JOHN 10
10
Dibé bighan binahjį' hane' bee ak'idi'dootį́įłii
1T'áá aaníí, t'áá aaníígóó ánihidishní, T'áá háiida dibé bighan bich'é'étiindę́ę́' doo yah anádáhígíí, nidi t'áá háádę́ę'da yitis ná'nahígíí, t'áá éí ani'įįhii áádóó agha'ii'níiłii nilį́, 2nidi ch'é'étiindę́ę́' yah anádáhígíí éí dibé yaa áhályáanii nilį́. 3Éí dáń'dítį́hí yaa áhályáanii bá ąą néiditį́į́h; dibé biinéé' deidiits'a', áko t'áá bí bidibé dabízhi' yee yózhíigo, yá ch'éhéghááh. 4T'áá bíhígíí t'áá ałtso ch'ínéi'niłgo yilą́ąjį' naagháago dibé bikéé' naakai, háálá biinéé' yéédahósin. 5Diné doo yéédahósinii éí doo yikéé' dah didoojah da, nidi t'óó yits'ą́ą́' dah didoojah, háálá doo yéédahósinii biinéé' doo yéédahósin da. 6Díí hane' bee ak'idi'dootį́įłii Jesus yee hach'į' haadzíí', nidi yee hach'į' haadzí'ígíí t'áadoo bik'idazh'diitą́ą da.
Jesus yá'át'éehgo dibé yaa áhályáanii
7Áko Jesus ánááhodoo'niid, T'áá aaníí, t'áá aaníígóó ánihidishní, Shí dibé bich'é'étiin nishłį́. 8Shítséedi nidahaaskaígíí t'áá ałtso da'ni'įįhii índa aghada'ii'níiłii danilį́, áko dibé doo dabidiits'a' da. 9Shí ch'é'étiin nishłį́; t'áá háiida shí shee yah ííyáhígíí yisdádooltééł, áádóó yah anádááh índa ch'ínádáahgo hootsojį' anáhádáah dooleeł. 10Ani'įįhii adínóo'į́į́ł áádóó ni'doołtsił índa í'doołdįįł t'éiyá yiniyé nádááh, nidi shí t'éí shidibé iiná bee dahólǫ́ǫ dooleeł, áádóó łą́ągo bee dahólǫ́ǫ dooleeł biniyé níyá. 11Shí yá'át'éehgo dibé yaa áhályáanii nishłį́. Yá'át'éehgo dibé yaa áhályáanii éí t'áá bí dibé yich'ą́ą́h niná'ádiit'aah. 12Ákondi adeenáago naalnishii éí doo na'niłkaadii nilį́į da, éí dibé doo t'áá bí bilį́į́'góó biniinaa mą'iitsoh éí dibé yich'į' yilwołgo yiyiiłtséehgo, dibé t'áá ákǫ́ǫgo dah díníichééh, áko mą'iitsoh éí dibé ła' yił nehedił áádóó ła' baa taojah. 13Háálá éí t'óó adeenáago naalnishgo bąą dah díníichééh, áko dibé t'óó yaa yoonah. 14Shí yá'át'éehgo dibé yaa áhályáanii nishłį́, shíhígíí béédahasin áádóó shíhígíí shéédahósin. 15T'áá aTaa' shééhósin áádóó aTaa' bééhasinígi át'éego,#Mt. 11:27; Lk. 10:22. áko t'áá shí she'iina' dibé bich'ą́ą́h ninádinish'aah. 16Dibé náánáła' shee nááhódlǫ́, nidi éí díí shijé'ígíí doo bitahdóo da; éí ałdó' shóideesht'eełgo shiinéé' deidiits'a' doo. Áko t'ááłáhígóó shijée' dooleeł, índa dibé yaa áhályáanii t'ááłá'í dooleeł. 17Éí bąą she'iina' t'áá shí náádideeshdlééł biniyé ninádinish'aah, éí bąą shiTaa' ayóó'áshó'ní. 18Éí diné doo ła' shighaidoolyéeł da, nidi t'áá shíniik'eh ninádinish'aah. Bee óhólnííh shee hólǫ́ǫgo ninádinish'aah, áádóó bee óhólnííh shee hólǫ́ǫgo náádideeshdlééł; díí bi'deeshłíiłgo shiTaa' bibik'eh ó'oo'níiłii át'é.
