SOERA MOZE II. FAZA 12.
FAZA 12.
I. Tehonogõi gowasa fasa andrõ, si ero rõfi. II. Famoenoe iraono si aʼa ba danõ Miseraji. Aheta Ndraono Gizeraëli. III. Tefachoi na he wisa wolaoe fasa andrõ.
1I. Ba imane Jehowa chõ ndra Moze Aʼaroni, ba danõ Miseraji: 2Si aʼa mbaw̃a chõmi dania mbaw̃a daʼe; bõrõta mbaw̃a ia chõmi ba ndrõfi. 3Mimane ba mbanoea Ndraono Gizeraëli fefoe: Ba zi mewoeloe ba mbawa daʼe, ba ja moefaigi chõnia nono mbiribiri zamõsana, sambasamba omo, ba sarasara nono mbiribiri. (Joh. 1, 29). 4Ba na ambõ faʼato zi samba omo, ba zi sara ono mbiribiri, ba jamoehalõ awõnia zi fahatõ omo chõnia, ba wangai si sara, dali waʼato niha; ha waʼato zi tola mangohori jaʼia, ba sara nono mbiribiri mihonogõi. 5Ono mbiribiri si lõ hadia ia zi sala nifaigi, si matoea ba si dõfi faʼeboea; na tenga ono mbiribiri, ba ono nambi nitoetoejoe. (Moz. III. 1, 3; 22, 21). 6Ba mihoë, iroegi zi meweleõfa ba mbaw̃a daʼe, ba tánõ owi lataba, dozi Iraono Giseraëli. (Moz. IV. 9, 5). 7Ba ndramoehalõ õsa ndro, ba lagoeleʼõ ba gehomo, fatambai mbaw̃androehõ ba ba hõgõ mbawandroehõ, ba nomo andrõ, ba niʼā jaʼia. 8Ba õsinia, ba ba zi bongi andrõ laʼā, nitoenoe; roti si lõ moeʼaisõni ba boeloe ndroeʼoe safeto nawõ. 9Bõi miʼenata, ba tenga nirino ba nidanõ, mitoenoe ba galitõ, maʼasara, tenga nifaefa hadia ia: fabaja alachaõ. 10Ba maʼifoe bõi misaigõ irege mahemoloe; hadia zi tosai irege mahemoloe mbanoea, ba nitoenoe. 11Ba mimane ba wemanga: Si no mamõbõ taloe ami ba so mbadagahe ba gahemi ba siʼo ba dangami; ba mitaʼitaʼi wemanga jaʼia! Fasa ia chõ Jehowa. (Mat. 26, 17. Heb. 11, 28). 12Ba zi bongi andrõ sa oetõrõi danõ Miseraji, ba oeboeboenoe nono si aʼa fefoe, ba danõ Miseraji, he ba niha ba he ba goerifõra; ba laʼila dania waʼabõlõgoe fefoe Lowalangi Miseraji oebeʼe, jaʼo, Jehowa! (Moz. IV. 33, 4. Sin. 136, 10). 13Ba do andrõ ba nomo, ba zi so ami, ba tandra chõgoe, fangorifimi; na oeʼila ndro andrõ, ba oetaloeʼi ami, fa lõ gõna ami famakao, famakiko andrõ, na oelaoe ba Ndrawa Miseraji. 14Ba baw̃a daʼõ, ba baw̃a wamasoegi ba dõdõ chõmi dania; baw̃a gowasa chõ Jehowa dania ia chõmi, gõtõgõtõ waʼara; si lõ teboelõ chõmi wolaoe jaʼia, iroegi zi lõ aetoe. 