اعمالٚ رسولأن ۱۰
۱۰
پطرس کُرنِلیوسٚ رومی اَمرأ مولاقات کونه
۱ قیصریه شهرٚ میأن ایتأ مردای زندگی کودی، کُرنِلیوس نام، کی هنگٚ رومیأنٚ افسر بو. اونٚ هنگ معروف به «هنگٚ ایتالیایی» بو. ۲ اون ایتأ پارسا مردای بو و تومامٚ اونٚ خانواده دوروستکار و خوداترس بید. کُرنِلیوس دس و دیل‌باز بو و نیازمندأنَ صدقه فدَیی و همیشه به درگاهٚ خودا دوعا کودی. ۳ ایتأ روز بعدٚ ظهر حدودٚ ساعتٚ سه، رویا دورون خودا فرشته‌یَ آشکارا دینه کی بمو اونٚ ورجأ، بوگفته: «اَی کُرنِلیوس!» ۴ کُرنِلیوس ترسٚ اَمرأ اونَ نیگاه بوکوده و جواب بده: «بله، سرور!» فرشته بوگفته: «تی هدایا و دوعایأن، خودا ورجأ موردٚ قوبیل قرار بیگیفته. ۵ هسأ چند نفرَ اوسه کون بیشید شهرٚ یافا و شمعونَ کی اونَ ‹پطرس› دوخوأنیدی، بأورید اَیه. ۶ اون ایتأ دَبّاغٚ ورجأ، به نامٚ شمعون کی دریا کنار خانه دأره، مهمانه.»
۷ وختی فرشته‌یی کی اونٚ اَمرأ گب زِئن دوبو بوشو، کُرنِلیوس دو نفرَ جٚه خو خادمأن و ایتأ جٚه خودشٚ سپاهیأنٚ مخصوصَ کی ایتأ پارسا مردای بو، دوخوأده ۸ و تومامٚ ماجرایَ اوشأنٚ رِه بوگفته و اوشأنَ اوسه کوده کی بیشید یافا.
۹ فردا ظهرٚ موقع بو، وختی رأ میأن ایسَه‌بید و شهرَ نزدیکَ بوستن دیبید، پطرس بوشو خانه پشتٚ بامٚ جور کی دوعا بوکونه. ۱۰ اویه اونَ ویشتأ کوده و بخوأسته ایچی بوخوره. وختی غذایَ آماده کودن دیبید، خلسه دورون بوشو. ۱۱ هو حالٚ میأن بیده کی آسمان وازَ بوسته، ایتأ پیله سفره بوقچه مأنستن، جٚه چار گوشه آویزأنه، زیمینٚ طرف بیجیر اَمون دره. ۱۲ او سفره، همه جور چارپایأن و خزنده‌یأن و پرنده‌یأنٚ جأ پور بو. ۱۳ صدایی بیشنأوسته کی گفتی: «پطرس، ویریز، اوشأنٚ سرَ وَوین و بوخور!»
۱۴ پطرس بوگفته: «حاشا خوداوندأ، من هرگز ایچی‌یَ کی نجست و ناپاک ببه لب نزِم.»
۱۵ دوواره صدا بمو کی «اونچی‌یَ خودا حلال بوکوده، تو حرام نوأ دأنستن.» ۱۶ سه دفعه تکرار بوبوسته، بأزین سفره آسمانٚ جور بوشو.
