SAN LUCAS 3

Juan el Bautista predica en el desierto

(Mateo 3.1-12; Marcos 1.1-8; Juan 1.19-28)

1-2Cabero Juan, Sacaría macʉ cabʉcʉ ca-añupʉ. Camaja mani paʉpʉ, ca-yucʉ manopʉ ca-aninucuñupʉ Juan. Ti paʉ ca-anopʉ Tiberio César ca-wamecʉcʉ romano maja ʉpaʉ ca-rotii ca-añupʉ. To canacã yepa ape macaripʉre cʉ̃re ca-rotibojarã ca-añuparã. Ponsio Pilato ca-wamecʉcʉ Judea yepapʉre cʉ̃ ca-rotibojayupʉ. Herode ca-wamecʉcʉ Galilea yepapʉre cʉ̃ ca-rotibojayupʉ. Herode bai Felipe ca-wamecʉcʉ Iturea, Traconite pʉga yepapʉre cʉ̃ ca-rotibojayupʉ cʉ̃a. Apeĩ Lisanias ca-wamecʉcʉ Abilinia yepapʉre cʉ̃ ca-rotibojayupʉ. To bairo na ca-rotiri yʉteare sacerdote maja ʉparã ca-añuparã Aná, Caifá ca-wamecʉna. To bairi Tiberio César quince cʉmari caʉpaʉ cʉ̃ ca-ano Dio cʉ̃ ye quetire cʉ̃ ca-buio teña rotiyupʉ Juan're camaja manopʉ ca-aninucuʉre. 3To bairi Jordán na ca-ĩri ya tʉpʉ nipetiro to ca-ãnare na ca-buio teñanucuñupʉ Juan. Oco bairo na ca-buionucuñupʉ nare:

—Caroorije mʉja cá-átinucurijere jʉtiritiri mʉja yeri wajoaya. Coje rericarore bairo caroorije jã cá-átiere Dio cʉ̃ majirioato ĩirã bautisa rotiya, ca-ĩi buio teñanucuñupʉ Juan.

4To bairo buio teñaʉ, tirʉmʉpʉ macacʉ Dio ye quetire ca-buioricʉ Isaía ca-wamecʉcʉ ãnacʉ cʉ̃ ca-ĩi ucarica wamere bairona cá-ájupʉ Juan. Oco bairo ca-ĩi ucayupi Isaía Juan cʉ̃ ca-baipere:

Oco bairo ĩi awaja buiogʉmi jicãʉ camaja manopʉ ca-ãcʉ̃: “Caroaro quenoo yuuya mʉja yerire mani Ʉpaʉ cʉ̃ cá-atíparo jʉgoye. Caroa macare ája. Camaja na ʉpaʉ cʉ̃ cá-atípa wãre na ca-quenoo yuurore bairona caroaro quenoo yuuya.

5Camaja maca na ʉpaʉ cʉ̃ cá-atípa wãpʉre ope to ca-ãmata jita mena cũu jiroo bipema. Ʉ̃ta buuri to ca-ãmata yejea cũu quenooma. Ca-rupa betori quenare cariape quenoo ame buuma ti wãre. Caroaro yabi ñuuri wãa quenooma na ʉpaʉ cʉ̃ cá-atípa wãre. To bairo na cá-átore bairona mani Ʉpaʉ cʉ̃ cá-atíparo jʉgoye mʉja yeri macajere quenoo yuuya. Caroorije mʉja cá-átiere áti janaña.

6To bairo mʉja cá-áto camajare ca-netoo catíopaʉre tʉjʉgarãma camaja nipetirã,” ĩi awajagʉmi jicãʉ camaja manopʉ ca-ãcʉ̃, ca-ĩi ucayupi Isaía ãnacʉ tirʉmʉpʉ.#Isaías 40.3-6

7To bairi Isaía cʉ̃ ca-ĩi ucaricarore bairona ca-baiyupʉ Juan. To bairi Juan tʉpʉ ca-ejayuparã camaja capaarã cʉ̃ bautisa rotira anaa. Oco bairo na ca-ĩiñupʉ Juan cʉ̃ tʉpʉ ca-ejarãre:

—Caroorije mʉja áticõa aninucu. ¿Nope ĩirã yʉ tʉpʉ ejari yʉre mʉja bautisa rotití? Mʉja popiyeyegʉmi Dio mʉja ca-yeri wajoaquẽpata. 8Caroorije mʉja cá-átiere jʉtiritiri áti janaña. Caroa macare ája. To bairo ána Dio yarã mʉja ca-aniere mʉja ani iñoogarã. “Abraham pãramerã jã ãa, to bairi Dio yarã jã ãa,” ĩi tʉgooñaqueticõaña. Atie ʉ̃ta rupaarena áti rupeo majimi Dio Abraham pãramerãre nare cʉ̃ ca-boonemoata, na ca-ĩiñupʉ Juan. 9—Mʉja ca-tʉgooñarijere mʉja ca-wajoaquẽpata, caroa macare mʉja cá-átiquẽpata mʉja reegʉmi Dio. Yucʉ ca-rica maniire quetí joe rocaricarore bairona mʉja átigʉmi Dio.

