پیدایش ۴۶
۴۶
یعقوب بوشو مصر
۱ پس ایسرائیل هرچی کی دأشتی خو اَمرأ اوسَده رأ دکفته، بوشو فأرسه بئرشبع، خو پئر، ایسحاقٚ خودا ره قربانی بوکوده. ۲ شب رویا میأن خودا ایسرائیلٚ اَمرأ گب بزه و بوگفته: «یعقوب! یعقوب!»
جواب بدَه: «اَیه ایسم.»
۳ خوداوند بوگفته: «منم خودا، خودایٚ تی پئر. مصرٚ سفر کودنٚ وسی نَوأ ترسئن، چونکی خودم اویه تی جَا ایتأ پیله قوم به وجود اَورم. ۴ من خودم تی اَمرأ اَیم مصر و خودم ترَ وأگردأنم. و یوسف خو دسٚ اَمرأ تی چومأنَ دَوَده.»
۵ یعقوبم بئرشبع جَا رأ دکفته، اونٚ پسرأن خوشأنٚ پئر، و خوشأنٚ زن و زأکأنٚ اَمرأ، ارابه‌یأنی کی فرعون اوشأنٚ بردنٚ وسی اوسه کوده‌بو، سوارَ بوستیدی. ۶ اوشأنم خوشأنٚ گله و رمه، مال و منالی کی کنعانٚ دورون دأشتیدی، اوسَدیدی و یعقوب تومامٚ خو ایل و تبارٚ اَمرأ بوشوییدی مصر. ۷ یعقوب تومامٚ خو فامیلَ خو اَمرأ ببرده مصر، یَنی خو پسرأن، خو دوخترأن و تومامٚ خو نوه‌یأن.
یعقوبٚ نسل
٨ اَشأن ایسرائیلٚ پسرأنٚ نام ایسه یَنی یعقوبٚ نسل اونٚ اَمرأ بوشوییدی مصر:
رئوبین، یعقوبٚ ارشدٚ پسر. ٩ رئوبینٚ پسرأن: حنوک، فلو، حصرون و کرمی.
١٠ شمعونٚ پسرأن: یموییل، یامین، اوهد، یاکین و صوحر، و شائول، کی ایتأ کنعانی زنأکٚ پسر بو.
١١ لاوی پسرأن: جرشون، قهات و مراری.
١٢ یهودا پسرأن: عیر، اونان، شیله، فارص و زارح. عیر و اونان سرزیمینٚ کنعانٚ دورون بمرده‌بید. فارصٚ پسرأنم حصرون و حامول.
١٣ یساکارٚ پسرأن: تولاع، فواه، یاشوب و شمرون.
١٤ زبولونٚ پسرأن: سارد، ایلون و یاحل‌ییل.
١٥ تومامٚ اَ سی و سه نفر کی یعقوبٚ نسلٚ جَا بید، لیَه جَا فَدّان‌اَرامٚ دورون یعقوبٚ‌ره بدونیا بَمویید. هَطویم اوشأنٚ دوختر دینه.
١٦ جادٚ پسرأن: صِفیون، حَجّی، شونی، اِصبون، عِری، اَرودی و اَرئیل.
١٧ اَشیرٚ پسرأن: یِمنَه، یِشوَه، یِشوی و بِریعِه. اوشأنٚ خواخورٚ نام سِراخ بو. بِریعَه پسرأن: حِبِر و مِلکیئیل.
١٨ اَ شونزده‌تأ زِلفه جَا یعقوبٚ‌ره بدونیا بَمویید. زِلفه کنیزی بو کی لابان خو دوختر، لیه‌یَ فدَه‌بو،
١٩ یعقوبٚ زن، راحیلٚ پسرأن یوسف و بنیامین بید.
٢٠ یوسفٚ پسرأن، منسی و اِفرایم، کی اَسِنات، فوطی‌فارع دوختر، یوسفٚ‌ره به دونیا بأورده. او موقع فوطی‌فارع مصرٚ دورون کاهنٚ «اون» بو.
٢١ بنیامینٚ پسرأن: بِالع، باکِر، اِشبیل، جیرا، نعمان، اِیحی، رُش، مُفّیم، حُفّیم و اَرْد.
٢٢ اَ چارده نفر راحیلٚ پسرأن بید، کی یعقوبٚ‌ره به دونیا بأورده.
٢٣ دانٚ پسر، حوشیم.
٢٤ نفتالی پسرأن: یِحصِئیل، جونی، یِصِر و شیلِم.
٢٥ اَ هفت نفر پسرأنی بید کی بلهه یعقوبٚ ره به دونیا بأورده. بلهه کنیزی بو کی لابان اونَ خو دوختر، راحیلَ فدَه‌بو.
٢٦ تومامٚ کسأنی کی یعقوبٚ اَمرأ بوشوییدی مصر یَنی کسأنی کی جٚه اونٚ نسل بید، به جز اونٚ عروسأن، شصت و شیش نفر بید. ٢٧ تومامٚ کسأنی کی یعقوبٚ خاندانٚ جَا بوشوییدی مصر و دوتأ پسری کی یوسفٚ ره مصرٚ دورون بدونیا بَمویید، همه همه هفتاد نفر بید.
یعقوب یوسفٚ اَمرأ دیدار کونه
۲۸ یعقوب خو پسر یهودایَ جُولوتر اوسه کوده کی یوسفَ وَورسه جٚه کو طرف وأ بیشیم کی فأرسیم جوشن. وختی کی فأرسه‌ییدی سرزیمینٚ جوشن، ۲۹ یوسف فرمان بدَه کی خو ارابه‌یَ بأورید، سوارَ بوسته بوشو جوشن خو پئر یعقوبٚ پیشواز. یوسف هَطو کی خو پئرٚ ورجه فأرسه، اونَ کشَ گیفته و گریه بوکوده. ۳۰ یعقوب یوسفَ بوگفته: «هسه دِ حاضرم بیمیرم، چونکی می چومأنٚ اَمرأ بیدم کی تو زنده‌یی.»
۳۱ یوسف خو برأرأنَ و خو پئرٚ فک و فامیلَ بوگفته: «هسه شم فرعونٚ ورجه اونَ گم کی ‹می برأرأن و می پئرٚ فک و فامیل کی کنعان ایسَه‌بید بَموییدی می ورجه،› ۳۲ و اونَ خبر دهم کی ‹اوشأن چوپانأن و گابدارأنی ایسیدی کی خوشأنٚ گله رمه و هرچی دأشتیدی خوشأنٚ اَمرأ بأوردیدی.› ۳۳ وختی کی فرعون شمرَ دوخوأنه، وَورسه کی ‹چی کاره ایسیدی؟› ۳۴ اونَ جواب بدید: ‹اَمأن شیمی غولامأن جٚه نوجوأنی گله‌دار بیم، هو کاری ایسه کی اَمی آبااجدادم انجام دَییدی.› بعدٚ اون ایجازه دأریدی کی جوشنٚ دورون زندگی بوکونید، چونکی مصریأن چوپانأنَ مکروه دأنیدی.»
Currently Selected:
پیدایش ۴۶: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
