GENESIS 25
25
Ketúrah éí Éíbraham yá niyiishchínígíí
(1Chr. 1:32,33)
1Éíbraham be'asdzą́ą́ nááhásdlį́į́'; éí Ketúrah wolyé. 2Zímran áádóó Jákshan áádóó Míídan áádóó Mídiyan áádóó Íshbak índa Shúwah; díí Éíbraham bá nijiishchį́. 3Jákshan bá yizhchíinii éí Shííba índa Díídan. Díídan biye'ké éí Áshurim áádóó Létushim índa Léyumim. 4Mídiyan biye'ké éí Íífah áádóó Íífer áádóó Héínak áádóó Abáída índa Eldéíyah; díí t'áá ałtso Ketúrah binálíké. 5Áko Éíbraham hwee hólónígíí t'áá ałtso Áízak baazhdiní'ą́. 6Nidi Éíbraham bida'asdzą́ą́ yíł'íní dabiyáázh ya'iiznil, áádóó t'ah jiináago haye' Áízak bits'ą́ąjį' ha'a'aah biyaajigo kéyahgóó adziis'a'.
Éíbraham daaztsą́ áádóó łeeh bi'dooltį́
7Áádóó Éíbraham bíídíiską́ą́dóó hináago neeznádiindóó ba'aan tsosts'idiindóó ba'aan ashdla' binááhai. 8Ákohgo Éíbraham hajííyol; yá'át'éehgo yéego hajistih áádóó lą'í honááhaigo dajiztsą́, áko índa hak'éí yę́ę ahikááhgóó dzizlį́į́'. 9Áko haye' Áízak índa Íshmeiyel éí Zóhar, Het dine'é nilíinii biye' Íífran bikéyahgi Mámre bíighahgi haz'ą́; éí Makpíílagi hatséníhoodzání góne' yóó'áhoolaa. 10Het dine'é bikéyahgi Éíbraham nayiisnii'#Gen. 23:3-16. yę́ęgi Éíbraham yę́ę yóó'ábi'diilyaa; hwe'asdzą́ą́ Sárah yę́ę ałdó' ákwii yóó'ábi'diilyaa. 11Áádóó Éíbraham daaztsą́ą́dóó bik'ijį' Diyin God éí haye' Áízak yik'idzisdli' áádóó yaa áhályą́, áko Áízak éí Laháíroigi tó hahadleeh bíighahgi kééhojit'į́.
Íshmeiyel bits'ą́ą́dóó adideezhchínígíí
(1Chr. 1:28-31)
12Áádóó díí Éíbraham biye' Íshmeiyel ba'áłchíní náás da'ahílchíihii ádaat'į́; éí Sárah binaalte' Héígar, Ííjip dine'é nilíinii, Éíbraham yá yishchį́. 13Íshmeiyel biye'ké náás da'ahílchíihii bik'ehgo kódaolyé: ts'ídá alą́ąjį' yizhchínígíí éí Niibéíyath áádóó Kíídar áádóó Ádbiil áádóó Míbsam 14áádóó Míshma áádóó Dúmah áádóó Mássa 15áádóó Héídad áádóó Tííma áádóó Jííter áádóó Néífish índa Kédiimah. 16Díí Íshmeiyel biye'ké áádóó díí dabízhi' kin naazhjaa'ígíí bik'ehgo, áádóó dah deínéhígíí naakits'áadahgo naat'áanii bidine'é bik'ehgo. 17Áko Íshmeiyel hináago neeznádiindóó ba'aan tádiindóó ba'aan tsosts'id binááhai, áko índa hajííyolgo dadziztsą́. Áádóó hak'éí yę́ę ahikááhgóó dzizlį́į́'. 18Hávilahdóó Shur bíighahjígo Ííjip kéyah binaashiijí Asíriya kéyah bich'į'go ha'áłchíní kéédahat'į́, áko hak'isóó t'áá ałtso binááł kééhojit'į́į́ nít'éé'.#25:18 Kééhojit'į́į́ nít'éé' jiníigo Hííbrew k'ehjígo hasht'e'nizhníná jiníigo óolyé.
