SAN JUAN 17

Jesús ora por sus discípulos

1To bairo ĩri bero tʉjʉ mʉgo, oco bairo cʉ̃ ca-ĩiwĩ Jesú cʉ̃ Pacʉ Diore:

—Caacʉ, rooro yʉre na cá-átipe yʉre mʉ ca-cũrica paʉ eja tʉga meere. To bairi mʉ Macʉ yʉ ca-aniere camajare na iñooña. To bairo na mʉ cá-áti iñooro bero camaja caroaro mʉre na ca-tʉgooña nʉcʉbʉgoro yʉ átigʉ. 2Camaja nipetirãre ca-rotipaʉre yʉre mʉ ca-cũuwʉ. Nipetirã yʉre mʉ ca-jooricarãre na catícõa aninucupere na joo rotii to bairo yʉre mʉ ca-cũuwʉ. 3To bairi camaja Dio, jicãʉna cariape ca-ãcʉ̃re ca-api nʉcʉbʉgorã, yʉre mʉ ca-jooricʉ quenare ca-api nʉcʉbʉgorã catícõa aninucugarãma.

4’Ati yepapʉre ãcʉ̃, camaja, “Caroaʉ ãmi Dio,” mʉre na ca-ĩiro yʉ cá-ápʉ́. Nipetiro yʉre mʉ cá-áti rotiriquere yʉ cá-áti peocõawʉ. 5Caacʉ, ati yepa mʉ cá-átiparo jʉgoye mʉ mena yʉ ca-anicõawʉ, meere. Nemoona mʉ mena caroaro yʉ ca-anicõa anieparore bairona yʉre ája tunu.

6’Ati yepa macana mena ca-anibatanare mʉ ca-bejeyupa yʉ mena macana ca-aniparãre. Na tʉpʉre cʉ̃ yʉ joogʉ yʉ Macʉre ĩi, to bairo mʉ cá-ájupa. Mʉ ca-aniere na yʉ ca-majiowʉ. Mʉ yarã ca-ãnanare yʉre mʉ ca-joowʉ. Mʉ ca-rotirijere cá-ána ca-ãma. 7Yucʉacã caroaro majima: Nipetirije yʉ cá-áti majirije yʉre mʉ ca-joorique ãa. 8Nipetiro nare yʉ mʉ ca-buio rotiriquere na yʉ ca-buiowʉ. Tiere na yʉ ca-buioro ca-api nʉcʉbʉgowã. Cariapena mʉ tʉpʉ ca-ãnacʉ yʉ cá-atájere, yʉre mʉ ca-jooriquere apiʉja nʉcʉbʉgoma.

9’Na ca-baipere na yʉ jeniboja mʉre. Aperã, ati yepa macana yʉre ca-apiʉjaquẽnare na yʉ jenibojaquẽe. Yʉre mʉ ca-jooricarã mʉ yarã ãma. To bairi na yʉ jeniboja mʉre. 10Mʉ yarã ca-ãna nipetirã yʉ quenare yʉ yarã ãma. Yʉ yarã ca-ãna quena mʉ yarã ãma. Na jʉgori aperã quena, “Caroaʉ ãmi Jesú,” yʉre ĩi nʉcʉbʉgoma.

11’Ati yepapʉre yʉ tuaquetigʉ. Yʉ cabuerã jeto tuagarãma. Yʉa mʉ tʉpʉ aácʉ yʉ áa. Caacʉ, caroaʉ majuu aniri mʉ ca-tutuarije mena caroaro na coteya yʉre mʉ ca-jooricarãre. To bairo mʉ cá-áto jicãʉna mani ca-anore bairona jicãro mena anigarãma. 12Ati yepapʉ ãcʉ̃, yʉre mʉ ca-jooricarã mena ãcʉ̃ mʉ ca-tutuarije yʉre mʉ ca-joorique mena nare yʉ ca-cotenucuwʉ. To bairi jicãʉ maca yʉre yaji weoquẽmi. Jicãʉ jeto ca-jʉgoyepʉna yʉ mena ca-anibatacʉ ca-yajipaʉ ãmi. Mʉ ca-ĩricarore bairona cʉ̃ jetona yʉre yaji weomi. To bairo cʉ̃ ca-yaji weoro Dio ye queti ucarica pũuripʉ tirʉmʉpʉ macana na ca-ĩi ucaricarore bairo cariapena bai.

