اعمالٚ رسولأن ۱۱

۱۱

پِطرُس اورشلیمٚ کلیسا رِه گزارش دهه

۱ رسولأن و برأرأنٚ ایمانداری کی یهودیه ایسَه‌بید، بیشتأوستیدی کی غیریهودیأنم به خودا کلام ایمأن بأوردیدی. ۲ وختی پطرس وأگردسته اورشلیم، ایماندارأن کی ختنه بوبوسته‌بید اصرار دأشتیدی غیریهودیأنم ختنه بیبید. اوشأن پِطرُسٚ اَمرأ بحث و گفتگو بوکودیدی و بوگفتیدی: ۳ «چوطو بتأنستی بیشی مردأکأنٚ خانه‌یی کی ختنه نوبوستیدی و اوشأنٚ اَمرأ همسفره بیبی؟»

۴ پطرس تومامٚ ماجرایَ جٚه اوّل، اوشأنٚ رِه تعریف بوکوده و بوگفته: ۵ «من شهرٚ یافا میأن دوعا کودن دوبوم کی رویا میأن بیدم ایتأ پیله سفره بوقچه مأنستن کی جٚه چهارگوشه آویزانَ بو آسمانٚ جأ بیجیر بمو، فأرسه می ورجأ. ۶ او سفره دورون، چهارپایأن و جانورأن و خزنده‌یأن و پرنده‌یأنٚ آسمانَ بیدم ۷ و صدایی‌یَ بیشنأوستم کی مرَ گفتی: ‹اَی پطرس، ویریز، اوشأنٚ سرَ وَوین و بوخور.›

۸ «جواب بدَم: ‹هرگز خوداوند، من هیوخت ایچی کی حرام یا نجست ببه نوخوردم.›

۹ «دوواره آسمانٚ جأ ندا بمو کی: ‹هرچی‌یَ خودا پاک بوکوده، تو نجستَ نوکون.› ۱۰ سه مرتبه تکرار بوبوسته و هو دم سفره بوشو آسمانٚ جور.

۱۱ «هو وخت سه نفر کی جٚه قیصریه می ورجأ اوسه کوده‌بید، بمویید او خانه میأن کی من ایسَه‌بوم. ۱۲ روح‌القدس مرَ بوگفته کی وأ او سه نفرٚ اَمرأ بشم و شک نوکونم. اَمأنم وأگردستیم، بموییم کُرنِلیوسٚ خانه میأن و اَ شیش نفرٚ ایماندارأن کی یافا شین بید اَمی اَمرأ بموییدی. ۱۳ اون اَمِره تعریف بوکوده کی چوطو خو خانه میأن فرشته‌یَ بیده کی اونَ بوگفته: ‹چند نفرَ اوسه کون، بیشید یافا و شمعونَ کی اونَ «پطرس» دوخوأنیدی، اَیه بأورید. ۱۴ اون پیغامی تِره اَوره کی ترَ و تومامی‌یٚ اوشأنی‌یَ کی تی خانه میأن زندگی کونیدی نجات دهه.›

۱۵ «وختی شروع به گب زِئن در موردٚ نجات جٚه طریقٚ عیسی مسیح بوکودم، اوشأن روح‌القدسَ دریافت بوکودیدی، اوجور کی اَمأن پیشتر روح‌القدسَ فیگیفته‌بیم ۱۶ و من خوداوندٚ کلامَ به یاد بأوردم کی بفرمأسته بو: ‹یحیی آبٚ اَمرأ تعمید دَیی ولی شومأن به روح‌القدس تعمید گیریدی.› ۱۷ اگه خودا هو عطایَ اوشأنَ ببخشه، کی بعدٚ اَمی ایمأن اَوردن به عیسایٚ مسیحٚ خوداوند، اَمرَ فدَه، پس من کیسم کی بتأنم خودا کارَ جولوی بیگیرم؟»

۱۸ وختی ایماندارأنٚ یهودی اَ گبأنَ بیشتأوستیدی، آرامَ بوستیدی، خودا نامَ جلال بدَه‌ییدی و بوگفتیدی: «رأس رأسی کی خودا توبه‌یٚ حیات‌بخشَ غیریهودیأنٚ رِه هدیه بوکوده!»

اَنطاکیه کلیسا

۱۹ بعدٚ اونکی استیفانَ سنگسار بوکودیدی، ایماندارأنٚ شکنجه و آزارم شروع بوبوسته‌بو، جٚه اَ خأطر ایماندارأن پخش و پلا بوبوستید و به فینیقیه و قبرس و اَنطاکیه بوشوییدی و خودا کلامَ جز یهودیأن هیکسٚ دیگرَ بشارت ندَییدی. ۲۰ ولی اوشأنٚ میأن، مردأکأنی جٚه قبرس و قیرَوان ایسَه‌بید کی وختی به اَنطاکیه فأرسه‌ییدی، بوشوییدی غیریهودیأنٚ ورجأ و اوشأنٚ رِه بشارت بدَه‌ییدی کی ایسه. ۲۱ خوداوندٚ دسَم اوشأنٚ اَمرأ بو و تعدادٚ زیادی ایمأن بأوردیدی و خوداوندٚ طرف بموییدی.

۲۲ وختی اَ خبر به اورشلیمٚ ایماندارأن فأرسه، اوشأن برنابا‌یَ اوسه کودیدی کی بشه اَنطاکیه. ۲۳ وختی اویه فأرسه و نجاتٚ ایماندارأنَ کی جٚه خودا فیض بو، بیده خوشحالَ بوسته و اوشأنَ تشویق بوکوده کی تومامٚ دیل و جانٚ اَمرأ به خوداوند عیسی مسیح وفادار بمأنید. ۲۴ چونکی ایتأ مردٚ نیکوکار و خودا ترس بو و پُری‌یٚ روح‌القدسَ دأشتی، مردومأنٚ زیادی اونٚ بشارتٚ اَمرأ به خوداوند ایمأن بأوردیدی.

۲۵ بأزین برنابا جٚه اویه رأ دکفته، بوشو تارسوسٚ شهرٚ میأنی کی شائولَ پیدا بوکونه. ۲۶ وختی شائولَ پیدا کوده، اونَ خو اَمرأ بأورده اَنطاکیه. اوشأن اویه یک سالٚ تومام ایماندارأنٚ زیادیَ تعلیم بدَه‌ییدی. اَنطاکیه شهرٚ میأنی بو کی اوّلی مرتبه پیروأنٚ عیسایٚ خوداوندَ «مسیحی» دوخوأدیدی.

۲۷ او روزأن، چند نفرٚ ایمانداری کی عطا‌یا‌یٚ نبوّت دأشتیدی جٚه اورشلیم بموییدی اَنطاکیه. ۲۸ اینفر جٚه اوشأن کی آگابوس نام دأشتی، ویریشته و روح‌القدسٚ الهامٚ اَمرأ، ایتأ پیله قحطی‌یَ پیشگویی بوکوده کی رومٚ سرزیمینٚ میأنی ایتفاق دکفتی. اَ قحطی کْلودیوسٚ حکومتٚ زمان رخ بده. ۲۹ ایماندارأن تصمیم بیگیفتیدی کی هر کی خودشٚ بضاعتٚ اَمرأ مسیحیأنٚ ساکنٚ یهودیه رِه کومک روانه کونید. ۳۰ پس اَ کارَ بوکودیدی و هدایایی برنابا و شائولٚ دس فدَه‌ییدی تا اوشأنم اورشلیمٚ کلیسا مشایخَ فدید.

Currently Selected:

اعمالٚ رسولأن ۱۱: گیلکی (رشتی)

Highlight

Copy