اعمالٚ رسولأن ۲
۲
روح‌القدسٚ نوزول، پِنتیکاستٚ روزٚ میأنی
۱ هفت هفته جٚه عیسی مسیحٚ زنده بوستن بوگوذشته‌بو کی عیدٚ پِنتیکاست فأرسه و همه‌یٚ ایماندارأن، یکدیل ایجا جمَ بوسته‌بید ۲ کی ناخبر صدایی کی شبیه زوزه‌یٚ بادٚ شدید بو، آسمانٚ جأ او خانه میأن کی همه اویه نیشته‌بید، بمو و تومامٚ او خانه‌یَ پورَ کوده. ۳ ایدفعه‌یی شُواله‌یأنی، آتشٚ مأنستن اوشأنٚ چومأنٚ ورجأ آشکارَ بوستید، همدیگرٚ جأ سیوأ بوبوستیدی و هر کدامٚ او ایماندارأنٚ سر بینیشتیدی. ۴ پس همه‌تأن روح‌القدسٚ جأ پورَ بوستیدی و جٚه قوّتٚ خودا روح بتأنستیدی ایتأ ایتأ شروع به گب زِئن به زوانأنٚ جورواجور بوکونید کی به او زوانأن هیچ آشنایی نأشتیدی.
۵ او روزأن، یهودیأنٚ خوداترسٚ تومامی‌یٚ قومأن، عیدٚ پِنتیکاستٚ وأسی اورشلیمٚ میأن بمو بید. ۶ وختی مردومأنی کی اویه جمَ بوسته‌بید او سر و صدایَ بیشتأوستیدی، تعجب بوکودیدی کی شاگردأن اوشأنٚ زوانأن گب زِئن دریدی. ۷ همدیگرَ فندرستیدی و بوگفتیدی: «چوطویی ممکن به؟ مگر اَشأن همه‌تأن جلیلٚ شین نی‌ییدی؟ ۸ پس چی بوبوسته کی اَمی ماری زوانٚ اَمرأ گب زنیدی؟ ۹ اَمأن، همه‌تأن قومٚ پارتیأن، مادیأن، ایلامیأن و مردومأنٚ بین‌النهرین و یهودیه و کاپادوکیه و پونتوس و آسیا اوستان ۱۰ و فْریجیه و پامفیلیه و مصر و نواحی‌یٚ لیبی کی قیرَوانٚ شهرَ وصله و رومٚ زوارأن، ۱۱ چی یهودی و چی اوشأنی کی یهودی بوبوسته‌بید، و کْرِت و عربستانٚ مردومأن، همه ایشنأوستن دریم کی اَشأنی کی به عیسی ناصری ایمأن بأوردیدی اَمی زوانأنٚ اَمرأ خودا عظمتَ و اونٚ عجیبٚ کارأنٚ گبَ زِئن دریدی.» ۱۲ همه‌تأن تعجبٚ اَمرأ همدیگرَ گفتیدی: «چی ایتفاقی دکفته؟» ۱۳ ولی بعضیأنم مسخره‌کنأن گفتیدی: «اَشأن شرابٚ اَمرأ مستَ بوستیدی!»
پِطرُسٚ پیغام
۱۴ او وخت پطرس او یازده‌تأ رسولٚ اَمرأ ویریشته، به پا بِیسه، اوشأنٚ طرف وأگردسته و بولند بوگفته: «اَی همشهریأنٚ یهودی و اَی شومأنی کی اورشلیمٚ میأن زندگی کونیدی، اَنَ بدأنید و هرچی‌یَ کی گفتن درم وأستی خُب گوش بوکونید! ۱۵ فیکر نوکونید اَ مردأکأن مستَ بوستیدی، چونکی ساعتٚ نُه صبحه! ۱۶ اونچی کی الأن اَیه دِئن دریدی یوئیلٚ نبی پیشگویی بوکوده‌بو:
۱۷ «‹خودا بفرمأسته: «روزأنٚ آخرٚ دورون،
می روحَ بر تومامٚ مردوم فوکونم.