۱۷ هو وخت کی پطرس تعجبٚ اَمرأ به خو رویا فیکر کودن دوبو، هو کسأنی‌یَ کی کُرنِلیوس اوسه کوده‌بو، شمعونٚ خانه‌یَ پیدا بوکودید و اونٚ خانه درٚ سر فأرسه‌یید. ۱۸ اوشأن صدایٚ بولندٚ اَمرأ وَورسه‌ییدی: «آیا شمعون کی اونَ پطرس دوخوأنیدی اَیه مهمانه؟»
۱۹ پطرس به خو رویا فیکر کودن دوبو کی روح‌القدس بوگفته: «بیدین، سه نفر تی دونبأل گردیدی. ۲۰ ویریز، بوشو بیجیر، شک نوکون کی اوشأنٚ اَمرأ وأ بیشی، چره کی من اوشأنَ اوسه کودم.» ۲۱ پطرس بوشو بیجیر و اوشأنَ بوگفته: «من هونم کی اونٚ دونبأل گردیدی. چی وأسی بموییدی اَیه؟»
۲۲ اوشأن بوگفتیدی: «فرمانده کُرنِلیوس اَمرَ اوسه کوده. اون مردی عادل و خوداترسه، کی تومامٚ مردومٚ یهود اونَ به خوبی شنأسیدی. فرشته‌یٚ موقدّسٚ خودا اونَ دستور بده اَمرَ اوسه کونه تا ترَ ببریم اونٚ خانه کی تی گبأنَ بیشنَوه.» ۲۳ پس پطرس اوشأنَ ببرده شمعونٚ خانه و اوشأنٚ جأ پذیرایی بوکوده.
فردا روزٚ رِه ویریشته کی اوشأنٚ اَمرأ بشه. چند نفر جٚه ایماندارأنٚ شهرٚ یافایم اونٚ اَمرأ بوشوییدی. ۲۴ پس فردا روزٚ رِه فأرسه‌ییدی قیصریه. کُرنِلیوس، اونٚ فامیلأن و رِفِقأنَ کی دعوت بوکوده‌بو، همه‌تأن، اوشأنٚ رافا ایسَه‌بید. ۲۵ وختی پطرس فأرسه، کُرنِلیوس بوشو اونٚ پیشواز، بکفته اونٚ پا جیر و اونَ پرستش بوکوده. ۲۶ ولی پطرس اونَ به پا بدأشته، بوگفته: «ویریز؛ منم ایتأ اینسأنم.»
۲۷ هوطو کی اوشأنٚ اَمرأ گب زِئن دوبو، شه خانه دورونی. اویه مردومٚ زیادی اَمرأ روبرو به. ۲۸ پطرس اوشأنَ بوگفته: «شومأن خودتأن دأنیدی کی یهودیأن بر طبقٚ شریعت ایجازه نأریدی غیریهودیأنٚ اَمرأ معاشرت بوکونید یا اوشأنٚ خانه بیشید. ولی خودا مرَ نیشأن بده کی هیکسَ نجست یا ناپاک ندأنم. ۲۹ هَنٚ وأسی وختی می دونبأل اوسه کودیدی، هیچی نوگفتم، فوری بموم. هسأ مرَ بیگید، چی وأسی مرَ بأوردیدی اَیه؟»
۳۰ کُرنِلیوس بوگفته: «چار روزٚ پیش، ساعت سه‌یٚ بعدٚ ظهر، هو وختی کی می خانه میأن دوعا کودن دوبوم، ناخبر بیدم ایتأ مردای کی اونٚ لیباس نورانی بو، می روبرو ایسَه ۳۱ و بوگفته: ‹کُرنِلیوس، خودا تی دوعایَ بیشنأوسته و تی کومک‌هایی کی فقیرٚ مردومأنٚ رِه کونی، قوبیل بوکوده. ۳۲ چند نفرَ اوسه کون، بیشید یافا کی پطرسَ بأورید اَیه. اون مهمانٚ شمعونی‌یه کی اونٚ شغل دبّاغی ایسه و اونٚ خانه دریا کنار نهَه.› ۳۳ پس منم فوری اوسه کودم تی دونبأل کی ترَ بأورید و تونم اَمی سر منت بنَه‌یی بمویی اَمی ورجأ. هسأ اَمأن همه‌تأن در حوضورٚ خودا حاضریم کی هرچی‌یَ خوداوند ترَ بوگفته، بیشنَویم.»