15Fitoe bongi waʼara miʼā roti si lõ moeʼaisõni. Ba mbõrõta mbaw̃a daʼõ saʼae, ba bõi faloecha ba nomomi danõmõ roti; ha niha sa zi manga roti niʼaisõni, gõtõ zi fitoe bongi andrõ, ba niseʼe ba Ndraono Gizeraëli. (F. 23, 15. Kor. I. 5, 7). 16Ba na loeo si fõfõna andrõ, ba owoelo ami ba niʼamoniʼõ andrõ ba si manõ gõi na loeo si fitoe; ba ba loeo daʼõ, ba maʼifoe manõ lõ lahalõ halõw̃õ; ha sogoena õ zamõsana, ba tola mihalõ. 17Ba bõi olifoe ami roti si lõ moeʼaisõni no mege; me ba mbaw̃a daʼõ oeheta ngahõnõmi ba danõ Miseraji, andrõ, mitõngõni mbaw̃a daʼõ, gõtõgõtõ waʼara, nihonogõi, siroegi si lõ aetoe. 18Ba mbaw̃a si fõfõna andrõ, ba zi meweleõfa, ba zi bongi, ba daʼõ miʼā roti si lõ moeʼaisõni ba iroegi ba zi bongi ba zi meõnõ gachõmita. (Moz. III. 23, 6. Moz. IV. 28, 17. Moz. V. 16, 3). 19Fitoe bongi waʼara, ba lõ tola faloecha danõmo roti ba nomomi; ha niha sa zi manga roti niʼaisõni, ba niseʼe ba mbanoea Ndraono Gizeraëli, he na niha bõʼõ ba he na iwara. 20Sambawa bõi miʼā roti niʼaisõni. Fefoe gofoe heza, ba zi so ami, ba roti si lõ moeʼaisõni miʼā. 21Ba ifakaoniʼõ zatoea Ndraono Gizeraëli fefoe Moze, ba imane chõra: Milaboe, mifaigi chõmi nono mbiribiri, õ zoroijomomi, sambasamba omo, ba mitaba wasa andrõ. 22Ba mihalõ zamboea moeroemoeroe doetoeroe zoefa ba miʼoengoegõ ba ndro andrõ, ba wiga jaw̃a, ba migoeleʼõ õsa ndro andrõ ba wiga ba hõgõ mbawandroehõ ba ba gehomo fatambai; ba samõsa bõi jamõi tooe, bõi mirõi nomomi, iregi moloeo. 23Itõrõ sa danõ Jehowa, ba wolaoe ba Ndrawa Miseraji, ba na iʼila ndro andrõ ba hõgõ mbawandroehõ ba ba gehomo fatambai, ba italoeʼi mbawandroehõ si manõ Jehowa, ba lõ itehe ba zamakiko andrõ weʼamõi jomo chõmi, ba wolaoe chõmi. 24Ba milaoe daʼõ, amachoita chõoe ba ba ngaʼõtõoe, iroegi zi lõ aetoe. 25Ba na miroegi dania danõ andrõ nibeʼe Jehowa ochõtami, si mane nifaboeʼoenia, ba mitõrõ daʼõ wamosoemange Lowalangi. 26Ba na lasofoe dania chõmi iraonomi, na lamane: Hadia chõmi wamosoemange andrõ? 27ba mimane chõra: Soemange fasa chõ Jehowa, sanaloeʼi omo Ndraono Gizeraëli, me ilaoe ba Ndrawa Miseraji, fa lõ ibabaja zi so jomo chõda. Ba lafaõndrõ ira sato, mangaloeloe. 28Ba mõi Ndraono Gizeraëli, laʼoʼõ niw̃aʼõ Jehowa chõ ndra Moze Aʼaroni; daʼõ lalaoe.
