پیدایش ۴۴
۴۴
یوسفٚ جامٚ نقره خورجینٚ دورون
۱ بَزین یوسف خو خانه پیشکارَ اَطویی فرمان بدَه و بوگفته: «اوشأنٚ کیسه گندمَ پورَ کون اَنقدر کی بتأنید بوکولَ گیرید ببرید. هر کسٚ گندمٚ پولم اونٚ خورجینٚ دورون بارٚ سر بنه. ۲ بَزین می جامٚ نقره‌یَ، گندمٚ پولٚ اَمرأ بنه کوجه برأرٚ کیسه دورون بارٚ سر.» پیشکارم هرچی یوسف بوگفته‌بو انجام بدَه.
۳ هوا کی روشنَ بوستن دوبو، اوشأن خوشأنٚ اولاغأنٚ اَمرأ رأ دکفتیدی. ۴ ولی اوشأن شهرٚ جَا دورَ نوبوسته‌بید کی یوسف خو پیشکارَ بوگفته: «فوری بوشو اوشأنٚ دونبالسر. هَطو کی اوشأنَ فأرسه‌یی، بوگو کی ‹چره خوبی‌یَ بدی اَمرأ جواب بدَییدی؟ ۵ چره می اربابٚ جامٚ نقره‌یَ کی اونٚ اَمرأ شراب خوره و طالع دینه شیمی اَمرأ بردن دریدی؟ کارٚ بدی بوکودیدی.›»
۶ پیشکار وختی اوشأنَ فأرسه، هرچی کی یوسف بوگفته‌بو، اوشأنَ بوگفته. ۷ ولی اوشأن بوگفتیدی: «اَن چی حرفی ایسه کی زِئن دری؟ اَمأن شیمی غولامأنیم، حاشا کی شیمی جَا دوزدی بوکونیم! ۸ اَمأن گندمٚ پولَ کی پیشتر اَمی خورجینٚ دورون دوبو، کنعانٚ جَا پس بأوردیم، چوطو تأنیم جٚه شیمی اربابٚ خانه طلا و نقره دوزدی بوکونیم؟ ۹ اگه نقره‌یی جام هر کسٚ خورجینٚ دورون بیأفتی، وأ بیمیره. اَمأنم شیمی اربابٚ غولام بیم.»
۱۰ پیشکارم قوبیل بوکوده و بوگفته: «هرچی کی شومأن گیدی. هر کسٚ ورجه کی جام پیدا ببه، اون می اربابٚ غولام به. بقیه‌یٚ شومأن مقصر نی‌ییدی.»
۱۱ اوشأنم خوشأنٚ خورجینَ فوری بیجیر بأوردیدی و وأکودیدی. ۱۲ پس پیشکارم اوّل پیله برأرٚ خورجینٚ دورونَ وأمخته، فأرسه به کوجه برأرٚ شین و جامَ، بنیامینٚ خورجینٚ دورون بیده. ۱۳ اوشأن خوشأنٚ لیباسأنَ پارَه کودیدی، خوشأنٚ اولاغأنٚ بارَ دَوستیدی، وأگردستیدی بَموییدی شهر. ۱۴ یوسف هنوزم خو خانه دورون ایسَه‌بو کی یهودا خو برأرأنٚ اَمرأ بوشوییدی خانه دورون و اونٚ پا جیر بکفتیدی زیمینٚ رو.
۱۵ یوسف اوشأنَ بوگفته: «اَن چی کاری بو کی بوکودیدی؟ نأنستیدی کی مردی می مأنستن تأنه پیشگویی بوکونه و دوزدَ بشنأسه؟»
۱۶ یهودا جواب بدَه: «دِ اَمی سرورَ چی تأنیم بیگیم؟ وأ چی جواب بدیم؟ چوطو تأنیم بیگیم کی بی‌گوناه ایسیم؟ خودا بو کی شیمی غولامأنٚ گونایَ آشکارَ کوده، هسه وأگردستیم کی بیگیم اَمأن همه‌تأن اونٚ اَمرأ کی جام اونٚ خورجینٚ دورون پیدا بوبوسته، شیمی غولامأنیم.»
۱۷ ولی یوسف بوگفته: «نه، اَ کارَ نوکونم. فقط اونی کی جام اونٚ خورجینٚ دورون پیدا بوبوسته می غولامه. شومأن همه‌تأن آزاد ایسیدی، به سلامتی وأگردید بیشید شیمی پئرٚ ورجه.»
