LUKE 11

Jesus sodizin yína'niłtin

(Mt. 6:9-13; 7:7-11)

1Ákódzaago łahgo haz'ą́ą́ léi'gi Jesus sozdilzin, nít'éé' áá hodzoost'įįdgo hóhooł'aahii ła' áhodííniid, Bóhólníihii, sodadiilzin dooleełígíí bínanihiníłtin, t'áá John bídahooł'aahii sodizin yíneineestą́'ígi át'éego. 2Áko ábizhdííniid, Sodadołzingo kódadohní:

NihiTaa' [yá'ąąshdi honílóonii], nízhi' diyingo óolzin le'.

Bee nóhólníihii náásgóó k'ee'ąą yilzhish le'.

[Bee íinínízinii t'áá yá'ąąshdi ááníłígi át'éego nahasdzáán bikáa'gi ááníił le'.]

3Ch'iyáán t'áá ákwíí jį́ niha'iyíłtsódígíí t'áá ákwíí jį́ nihaa hidí'aah.

4Áádóó nich'į' nida'ayiilzíhígíí nihá yóó'anáhidí'aah,

háálá t'áá nihí nihich'į' bąąhági ádaaníiłii t'áá ałtso bá yóó'anídahidiit'aah,

áádóó nihí hodínóotahjį' nihi'óółnííh lágo,

[nidi bąąhági át'éii bits'ą́ąjį' yisdánihiyínííł].

5Áádóó ábizhdííniid, Háishą' nihí ła' nihik'is hólǫ́ǫgo tł'é'ííłníi'go baa nooyáago ábididoohniił, Shik'is, bááh táa'go sha'nínííł, 6háálá shik'is ła' nízaadę́ę́' yigáałgo shaa níyá, áko t'áadoo biyaa nooshkáłí da? 7Nít'éé' wóne'dę́ę́' haadzíi'go ádidooniił, T'áadoo shaa nánít'íní; t'áá íídą́ą́' dádi'níłkaal, áádóó sha'áłchíní bił da'ashhosh; doo nídoosh'néehgo na'óstsóód át'ée da. 8Ánihidishní, Azhą́ hak'is nilį́į nidi doo nízhdidoo'nahgo baz'doołtsoł da, nidi doo diiłheełgóó adókeedígíí biniinaa nízhdidoo'nah, áko t'áá yinízinígi ánéelt'e'go baz'doołtsoł. 9Áádóó ánihidishní, Da'íínóhkeed, áko deínóhkeedígíí nihaa dadoolyééł; hádaaht'į́, áko hádaaht'ínígíí bik'ídadoohkah; dáádílkał nídanołts'in, áko nihá ąą ádadoolnííł. 10Háálá t'ááłá'í jinítínígo dajókeedii éí haa dahalyé, hádajit'ínígíí bik'ídajiikááh, índa dáádílkał nídazniłts'inígíí há ąą ádaalne'. 11Háishą' nihitahdóó azhé'é nilíinii ła' biye' éí [łees'áán bíyííkeedgo, da' tséésh yeidoo'ááł, doodaii'] łóó' bíyííkeedígíísh tł'iishda yeidoołtééł, 12doodaii' naa'ahóóhai biyęęzhii bíyííkeedgo, da' séígo'ísh yéídoołtééł? 13Áko nihí doo yá'ádanoht'ée da nidi, aa doolyéełii yá'ádaat'éehii nihada'áłchíní baa dadoohłéełgo nihił béédahózin, éí bilááh át'éego nihiTaa' yá'ąąshdi hólóonii Níłch'i Diyinii bídayókeedii yeidiyii'aah.

