Luka 10

Yesu atuma abasambi amakumi cine lubali na babili (72)

1Kabili Imfumu Yesu yasontele abasambi na bambi amakumi cine lubali na babili (72).#10:1 72: Ba Baibele bamo bakwata, “Yesu asonta abasambi 70.” Yabatuma babili babili, ukuti baitangilile ukuya mu misumba yonse na mu ncende shonse umo iyine yali nokupita. 2Yabeba aiti, “Ifyakulobolola fyena fingi, lelo ababomfi bakulobolola bena banono. Kanshi akulombeni umwine fisabo atume ababomfi na bambi abakumulobolwelako. 3Kabiyeni, namutuma nga bana ba mpaanga pakati ka mimbulu. 4Mwilasenda cikwama, nangu icola, nangu ni ndyato. Ilyo muleya mu nshila, mwilaposha nelyo umo. 5Elyo mu ŋanda yonse iyo mwaingilamo, muletala mwasosa amuti, ‘Umutende ube muli ino ŋanda!’ 6Na cine ngo muntu wamutende ewikalamo, umutende wenu ulemwishila. Nomba nga teifyo, ninshi ulemubwelela. 7#1 Kol 9:14; 1 Timo 5:18Muleikala mu ŋanda imo ine. Mulelya no kunwa ifyo bamupeela, pantu umubomfi afwile ukupeelwa amalipilo yakwe. Mwilasela ukufuma muli iyi ŋanda ukuya ku ŋanda imbi. 8Kabili mu musumba onse umo mwaingila, na bantu bamupokelela, mulelya ifyo bamuletela. 9Muleposha na balwele abalimo. Mulebeba nokuti, ‘Ubufumu bwakwa Lesa nabumupalama.’ 10#Imili 13:51Nomba umusumba onse mwaingilamo na bantu tabamusekelele, mufumine mu mansa. Musose amuti, 11‘No lukungu lwine lwa mu musumba wenu ulukungile ku makasa yesu nalo lwine twamukuntila. Nomba kwena mwishibe ukuti, Ubufumu bwakwa Lesa nabupalama.’ 12#Icite 19:24-28; Mateo 10:15; 11:24Ndemweba ukuti, pali bulya bushiku bwabupingushi, Lesa akakanda ulya musumba ukucila na pali Sodoma.

Yesu aebaula imisumba iyakeene ukumusumina

(Mateo 11:20-24)

13“Ukacimona Kolasini! Ukacimona nobe Betisaida! Pantu ifipeshamano fyacitilwe muli imwe, efyo aficitwa mu Turi na mu Sidoni, awe nga ni kale balapile no kupilibuka mukufwala insalu shabulanda no kuikuba imito. 14Eico ndemweba nati, pa bushiku bwakupingulwa, ubupingushi bwa pali Turi na Sidoni bukaba eyefilyako ukucila pali imwe. 15Nomba iwe Kapenamu, bushe waleti ukaisansabalika ukufika na ku mulu? Awe iyoo, ukakulukila ku muyenge wa mfwa!” 16Kabili Yesu ati, “Uumfwa imwe, ninshi nine omfwa. Uwamusuula imwe, ninshi nine asuula. Elyo uwasuula ine, ninshi asuula no wantuma.”

Abasambi amakumi cine lubali na babili (72) babwela

17Awe abasambi balya amakumi cine lubali na babili, babwelele baleyangafye ku nsansa. Balaeba Yesu abati, “We Mfumu, ala ne mipashi yakowela yalecimba nga twalumbula ishina lyobe.” 18Yesu abeba ati, “Nalimwene uko Satana aponene ukufuma ku mulu kwati ni nkuba. 19#Amalu 91:13Moneni, imwe nalimupeela amaka ayakunyanta pa nsoka na pali bakaliŋongo na yakwansha ubulamba bonse ubwa mulwani. Takuli ne cingamucita akabi nakalya. 20Nomba mwilasansamukafye pali ico imipashi yakowela ilecimba kuli imwe, lelo mulesansamuka pali ico amashina yenu nayalembwa mu mulu.”

