GENESIS 28
28
1Áádóó Áízak éí Jéíkab hágo yidííniidgo yik'i sodoolzin, áádóó hazhó'ógo bee bił hojoolne'go ábizhdííniid, Kéínan dine'é bitsi'ké ts'ídá doo ła' ne'asdzą́ą́ ádíílíił da. 2Asht'e'ádílnéehgo nimá bizhé'é Biithúwel bighangóó Péídan-éíram hoolyéejį' dínááh; áadi nimá bínaaí Léíban bitsi'ké ła' ne'asdzą́ą́ ádíílííł. 3Diyin God Aláahgo Ayóó'ábóodziilii nik'ijidlíi doo, áádóó náás nooht'į́įłgo índa k'ee'ąą nooht'į́įłgo ándoolííł, áko diné nááséełii nohłį́į doo. 4Áádóó Éíbraham bee bik'ihodzisdli'ii#Gen. 17:4-8. éí na'áłchíní náás da'ahílchíhígíí t'áá bił nik'ihwiizhdoodliił, áko dé'éyóní nílį́įgo kéyah bikáá' nanináhígíí Diyin God éí Éíbraham yeidiní'áanii bee níhólníih dooleeł. 5Áko Áízak haye' Jéíkab dashdiił'a', áádóó Péídan-éíramgóó Síriya dine'é Biithúwel biye' éí Jéíkab áádóó Íísa bimá Rebékah bínaaí Léíban bich'į' ajííyá.
Íísa éí asdzání náánáła' nínéidiiłtį́
6Ákohgo Íísa díí hoł bééhoozin: Áízak éí Jéíkab yik'ijisdli' lá, áádóó Péídan-éíram hoolyéédóó hwe'asdzą́ą́ dooleełii nízhdidoołtééł biniyé ákǫ́ǫ́ ahóół'a', áádóó bik'ijiijisdli'go hazhó'ó bizhníłnii'go ábijiní, Kéínan dine'é bitsi'ké ts'ídá doo ła' ne'asdzą́ą́ ádíílíił da, 7áádóó Jéíkab bizhé'é índa bimá yik'eh hóół'įįdgo Péídan-éíram hoolyéégóó ííyá. 8Hazhé'é éí Kéínan dine'é bitsi'ké doo bił aaníígóó hoł bééhoozingo 9Íísa dashdiiyáago Íshmeiyel bighangi jiníyá; áádę́ę́' asdzání hwe'asdzą́ą́ dooleełii éí Éíbraham biye' Íshmeiyel wolyéii bitsi' Méíhalah wolyéego Nibéíyah yilah nilį́įgo hwe'asdzą́ą́ dooleeł biniyé nínáázhdiiłtį́.
Jéíkab éí Béthelgi nayiizyeel
10Áko Bíyer-shííba hoolyéédóó Jéíkab dashdiiyáago Héírangóó ajííyá. 11Áádóó i'íí'ą́ągo bąą t'áá ádzaagi hwiiską́; ákwii tsé ła' nízhdii'ą́ągo hatsii'áál ájiilaago jineeztį́įgo ajiiłhaazh. 12Nít'éé' kót'éego nidziizyeel, jó'akon, nahasdzáán bikáá'dóó haaz'éí yádiłhił biní'á; éí bikáá'dóó Diyin God bidiyingo nidaal'a'í dego áádóó yaago ałnánákahgo#Jn. 1:51. jiiłtsą́. 13Áádóó, shoo, éí bilááhdę́ę́' Bóhólníihii sizį́įgo ání, Bóhólníihii ásht'į́, nizhé'é yę́ę Éíbraham biDiyin God áádóó Áízak yę́ę biDiyin God nishłį́; kéyah bikáá' sínítíinii naa dinish'aahígíí na'áłchíní náás da'ahílchíihii ałdó' baa dideesh'ááł.#Gen. 13:14,15. 14Áádóó nahasdzáán bikáa'gi łeezhígi ánéelą́ą'go na'áłchíní ákónéelą́ą' doo; e'e'aahjigo áádóó ha'a'aahjigo áádóó náhookǫsjigo áádóó shádi'áahjigo k'ee'ąą deílzhíish doo, áko ni ninahjį' índa na'áłchíní náás da'ahílchíihii binahjį' nahasdzáán bikáa'gi ał'ąą dine'é t'áá ałtso bik'ihozhdoodliił.#Gen. 12:3; 22:18. 15Jó'akon, nił honishłǫ́; t'áá hidínááhgóó naa áháshyą́ą doo, áádóó díí kéyahgi nił nínáádeesht'ash; bee nich'į' haasdzíi'ii bi'iishłaajį' doo nits'ą́ą́' dahodideeshłeeł da. 16Áko Jéíkab ch'éédzídzidgo ázhdííniid, T'áá aaníí Bóhólníihii kwe'é hólǫ́ǫgo doo shił bééhózin da lá. 17Áko nídzíldzidgo ázhdííniid, Dooládó' kwe'é náhádzid da lá! Díí t'áá aaníí Diyin God bighan lá; yá'ąąsh bich'é'étiin át'éé lá.
18Áko Jéíkab t'ah abíínígo nízhdii'na'go tsé hatsii'áál ájiilaii nízhdii'ą́ągo ajíítsih, índa bílátahgi ak'ah yadziiziid. 19Ákwe'é Béthel#28:19 Béthel jiníigo éí Hííbrew k'ehjígo Diyin God bighangi jiníigo óolyé. hoolyée doo, jidííniid; bitséédą́ą́' Luz hoolyéego kin haal' áá nít'éé'. 20Áko Jéíkab ádee hadzoodzíi'go ázhdííniid, Diyin God shił hólǫ́ǫgo áádóó naasháágóó shaa áhályą́ągo áádóó sha'ałtso'go áádóó éé' yee hááshidoodlíiłgo 21índa shizhé'é bighandi hózhǫ́ǫgo baa nínáádeeshdáałgo Bóhólníihii shiDiyin God nilį́į doo, 22áádóó tsé íí'áago íishłaaígíí éí Diyin God bighan doo, áádóó t'áá ałtso shaa hidí'aahígíí neeznáá daníjaa'ígíí éí t'ááłá'í shijaa' naa náhidish'aah doo.
Currently Selected:
GENESIS 28: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
