San Mateo 6
6
Jesuu nem wajaphamta waupi jaautarr
1’Sĩi pãach o wajaug phemkhĩirpai chan oob chikham dakhĩir nem waumiet ajim anʉm. Bigaaum khʉʉnag magamkhĩirpaita pãrau mag nem wau nʉm paar chan, maach Aai ʉ̃gthar simua pãar wajapha ig iyʉʉ abaju, ya mʉig eegarwe õrau pãar wajapha ig iyʉʉ nʉmua ya amau pãrag phag nʉmjota naawai.
2’Magam uguata, dau aphʉʉm khʉʉndamag nemdam deewaijã oob thumaam khʉʉnag khakhapdo apimiet, sĩi jãg amach eugar wajapha ig iyʉʉ amkhĩirpai culto ee wa kaaijã ee khãijã õor khapanag dakhĩir aajem khʉʉn denjo. Ar jãg amach eugar wajapha ig iyʉʉ amkhĩirta aphʉʉm khʉʉndam dʉi o wajapha aajem khʉʉnan, ya õrau amag phagbarmjota nʉmgui ajim anʉm, am eugar wajapha iekha nʉmua. Jãgʉm khʉʉnag khanii Ẽwandamau tag phagbarju. 3Dau aphʉʉm khʉʉndamag nem inagdam deewai oob pãach khapeen pãach dʉi chi wajapcharam khʉʉnagjã jaaumiet. 4Magju khãai warag pãach khaugpimaphamjo meraata deebat ajim anʉm. Pãrau mag meraa deewiajã, pãar Aai ʉ̃gtharmua pãar oo sim aawai, ichdeujã pãar eeg oob khaba eeg ooju a jaaujim anaabá.
Jesuu jãgata maadeu Ẽwandamag jeeuju aai nʉ a jaautarr
(Lc. 11:2-4)
5Mag nem jajawagmamua ich Jesuu magjim anʉm: —Ẽwandamag jeeuwai, oob jãg sĩi chadcha magba nʉmta Ẽwandamag jeeu nʉm amkhĩir jãg õor dakhĩirpai jeeujem khʉʉnjo amiet ajim anʉm. Jãkhʉʉnan sĩi õrag amach oomkhĩirpaita culto ee maimua sĩi kaaijã eejã agjo Ẽwandamag jeeu nʉm anʉmua bʉjãaupaita ijẽjẽb aajerramgui ajim anaabá. Jãg amach eugar wajapha ig iyʉʉ amkhĩirta jãg nʉm khʉʉnan, ya õrau amag phagbarmjota nʉmgui ajim anʉm, am eugar wajapha iekha nʉmua. 6Pari pãrag mua jaaukhim: Ẽwandamag jeeuwai, am denjo khaba, pãach khãaijem thuur wai nʉm khai, aar dubnaata pãach appai irig jeeubat. Mag pãach appai nʉmjo naab mamʉ, maig pãar dʉi sim pãar Aai. Mag pãar Ayau pãrau pãach appai ichig jeeu nʉm oobaawai pãrag irua pãachdeu nem jeeu nʉmjã deeb khaba deejugui ajim anʉm.
7’Mag irig jeeuwaijã oob jãg par iiupai Ẽwandam iek ʉkha nʉm anʉm khʉʉn denjo parhoobam iek maadeu igbaju ayaampata iekha nʉʉ amiet ajim anaabá. Amachigan jãg jeeubaadem pʉa chʉuu aawaita Ẽwandamau ʉ̃rcha amach iek ũurjempii aajerram ajim anʉm. 8Pãrau ichig jeeuju nawe pãar Ayau ya pãrau nem ig nʉmjã khaphʉ sim aawai, oob am denjo atcha iekha nʉʉ amiet. 9Magju khãai pãachdeu irig jeeuwai mʉgta jeeubat ajim anʉm:
“Ẽwandam, pʉʉta maar Aai ʉ̃gthar chiraajemʉu.
Pʉch appaita chadcha pekau chukhu chitʉm.
10Pʉrʉgta marau maach dʉi pʉchdeu ampierr apinaa pʉchta thumaam khʉʉn Porkhapim khõsi nʉm.
Ʉ̃gtharjã jãg pʉchdeu nem waupi jaau nʉm appai waaujemjo, mʉig eegarjã thum pʉchdeu jaau simjota apim khõsi nʉm.
11Ed eepierr pua marag ich jãg khojudam deebarju.
12Ẽwandam, maar pekau thum chugpaabapʉi,
maimua ar marau maach dʉi khaigba abarm khʉʉn dʉi tag magʉm iek igba ich mag khĩir okhoopäaijemjo, maar denjã khĩir okhoobapʉi.