شیمی زأکأن چی پسر و چی دُختر، نبوّت کونیدی،
شیمی جوانأن رویا دینیدی و شیمی پیرأنم خواب دینیدی.
۱۸ هَطویم هو روزأن، تومامی‌یٚ می خدمت‌گوزارأن، چی مردای و چی زنای،
می روحٚ جأ پورَ بیدی
و اوشأنم نبوّت کونیدی.
۱۹ آسمانٚ جور عجایب
و بیجیر، زیمینٚ سر، نیشأنه‌یأنی
جٚه خون و آتش و دود آشکارَ کونم.
۲۰ قبلٚ اونکی او پیله‌دأنه روزٚ پور جلالٚ خوداوند فأرسه،
خورشید تاریکَ به و ماه به رنگٚ خون وأگرده.
۲۱ اَطویی به، هر کی خوداوندٚ نامَ دوخوأنه، نجات پیدا کونه.»›#۲:۲۱ یوئیلٚ نبی کیتاب بابٚ ۲، آیه ۲۸ تا ۳۲.
۲۲ «اَی قومٚ ایسرائیل، اَنَ بیشنَوید: هوطو کی خودتأن دأنیدی، عیسایٚ ناصری مردی بو کی خودا، خو معجزات و عجایب و نیشأنه‌یأنٚ اَمرأ کی اونٚ دسٚ جأ شمرَ آشکارَ کوده، ثابت بوکوده کی عیسی مأموریت جٚه اونٚ طرفٚ بو. ۲۳ هَن نقشه و اراده خودا بو کی عیسی، شیمی دسٚ اَمرأ تسلیمَ بوسته، و شومأنم اونَ بی‌دینأنٚ دس بیسپردیدی و اوشأنم اونَ مصلوبَ کودیدی و بوکوشتید. ۲۴ ولی خودا، عیسی مسیحَ، بعدٚ اونکی بمرده، زنده کوده، چونکی مرگ قودرتٚ اَنَ نأشتی کی اونَ خو چنگالٚ دورون بدأره. ۲۵ هوطو کی داوودٚ نبی درباره‌یٚ مسیح بفرمأسته:
«‹خوداوندَ همیشه می چومأنٚ جُلُو دینم
کی اون می راستٚ دس ایسَه کی نکفم.
۲۶ هَنٚ وأسی می دیل شاده و می زبانم اونَ ستایش کونه
و می جانٚ میأنم امید دأرم.
۲۷ چونکی تو، می پئر، ونألی می جان مورده‌یأنٚ دونیا میأن بمأنه
و تی پسرٚ جسم کی قدوسه، بعدٚ مردن جٚه میأن بشه.
۲۸ تو حیاتٚ رأیَ مرَ نیشأن بدَیی
و تی حوضورٚ اَمرأ، مرَ شادی جأ پورَ کونی.›
۲۹ «اَی برأرأن، تأنم شمرَ ایطمینانٚ اَمرأ بگم داوودٚ نبی#۲:۲۹ متنٚ اصلی میأن «داوودٚ پاْتریارْک» بمرده و دفنَ بوسته و اونٚ مقبره‌یم تا به ایمروز هَیه باقی بمأنسته. ۳۰ ولی اون، پیغمبر بو و دأنستی کی خودا اونٚ‌ره قسم بوخورده‌بو کی اینفرَ جٚه اونٚ نسل، سلطنتٚ تختٚ سر نیشأنه. ۳۱ داوودٚ نبی، قبلٚ اَنکی بیمیره، مسیحٚ مرگَ و اونٚ دوواره زنده بوستنَ پیشگویی بوکوده و در موردٚ اون بوگفته:
«‹خودا، دونیا مورده‌یأن دورونی اونَ ترکَ نوکوده، و اونٚ جسد هیوخت فاسدَ نوبوسته.›#۲:۳۱ مزمور ۱۶، آیه ۱۰
۳۲ «خودا هَه عیسایَ سه روز بعدٚ مرگ زندَه کوده و اَمأن همه‌تأن شاهد ایسیم. ۳۳ اون خودا راستٚ دسٚ ورجأ نیشته و روح‌القدسَ کی پئر وعده بده‌بو، فیگیفته و اونَ خو شاگردأنَ فَده کی هسأ شومأن اونٚ نتیجه‌یَ دینیدی و ایشنَویدی، ۳۴ چونکی داوودٚ نبی، عیسی مسیحٚ مأنستن آسمانٚ جور نوشو، ولی بوگفته:
«‹خودا، می خوداوند مسیحَ بفرمأسته: «به می راستٚ دس بینیشین ۳۵ تا کی تی دوشمنأنَ تی پا جیر تأودم.»›#۲:۳۵ مزمور ۱۱۰ آیه ۱
۳۶ «پس اَی قومٚ ایسرائیل، همه‌تأن یقین بدأنید کی خودایٚ پئر هَه عیسایَ کی شومأن اونَ به صلیب فأکشه‌ییدی، خوداوند و مسیح تعیین بوکوده.»
