Luka 18

Umulumbe wakwa mukamfwilwa uwamupampamina

1Kabili Yesu aumine abantu umulumbe, uwakubalanga ukuti bali nokulapepa lyonse ukwabula ukunenuka. 2Alabeba ati, “Kwaliko kapingula wamilandu mu musumba umo, uushaletiina Lesa nangu ukusakamana umuntu. 3Kabili muli uyo wine musumba mwalimo mukamfwilwa umo. Aleisa libili libili kuli kapingula wamilandu alemweba ati, ‘Ungafweko ukuti umulandu ku mulwani wandi ungwamine.’ 4Kwena palipitile inshita kapingula wamilandu akaanafye. Lelo pakulekelesha asuka alatontonkanya mu mutima wakwe ati, ‘Kwena nshitiina Lesa kabili nshasakamana muntu. 5Lelo uyu mukamfwilwa umupampamina wacilamo. Ndi nokuputwila umulandu ngomo alefwaila, epakuti aleke ukwisa mukunkalifya umutwe.’ ” 6Elyo Imfumu yasosa aiti, “Mwaumfwa ifyo uyu kapingula walufyengo asosa? 7Nga Lesa wena kuti akaana shani ukutulanya abantu bakwe, abamulilila ubwaca no bwaila? Bushe kuti alashingashinga pakubafwilisha? 8Awe, ndemweba ukuti, akabatulanyafye bwangu bwangu mu bupingushi bwakwe. Nomba ilyo Umwana wa muntu akabwela, bushe akesa sanga abantu abacisumino pano calo?”

Umulumbe wa Mufalise na kasonkesha wamusonko

9Kabili Yesu aumine umulumbe ku bantu bamo abaleitunga ukuba abakaele pa cinso cakwa Lesa, balesuula na bambi bonse, ati, 10“Abantu babili baninike ukuya mwi Tempele kukupepa, umo Mufalise, umbi ni kasonkesha wamusonko. 11Umufalise aiminina alapepa mu mutima wakwe ati, ‘We Lesa nakutasha pantu nshaba nga abantu bambi, abapupu, abalufyengo, abacende, nangu ifi fyaba uyu kasonkesha wamusonko. 12Ndafunga ukulya imiku ibili cila mulungu. Elyo ndatuula cimo pekumi lyonse pafyo nonka.’ 13Kasonkesha wena aiminina akatalamukila. Afilwa no kwinwina amenso ku mulu, alayumafye pa cifuba ati, ‘We Lesa, mbelelako uluse ne mubifi.’ 14Ndemweba ukuti uyu muntu kasonkesha abwelele kumwakwe nalengwa ukuba uwakaele, umunankwe wena iyoo. Pantu uyo onse uuikusha, bakamucefya, no uicefya bakamusansabalika.”

Yesu apaala utwaice

(Mateo 19:13-15; Mako 10:13-16)

15Awe abantu baletele utwaice kuli Yesu pakuti atukumye. Nomba cilya abasambi bamona, balabakalipila. 16Yesu ati, “Lekeni utwaice twise uko ndi, mwitulesha iyoo. Pantu ababa ngotu twaice e bene ba Bufumu bwakwa Lesa. 17Ndemweba icine cine, umuntu onse uushipokelela Bufumu bwakwa Lesa nga kaice, takengilemo nakalya.”

Umuntu umukankala

(Mateo 19:16-30; Mako 10:17-31)

18Umuntu umo umucindami aipwishe Yesu ati, “Kafundisha musuma, bushe ni finshi ndi nokucita pakumona umweo wape?” 19Yesu amwasuka ati, “Cinshi ico wanjebela ukuti ndi musuma? Takwaba musuma nelyo umo, kanofye Lesa eka. 20Walishiba amafunde ayatila, ‘Wilabembuka, wilaipaya, wilaiba, wilabepesha, ulecindika wiso na noko.’ ” 21Nao asosa ati, “Ifi fyonse ndafikonka ukufumafye ku bwaice bwandi.” 22Yesu cilya aumfwa ifi, amweba ati, “Wabulishapofye icintu cimo. Kashitishe fyonse ifyo wakwata. Upeele ne ndalama ku balanda. Lyena ninshi ukakwata icuma mu mulu, elyo wise unkonke.” 23Awe wena pakumfwa ifi aikatwa no bulanda, pantu ali uwacuma nganshi.

24Yesu amulolesha, asosa ati, “Yangu ifyo cayafya ku bafyuma ukwingila mu Bufumu bwakwa Lesa! 25Ala cayangukapo ingamila ukupula mu linso lya nshindano, ukucila uwafyuma ukwingila mu Bufumu bwakwa Lesa.” 26Abaleumfwako balasosa abati, “Nga kanshi nani engapusuka?” 27Yesu ayasuka ati, “Ico abantu bafilililwafye ukucita, Lesa ena kuti acicita.”

28Petelo aeba Yesu ati, “Mona, ifwe twalisha ifyuma fyesu fyonse, twalikukonka.” 29Yesu abeba ati, “Ndemweba icine cine takwaba umuntu nelyo umo uwasha iŋanda, nangu umukashi, nangu bamunyina, nangu abafyashi, nangu abana pa mulandu wa Bufumu bwakwa Lesa, 30uushakapokelepo imikufye iyingi ukucilapo pali fyonse akwata pa nshita ya nomba. Elyo mu nshita ikesa akamona umweo wape.”

Yesu abwekeshapo nakabili ukusobela amacushi yakwe

(Mateo 20:17-19; Mako 10:32-34)

31Elyo Yesu asendele abasole ikumi limo na babili beka. Alabeba ati, “Moneni, twalaya ku Yerusalemu. Elyo fyonse ifyo bakasesema balemba pa Mwana wa muntu fili nokufikilishiwa. 32Pantu akaposwa mu minwe ya Benafyalo. Bakamuseka, bakamucusha no kulamusaka amate. 33Kabili bakamuma ifikoti no kumwipaya. Elyo ubushiku bwalenga shitatu, akabuuka ku bafwa.” 34Nomba abasole tabateseshe amashiwi Yesu alandile umo yalolele. Calyanshishe ukuyomfwa. Tabailwike nelyo panono pafyo alandile.

Yesu aposha impofu

(Mateo 20:29-34; Mako 10:46-52)

35Yesu ilyo apaleme ku Yeriko, kwali impofu imo iyaikele mumbali ya nshila, yalelomba. 36Cilya yaumfwa uko ibumba lilepita, yaipusha iciliko. 37Abantu bayeba abati, “Ni Yesu wa ku Nasaleti eulepita.” 38Elyo impofu yabilikisha aiti, “Yesu mwana Davidi, shi winganangulukilako!” 39Abali pantanshi balaikalipila, balayeba ukuti italale. Lelo yena elyo yacila ukupunda aiti, “Mwana Davidi, shi winganangulukilako.” 40Awe Yesu aiminina, aeba na bantu ukuti balete impofu uko ali. Cilya impofu yapalama, Yesu aipusha ati, 41“Cinshi ulefwaya ukuti nkucitile?” Nayo aiti, “We Mfumu, ndefwaya ukulalolesha.” 42Yesu nao ayeba ati, “Kanshi akulolesha. Icisumino cobe ecakuposha.” 43Awe apopene alalolesha alakonka na Yesu, alelumbanya Lesa. Abantu bonse nabo cilya bamona icacitika, balalumbanya Lesa.

Currently Selected:

Luka 18: ILL15

Highlight

Copy