13Oob pua ʉdʉraa chan maar pekau ee burrpi chiram.
Mag khãai warag maar thʉa wai chirsí, phithurg chukhu dosãtau maar ichig paa aum ugua.
[Ẽwandam, pʉchdeuta nem thʉnʉmʉn thum khap chirʉm.
Pʉchta chi jua thierriu,
maagwai pʉchpaita thumaam khʉʉnau tho iekhaju aai nʉm, mʉg atag pawiajã ich mag.]”
’Magta jeeubat ajim anaabá ich Jesuu. 14Magnaa ĩchab, Chikhamnau pãach dʉi khaigba aawai, pãrau am dʉi magʉm iekjã igba sĩi khĩir okhoopʉimʉn, magan maach Aai ʉ̃gthar chiraajemuajã ĩchab pãar pekau chugpaapʉiwia tag magʉm iek igba ich mag khĩir okhoopʉijugui ajim anʉm. 15Mamʉ pãrauta pãach khapeen wir aig perdonaabam chan, maach Aai Ẽwandamaujã pãar pekau chugpaabamgui a jaaumajim aajem.
Jesuu sʉrkhapi jaautarr
16’Pãach Ẽwandamag jeeu khewaag thach khoba sʉrkhaawai, oob jãg sĩi amach eugar wajapha ig iyʉʉ amkhĩirpai nem waaujem khʉʉnjo jãsogau okhĩirjuumjo amiet ajim anʉm, mag oowi bigaaum khʉʉnau “Jãan Ẽwandamag jeeu nʉmua sʉrkha naawaita jãg nʉm” am ugua. Jãg amach sʉrkha nʉm khap amkhĩirpaita okhĩirjuumjo aajem khʉʉnan, ya õrau amag chi phagamjota nʉmgui ajim anaabá, am igwi chadcha sʉrkhaajem khʉʉnau anʉm gaaimua. 17Magju khãai Ẽwandamag jewaag sʉrkhaawai, warag wajapha pãach khĩir sũgpʉinaa por megbapʉit, 18bigaaum khʉʉnau mag pãach sʉrkha nʉm ni ãbmuajã khap am ugua. Pãrau magta amʉn, ãba maach Aai pãar dʉi simuapaita khap aju; maagwai ichdeuta ĩchab pãar eeg oojugui ajim anaabá.
Ʉ̃gthar augcheba naaimaag
(Lc. 12:33-34)
19’Mʉig eegarwe chan oob phatkhon wa nem inag pom khãijã paarpaju ẽkhamiet. Mʉiguin nem thum polieu ãrnaa khukhungaujã jẽeumaajem; mag nʉm dʉi nem jĩgmienaujã sĩi dubwia jĩgkhamaajemgui a jaaumajim anʉm. 20Magju khãai nem wajapha wau nʉmuata phatkhon ãkha phiemam dʉi nem inag pom paarpamamjo abat, ʉ̃gthar paimaawaijã chadcha paraa naaimaag. Pãach jam paaukhaimaawaim atheeta pãrau phatkhon phie nʉmjo nem wajaphamta wau nʉmʉn ʉu simgui ajim anʉm. Jam chan polieujã ãrba, khukhungaujã jẽeuba, ni nem jĩgmienaujã pod jĩgkhabam. 21Mʉig jẽb gaai nʉweta nem thum paraa aju khĩirjuju khãyau ʉ̃gthar paawaita nem thum paarpaju khĩirju wenʉrrʉmʉn, magan chadcha pãar khĩirjug ãba Ẽwandam gaaita sim ajim anʉm.
Jesús iek maach daun õtdaujota sim aajem maach mor gaai
(Lc. 11:34-36)
22’Maach daun õtdaujota sim maach mor gaai. Maach daujãata wajapha sim aiguin, nem thum dawaata oojem. Ich agjota sim maach thãarjã. Ẽwandam iek ʉkhanaa maach thãarta wajapha sim aiguin, nem thum Ẽwandamau khõsimjota waaujem. Mag nʉm aiguin ararag ee nʉmjota nʉmgui ajim anʉm. 23Mamʉ magba agtha pãach pekau ee nʉmʉn, magan pãran sĩi agtha khĩchag ee jʉrkha jʉrkha nʉmjota nʉm. Mag nʉm aig pod Ẽwandam dʉi naaju khaba nʉmgui ajim anaabá, pekau eeta naawai.
