اعمالٚ رسولأن ۳

شلٚ مادرزادٚ شفا دَئن

۱ ایتأ روز پطرس و یوحنا ساعتٚ سه‌یٚ بعد از ظهر کی دوعا کودنٚ وخت بو، شوئون دیبید معبد. ۲ هو وخت بیده‌ییدی کی چند نفر ایتأ مردأکَ، کی شلٚ مادرزاد بو، اَوردن دیبید. اوشأن همه‌تأ روزأن اونَ معبدٚ دروازه کنار کی «دروازه‌یٚ زیبا» نام دأشتی، نهیدی تا مردومٚ جأ کی شوییدی معبدٚ میأن، صدقه فیگیره. ۳ هَطو کی اون پطرس و یوحنایَ بیده کی شوئون دیبید معبدٚ میأن، خو دسَ درازَ کوده کی اوشأنٚ جأ صدقه فیگیره. ۴ پطرس و یوحنا بِیسَه‌ییدی، اونَ فندرستید و بوگفتید: «اَمرَ نیگاه بوکون!» ۵ بأزین او مردای اوشأنَ نیگاه بوکوده و منتظرٚ صدقه بو کی اوشأنٚ جأ فیگیره. ۶ ولی پطرس اونَ بوگفته: «من پولی نأرم ترَ فدم ولی اونچی‌یَ کی دأرم جٚه پول بالاتره! به نامٚ عیسایٚ مسیحٚ ناصری ویریز و رأ دکف!» ۷ بأزین اونٚ راستٚ دسَ بیگیفته و اونَ به پا بدأشته. فوری اونٚ پا خاشأن قوّت بیگیفتیدی. ۸ اون بپرسته، خو پا سر به پا بِیسه، رأ دکفته. هَطو کی وازواز کودی، خودایَ شکر کودی و پطرس و یوحنا اَمرأ بوشو معبدٚ دورونی. ۹ تومامٚ مردوم، اونٚ رأ شوئون و خودایَ شکر کودنَ بیده‌ییدی ۱۰ و بفهمستیدی اَن هو گدایی ایسه کی «دروازه‌یٚ زیبا» معبدٚ کنار نیشتی و صدقه فیگیفتی. جٚه ایتفاقی کی او گدا رِه دکفته‌بو مردوم حاج و واج بید.

پِطرُسٚ پیام

۱۱ هوطو کی او مردای، پطرس و یوحنا اَمرأ شوئون دوبو و اوشأنٚ جأ سیوأ نوبوستی، تومامٚ مردوم تعجبٚ اَمرأ «سلیمانٚ ایوانٚ» دورون اوشأنٚ طرف بودُوٚستیدی. ۱۲ وختی پطرس او مردومأنَ بیده، وأگردسته بوگفته: «اَی مردومأنٚ ایسرائیلی، چره اَ پیش‌آمدٚ جأ تعجب کونیدی؟ چره اَمرَ اَطویی نیگاه کودن دریدی؟ مگر اَمأن، اَمی خودمأنٚ قوّت و کردکارأنٚ دینی اَمرأ، اَ مردأکَ شفا بدَییم کی اون تأنه رأ بشه؟ ۱۳ خودایٚ ایبراهیم و ایسحاق و یعقوب، اَمی پئرأنٚ خودا، خو خادم، عیسی مسیحَ جلال فدَه، هو عیسی کی شومأن اونَ تسلیم بوکودیدی و پیلاطسٚ حاکمٚ ورجأ اونَ اینکار بوکودیدی، هر چند کی پیلاطس تصمیم دأشتی اونَ آزادَ کونه. ۱۴ ولی شومأن بید کی دسٚ رد به سینه‌یٚ او قدّوس و عادل، عیسایٚ مسیح بزه‌ییدی و بخوأستیدی کی پیلاطس، اونٚ عوض باراباسٚ قاتلَ آزادَ کونه. ۱۵ شومأن چشمه‌یٚ حیاتَ بوکوشتید ولی خودای پئر، اونَ جٚه مورده‌یأنٚ میأن ویریزأنه و اَمأن شاهدیم. ۱۶ عیسی نام و قودرتٚ مره اَ مردأکَ کی شنأسیدی و دِئن دریدی، قوّت فیگیفته و هَطویم، ایمأن به عیسی نامٚ وأسی بتأنسته شفا بیگیره و شیمی همه‌تأنٚ پهلو ساق و سالم بِیسه.

۱۷ «هسأ اَی برأرأن، دأنم کی شومأن و شیمی پیله‌دأنه آدمأنٚ کار، جٚه جهل و نادانی بو. ۱۸ ولی خودا اَطویی اونچی‌یَ کی تومامٚ پیغمبرأنٚ زبانٚ اَمرأ پیشگویی بوکوده‌بو، به انجام برسأنه: کی مسیح، وأ عذاب بکشه. ۱۹ وأستی توبه بوکونید و خودا طرف بأیید تا شیمی گونایأن پاکَ به و او وختأن دوواره زندگی کودنٚ خوداوندٚ ورجأ فأرسه. ۲۰ و خودا، عیسایَ، او مسیحٚ موعود کی قبلاً شِمره اینتخاب بوکوده‌بو، اوسه کونه. ۲۱ هَطو کی جٚه قبلنان، خودا خو انبیایٚ موقدّسٚ زبانٚ جأ اعلام بوکوده‌بو، عیسی تا او وختأنی کی همه چیز تازه به، وأستی آسمانٚ جور بِیسه. ۲۲ موسی‌یٚ نبی، خو قومَ بوگفته: ‹خوداوند، شیمی خودا، جٚه شیمی برأرأنٚ میأن پیغمبری می مأنستن شِمره اوسه کونه و شومأن وأ هرچی‌یَ کی شمرَ گه، دیل و جانٚ مره گوش بدید. ۲۳ هر کس اونٚ گبأنَ گوش نده، وأ جٚه ایسرائیلٚ قومٚ دورونی ریشه‌کن ببه.›

۲۴ «پیغمبرأنم، جٚه سموئیل به بعد، همه‌تأن درباره‌یٚ اَ روزأن پیشگویی بوکودید. ۲۵ شومأن پیغمبرأنٚ زأکأن، وارثأنٚ عهد و پیمانی ایسیدی کی خودا شیمی پئرأنٚ اَمرأ دٚوٚسته. اون، ابراهیمَ بوگفته: ‹همه‌یٚ قومأنٚ زیمین، تی نسلٚ جأ برکت بریدی.› ۲۶ هو زمانی کی خودا خو خادم، عیسایَ اینتخاب بوکوده‌بو، اونَ شیمی ورجأ اوسه کوده تا شمرَ جٚه شرارتٚ رأیأن وأگردأنه و برکت بده.»

Currently Selected:

اعمالٚ رسولأن ۳: گیلکی (رشتی)

Highlight

Copy