19Áko éí saad bee hadzoodzí'ígíí biniinaa Jew dine'é ałghanááda'dit'áahgo ałts'ákah. 20Áko lą'í yilt'éego ádadííniid, Níłch'i bi'iiníziinii hayi'di hólǫ́ǫgo, diigis jílį́į́ lá; ha'át'íísh biniyé dahwíísółts'ą́ą́'? 21Ła' ádaaní, Díí saadígíí doo níłch'i bi'iiníziinii bii' hólóonii ła' bizaad át'ée da. Da' níłch'i bi'iiníziiniísh doo oo'íinii oo'į́įgo íidoolííł?
Jew dine'é éí Jesus bił nidazdiilniił dayó'ní
22Íídą́ą́' Jerúsalemdi, kin bii' sohodizin éí Diyin God bá ats'át'ánígíí bee bééhániihgo biniit'aa hodílzingo áłah ná'ádleehígíí baa nááhoolzhiizh, áko íídą́ą́' hai, 23nít'éé' kin bii' sohodizin bich'éédą́ą'gi, Sálaman bichaha'oh góne' Jesus nijighá. 24Áádóó Jew dine'é haa áłah silį́į'go ádahodííniid, Haa nízáágóoshą' náás nihiníí'ah doo? Christ nílį́į́ ládą́ą́', t'áá bééhózínígo bee nihił hólne'. 25Áko Jesus ábidííniid, Nihił hweeshne' lą́ą, nidi t'áadoo deisoohdląąd da. ShiTaa' bízhi' bee naanish baa naasháhígíí, éí bee Christ nishłį́įgo nihił béédahózin, 26nidi doo dashoohdlą́ą da, háálá [t'áá ánihidííniidígi át'éego] doo shí shidibé danohłį́į da. 27Jó, shidibé shiinéé' deidiits'a', áádóó béédahasingo shikéé' nidaakai, 28índa iiná doo ninít'i'ii baa hidish'aah, áko ts'ídá doo ádadoodįįł da, doo nidi ła'da shílák'eedóó haidiyoołhą́łí da. 29ShiTaa' t'áá ałtso biláahgo ayóó ájít'éii, éí dibé shaazhnínilígíí doo ła' shiTaa' bílák'eedóó haidiyoołhą́ąłgo yíneel'ání da. 30Shí índa shiTaa' t'ááłá'í niidlį́.
31Ákohgo Jew dine'é hoł nidazdoołniił biniyé tsé nínáádayiisdláá'. 32Nít'éé' Jesus ánáábidoo'niid, ShiTaa' bits'ą́ą́dę́ę́' naanish yá'ádaat'éehii lą'í nihinááł baa niséyá, áko háidíígíishą' biniinaa shił nidaznołne'? 33Jew dine'é ánáádahodoo'niid, Yá'át'éehii baa nanináhígíí biniinaa doo nił nidazniilne' da, nidi Diyin God doo díínísingóó baa yáníłti'ígíí biniinaa,#Lev. 24:16. háálá t'áá diné nílį́įgo Diyin God í'díl'į́. 34Jesus ánáábidoo'niid, Diyin danohłį́, dííniid,#Ps. 82:6. da' doósh nihibee haz'áanii bii' bee ak'e'ashchį́į da? 35Diyin God bizaad baa deet'ánígíí, Diyin danohłį́, yidííniidgo, jó, Diyin God bizaad bee ak'e'ashchínígíí doo łahgo ádooníił da. 36Áko Diyin God biYe' nishłį́, dishnínígíí bąą ha'át'éegoshą', Diyin God baa'ihgo baa yáníłti', dashidohní? Jó, aTaa' ats'áshiníłtį́įgo nahasdzáán bikáa'jį' shiníł'a'. 37ShiTaa' binaanish doo baa naasháágóogo t'áadoo dashiinohdlání, 38nidi éí baa naasháago azhą́ shí doo dashiinohdlą́ą da nidi, naanish baa naasháhígíí éí deinohdlą́, áko aTaa' shiyi'di hólǫ́, shí ałdó' biyi'di honishłónígíí nihił béédahodoozįįłgo deidoohdląął.
39Éí bąą dahwiidiiltsoł ch'ééh náádaniidzį́į́' nidi, bits'ą́ą́' dah náázdiidzá. 40Áádóó Jórdan tsé'naagóó anáádzoodzá, John tó yee asį́įhgo hahoolzhiizh yę́ęjį',#Jn. 1:28. ákwii nijigháá nít'éé'. 41T'óó ahayóí haa haaskaigo ádaaní, John éí Diyin God bibee adziilii bee bééhózinii doo ła' yaa naayáa da, nidi John díí diné yee yaa hoolne'ígíí t'áá ałtso t'áá aaníí lá. 42Áko ákwii t'óó ahayóí dahoosdląądgo haa dadzoozlíí'.
Currently Selected:
JOHN 10: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