10To bairo na cʉ̃ ca-ĩi buioro apiri oco bairo cʉ̃ ca-ĩi jeniñañuparã:

—Baiyupa, ¿dope bairo jã ánaatí?

11To bairo cʉ̃ na ca-ĩi jeniñaro:

—Nii camisa pʉgaro ca-cʉgoʉ apeĩ ca-camisa mácʉre jicãro cʉ̃ jooya, na ca-ĩiñupʉ Juan. —Noa ca-ʉgarique cʉgorã na jooya aperãre ca-ʉgarique manare, na ca-ĩi yʉʉyupʉ Juan.

12Aperã Juan tʉpʉ ca-ejayuparã gobiernore camaja yere niyeru jeebojari maja. Na quena bautisa rotira anaa ca-baiyuparã. Oco bairo cʉ̃ ca-ĩi jeniñañuparã:

—Jãare ca-majioʉ, ¿dope bairo jã ánaatí jãa?

13To bairo na ca-ĩi jeniñaro:

—Mʉja ʉparã niyeru camaja yere mʉja na ca-jee rotinucuro cõona jeeya. Netoro jeniqueticõaña, na ca-ĩiñupʉ Juan.

14Polisía maja quena oco bairo cʉ̃ ca-ĩi jeniñañuparã:

—¿Jãate dope bairo jã cá-átipe to ãtí? Juan're cʉ̃ ca-ĩi jeniñañuparã.

To bairo na ca-ĩi jeñiñaro:

—Camajare na ĩi uwiotori na yere emaqueticõaña. Cariape mʉja ca-wapataro cõona cʉgo wariñuuña. Boonemoqueticõaña, na ca-ĩiñupʉ Juan.

15Camaja nipetirã Juan cʉ̃ ca-buiorijere apirã seeto cʉ̃ ca-tʉgooñañuparã. “Dio ye quetire ca-buiori maja ãnana, ‘Jicãʉ Cristo, camajare cá-átinemopaʉre cʉ̃ joogʉmi Dio,’ ¿na ca-ĩricʉ cʉ̃ anicʉtí ania?” ca-ame ĩi jeniñañuparã. 16-17To bairo na ca-ame ĩi jeniñaro oco bairo na ca-ĩi buioyupʉ Juan cʉ̃ tʉpʉ ca-ejarã nipetirãre:

—Oco mena ca-bautisaʉ yʉ ãa. Yʉ bero anigʉmi yʉ netoro ca-ãcʉ̃, ca-ani majuʉ. Cʉ̃ menare cʉ̃ paabojari majocʉre bairo yʉ ãa. Cʉ̃ maca cʉ̃ Espíritu Santo, cʉ̃ ca-tutuarije mena joogʉmi. Cʉ̃ Espíritu Santore joo, cʉ̃re ca-boorãre caroorije na cá-átiere oco mena ʉgueri coje rericarore bairona na átigʉmi. Cʉ̃re ca-booquẽna macare na reegʉmi, cʉ̃ yarã jetore na beje jeegʉ. Trigo rupaa ajeri caroorije papu beje joe rericarore bairona na reegʉmi. Caroa macare beje cũurica paʉpʉ cũuricarore bairona na átigʉmi cʉ̃ yarã jetore. Aperã macare peero ca-yatiqueti peeropʉ na reegʉmi, na ca-ĩi buioyupʉ Juan.

18Apeye Dio ye quetire capee na ca-ĩi buionemoñupʉ Juan. 19Herode ti yepa ʉpaʉ maca Juan cʉ̃ ca-buionucurijere ca-apigateeyupʉ. Cʉ̃ maca cʉ̃ bai Felipe nʉmore Herodía ca-wamecʉcore ca-emañupʉ. Apeye quenare capee rooro majuu cá-ácʉ ca-añupʉ Herode. To bairo cá-ácʉre, “Ñuuqueti majuucõa to bairo rooro mʉ cá-átinucurije,” cʉ̃ ca-ĩibajupʉ Juan Herodere. 20To bairo Juan cʉ̃ ca-ĩrijere apibacʉ quena rooro cʉ̃ cá-ájupʉ Herode. Presopʉ cʉ̃ ca-jooyupʉ, “Rooro mʉ átinucu,” Juan cʉ̃re cʉ̃ ca-ĩinucurijere apigatei.