Jesus áádóó Béíyalzííbab

(Mt. 12:22-30; Mk. 3:20-27)

14Łah níłch'i doo yájíłti'góó áhoolaii hayi'dóó hainííłchą́ą́', áko níłch'i bi'iiníziinii hanoolchą́ą'go doo yájíłti'ígíí yájíłti' nídzísdlį́į́', áko diné yíl'áhígíí t'óó bił adahóóyóí. 15Nidi ła' ádadííniid, Níłch'i bida'iiníziinii binanit'a'í Béíyalzííbab yolyéii bee níłch'i bida'iiníziinii ayi'dę́ę́' hahizhniłkaad lá,#Mt. 9:34; 10:25. 16nidi náádaała', hákada'iiłhilgo nidahódééłkidgo ádaaní, Yá'ąąshdę́ę́' bee ééhózinii ła' dadíníil'įįł.#Mt. 12:38; 16:1; Mk. 8:11. 17Nidi yaa nitsídaakeesígíí hoł bééhózingo ábizhdííniid, Ła' hooghandóó danilíinii t'áá bí ałk'i néijahgo éí t'áá ádzaaí neheleeh, áádóó łahgo dah oonééł t'áá bí ałk'i néijahgo t'óó ałts'á'áldah doo. 18Séítan ałdó' t'áá bí ák'inéilwodgo, hait'éegoshą' áko bee bóhólníihgo bił haz'áanii dina' dooleeł? Háálá, Béíyalzííbab bee níłch'i bida'iiníziinii ayi'dę́ę́' hahizhniłkaad, dashidohní. 19Áko Béíyalzííbab bee níłch'i bida'iiníziinii ayi'dę́ę́' hahinishkaadgo, ákoshą' nidanohtinígíí éí háí bibee adziilii shį́į́ bee ayi'dę́ę́' hadeiniiłkaad? Éí bąą éí t'áá bí nihaa nídadóot'įįł. 20Nidi Diyin God bílázhoozh bee níłch'i bida'iiníziinii ayi'dę́ę́' hahinishkaadgo, áko éí bee t'áadoo bahat'aadí Diyin God bee bóhólníihgo bił haz'áanii bił nihaa honíyá. 21Diné bidziilii éí yee naabaahii t'áá át'é bee hólǫ́ǫgo, t'áá bí bighan yich'ą́ą́h naagháago binaalye'é hazhó'ó sinil łeh, 22nidi diné náánáła' halááh ábóodziilgo hak'iilwodgo hak'eh didoodleeł, áko bee nijibaahii beijólíhígíí haghaidoo'nił, áádóó hanaalye'é ałts'ádeidooniłgo neidoonih. 23Diné doo shich'ijí jílínígíí éí shits'ą́ą́jí jílį́,#Mk. 9:40. áádóó doo shił ahanizh'niiłkaadígíí éí ta'izhnoołkaad.

Níłch'i nichxǫ́'íii nádááh

(Mt. 12:43-45)

24Níłch'i nichxǫ́'ígíí diné yii'dę́ę́' haagháahgo, háádoolyįhgi haintáago tó ádaadingóó hahidiighááh, nidi doo ła' yik'éghááhgóó ániih, Shighandóó ch'íníyáhígóó nídeeshdááł. 25Áko nádáahgo nahashzhóo'go índa hasht'ehoolyaago yik'éghááh. 26Áko dah náádiidáahgo, náánáła' níłch'i tsosts'idgo t'ah biláhígo doo yá'ádaashóonii yił nákah, áko éí yił hwiih yikahgo hwii' kéédahat'į́į łeh, áko diné áłtséédą́ą́' át'éhę́ę t'óó nówehda át'įįh.

Ts'ídá t'áá aaníí bik'ihojidlí yolyéii

27Kójíníigo nít'éé' áłah ílínígíí bitahdę́ę́' asdzání léi' ła' hadoolghaazhgo áháłní, Nishchínígíí índa yíníłt'ódígíí éí bik'ihojidlí! 28Nidi ázhdííniid, Ákondi Diyin God bizaad deidiits'a'go yik'eh dahół'ínígíí éí aláahgo bik'idahojidlí!

