JOHN 21
21
Jesus éí bídahooł'aahii tsosts'idgo yich'į' yit'íní í'diilyaa
1Kódzaadóó bik'ijį' Taibííriyas be'ek'id bibąąhgi Jesus éí hódahooł'aahii bich'į' yit'íní ánáázh'diilyaa; kót'éego bich'į' yit'íní ízh'diilyaa. 2Ákwii Sáíman Peter, áádóó Thomas, éí Naakií hodi'nínígíí, áádóó Natháneiyel éí Kéínadę́ę́' naagháhígíí, éí kéyah Gálilii biyi'dóó, áádóó Zébedii biye' nidilt'éego, índa ła' Jesus bíhooł'aahii nidilt'éego bił ahíjiikai. 3Nít'éé' Sáíman Peter áhodííniid, Łóó' hahideestsosgóó déyá. Nít'éé', Nihí ałdó' ákǫ́ǫ́ nił diikah, dahodííniid. Áko ch'íjíkaigo tsinaa'eeł biih jookai, nidi éí bitł'éé' t'áadoo łóó' ła' hadadzistsooz da.#Lk. 5:5.
4Nít'éé' hayííłką́ągo tábąąhgi Jesus sizį́įgo dajiiłtsą́, nidi ídahooł'aahii Jesus át'į́įgo t'áadoo yéédahoosįįd da. 5Áko Jesus áhodííniid, Sha'áłchíní, łóó'ósh nihee dahólǫ́? Nít'éé', Ádin, dabizhdííniid. 6Áko áhodííniid, Tsinaa'eeł binish'náájígo łóó' bee hahaltsósí taah daałtsóosgo ła' bee hadadoołtsos. Áko taah dadzistsooz, nít'éé' łóó' t'óó ahayóigo#Lk. 5:6. biniinaa ch'ééh hadadziłtsóós. 7Áko íhooł'aahii Jesus ayóó'ábó'nínígíí Peter áyidííniid, Bóhólníihii át'į́į́ lá! Sáíman Peter éí Bóhólníihii át'į́įgo yidiizts'ą́ą'go, bi'éé' yee ákászas, háálá deji' bi'éé' t'áágéedgo naalnish nít'éé', áádóó táyi' góne' dah diilwod. 8Nidi ła' ídahooł'aahii łóó' bee hahaltsósí yee łóó' dayíshoodgo tsinaa'eeł yázhí bił ní'éél, háálá tábąąhjį' t'áá áyídí, ach'oozhlaa'dóó ála' bílátahjį' áníłtsoígíí éí naakidi neeznádiindi ahą́ą́hdí'á ánízah.
9Táłts'ájíkaigo, ákǫ́ǫ́ tsííd kǫ'go dajiiłtsą́, tsííkáa'gi łóó' sinilgo áádóó łahjí łees'áán sinil. 10Áko Jesus áhodííniid, Łóó' hadasoołtsoozígíí ła' nídoohjááh. 11Áko Sáíman Peter tsinaa'eeł yiih yíyáago łóó' bee hahaltsósí, łóó' bii' hadeezbingo táłts'éiníshóód, nít'éé' łóó' dantsxaazígíí neeznádiindóó ba'aan ashdladiindóó ba'aan táá' lá. Azhą́ t'óó ahayóí lá nidi, łóó' bee hahaltsósí t'áadoo neheezdláad da lá. 12Jesus áhodííniid, Hágo, da'ohsą́. Áko hódahooł'aahii t'áadoosti'ee, Háí lá ánít'į́? t'áadoo dahodííniidí da, háálá Bóhólníihii át'į́įgo bił béédahózin. 13Áádóó Jesus dah diiyáago łees'áán néidiinilgo hataiznii', índa łóó' ałdó'. 14Dadziztsą́ą́dę́ę́' náázdiidzáádóó bik'ijį' díí bił k'ad táadi hódahooł'aahii bich'į' yit'íní ánízh'diilyaa.
Jesus áádóó Peter
15Da'jííyą́ą'go Jesus, éí Sáíman Peter áyidííniid, Sáíman, John biye' nílíinii, da' díidíígíísh biláahgo ayóó'áshííní'ní? Áko, Aoo', Bóhólníihii; ayóó'ánósh'níigo nił bééhózin, bizhdííniid. Áádóó ánááhodoo'niid, Shidibé yázhí ba'íłtso'. 16Naakidi aleeh góne' ánááhodoo'niid, Sáíman, John biye' nílíinii, da' ayóósh'áshííní'ní? Áko ánáábizhdi'ní, Aoo', Bóhólníihii; ayóó'ánósh'níigo nił bééhózin. Áádóó ánááhodoo'niid, Shidibé baa áhólyą́. 17Táadi azlį́į́' góne' ánááhodoo'niid, Sáíman, John biye' nílíinii, da' ayóósh'áshííní'ní? Táadi Peter, Da' ayóósh'áshííní'ní? ho'doo'niidígíí biniinaa yíní biih níjíítłizh. Áko ábizhdííniid, Bóhólníihii, t'áá ałtsoní nił bééhózin; ayóó'ánósh'níigo nił bééhózin. Jesus ánááhodoo'niid, Shidibé ba'íłtso'. 18T'áá aaníí, t'áá aaníígóó ándishní, Ániid naniná yę́ędą́ą́' áká nánílzisgo t'áá ni nínízingóó nanináá nít'éé', nidi hasínítihgo ałts'ą́ąjį' k'ídidíílchił, áko ła'da áká nidoosisgo doo deesháał da nínízin yę́ęgóó nidoołtééł. 19Díí kót'éego dazdootsaałígíí bee Diyin God baa hozhdoonih biniyé yee hach'į' haadzíí'. Áádóó kóhodííniid, Shikéé' yínááł.
Íhooł'aahii ayóó'óó'níinii
20Áko Peter nídzízyiz, nít'éé' íhooł'aahii Jesus ayóó'ábó'nínígíí hakéé' yigáałgo jiiłtsą́, éí da'jííyą́ą́ nít'é'ígi Jesus biyid binahjį' dziztį́įgo,#Jn. 13:25. Bóhólníihii, háishą' ninándidoo'ááł? bizhdííniidii. 21Áko Peter éí yiyiiłtsą́ągo Jesus áyidííniid, Bóhólníihii, díí diné éí hait'ée doo? 22Jesus áhodííniid, Náánísdzáajį' háni'dii shiba' nijighá hwíínísh'níigo, éí daashą' díílííł? Ni éí shikéé' yínááł! 23Áko éí íhojiił'aahii doo dazdootsaał da ha'nínígíí ałk'isóó bitahgóó adahideezdláád, nidi Jesus, Éí doo dazdootsaał da, doo dííniid da nidi, Náánísdzáajį' háni'dii shiba' nijighá hwíínísh'níigo, éí daashą' díílííł? dííniid.
24Díí íhooł'aahii haa hwiinít'ínígíí hoł bééhózingo baa hojilne', áádóó t'áá hó díidíígíí bee ak'e'jishchį́, áko baa hojilne'ígíí éí t'áá aaníigo nihił béédahózin.
25Nidi Jesus yaa naayáii náánáła' t'óó ahayóí ałdó' yaa naayá; éí t'áá ałtso bee ak'e'ashchį́įgo naaltsoos t'óó ahayóí dooleeł, nahasdzáán nidi bikáa'gi doo bá haz'ą́ą da doo sha'shin nisin.
Currently Selected:
JOHN 21: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