پطرسٚ پیغام کُرنِلیوسٚ خانه میأنی
۳۴ پطرس خو گبأنَ هَطویی شروع بوکوده و بوگفته: «من اَ حقیقتَ بفهمستم کی خودا خو مردومأنٚ میأنی هیچ فرقی نَنه، ۳۵ بلکی هر قومٚ میأن، هر کس اونٚ جأ بترسه و عیدالتَ به جا بأوره، خودا اونَ قوبیل کونه. ۳۶ هَطویی کی دأنیدی، خودا خو پیغامٚ صلح و سلامتی‌یَ ایسرائیلٚ قومٚ‌ره توسطٚ عیسایٚ مسیح، کی همه‌تأنٚ خوداوند ایسه، اوسه کوده. ۳۷ شومأن خودتأن جٚه او پیله‌دأنه ایتفاقی کی سرتاسرٚ یهودیه دکفته خبر دأریدی و دأنیدی کی همه‌یٚ اَ چیزأن بعدٚ یحیی تعلیم در موردٚ تعمید جٚه جلیلٚ اوستان شروع بوبوسته. ۳۸ خودا عیسایٚ ناصری‌یَ، روح‌القدسٚ قوّتٚ اَمرأ مسح بوکوده، جوری کی همه جا گردستی و به نیکویی رفتار کودی و تومامٚ اوشأنی کی اسیرٚ شیطأن بید، شفا دَیی، چره کی خودا اونٚ اَمرأ بو.
۳۹ «اَمأن همه‌تأن شاهدٚ تومامی‌یٚ عیسی کارأنیم، کی سرزیمینٚ یهود و اورشلیمٚ میأن انجام بده. ولی او قوم اونَ مصلوب بوکودیدی و بوکوشتیدی. ۴۰ خودا اونَ، سوّمی روزٚ رِه جٚه مورده‌یأنٚ میأن ویریزأنه و خیلی‌یأن اونَ بیده‌ییدی، ۴۱ ولی نه همه کس، بلکی شاهدأنی کی خودا خودش پیشتر اینتخاب بوکوده‌بو. وختی عیسی جٚه مورده‌یأن ویریشته‌بو، اَمأن همه‌تأن اونٚ اَمرأ غذا و آب بوخوردیم. ۴۲ اون اَمرَ دستور بده قومٚ‌ره موعظه بوکونیم و آشکارا شهادت بدیم کی خودا اونَ داورٚ زنده‌یأن و مورده‌یأن قرار بده. ۴۳ همه‌یٚ پیغمبرأنم هَنَ شهادت دیهیدی کی هر کس به عیسی مسیح ایمأن بأوره، اونٚ گونایأن ببخشه به.»
۴۴ پطرس اوشأنٚ اَمرأ گب زِئن دوبو کی روح‌القدس بر همه‌یٚ اوشأنی کی کلامَ ایشنأوستن دیبید، نازلَ بوسته. ۴۵ تومامٚ ایماندارأن جٚه قومٚ یهود کی پِطرُسٚ اَمرأ بمو بید، وختی بیده‌ییدی کی غیریهودیأنم روح‌القدسٚ جأ پورَ بوستید، تعجب بوکودیدی، ۴۶ چره کی بیشتأوستیدی اوشأن به زبانأنٚ جورواجور گب زه‌ییدی و خودایَ پرستش کودیدی. پس پطرس بوگفته: ۴۷ «هسأ دِه چی کسی تأنه بگه کی اَشأن نتأنیدی آبٚ اَمرأ تعمید بیگیرید؟ چون روح‌القدسَ اَمی مأنستن دریافت بوکودیدی.» ۴۸ هَنٚ وأسی دستور دهه اوشأنَ به عیسی مسیحٚ نام تعمید بدید. اوشأنم پطرسٚ جأ خوأهش بوکودیدی تا چند روزی اوشأنٚ ورجأ بِیسه.
Currently Selected:
اعمالٚ رسولأن ۱۰: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