Íísa áádóó Jéíkab bi'dizhchį́
19Díí t'éiyá Éíbraham biye' Áízak ba'áłchíní náás da'ahílchíihii ádaat'į́: Éíbraham há Áízak yizhchį́, 20áko Áízak dízdiin binááhaigo Rebékah wolyéii hwe'asdzą́ą́ silį́į́'. Éí Péídan-éíramdóó, Síriya dine'é nilį́įgo Biithúwel bitsi' áádóó Léíban éí Síriya dine'é nilį́įgo bideezhí jílį́. 21Áádóó Áízak hwe'asdzą́ą́ doo ałchíi dago biniinaa Bóhólníihii nídzooskan, áko Bóhólníihii hodiizts'ą́ą'go hwe'asdzą́ą́ Rebékah i'niiltsąąd. 22Áko ha'áłchíní hatsą́ądi na'ahégilgo ázhdííniid, Díí ha'át'íí biniyé kónísht'éé lá? Áko dashdiiyáago Bóhólníihii nayízhdééłkid. 23Áko Bóhólníihii áhodííniid,
Naaki ał'ąą dine'é bííníltsą́,
áádóó naaki dine'é ał'ąą át'éego nits'ą́ą́dóó hodooleeł,
Áko ła' dine'é éí aláahgo bidziil doo,
Índa alą́ąjį' nilínígíí t'éiyá akéédę́ę́' nilíinii yá naal'a' dooleeł.#Rom. 9:12.
24Áádóó azhdoołchííł beiníłką́ągo, jó'akon, naakiishchíín bídzooltsą́ą́ lá. 25Alą́ąjį' yizhchínígíí łichíi'go índa t'áá át'é ditł'ogo akágí éé' nahalin, áko éí Íísa#25:25 Íísa jiníigo éí Hííbrew k'ehjígo ditł'oii jinínígi át'éego nahalin. bee dahojíízhi'. 26Áádóó akéédę́ę́' hatsilí hanáánáátłizh, éí Íísa yikétal yótą'go háátłizh, áko éí Jéíkab#25:26 Jéíkab jiníigo éí Hííbrew k'ehjígo akétal jinínígi át'éego nahalin. dzoosye'. Áízak hastą́diin binááhaigo Rebékah díí há yishchį́.
Íísa éí alą́ąjį' yizhchíinii bee bóhólníihii baa nahaaznii'
27Áádóó ashiiké dínéesą́. Íísa ayóó át'éego naalzheehí dzizlį́į́'; halgaigóó naagháii jílį́; Jéíkab éí hastiin doo hahałtaahí jílį́įgo hooghangi t'éí nijighá. 28Áízak éí Íísa ayóó'áyó'ní; bibįįh bitsį' jiyą́ągo éí bąą, nidi Rebékah éí Jéíkab ayóó'áyó'ní.
29Łah Jéíkab éí atoo' jiłbéezhgo Íísa t'áá íiyisí dichin bi'niiłhį́įgo halgaidę́ę́' haa nádzá. 30Áko Íísa éí Jéíkab áyidííniid, T'áá shǫǫdí, atoo' łichíi'go niłbézhígíí ła' shá hanikaah; t'áá íiyisí dichin shi'niiłhį́; éí biniinaa Íídam#25:30 Íídam jiníigo éí Hííbrew k'ehjígo halchíí' jinínígi át'éego nahalin. dzoosye'. 31Áko Jéíkab ání, Alą́ąjį' yizhchíinii bee bóhólníihii átsé naa nahashniih. 32Áko Íísa ání, Jó, shi'niitsą́ą́ lá; alą́ąjį' yizhchíinii bee bóhólníihii éíshą' ha'át'íí bits'ą́ą́dóó shaa doodił? 33Áko Jéíkab ání, K'ad áłtsé shich'į' ádee hadídziih, áko bich'į' ádee hazdoodzíi'go alą́ąjį' yizhchíinii bee bóhólníihii Jéíkab bich'į' nidziisnii'.#Heb. 12:16. 34Ákohgo Jéíkab éí łees'áán áádóó naa'ołí bitoo' bił Íísa baazhníką́, áko ííyą́ą'go dah diiyá. Kót'éego Íísa alą́ąjį' yizhchíinii bee bóhólníihii doo bił yílįįdgóó yóó'iidíí'ą́.
Currently Selected:
GENESIS 25: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