Doo yá'áshxǫ́ǫ́góó ahoolchíiłii bee ééhózinii hadeintá

(Mt. 12:38-42)

29Áko diné hach'į' ahinééltihgo ayázh'niiłti'go ájíní, Díí k'ad dine'é doo yá'át'ééhgóó ahoolchíiłii bee ééhózinii hadeintá,#Mt. 16:4; Mk. 8:12. nidi bee ééhózinii doo ła' bá ádoolníił da, t'áá hazhó'ó Jónah Diyin God yá halne'ii bee ééhózinii silį́'ígíí t'éiyá. 30Háálá t'áá Jónah éí Níneveh dine'é yá bee ééhózinii silį́'ígi át'éego,#Jon. 3:4. t'áá ákót'éego Diné Silį́į'ii ałdó', díí k'ad ahoolchíłígíí bá bee ééhózinii dooleeł. 31Kéyah Shádi'ááh hoolyéedi asdzání naat'áanii jílį́į́ nít'é'ígíí díí k'ad ahoolchíłígíí ánihwiit'aah beiníłką́ądi bił náázhdidoojahgo bá nihozhdoo'ááł, háálá Sálaman bibee hódzáanii yízdóołts'įįł biniyé ni' nineel'ą́ą́dę́ę́' jiníyá,#1Kgs. 10:1-10; 2Chr. 9:1-12. nidi jó'akon, Sálaman yiláahgo ayóó át'éii k'ad kwe'é naaghá. 32Níneveh dine'é yę́ę ánihwiit'aah beiníłką́ądi díí k'ad ahoolchíłígíí yá nidahodoo'áałgo yee deidoozįįł, háálá Jónah éí Diyin God bizaad yaa hoolne'ígíí binahjį' łahgo át'éego Diyin God yich'į' tsíńdadeezkéezgo dayoosdląądgo ádił nida'iiszí'ígíí yits'áhaaskai,#Jon. 3:5. nidi jó'akon, Jónah yiláahgo ayóó át'éii éí kǫ́ǫ́ naaghá.

Ats'íís yá adiníłdíinii

(Mt. 5:15; 6:22,23)

33Diné doo ła'da bee hool'iní yidiiłtłi'go nahont'ingi nií'aah da, doo nidi tsits'aa' yił yaa nií'aah da, nidi bá ya'ii'áhígi dah yi'ááh,#Mt. 5:15; Mk. 4:21; Lk. 8:16. áko yah ahikáhígíí bá adinídíingo da'oo'į́į łeh. 34Bee hool'iní bee adinídínígi át'éego nináá' éí nits'íís bee bá adinídíín, nináá' yá'át'éehgo, nits'íís t'áá át'é bił hool'in, nidi nináá' doo yá'át'ééhgóó, nits'íís t'áá át'é bił chahałheeł. 35Éí bąą ádaa áhólyą́, doodago adinídíín niyi'di hólónígíí éí bił chahałheeł doo. 36Éí bąągo t'áá át'é adinídíín bee nits'íís bił hool'ingo t'áadoo łahjį' bił chahałheełí, t'áá bee hool'iní i'dííłdláadgo ná adiníłdínígi át'éego t'áá át'é adinídíin dooleeł.

Jesus éí Férisii danilíinii áádóó bee haz'áanii yínda'niłtinii yideezteh

(Mt. 23:1-36; Mk. 12:38-40)

37T'ah yájíłti'go, nít'éé' Férisii danilíinii ła' adiidį́į́ł hodííniid, áádóó yah ajííyáago azhdooyį́į́ł biniyé dasneezdá. 38Nít'éé' Férisii honíł'į́įgo t'áadoo átsé Jew dine'é binahagha' bik'ehgo tá'ázdígisí izh'niiyą́ą'go t'óó bił ahóóyóí. 39Áko Bóhólníihii áhodííniid, Jó, Férisii danohłíinii, bee adlání índa łeets'aa' bikáá'dę́ę́' t'éiyá táádaahgis, nidi agha'ílyé índa bąąhági át'éii nihiyi' hadadeezbin. 40Doo ádahalyáanii danohłíinii, da' akáá'dę́ę́' áyiilaaígíísh ałdó' doo ayi'dę́'ígíí áyiilaa da? 41Nidi ayi'diígíí badahojoobá'íii baa dahidoohnił, áko t'áá ałtsoní nihá chin bąąh ádin doo.