Yesu atasha Wishi

(Mateo 11:25-27; 13:16-17)

21Kabili pa nshita ine iyo, elyo Mupashi Wamushilo alengele Yesu ukusansamuka, alasosa ati, “Nakutasha Tata, we Mfumu ya mulu ne calo, pantu ifi fintu walififisa ku bamano na ku bacenjela, wafisokolola ku bantu bafye. Ee, Tata pantu we mwine efyo wafwaile ukucita. 22Tata alimpeela fyonse. Tapaba nangu umo uwaishiba Mwane, kano Wishi. Kabili tapaba waishiba Wishi, kano Mwane, elyo na bonse abo Mwane atemwa ukusokolwela.” 23Kabili uko bali beka Yesu apilibukila ku basambi bakwe alabeba ati, “Yalishuka amenso yenu ayalemona ifintu mulemona! 24Pantu ndemweba bakasesema abengi na bashamfumu abengi balefwaya ukumona ifyo imwe mulemona, nomba tabafimwene nakalya. Balefwaya no kumfwa ifyo imwe muleumfwa, nomba tabafyumfwile nakalya.”

Umulumbe wa mwina Samaria

25Awe kafundisha wamafunde umo, aiminine, alemwesha ati, “Kafundisha, bushe ni finshi ndi nokucita pakumona umweo wape?” 26Yesu amwasuka ati, “Bushe finshi fyalembwa mu Mafunde yakwa Mose? Finshi ubelengamo?” 27#Amaf 6:5; Levi 19:18Nao ayasuka ati, “Uletemwa Imfumu Lesa obe no mutima obe onse, no mweo obe onse, na maka yobe yonse, na mano yobe yonse. Kabili uletemwa no mubiyo, ngefyo waitemwa we mwine.” 28#Levi 18:5Yesu amweba ati, “Wayasukafye bwino. Kanshi ulecita ifyo fine, lyena ukamona umweo.” 29Nomba kafundisha wamafunde ico alefwaya ukuiwaminisha, aipusha Yesu ati, “Ngo munandi nani?” 30Mukumwasuka Yesu ena atila ati, “Umuntu umo afumine ku Yerusalemu aleya ku Yeriko. Mu nshila abapupu bamusansa. Bamupokolola fyonse ifyo akwete. Elyo bamupumaula, baya, bamusha impondo. 31Kanshi califye nkuma, shimapepo umo nao aleya mu nshila imo ine. Nomba ilyo amona uyu muntu, wena alambata, apita lubali, alaya. 32Kanshi umwina Levi nao acita ifyo fine. Nao atile ashifika pali iyi ncende, amona umuntu uwapuminwe, alambata, apita alaya. 33Nomba umwina Samaria uwali pa bulendo, ilyo afika pa muntu uwapuminwe, cilya amona uyu muntu, uluse lwamwikata. 34Aya apo ali. Abuula amafuta no mwangashi aitila pa filonda, elyo alafikakila. Kabili amuteka pa nama yakwe, amutwala na ku ŋanda ya beni alamutensha. 35Ubushiku bwakonkapo, abuula indalama sha silifa shibili, apeela no mwine ŋanda. Amweba ati, ‘Ulemutensha bwino. Kabili indalama shonse ukaposapo, pakubwela nkesa kubwesesha.’ ” 36Nomba iwe pali aba batatu uo uletila e mubiye wa uyu muntu uwasanshilwe na bapupu nani? 37Nao ayasuka ati, “Ni uyo wamucitile uluse.” Yesu epakumweba ati, “Kabiye na iwe ulecita ifyo fine.”

Yesu mwa Maria na Malita

38Kabili ilyo Yesu na basambi bakwe bacili baleya pa bulendo, bafikile ku mushi umo. Elyo umwanakashi umo ishina lyakwe ni Malita, amupokelela kumwakwe. 39Malita ali na nkashimbiye ishina lyakwe ni Maria, ena aikala mupepi ne Mfumu pamo na basambi bakwe, alekutika kufyo ilelanda. 40Malita wena alepitanafye mukupekanya ifyakubatebeta. Awe asuka aisa kuli Yesu alamweba ati, “We Mfumu, bushe tausakamene ukuti nkashi nandi andekelefye neka mukupekanya? Mwebeni ese angafweko!” 41Nomba Imfumu yamwasuka aiti, “Malita, Malita ee, ala ulepitana no kusakamikwa ne fintu ifingi. 42Lelo cintufye cimo ecilefwaikwa. Maria ena nasala iciwemepo. Kabili takwakabe uwakumupokolola.”

Currently Selected:

Luka 10: ILL15

Highlight

Copy