13’Yucʉacã mʉ tʉpʉ aácʉ yʉ áa. Ati yepapʉ ãcʉ̃ mʉ ye quetire yʉ ca-buionucuwʉ. Nare yʉ ca-buionucuwʉ yʉ yarã na ca-ani wariñuu netoparore bairo ĩi. 14Yʉre mʉ ca-buio rotiriquere na yʉ ca-buio netonucuwʉ. Tiere yʉ ca-buioro ca-apiʉjarã aniri ati yepa macana majuu me ãma. Yʉ quena ati yepa macacʉ mee yʉ ãa. To bairi na quena yʉre bairona ca-anicõa aninucuparã ãma. To bairo ati yepa macana mena ca-aniquẽna na ca-ano yʉ ca-buiorijere ca-apiʉjaquẽna maca na tʉjʉteema. 15Ati yepapʉ yʉre ca-booquẽna watoapʉ ca-ãnare nemoona mʉ tʉpʉ na jee aácʉja yʉ yarãre ĩi mee yʉ ĩi. Sataná caroorije nare cʉ̃ cá-áti rotigaro na matabojaya ĩi, to bairo yʉ ĩi. 16Ati yepa macacʉ yʉ aniquẽe yʉa. Na quena ati yepa macana majuu me ãma. 17Mʉ ye queti cariape macajere na ca-apiʉjaro na ája. To bairo tiere na ca-apiʉjaro mʉ yarã caroarã majuu na ca-ano na mʉ átigʉ. Mʉ ye queti ca-ĩitorije me ãa. Cariape macaje ãa. 18Mʉ ye quetire ati yepa macanare yʉre buio rotii yʉ mʉ ca-joowʉ. To bairona yʉ quena yʉ buerãre ati yepa macana aperãre na buioato ĩi, na yʉ joo. 19Yʉ majuuna na ye wapa na yʉ bai yajibojagʉ. To bairo yʉ ca-bairo na quena mʉ ye queti cariape ca-aniere apiʉjari mʉ yarã majuu caroarã anigarãma.

20’Yʉ buerã jeto meere na jenibojaʉ yʉ áa. Caberopʉ na ca-buiorijere ca-api nʉcʉbʉgoparã quenare na yʉ jeniboja mʉre. 21Jicãʉna mani ca-anore bairona jicãro mena na ãmaro ĩi, na yʉ jeniboja. Caacʉ, yʉ mena mʉ ca-anore bairo, yʉ quena mʉ mena yʉ ca-anore bairo na quena jicãro mena na ãmaro. To bairo jicãro mena caroaro na ca-ano tʉjʉrã aperã quena ati yepa macana, “Dio cʉ̃ ca-jooricʉna ãmi Jesú,” ĩi nʉcʉbʉgogarãma na quena. 22Caroa majuu ca-aniere yʉre mʉ ca-jooriquere na yʉ ca-joo netowʉ, jicãro mani ca-anore bairona na quena jicãro mena na ãmaro ĩi. 23Na menapʉre yʉ ãa. Mʉ maca yʉpʉre mʉ ãa. To bairi na quena jicãro mena anigarãma. To bairo na ca-bairo tʉjʉ cõoñari aperã ati yepa macana quena, “Dio ʉmʉrecóo macacʉ cʉ̃ ca-jooricʉna ãmi Jesú,” ĩi majigarãma. “Cʉ̃re ca-apiʉjarãre na maimi Dio, cʉ̃ Macʉre cʉ̃ ca-mairore bairona,” ĩi majigarãma. 24Ati yepare átigʉ jʉgoyepʉna, meere, yʉre mʉ ca-maiwʉ. Yʉre maii caroa majuu ca-aniere yʉre mʉ ca-joowʉ. Yʉre ca-apiʉjarã yʉre mʉ ca-jooricarã na quena yʉ mena mʉ tʉpʉ na cá-aápere yʉ boo. Caroa majuu yʉ ca-aniere yʉre mʉ ca-jooriquere na tʉjʉato ĩi, mʉ tʉpʉ na cá-aápere yʉ boo. 25Caacʉ, caroa jetore cá-átinucuʉ mʉ ãa. Caroare cá-ácʉ mʉ ca-anibato quena ati yepa macana mʉre majiquẽema. Mʉre yʉ maji yʉa. Ati maja yʉ buerã quena majima yʉre mʉ ca-jooriquere. 26To bairi mʉ ca-aniecʉtiere nare yʉ ca-majionucuwʉ. Nare yʉ majio janaquetigʉ. To bairona na yʉ majiocõa aninucugʉ. Napʉre yʉ anicõagʉ. To bairo napʉre yʉ ca-ano ca-ame mairã anicõa aninucugarãma. Yʉre mʉ ca-mairore bairona na quena ame maigarãma. To bairi yʉ quena na mena yʉ anicõa aninucugʉ, na ca-ĩi jenibojawĩ Jesú cʉ̃ buerãre cʉ̃ Pacʉ Diore yua.

Currently Selected:

SAN JUAN 17: TAVNT2

Highlight

Copy