۳۷ وختی اَ گبأنَ بیشتأوستید، اَشأنٚ دیلأنٚ دورون خیلی غم دکفته و پطرس و بقیه‌یٚ رسولأنَ بوگفتیدی: «هسأ اَی برأرأن، چی وأ بوکونیم؟» ۳۸ پطرس وأگردسته اوشأنَ بوگفته: «وأستی توبه بوکونید و هرکدامٚ شومأن عیسی مسیحٚ نامٚ اَمرأ تعمید بیگیرید تا شیمی گونایأن ببخشه ببه و بتأنید روح‌القدسَ دریافت بوکونید، ۳۹ چونکی اَ وعده، شومأن، شیمی زأکأن و تومامی‌یٚ مردومأنٚ شینه کی جٚه اَ سرزیمین دور ایسیدی، ینی کسأنی کی اَمی خوداوند، خودا اوشأنَ دوخوأنه.»
۴۰ پطرس خو گبأنٚ زیادٚ دیگرٚ اَمرأ شهادت بده و اوشأنَ تشویق بوکوده، بوگفته: «شمرَ جٚه اَ نسل، کی گمراهه، آزادَ کونید!» ۴۱ بأزین اوشأن کی اونٚ گبأنَ قوبیل بوکودیدی، تعمید بیگیفتید. هو روزٚ میأن، حدودٚ سه هیزار نفر ایمأن بأوردید.
ایماندارأنٚ زندگی‌یٚ موشترک
۴۲ ایماندارأن، تومامی‌یٚ خوشأنٚ وختَ، تعلیم گیفتنٚ وأسی در اختیارٚ رسولأن نهیدی و همدیگرٚ اَمرأ مشارکت دأشتیدی و دوعا کودیدی و مراسمٚ «شامٚ خوداوندٚ» میأن شرکت کودیدی. ۴۳ جٚه اَ خأطر کی خیلی عجایب معجزه‌یأن رسولأنٚ جأ آشکارَ بوستی، همه‌تأنٚ دیلٚ دورون ترس و ایحترامٚ به خودا دکفتی ۴۴ تومامی‌یٚ ایماندارأن همدیگرٚ اَمرأ یکدیل بید و هرچی کی دأشتیدی خوشأنٚ میأن سأم کودیدی. ۴۵ خوشأنٚ ملک و املاکَ فروختیدی و او پولَ هر کسی‌یَ، هر چقدر لازم دأشتی، فدَه‌ییدی. ۴۶ اوشأن همه‌تأ روزأن، یکدیل معبدٚ میأنی جمَ بوستیدی و خوشأنٚ خانه‌یأنٚ میأنم مراسمٚ «شامٚ خوداوندٚ» میأن شرکت کودیدی و خوشی و صفایٚ دیلٚ اَمرأ همدیگرٚ مره غذا خوردیدی ۴۷ و خودایَ شکر کودیدی. تومامی‌یٚ مردوم اوشأنَ ایحترام نهیدی و دوس دأشتیدی و خوداوندم هر روزه کسأنی‌یَ کی نجات پیدا کودیدی اوشأنٚ جمَ ایضافه کودی.
Currently Selected:
اعمالٚ رسولأن ۲: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