El bautismo de Jesús

(Mateo 3.13-17; Marcos 1.9-11)

21Atie jʉgoye, presopʉ Ʉpaʉ Herode Juan're cʉ̃ ca-jõoparo jʉgoye camaja capaarãre na ca-bautisayupʉ Juan. Nare cʉ̃ ca-bautisaro Jesú quena bautisa rotii ca-ejayupʉ. To bairi Jesúre Juan cʉ̃ ca-bautisaro bero cʉ̃ Pacʉre ca-jeni nʉcʉbʉgoyupʉ Jesú. Cʉ̃ ca-jeni nʉcʉbʉgori paʉ ʉmʉrecóo ca-pãañupe. 22Ca-pãaro Dio Espíritu Santo Jesúpʉre buare bairo cʉ̃ ca-bau rui ejayupʉ. To bairo Jesúpʉre cʉ̃ ca-bau rui ejaro Dio ʉmʉrecóopʉ ca-ĩi wadayupʉ:

—Yʉ Macʉ, yʉ ca-mai netoʉ majuu mʉ ãa. Seeto mʉ yʉ tʉjʉ wariñuu, Jesúre cʉ̃ ca-ĩiñupʉ Dio yua.

Los antepasados de Jesucristo

(Mateo 1.1-17)

23Treinta cʉmari ca-cʉgoʉ majuu ãcʉ̃ camajare ca-buio teña jʉgoyupʉ Jesú. Dio Macʉ cʉ̃ ca-anibato quena, “José macʉ ãmi,” ca-ĩi tʉgooñabajuparã camaja Jesúre. Joséa Elí macʉ ca-añupʉ. 24Elí maca Matá ca-wamecʉcʉ macʉ ca-añupʉ. Matá Leví macʉ ca-añupʉ. Leví Melqui macʉ ca-añupʉ. Melqui Jana macʉ ca-añupʉ. Jana José macʉ ca-añupʉ. 25José Matatías macʉ ca-añupʉ. Matatías Amós macʉ ca-añupʉ. Amós Esri macʉ ca-añupʉ. Esri maca Nagai macʉ ca-añupʉ cʉ̃a. 26Nagai Maat macʉ ca-añupʉ. Maat Matatías macʉ ca-añupʉ. Matatías Semei macʉ ca-añupʉ. Semei José macʉ ca-añupʉ. José Judá macʉ ca-añupʉ. 27Judá Joana macʉ ca-añupʉ. Joana maca Resa macʉ ca-añupʉ. Resa Sorobabé macʉ ca-añupʉ. Sorobabé Saratié macʉ ca-añupʉ. Saratié Neri macʉ ca-añupʉ. 28Neri Melqui macʉ ca-añupʉ. Melqui Adi macʉ ca-añupʉ. Adi Cosam macʉ ca-añupʉ. Cosam Elmodam macʉ ca-añupʉ. Elmodam Er macʉ ca-añupʉ. 29Er Josué macʉ ca-añupʉ. Josué Elieser macʉ ca-añupʉ. Elieser Jorim macʉ ca-añupʉ. Jorim Matá macʉ ca-añupʉ. 30Matá Leví macʉ ca-añupʉ. Leví Simeón macʉ ca-añupʉ. Simeón Judá macʉ ca-añupʉ. Judá José macʉ ca-añupʉ. José Jonán macʉ ca-añupʉ. Jonán Eliaquim macʉ ca-añupʉ. 31Eliaquim Melea macʉ ca-añupʉ. Melea Mainán macʉ ca-añupʉ. Mainán Matata macʉ ca-añupʉ. Matata Natán macʉ ca-añupʉ. 32Natán David macʉ ca-añupʉ. David Isaí macʉ ca-añupʉ. Isaí Obé macʉ ca-añupʉ. Obé Booz macʉ ca-añupʉ. Booz Salmón macʉ ca-añupʉ. Salmón Naasón macʉ ca-añupʉ. 33Naasón Aminadá macʉ ca-añupʉ. Aminadá Aram macʉ ca-añupʉ. Aram Esrom macʉ ca-añupʉ. Esrom Fares macʉ ca-añupʉ. Fares Judá macʉ ca-añupʉ. 34Judá Jacobo macʉ ca-añupʉ. Jacobo Isaá macʉ ca-añupʉ. Isaá Abraham macʉ ca-añupʉ. Abraham Taré macʉ ca-añupʉ. Taré Nacor macʉ ca-añupʉ. 35Nacor Serú macʉ ca-añupʉ. Serú Ragau macʉ ca-añupʉ. Ragau Pelé macʉ ca-añupʉ. Pelé Heber macʉ ca-añupʉ. Heber Sala macʉ ca-añupʉ. 36Sala Cainán macʉ ca-añupʉ. Cainán Arfasá macʉ ca-añupʉ. Arfasá Sem macʉ ca-añupʉ. Sem Noé macʉ ca-añupʉ. Noé Lame macʉ ca-añupʉ. 37Lame Matusalén macʉ ca-añupʉ. Matusalén Enoc macʉ ca-añupʉ. Enoc Jared macʉ ca-añupʉ. Jared Mahalaleel macʉ ca-añupʉ. Mahalaleel Cainán macʉ ca-añupʉ. 38Cainán Enós macʉ ca-añupʉ. Enós Sete macʉ ca-añupʉ. Sete Adán macʉ ca-añupʉ. Adán nemoopʉre Dio macʉ ca-añupʉ yua.

Currently Selected:

SAN LUCAS 3: TAVNT2

Highlight

Copy