پیدایش ۴۵
۴۵
یوسف خو برأرأنَ گه «من یوسفم»
۱ یوسف دِ نتأنستی خوره بدأره اوشأنٚ ورجه گریه نوکونه، فریاد بزه: «همه کسَ بیرونَ کونید.» هیکس دِ اویه نِیسه‌بو، وختی کی یوسف خورَه معرفی کودن دوبو. ۲ اون جوری شِیون‌کونان گریه کودی کی مصریأن ایشنَوستیدی و فرعونٚ خانه آدمأنم وأخبرَ بوستیدی.
۳ یوسف خو برأرأنَ بوگفته: «منم، یوسف! هنوزم می پئر زنده‌یه؟» ولی اونٚ برأرأنٚ زبان بند بَمو بو و نتأنستیدی جواب بدید، چونکی اونٚ جَا بترسه‌بید. ۴ یوسف بوگفته: «بأیید جُلُوتر می ورجه.» وختی کی اوشأن بوشوییدی اونٚ ورجه، بوگفته: «من شیمی برأرم یوسف، هونی ایسم کی اونَ مصرَ بوفروختیدی. ۵ هسه دِ پریشانَ نیبید، دِ خودتأنَ سرزنش نوکونید کی مرَ بوفروختیدی، چونکی آدمأنٚ جانٚ نجاتٚ وسی بو کی خودا مرَ قبلٚ شومأن اوسه کوده اَیه. ۶ چونکی دو ساله اَ سرزیمینٚ دورون قحطی بَمو، پنج سالٚ دیگرم نه کاشتی به، نه بردأشتی. ۷ ولی خودا مرَ قبلٚ شومأن اوسه کوده اَیه کی ایتأ نجاتٚ عظیمٚ اَمرأ شمرَ زنده بدأره و شیمی نسلَ زیمینٚ سر حفظ بوکونه. ۸ پس شومأن نیبید کی مرَ اَیه اوسه کودیدی، بلکی خودا بو. مرَ مشاورٚ فرعون، سرپرستٚ اونٚ خانه و فرمانروایٚ تومامی‌یٚ سرزیمینٚ مصر بوکوده.
۹ «هسه هر چی زودتر وأگردید، بیشید می پئرٚ ورجه بیگید: ‹تی پسر، یوسف بوگفته: «خودا مرَ سراسرٚ مصرٚ دورون فرمانروا چأکوده. فوری ویریز، بیأ می ورجه! ۱۰ تو، تی زأکأن، تی نوه نتیجه، تی تومامٚ گاب و گوسفندأنٚ اَمرأ و هرچی کی دأری، سرزیمینٚ جوشنٚ دورون هَیه می دور و ور زندگی بوکونید و می نزدیکی بِیسید. ۱۱ اویه من تی جَا نگهدأری کونم، چره کی پنج سالٚ دیگرم قحطی ایسه. نوکونه تو، تومامٚ تی فک و فامیل و تی کس و کارٚ اَمرأ محتاج بیبید.»›»
۱۲ «شومأن خودتأن دِئن دریدی، می برأر بنیامینم دِئن دره کی شیمی اَمرأ گب زِئن درم. ۱۳ جٚه احترامی کی مصرٚ دورون دأرم و جٚه هرچی کی بیده‌ییدی می پئرَ خبر بدید. هرچی زودترم اونَ اوسَنید، بأورید اَیه.» ۱۴ بَزین اون خو برأر بنیامینَ کشَ گیفته و گریه بوکوده، و بنیامینم خو برأرَ کشَ گیفته و گریه بوکوده. ۱۵ یوسف همه‌یٚ خو برأرأنَ ماچی بدَه و اوشأنٚ وسی گریه بوکوده. بَزین اوشأن اونٚ ره گب بزه‌یید.
یوسف یعقوبَ دعوت کونه مصر
۱۶ وختی اَ خبر کی یوسفٚ برأرأن بَموییدی به گوشٚ فرعون و اونٚ درباریأن فأرسه، همه‌تأن شادی بوکودیدی.
۱۷ فرعونم یوسفَ بوگفته: «تی برأرأنَ بوگو: ‹خوشأنٚ چهارپایأنَ بار بوکونید وأگردید، بیشید سرزیمینٚ کنعان. ۱۸ تی پئرَ، اونٚ تومامٚ فک و فامیلٚ اَمرأ بأورید مصر. منم پورحاصلترینٚ کشتزارٚ مصرَ شمرَ فدم کی اونٚ محصولأنٚ فراوانٚ جَا بهره ببرید.› ۱۹ بوشو تی برأرأنَ بوگو: ‹مصرٚ جَا چندتأ ارابه شیمی زن و زأکأنٚ وسی اوسَنید و شیمی پئرٚ اَمرأ بأورید اَیه. ۲۰ شیمی مِلک و املاکٚ وسی‌یم نیگران نیبید، چونکی مالکٚ بهترین املاکٚ مصر بیدی.›»
۲۱ پس ایسرائیلٚ پسرأنم هو کارَ بوکودیدی، یوسف، فرعون فرمانٚ اَمرأ اوشأنٚ ارابه و آذوقه سفرم فده. ۲۲ هر کدامٚ اوشأنم ایدس لیباسٚ تازه فدَه، ولی بنیامینَ سیصدتأ سکه‌یٚ نقره و پنج دس لیباسٚ نو فده. ۲۳ ده‌تأ اولاغَ بهترین محصولأنٚ مصر بار بزه و ده‌تأ ماده اولاغَ گندم و نان و آذوقه‌یٚ سفر بار بزه و خو پئرٚ وسی اوشأنٚ اَمرأ رأهی بوکوده. ۲۴ بَزین خو برأرأنَ اوسه کوده و وختی شوئون دیبید اوشأنَ بوگفته: «رأ دورون همدیگرٚ اَمرأ ناسازگاری نوکونید!» ۲۵ پس اوشأن مصرٚ جَا وأگردستیدی بوشوییدی سرزیمینٚ کنعان خوشأنٚ پئر یعقوبٚ ورجه.
۲۶ و خوشأنٚ پئرَ بوگفتیدی: «یوسف هنوزم زنده‌یه و حاکمٚ سرتاسرٚ سرزیمینٚ مصر بوبوسته!» یعقوب پریشانَ بوسته، نتأنستی اوشأنٚ گبأنَ بأور بوکونه. ۲۷ ولی وختی هرچی یوسف اوشأنَ بوگفته‌بو اونٚ‌ره بوگفتیدی، و یعقوب خو چومأنٚ اَمرأ ارابه‌یأنَ بیده کی یوسف اونٚ بردنٚ وسی اوسه کوده‌بو، اونٚ دیل روشنَ بوسته.
۲۸ ایسرائیل بوگفته: «دِ بأور بوکودم کی می پسر یوسف زنده‌یه. شم اونٚ ورجه تا کی قبلٚ می مردن اونَ بیدینم.»
Currently Selected:
پیدایش ۴۵: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
