SOERA MOZE II. FAZA 18.
FAZA 18.
I. Mõi chõ Moze matoeania Jetero. II. Ifobawa lala chõ Moze, ba wamataro sangoehoekoe sato.
1I. Ba me irongo Jetero, hõgõ gere ba Ndraono Midiano, matoea Moze, doeria daʼõ fefoe, he wisa Lowalangi chõ Moze ba ba mbanoeania Iraono Gizeraëli, wa no iheta ba danõ Miseraji Ndraono Gizeraëli Jehowa, 2ba ihalõ Zifora andrõ, foʼomo Moze Jetero, matoea Moze — noa sa ifaʼoheʼõ mangawoeli Moze — (F. 2, 21; 4, 20), 3awõ nononia andrõ, si domboea — tõi zi samboea, ba Gereso, me no imane: No tobali si fatewoe ndraʼo ba danõ zotanõ; (F. 2, 22); 4ba tõi zi samõsa, ba Eliezeri, me imane: No itolodo Lowalangi namagoe andrõ, no iʼefaʼõ ndraʼo ba mbawa ziʼõli Waraʼo. — 5Ba so Jetero, matoea Moze, awõ ndraono Moze, awõ woʼomonia, mõi ia chõ Moze ba danõ si mate, ba zolombase ira, ba gahe hili Lowalangi andrõ. 6Ba ifaw̃aʼõgõ chõ Moze imane: Mõido chõoe, jaʼodo andre, matoeaoe Jetero, awõ woʼomooe ba ononia si domboea andrõ, si fao chõnia. 7Ba maoso Moze, mõi moefaondragõ matoeania andrõ, ifaõndrõ ia ba faʼago bawa chõnia; ba faoma lasofoe chõ nawõra, na lõ hadia ia chõra, ba mõi baose. 8Ba idoenõdoenõ chõ matoeania Moze fefoe milaoe Jehowa chõ Waraʼo ba ba Ndrawa Miseraji, ba wangorifi Iraono Gizeraëli, awõ wamakao andrõ fefoe, si no gõna ira ba lala ba fangorifi Jehowa jaʼira. 9Ba omoeso dõdõ Jetero ba zi sõchi andrõ fefoe, nilaoe Jehowa ba Ndraono Gizeraëli, wa no iʼefaʼõ ira ba danga Ndrawa Miseraji. 10Ba imane Jetero: Nisoeno Jehowa, me no iʼefaʼõ ami ba danga Waraʼo ba ba danga Ndrawa Miseraji, me no iheta barõ mbawa Ndrawa Miseraji mbanoeami. 11Awena aboto ba dõdõgoe, wa no sabõlõ moroi ba Lowalangi bõʼõ fefoe Jehowa; ba zi fajaw̃a ira chõra saʼae ilaw̃a ira. (F. 1, 22; 14, 27. Sin. 76, 11). 12Aefa daʼõ, ba ifahalõʼõ goerifõ Jetero andrõ, matoea Moze, nibeʼe soemange nitoenoe ba soemange nitaba, soemange Lowalangi, ba so Gaʼaroni, awõ zatoea Ndraono Gizeraëli fefoe, ba wangoroedoegõ jaʼira chõ matoea Moze andrõ, ba wemanga zoemange andrõ fõna Lowalangi.
13II. Ba mahemoloe õ, ba moedadao Moze, ba wamatoenõ hoehoeo zato, ba laʼondrasi Moze niha, iʼotarai sihoelõ wongi, noemalõ ba waʼabongi. 14Ba me iʼila matoea Moze halõw̃õnia ba niha, ba imane chõnia: He wisa ndraʼoegõ ba niha andrõ? Hana wa ha jaʼoegõ zidaodao, ba lahoeroefai manõ ndraʼoegõ niha, iʼotarai zi hoelõ wongi noemalõ ba waʼabongi? 15Imane Moze chõ matoeania: Jaʼia, mõimõi chõgoe niha, ba wanofoe faetasa. 16Na so hoehoeora, ba laʼondrasi ndraʼo, enaʼõ oeʼetoeʼõ, ha chõ zatoelõ, ba enaʼõ oeʼombachaʼõ nifachoi Lowalangi ba oroisania. 17Ba imane matoea Moze chõnia: Tenga si gõna wolaoemõ andrõ. 18Erege dõdõoe ba erege gõi dõdõ niha andrõ, si so chõoe; abõlõ afõchõ halõw̃õoe andrõ chõoe, tebai ha jaʼoegõ zangasiwai. 19Ba daʼoefobawa lala chõoe, oʼõ chõgoe, ba itoloʼõ Lowalangi: bõi boelõʼõgõ samaʼema chõ Lowalangi hadia ia niw̃aʼõw̃aʼõ niha, faʼema chõ Lowalangi hoehoeora. 20Ba botochi ba dõdõra gamachoita ba oroisa, ba oromaʼõ chõra lala nitõrõra ba he lawisa wolaoe. 21Ba toetoejoe ba niha sato zangataʼoefi Lowalangi ba si fadoehoe dõdõda ba si lõ mangaloei chõra hadia ia, ba fataro ira sangoehoekoe si hõnõhõnõ ba si otoeʼotoe ba si limalima woeloe ba si foeloefoeloe, (Moz. IV. 11, 16. Moz. V. 1, 13), 22fa lõ mamalõmalõ lafatoenõ hoehoeo zato. Ba hoehoeo seboea, fefoe ba ndramoeʼohe chõoe; ba hoehoeo sideʼide fefoe, ba jaʼira zangetoeʼõ, ba aoha chõoe õbeʼe, ba latoloʼõ. 23Na õmanõ wangohonogõi daʼõ, ba na iw̃aʼõ chõoe Lowalangi, ba tola õtaha, ba si sõchi tõdõ niha andrõ fefoe, wangawoeli ba chõra. 24Ba iʼoʼõ niw̃aʼõ matoeania Moze, fefoe nifobawania lala chõnia, ba ifaloea. 25Itoetoejoe Moze ba Ndraono Gizeraëli fefoe niha si so tõdõ ba ifataro hõgõ zato, sangoehoekoe si hõnõhõnõ ba si otoeʼoetoe ba si limalima woeloe ba si foeloefoeloe, 26enaʼõ lõ mamalõmalõ laʼasiwai hoehoeo zato. Ba hoehoeo seboea, ba niʼohe chõ Moze, ba fefoe hoehoeo sideʼide, ba jaʼira zangetoeʼõ. 27Ba ifasao ba lala matoeania Moze, mangawoeli ba chõra daʼõ.
Currently Selected:
SOERA MOZE II. FAZA 18.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.