۱۸ یهودا ایپچه جُلُوتر بوشو و بوگفته: «آقا جان، ایجازه بدن من کی شیمی غولامم شیمی اَمرأ گب بزنم و شیمی غولامٚ جَا خشمگین نَوأ بوستن. دأنم کی فرعونٚ مأنستن قدرت دأری.
۱۹ «آقا جان، شیمی غولامأنٚ جَا وَورسه‌بی: ‹پئر یا برأری دأریدی؟› ۲۰ اَمأنم جواب بدَه‌بیم کی ‹اَمی پئر پیره و ایتأ جوانٚ برأر دأریم کی اونٚ پیری سالأنٚ دورون به دونیا بَمو، کی اونٚ برأرم بمرده، اون تنها یادگارٚ خو مار ایسه کی باقی بمأنسته. اونٚ پئرم اونَ خیلی دوست دأره.› ۲۱ بعدٚ اونم اَمأن شیمی غولامأنَ بفرمأستید: ‹اونَ بأورید می ورجه کی خودم اونَ بیدینم.› ۲۲ اَمأنم اَمی سرورَ بوگفتیم کی او جوان نتأنه خو پئرٚ جَا سیوا ببه. چونکی اَ کار، اونٚ پئرٚ مردنٚ اَمرأ یکی به. ۲۳ ولی شومأن شیمی غولامأنَ بفرمأستیدی کی: ‹تا شیمی کوجه برأرَ شیمی اَمرأ اَیه نأورید، مرَ نیدینیدی.› ۲۴ وختی اَمأن شیمی غولامأن اَمی پئرٚ ورجه بوشوییم، هرچی کی شومأن اَمی سرور بوگفته‌بید، اونٚ‌ره بوگفتیم. ۲۵ بَزین اَمی پئر بوگفته: ‹وأگردید بیشید و آذوقه‌یٚ بیشتری بیهینید.› ۲۶ ولی اَمأن بوگفتیم: ‹نتأنیم بیشیم. ولی اگه اَمی کوجه برأرَ اَمی اَمرأ ببریم، تأنیم بیشیم، یَنی نتأنیم او مردأکَ بیدینیم، مگر اَنکی اَمی کوجه برأرم اَمی اَمرأ بأیه.› ۲۷ اَمی پئر، اَمرَ بوگفته: ‹دأنیدی کی می زن دوتأ پسر مِره به دونیا بأورده. ۲۸ ایتأ جٚه می ورجه بوشو و بوگفتم: «بی‌شک ایتأ جانورٚ درنده اونَ پاره پارَه کوده،» و دِ اونَ نیدم. ۲۹ اگه اَیتأیم می جَا فیگیرید و بلایی اونٚ سر بأیه، می سیفیدٚ مویأنَ غم و غورصه اَمرأ به گیلَ کونیدی.›
۳۰ «اون می پئرٚ نفسه. پس اگه هسه وأگردم شیمی بنده، می پئرٚ ورجه و اَ جوان اَمی اَمرأ نبه، ۳۱ و بیدینه کی اونَ اَمی اَمرأ نأوردیم، در جا دق کونه. اَطویی اَمأن شیمی غولامأن اَمی پئرٚ سیفیدٚ مویأنَ غم و غورصه اَمرأ به گیلَ کونیمی. ۳۲ من، شیمی غولام، می پئرٚ ورجه اَ پسرٚ سلامتی‌یَ تضمین بوکودم و بوگفتم: ‹اگه وأگردم و تی پسرَ می اَمرأ نأورم، اَ گوناه تا اَبد دکفه می گردن!› ۳۳ پس هسه شیمی غولامَ ایجازه بدن به جایٚ بنیامین به غولامی شیمی ورجه بِیسم و می سرورٚ برده ببم، ایجازه بدن اَ جوان خو برأرأنٚ اَمرأ وأگرده. ۳۴ چوطو تأنم وأگردم می پئرٚ ورجه، اگه بنیامینَ می اَمرأ نبرم؟ نتأنم می پئرٚ درد و رنجٚ مردن کی اونٚ سر اَیه بیدینم.»
Currently Selected:
پیدایش ۴۴: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