42Nidi Férisii danohłíinii, doo hojooba' ájíníi da! Háálá tólchiin áádóó ru yolyéhígíí índa ch'il t'áá ałtah áát'eełii neeznáá daníjoolígíí éí t'ááłá'ígo shijool Diyin God baa nídahidoh'aah,#Lev. 27:30. nidi ts'ídá t'áá ákǫ́ǫ́ át'éego áhooníiłii índa Diyin God ayóó'óó'níinii doo baa nídaaht'į́į da; díí akée'di ch'ét'ánígíí ádaahníił doo nít'éé', ła'ígíí t'áadoo baa dayoohnéhí. 43Nihí Férisii danohłíinii, doo hojooba' ájíníi da! Háálá kin bii' áłah nída'adleehí dabiyi'góó aląąjį' naazíinii bá nidahaz'ą́ą́góó nihił ayóó ádahoot'é índa nida'iiniihgóó k'é danihidi'níigo nihił ayóó ádaat'é. 44Bee haz'áanii bínda'nołtinii áádóó Férisii danohłíinii, t'óó ádahodoł'íinii, doo hojooba' ájíníi da! Háálá dajishcháá' doo daat'íinii nidahonohłin, áko éí diné t'áadoo bił béédahóziní yikáá' naaldeeh.

45Bee haz'áanii yínda'niłtinígíí ła' haadzíi'go áhodííniid, Na'nitiní, díí háínídzí'ígíí bee t'óó baa yáhásinígi ánihidííníniid. 46Áko ázhdííniid, Bee haz'áanii bínda'nołtinii, nihí ałdó' doo hojooba' ájíníi da! Háálá nihí bee haz'áanii diné bide ádaahłaa, nidi t'áá nihí éí nihílázhoozh t'ááłá'í nidi doo bee bidadinołníih da. 47Doo hojooba' ájíníi da! Háálá danihizhé'é yę́ę Diyin God yá dahalne'ii nideistseed. Nihí k'ad Diyin God yá dahalne'ii yę́ę bee béédahaniih biniyé kin danizhónígíí nidaahnilgo ákóne' yóó'áńdaahdle'. 48Áko danihizhé'é yę́ę yaa naaskaígíí t'áá aaníí baa dahołne'go bee lą́ nida'iyohłeeh, háálá éí dahalne'ii nideistseed índa nihí bee béédahaniih biniyé kin danizhónígíí nidaahnilgo ákóne' yóó'áńdaahdle'. 49Éí bąą Diyin God bibee hódzáanii ałdó' ádííniid, Diyin God yá dahalne'ii índa daal'aadii hach'į' dadeesh'aał, ła' nidazdoołtsił, áádóó ła' éí atídazhdoolííł, 50áko nahasdzáán niit'ą́ą́dóó wóshdę́ę́' Diyin God yá dahalne'ii t'áá ałtso dabidił dadeezna'ígíí díí k'ad oochíłígíí yá ninádínóodah, 51t'áá níléí Éíbel#Gen. 4:8. bidił deezna' yę́ędóó níléí Zekaráíyah#2Chr. 24:20,21. bidił deezna' yę́ęjį', éí bikáá' náá'iiniihí índa kin bii' sohodizin bita'gi ábi'disdįįdígíí. T'áá aaníí ánihidishní, Díí oochíłígíí éí yá ninádínóodah. 52Bee haz'áanii bínda'nołtinii, doo hojooba' ájíníi da! Háálá óhoo'aah bibee ąą ńdítį́hí yóó'adasootą́; t'áá nihí nidi doo yah ahisoohkai da, índa ła' yah ahidookahígíí ałdó' dasinoołtł'ah.

53Áádóó díidí bee hadziidziihgo, bee haz'áanii yínda'niłtinii índa Férisii danilíinii hádahodiilchįįł danízingo índa tsístł'ah dahodíníilchééł danízingo t'áá bizáákáágóó nidahódééłkid, 54hazaad ła' yee hákada'iiłhilgo haa nahaakai, éí yee hak'i dahodidoo'ááł biniyé.

Currently Selected:

LUKE 11: NVJOB

Highlight

Copy

Want to have your highlights saved across all your devices? Sign up or sign in

Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).

Learn More About Navajo Bible