29II. Ba me taloe mbongi, ba ahori iboeboenoe Jehowa nono si aʼa ba danõ Miseraji, iʼotarai nono si aʼa chõ Waraʼo, sidadao ba dadaoma razo chõnia, noemalõ ba nono si aʼa ba nikoeroe, si so ba goeroenga, awõ fefoe nono si aʼa ba goerifõ. (Sin. 78, 51; 135, 8). 30Ba maoso Waraʼo, awõ ngoningoninia, awõ Ndrawa Miseraji fefoe, ba zi bongi andrõ ba tesao wegeʼege sabõlõbõlõ, ba danõ Miseraji; samboea sa lõ omo, si lõ si mate. 31Ba ifakaoniʼõ ndra Mose Aʼaroni Faraʼo, ba zi bongi, ba imane: Milaboe! miheta ami, mifabali ami ba mbanoeagoe, he jaʼami ba he Iraono Gizeraëli andrõ; miʼae mifosoemange Jehowa, mitõrõ niʼandrõmi andrõ. (Sam. I. 6, 6. Sin. 105, 38). 32Ba biribirimi gõi, ba saw̃imi, ba miʼohe, si mane niʼandrõmi; miheta ami ba miʼandrõ chõgoe gõi howoehowoe. (F. 10, 26). 33Ba laloeloegõ ira Dawa Miseraji, enaʼõ laʼaliogõ wangeheta jaʼira ba danõ; lamane sa dõdõra: ahori mate ita! 34Ba laʼohe gombõila roti andrõ sato, si lõ fachamõ aisõ na, laʼangalisigõ nahia, niʼolõwõsi ba lembera. 35Ba no laʼoʼõ niw̃aʼõ Moze chõra Iraono Gizeraëli, no laʼandrõ ba Ndrawa Miseraji gamagama firõ ba gamagama anaʼa, awõ noecha. (F. 3. 21; 11, 12). 36Ba no ibeʼe Jehowa eboea dõdõ Ndrawa Miseraji chõra, woloʼõ chõra; ba tobali laraboe gamagama Ndrawa Miseraji. 37Ba aheta ba Ramese Ndraono Gizeraëli, lasaw̃a Zoekota, mato 600,000 niha, sanõrõ tanõ, ira matoea, lõ lai ndraono. (Moz. IV. 33, 3). 38Ba ato gõi zi fao chõra niha [bõʼõ] ba biribiri ba saw̃i, oja sibai goerifõ. 39Ba labogõ gombõila roti no mege, niʼohera moroi ba danõ Miseraji, labaliʼõ koee si lõ moeʼaisõni; lõʼõ sa si fachamõ aisõ, me niloeloegõ ira, ba wondrõi tanõ Miseraji, ba me tebai saʼae tebato ira, ba wamaigi chõra nifatõʼõ enaʼõ. 40Ba faʼara Ndraono Gizeraëli ba danõ Miseraji, ba õfa ngaotoe a tõloe ngafoeloe fache. (Moz. I. 15, 13. Hal. zin. 7, 6). 41Ba me no aloea zi õfa ngaotoe a tõloe ngafoeloe fache, me loeo daʼõ sibai, ba aheta ba danõ Miseraji ngahõnõ andrõ chõ Jehowa. 42Bongi wangorifi chõ Jehowa, me iheta ira ba danõ Miseraji. Niʼamoniʼõ mbongi andrõ chõ Jehowa, me no fangorifi ba Ndraono Gizeraëli fefoe; gõtõgõtõ waʼara.
43III. Ba imane Jehowa chõ ndra Moze Aʼaroni: Daʼõ gamachoita ba wasa andrõ: lõ tola iʼā wõfõ niha bõʼõ. 44Ba awena tola laʼā dozi sawoejoe nihõli, na no moeboto ira. 45Si fatewoe ba enoni, ba lõ tola laʼā. 46Nifasamboea nomo ba niʼā jaʼia; lõ tola laʼohe hadia ia, nõsi. Sara tõla bõi mifatõ chõnia. (Moz. IV. 9, 12. Joh. 19, 36). 47Dozi Iraono Gizeraëli zolaoe jaʼia. 48Ba na so niha bõʼõ, somasi sosó chõmi ba molaoe fasa chõ Jehowa, ba niboto fefoe motõi matoea ba chõra; awena dania tola laʼondrasi, ba wolaoe, ba iwami saʼae ira, miw̃aʼõ. Ba si lõ moeboto, ba lõʼõ manõ tola iʼā. 49Ha samboea goroisa, he ba niwami ba he ba niha bõʼõ, si sosó ba chõmi. 50Ba laʼoʼõ niw̃aʼõ Jehowa chõ ndra Moze Aʼaroni dozi Iraono Gizeraëli; lamanõ wolaoe. 51Ba me loeo daʼõ iheta ba danõ Miseraji Ndraono Gizeraëli Jehowa, ba ngahõnõra.
Currently Selected:
SOERA MOZE II. FAZA 12.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.