اعمالٚ رسولأن ۱۲

۱۲

پِطرُسٚ نجات جٚه زندان خودا فرشته کومکٚ اَمرأ

۱ هو وختأن، هیرودیسٚ پادشا اذیت و آزار و شکنجه‌یٚ مسیحیأنَ شروع بوکوده. ۲ اون فرمان بده یوحنا برأر، یعقوبَ کی ایتأ جٚه دوازده‌تأ رسول بو، شمشیرٚ اَمرأ بوکوشید. ۳ وختی بیده کی اَ کار، یهودیأنَ خوشحالَ کوده، ایامٚ عیدٚ فصحٚ میأنی پطرسَ دسگیر بوکودیدی. ۴ هیرودیس بعدٚ پِطرُسٚ گیفتن، اونَ تأودَه زندانٚ دورون و چار دسته‌یٚ چار نفری نگهبان بنَه تا اونَ بپایید و تصمیم دأشتی کی بعدٚ عیدٚ فصح، تومامی‌یٚ مردومٚ ورجأ اونَ محاکمه بوکونه. ۵ پس پطرسَ زندانٚ میأن بدأشتیدی ولی ایماندارأن تومامٚ قوّتٚ اَمرأ اونٚ‌ره دوعا کودیدی.

۶ اَی شب قبلٚ او روز کی هیرودیس تصمیم دأشتی پطرسَ محاکمه بوکونه، اونَ به دوتأ زنجیل دٚوٚسته و بینٚ دوتأ سربازٚ نگهبان بوخوفته و نگهبانأنم زندانٚ درٚ جُلُو نگهبانی دَییدی. ۷ ایدفعه‌یی خوداوندٚ فرشته آشکارَ بوسته و نوری زندانٚ میأن بتأبسته. فرشته پِطرُسٚ پهلویَ بزه و اونَ خوابٚ جأ ویریزأنه، بوگفته: «فوری ویریز!» هو وخت زنجیلأنم اونٚ دسأنٚ جأ بکفتیدی زیمینٚ سر. ۸ فرشته اونَ بوگفته: «تی کمرَ دٚوٚد و تی کفشَ دوکون.» پطرس هو کارَ بوکوده. فرشته اونَ بوگفته: «تی ردایَ دوکون و می دونبألسر بیأ.» ۹ بأزین پطرس اونٚ دونبألسر زندانٚ جأ بیرون بوشو. اون باور نوکودی او کاری‌یَ کی فرشته انجام دَئن دره واقعی‌یه، بلکی فیکر کودی رویا دَئن دره. ۱۰ اوشأن جٚه اوّلی و دوّمی نگهبانأنٚ چومأنٚ جُلُو بوشوییدی و فأرسه‌ییدی دروازه‌یٚ آهنی‌یَ کی رو به شهر وازَ بوستی. دروازه خوره خوره اوشأنٚ جُلُو وازَ بوسته. پس بوشوییدی بیرون تا آخرٚ کوچه فأرسه‌ییدی و فرشته ناخبر ایدفعه‌یی غیبَ بوسته.

۱۱ او وخت پطرس به خودش بمو خو اَمرأ بوگفته: «هسأ دِه یقین دأرم کی خوداوند خو فرشته‌یَ اوسه کوده کی مرَ جٚه هیرودیسٚ دس و اونچی‌یَ کی قومٚ یهود اینتظار دأشتیدی، نجات بده.» ۱۲ وختی بفهمسته، بوشو مریمٚ خانه کی یوحنا مار بو، هو یوحنایی کی اونَ «مَرقُس» هم دوخوأدیدی. خیلی‌یأن بمو بید اویه کی دوعا بوکونید. ۱۳ وختی پطرس درَ بزه، دُختری کی رودا نام دأشتی و اویه خدمتکار بو بمو کی درَ وأکونه. ۱۴ هو وخت کی پِطرُسٚ صدایَ بشنأخته، جٚه خوشحالی هولَ کوده و درَ وأنکوده، بوشو اوطاقٚ دورون و اوشأنَ بوگفته کی: «پطرس درٚ سر ایسه!» ۱۵ اوشأن، اونَ بوگفتید: «مگر تی عقلَ جٚه دس بدَیی؟» ولی وختی بیده‌ییدی اون تأکید کونه، بوگفتیدی: «شاید اونٚ فرشته‌یٚ موحافظ ایسه کی بمو.»

۱۶ پطرس هَطو در زِئنَ ایدامه دَیی. وختی درَ وأکودیدی، پطرسَ بیده‌ییدی و همه‌تأن تعجب بوکودید. ۱۷ ولی پطرس خو دسٚ اَمرأ ایشاره بوکوده کی ساکیتَ بید و اوشأنٚ رِه تعریف بوکوده کی چوطویی خوداوند اونَ زندانٚ جأ نجات بده. بأزین بوگفته: «یعقوب و ایماندارأنٚ دیگرم خبر بدید». بأزین جٚه اوشأنٚ پهلو بوشو جای دیگر.

۱۸ فردا صُبٚ‌ره، نگهبانأنٚ دیلٚ زاله ترکستن دوبو، چونکی نأنستیدی پِطرُسٚ سر چی بمو. ۱۹ هیرودیس دستور بده همه جا پطرسٚ دونبأل بگردید و چون اونَ نیأفتیدی نگهبانأنٚ جأ بازجویی بوکوده، بأزین فرمان بده اوشأنَ بوکوشید. بأزین هیرودیس جٚه یهودیه به قیصریه بوشو و مدتی اویه بِیسه.

هیرودیسٚ مردن

۲۰ هیرودیس مردومٚ صور و صیدونٚ کینه‌یَ به دیل دأشتی. هَنٚ وأسی مردومأنٚ او دوتأ شهر همدیلی اَمرأ بوشوییدی هیرودیسٚ پیشکارٚ ورجأ کی «بْلاستوس» نام دأشتی. اونَ خوشأنٚ اَمرأ همرأه بوکودیدی کی پادشا اَمرأ آشتی بوکونید، چونکی اَ شهرأنٚ آذوقه هیرودیسٚ سرزیمینٚ جأ فراهمَ بوستی.

۲۱ او روزی کی هیرودیس تعیین بوکوده‌بو، لیباسٚ پادشایی دوکوده، تختٚ پادشایی سر بینیشته و همه‌تأنٚ‌ره گب بزه. ۲۲ مردوم کی پادشا گبأنَ بیشتأوستیدی فریاد بزه‌ییدی، بوگفتیدی: «اَ گبأن ایتأ جٚه خودایأنٚ گبأنه، نه جٚه ایتأ آدم!» ۲۳ هو وخت، چون هیرودیس مردومَ وهأشته کی به جایٚ خودا اونَ پرستش بوکونید، خوداوندٚ فرشته‌یم اونَ زیمینگیرَ کوده و اونٚ جانٚ دورون کلم دکفته و اونَ ایپچه ایپچه بوخورده، بأزین اون بمرده. ۲۴ ولی خودا کلام همه روزأن مردومأنٚ دورون رُشت کودی و پخشَ بوستی.

برنابا و شائولٚ رسالت

۲۵ چون برنابا و شائول خوشأنٚ خدمتَ اورشلیمٚ میأنی به انجام فأرسأنیدی، جٚه اورشلیم به اَنطاکیه وأگردستیدی و یوحنایم کی «مَرقُس» نام دأشتی خوشأنٚ اَمرأ بأوردیدی.

Currently Selected:

اعمالٚ رسولأن ۱۲: گیلکی (رشتی)

Highlight

Copy