GENESIS 22
22
Éíbraham éí Áízak nááhidííłnih bi'doo'niid
1Áádóó ákódzaadóó bik'ijį' Diyin God éí Éíbraham yíneeztą́ą'go áyidííniid, Éíbraham! Áko ázhdííniid, Kǫ́ǫ́ sédá. 2Áko áhodííniid, T'ááłá'í niye'ígíí, ayóó'ííní'níinii Áízak wolyéii, kéyah Moráíyahgóó bił dí'aashgo áadi hodíłidgo nááhodiyííłnih; ííshją́ą́ díí dził ghą́ą'gi kwe'é nidideesh'niił. 3Áádóó Éíbraham t'áá íiyisí abínígo nízhdii'na'go hatélii bik'i dah adziznil áádóó hatsíłkéí naaki ádíjii'nil; haye' Áízak ałdó' bił bee adidlidgo náá'iiniih biniyé chizh ahizhdííłkaal. Diyin God doohkah hałnínę́ęgóó dashdiikai. 4Áádóó dashdiikaidóó tágí jį́ aleeh góne' Éíbraham náás ajííghalgo dzideeskaijį' éí nízaadgo dziiłtsą́. 5Áko Éíbraham hatsíłkéí ábizhdííniid, T'áá kwe'é télii bísoołké; shí índa shiye' bił níláahjį' diit'ash; áadi sodidiilzįįłgo índa nihaa nídiit'ash. 6Áádóó Éíbraham chizh bee adidlidgo bee náázhdi'yoołnihígíí haye' Áízak bina'ízhdéénilgo nihiiníłjid, áádóó kǫ' índa béésh bił dashdiijaa', áko t'áá ájíłah ákǫ́ǫ́ joo'ashgo 7Áízak hazhé'é Éíbraham ábizhdííniid, Shizhé'é! Áko ázhdííniid, Kǫ́ǫ́ yishááł, shiye'. Nít'éé' ánááhodoo'niid, Shoo, kǫ' áádóó chizh nihee hólǫ́, ákoshą' dibé yázhí didlidgo nááhidoonihígíí éí háadi? 8Áádóó Éíbraham ádííniid, Shiye', Diyin God lá dibé yázhí didlidgo nááhidoonihígíí t'áá bí néididoołtéeł ni. Áádóó t'áá ájíłah t'áá ła' joo'ash.
9Diyin God, Kwe'é nidideeshniił, hodííniidígi jiní'áazhgo ákwe'é Éíbraham éí bikáá' náá'iiniihí ájiilaago bikáa'jį' chizh dah jizhjaa', áko haye' Áízak be'dziztł'ǫ́ǫgo bikáá' náá'iiniihí bikáa'gi chizh bik'i nizhníłtį́.#Jas. 2:21. 10Áko Éíbraham béésh néidii'ą́ągo biye' yi'niił hį́įgo yich'į' béésh yił k'ídeeshchid. 11Nít'éé' Bóhólníihii bidiyingo naal'a'í yá'ąąsh biyi'dę́ę́' hózhíigo áháłní, Éíbraham, Éíbraham! Áko ázhdííniid, Kǫ́ǫ́ sézį́. 12Áko ání, Ashkii atíhólééh lágo, doo nidi haada díílíił da, Diyin God t'áá íiyisí bóhoníłnííh lá k'ad shił bééhoozin, háálá t'ááłá'í niye'ígíí nidi doo shąąh síní'įįd da. 13Áko Éíbraham hajííghalgo nidzizghal, nít'éé' hane'jígo deenásts'aa' bidee' yee tsin yiih dinoolne' lá, áádóó Éíbraham éí deenásts'aa' néidiiłtį́įgo haye' bitsásk'ehgi didlidgo náádziisnii'.#Heb. 11:17-19. 14Áko Éíbraham ákwe'é Jiihóvah-jáíreh#22:14 Hííbrew k'ehjí Jiihóvah-jáíreh éí Bóhólníihii yee aa áhodoolyąąłii jiníigo óolyé. bee hojíízhi'; díigi át'éego díí jį́įjį' t'ah nidi bee ádajiní, Bóhólníihii bidził bighą́ą'gi yee aa áhodoolyąął.
15Áko díí bił naakidi aleeh góne' Bóhólníihii bidiyingo naal'a'í yá'ąąsh biyi'dę́ę́' Éíbraham nááyooji'go ání, 16T'áá shí kódíshníigo ádee hadeesdzíí', ní Bóhólníihii, háálá díí baa nisíníyá: t'ááłá'í niye'ígíí doo shąąh síní'įįdgóó bąą 17nik'ijishdlíigo éí t'áá íiyisí nik'ijishdlíi doo, áko na'áłchíní éí k'ee'ąą dínéesht'į́įłgo yádiłhił biyi'di sǫ'ígi ánéelą́ą'go índa tónteel bibąąhgóó séíígi ánéelą́ą'go na'áłchíní nídínéesht'į́į́ł#Heb. 6:13,14; 11:12. áádóó na'áłchíní náás da'ahílchíihii bida'ana'í yik'eh dadidlį́į doo. 18Áádóó nits'ą́ą́dóó yichíiłii bee ał'ąą dine'é t'áá ałtso bik'ihozhdoodliił,#Acts 3:25. háálá shizaad bik'eh honíł'į́. 19Ákohgo Éíbraham hatsíłkéí baa níjít'áazhgo t'áá ła' Bíyer-shííba hoolyéégóó dah nízhdiikai, áádóó Éíbraham éí Bíyer-shííbagi kééhojit'į́.
Néíhor bits'ą́ą́dóó adideezhchíinii
20Áádóó náás nááhodeeshzhiizhgo Éíbraham bił hóóne', Jó, Mílkah ałdó', nitsilí Néíhor yá ni'iishchį́į́ lá, ho'doo'niid. 21Haz alą́ąjį' há yizhchį́, áádóó bitsilí Baz áádóó Kémyu'el éí Áram 22áádóó Késed áádóó Héízo áádóó Píldash áádóó Jídlaf índa Biithúwel yizhé'é nilį́. 23Biithúwel há yizhchíinii éí Rebékah wolyé: díí tseebíigo Mílkah éí Éíbraham bitsilí Néíhor yá niyiishchį́. 24Áádóó Néíhor be'asdzą́ą́ yíł'íní Rúmah yolyéhígíí éí Tííba áádóó Géíham áádóó Téíhash índa Méí'akah ałdó' há niyiishchį́.
Currently Selected:
GENESIS 22: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
