a jaaumajim ich Jesuu.
Jãga Emkhooi Iewaa deeu beeju aajẽ
(Mr. 13:24-37; Lc. 21:25-33; 17:26-30,34-36)
29Mag jajawagmamua ĩchab, —Mag ich Ẽwandamau wajap õor dau aug waupiwi ya tag magba aadem ee, mʉg ãsdawam edau khĩjugui ajim. Magbaawai edau chi edaramjã araraa wʉʉ jẽerba warag khĩbaadem dʉi phĩdagjã edjã eemua sĩi khʉijugui ajim. Magbaawai edjã ee nem sĩsidʉmjã sĩi parhooba amach nʉnʉid arr chaaurta aaidʉ jorrjee thʉnʉisijugui ajim. 30Magbaadem eeta edjã eejã mʉch chi Emkhooi Iewaa urum dauchach dawaa oopijugui ajim. Mag oowi durrpierram khʉʉn jãphierr nʉm iekhau icharaucha bĩe nʉmuata mʉch chi Emkhooi Iewaa nem jua theeg thumaam khʉʉn Porkha urum oojurau. 31Mag urumua mʉch chognaanag nem jẽbag churo iekjo trompeta sirpijugui ajim, mag sirbarmua mʉchdeu jʉr auwia mʉch iek ʉkhatarr khʉʉn thumaa durrpierram khʉʉn ãbam aig biirdʉ awaag.
32Mag jaaumamua ich Jesuupai, —Khap amkhĩir pãrag jaaukhimgui ajim: Pãrau khaphʉ nʉm, mʉig Israel durr higo bʉ̃ jãga aajẽ. Ya jãata kher khukhuur aademʉn thumaam khʉʉnau ya chadcha dochʉumie burrju dakpapakham aajem. 33Ich agjota ajugui ajim ĩchab mʉch chi Emkhooi Iewaa beeju gaai paawaijã. Cha mʉchdeu jaau chirʉm thum ich ag ee obebergmam pãach daúa oobaawai khaphʉ abat, ya mʉch chi Emkhooi Iewaajã deeu beeimʉʉ chirʉmgui ajim. 34Mua pãrag mag Aai i jeeujem di õrau pogueupʉiju a chirʉmʉn, cha õor thʉnʉm khʉʉn khechju nawe cha mʉchdeu jaau chirʉmjo thumaa chadcha ajugui a jaaujim. 35Edaujãjã mʉg jẽb dʉi thum chukhu aadeju, mamʉ cha mua pãrag jaau chirʉm chan seukhaawai khabam. Jãan thumaa ich ag ee oberjugui ajim. 36Mamʉ mag mʉ beeju ed chan ni ãbmuajã khaugbam. Ʉ̃gthar Ẽwandam chognaanaujã khaugba, ni mʉchdeujã khaugba, ãba ich mʉ Ayaupaita mag mʉ beeju orajã khaphʉ simgui ajim, ich Jesuu.
37’Jooingar Noé khararr jaar dohãdau õor opäaiwai thʉnaajerrjo thʉnaaju ĩchab mʉg atag mʉch chi Emkhooi Iewaa bee nʉm jaarjã. 38Jooi Noé sim jaar mag dohãd pom beeju nawe, agtha õor phiestajã waunaa, thachjã khonaa, dojã donaa, sĩi jua pʉr khodthʉnaajim, bʉ̃ʉrjã amach ojujã khĩirjuba. 39Mamʉ am mag onee bʉ̃ʉrjã amach chig ajujã khĩirjuba nʉm ee, dohãd pom beewi, jẽb ierrpawi, thumaa odubjierram. Mʉch chi Emkhooi Iewaa bee nʉm jaarjã ich agjota ajugui ajim. Amau bʉ̃ʉrjã amach chig aju khĩirjuba nʉm ee, degolp mʉʉn dʉnʉʉucheju a jaaujim. 40Mag mʉ pierrum dʉicha emkhooin numí pabʉ ee amach phidag ee naaju: mag numí nʉm eem ãb mua arrwi ãb werpʉajugui ajim. 41Ʉʉinjã ĩchab numí ãbam molin gaai ba naaju: mamʉ mua ãbpai mʉch dʉi arrwi ãbakhai werpʉajugui ajim.
42’Pãrau mʉ pãach Porkha barcheju ed bʉ̃ʉrjã khaugba naawai pãachjã agjo thʉbagkham uguata muan pãragan, wajapha khĩir khaug nʉisit a chirʉmgui ajim. 43Pãrau khaphʉ nʉm, ãbmua khãijã ich di aig nem jĩgmienau nem jĩgkhaan beeju ora khaphʉ akhiin, khãijã khãiba ich mag dau phug eeju ʉdʉʉr ich nem jĩgkhapiba. 44Magua muan pãragjã ich agjota, ajapha khĩir khaug nʉisit a chirʉm. Pãrau ãbmuajã mʉ beeju ora khaugba nʉm. Pãrau mʉ da beebajupii nʉm ee, mʉch chi Emkhooi Iewaan degolp dʉnʉʉuchejugui ajim marag ichdeucha jaaumamua.
Chi chogau ichig nem jaau pʉarr thum wautarr
(Lc. 12:41-48)
45Mag jajawagmamua ĩchab ich Jesuupai deeu ich bee nʉm ora jãga naaju aai nʉm khap amkhĩir awi magjim: —Khanim nemjo patrón ãb simua ich chaaug maagpaawai ich chog ãb simʉg warm khʉʉn porkhapinaa ich magʉgpai ich nem thumaa jaau pʉabajem. 46Maimua mawia mam sĩi awia deeu beewi ichdeu jaau pʉarrjo phidkha sim oobaicheewai, ¿mag jooi ich chog dʉi onee sim dʉi chi chogjã onee abaju khai? ajim. 47Mag ajapha phidkha sim oobaicheewai jooirau warag ich nem thum magʉgta thʉsĩepʉijugui ajim, ich denjo khap amkhĩir. 48Mamʉ magba, mag ichig nem jaautarrjã ich odegpai “Mʉ patrón chan da beebam” awi 49nem khaibag ich khapeen jũrr ich jua eegpaim dʉi ichdeu ampierr anaa, nagjã ichdeu dom aig donaa, thachjã ichdeu khom aig khomʉn, 50-51chi dikhʉ bʉ̃ʉrjã irua nʉba sim ee pierrwai, mamagkham oobaichee, jũrr ichdeu warm khʉʉn dʉi aajerr khãaijã i gaai athuucha wʉnaa, phidag eemuajã barpʉinaa, chi khaigbacharam khʉʉn dʉi ãba sĩujugui ajim. Magbaawai gaai machgau icharaucha bĩemamua i agäa agäa abarjugui ajim. Magnaa maachigta, Maguata pãraujã mʉ deeu beeju khaphʉ naawai mag ichig nem jaau pʉarr thum wau sĩerrjota aju aai nʉmgui ajim, pãach khapeen dʉi, ich Jooirau khõsimjo.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.