Jesús iek Ẽwandamag wʉrpanaa pod phatkhonagjã wʉrpaju khaba nʉm aajem
(Lc. 16:13)
24’Ni ãbmuajã pod patronnaan numiim khʉʉn chogkhaju khaba simgui ajim anʉm. Patronnaan numí akhiin, iwiir ãbpaita ʉ̃rcha kha khõsi aju. Ich agjota sim ĩchab Ẽwandam dʉijã. Pod pãrau Ẽwandam khĩrag wʉrpanaa, phatkhonag khãijã wʉrpaju khaba nʉm. Pãar magta nʉm chan Ẽwandam ipierraa khaba nʉmgui ajim anaabá.
Khani khoju wa khani jũaju khĩirjupiba jaautarr
(Lc. 12:22-31)
25Mag nem khĩir pogkhe jajawagmamua magjim anʉm ich Jesuu: —Oob pãrau “¿khani khoju wa khanta dojuuta maach mʉg nʉma?” a khĩirjumiet. Wa magbam khai, ya khajũa chukhu nʉm “¿Khani jũajuuta mʉg nʉmua?” a khãijã khĩirjumiet ajim anʉm. Pãarta nem khoojem nem khãaijã wajapchanaa khajũa khãyaujã Ẽwandam dau na ʉ̃rʉʉcha balee sĩsid aawai, irua pãrag oobamjoo abajugui ajim anaabá. 26Pãade ar nemchaaindam edjã ee ũrr phophog aajem khʉʉn oobat. Am phidkhajã phidkhaba aajeewai amach phathaudam ãkhaagjã di chukhu nʉm. Mag phidkhaba sĩi naajeeb mamʉ, maach Aai ʉ̃gthar chiraajemuata amag phathaudam daumeraa dee wai simua am khee wai sĩejemgui ajim anʉm. Magʉm pãar chará nemchaain jãg thʉnʉm khãaijã ʉ̃rcha balee naawai, ¿jãga irua bʉ̃ʉrjã pãrag ooba abarju? a jaaumajim anaabá. 27Oob atcha pãachdeu nem ig nʉmta khĩirju nʉʉ amiet. Mag pãrau pãachdeu khõsimta ig nʉʉ akhiinjã, ¿khaíuta mʉg nʉm aig mag ichdeu khĩirju sim gaaimuapai ich meeju arr ʉ̃r oradam ãbpai khãijã ich iiupiju aai sĩ? ajim anʉm.
28’Mag nʉmta khajũa chukhu aawaijã ¿khanthee atcha khĩirju nʉʉ aajẽ? Pãade ar pamaardam ooihmʉ thʉnaajem khĩirjubat. Amjã ĩchab bʉ̃ʉrjã phidkhajã phidkhaba, ni amach khajũa jũaju khĩirjuwia ẽkhakha nʉʉjã aba aajem. 29Mag naab mamʉ õor ãbmuajã am dʉi barba aajem, ooimʉg athee. Warrgar rey Salomón khararraujã phatkhon pom paraanaa nem wajapham pom paraa aajerraujã pamaardam ooimʉgjo chan pod khajũa jũaba aajeejimgui ajim anʉm. 30Pamaar jãg ooihmʉ thʉnʉm edau wʉʉbaademuapai khiugphebaadeewai sĩi khʉʉijemjã Ẽwandamau jãg ooihmʉ wai sĩejemta, ¿jãgwi pãar pamaar khãai ʉ̃rcha balee nʉmua nem jeeu nʉmta irua deeba abarju? ¿Wa pãachdeu jeeu nʉmjã pod deebajupii aajẽwa? ajim anʉm. 31Oob atcha “¿khanta khoogáwa?” wa “¿khanta doogáwa?” wa magbam khai, “¿khandamta jũabaraag khai?” amiet ajim anaabá. 32Pãrau khaphʉ nʉmgui ajim anʉm, õor Ẽwandam iek ʉkhabam khʉʉnta magʉm nem thum khĩirju phobaademjã pʉaba sĩerrjeem. Mamʉ pãar Aai ʉ̃gthar chiraajemua pãrau nem ig nʉmjã thum khaphʉ sim aawai pãar chan warm khʉʉnjo magbaju aai nʉmgui ajim anʉm. 33Ãba Ẽwandamau nem waupi jaau simpaita waunaa irigpaita pãach dʉi ichdeu ampierr apibat. Pãrau chadcha magta amʉn, tagam nem pãachdeu igbarmjã irua deeb khaba deejugui ajim anʉm. 34Oob atcha “¿Khanta nan khobarju wa khanta jũabarju?” a khĩirjumiet. Ag nawe khĩirjuwiajã par khabahab ajim anʉm. Phithurgan ãspapakhampierr oojem. Magua maadeu ag nawe khĩirjuba awiajã, ichiita maadeu nem ig nʉm chan chuk khabajugui ajim anaabá, magʉm khĩirjuju aag.
Currently Selected:
San Mateo 6: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
