LUKE 13
13
Bąąhági át'éii bee ádaa ákohwiindzingo bits'á'iildééhjí, doodaii' í'dooldįįłjí
1Ts'ídá ákohgo ła' Jesus yił dahoolne'go ádaaní, Gáliliidóó dine'é nááda'jiisnii'go Páílat nahastseedgo náádajiisnii'ígíí hadił bił taozlį́įgo áyiilaa. 2Áádóó bich'į' hadzoodzíi'go ábizhdííniid, Éí Gáliliidóó dine'é ti'dahooznii'ígíí éí Gáliliigi dine'é t'áá ałtso yiláahdi bąąhági ádaat'į́įgo biniinaa ádzaásh danohsin? 3Dooda, nihidishní, nidi nihibąąhági át'éii doo łahgo át'éego Diyin God bich'į' tsíńdadookéezgo yóó'adasidoo'ą́ą́góó nihí ałdó' t'áá ákót'éego ádadoohdįįł. 4Doodaii' da' tseebííts'áadah yilt'éego Sailóomgi dego nízaadgóó astł'ingo ya'ii'áhígíí bik'iiłdáazgo nabistseedii, da' éísh Jerúsalemgi kéédahat'ínígíí t'áá ałtso yiláahgo bąąhági ádaadzaa danohsin? 5Ánihidishní, Dooda, nidi nihibąąhági ádaat'éii doo łahgo át'éego Diyin God bich'į' tsíńdahidookéezgo yóó'adasidoo'ą́ą́góó nihí ałdó' t'áá ákót'éego ádadoohdįįł.
Fig sikaadii bineest'ą' bąąh ádinii binahjį' hane' bee ak'idi'dootį́įłii
6Áko díí hane' bee ak'idi'dootį́įłii bee hadzoodzíí': Diné ła' bich'il na'atł'o'ii bitahgi fig k'iidíílá, áko bineest'ą' bąąh hólǫ́ǫ daats'í nízingo yąąh háidéé'į́į́', nít'éé' t'áadoo ła' yik'íníyáa da. 7Nít'éé' ch'il na'atł'o'ii yaa áhályáanii áyidííniid, Jó'akon, díí k'ad táá' nááhai díí tsin bineest'ą' bąąh hááníshtaah, nidi doo ła' yiistséeh da. K'íníłne'; ha'át'íishą' biniyé dá'ák'ehgi t'áadoo biniyéhígóó íí'á? 8Áádóó yich'į' haadzíi'go ání, Shinanit'a'í, k'ad anáá'niihaígíí biyi' ałdó' t'áadoo baa náhát'íní dooleeł, áko bitsį́į́góó da'alį́į́' bichaan bił hááhodínéeshchał. 9Áádóó bik'ijį' bineest'ą' hazlį́į́' ládą́ą́', yá'át'éeh dooleeł, nidi doo bineest'ą' haleehgóó índa k'ídííłniił.
Háá'áyį́į́h jį́į́ góne' asdzání k'ínábi'disdǫǫd
10Łah háá'áyį́į́h jį́į́ góne' kin bii' áłah ná'ádleehgi nazh'nitin nít'éé'. 11Áko asdzání éí níłch'i bi'iiníziinii hayi'di hólǫ́ǫgo yaa náhootihgo hąąh dahas'ą́ągo tseebííts'áadah nááhai; éí ts'ídá doo k'ézdongo woozįįh át'ée da lá. 12Áko Jesus hoołtsą́ągo, hágo hodííniidgo áháłní, Asdzání, doo nidziilígíí bits'ąą néédoochid. 13Áádóó hak'i diilnii', t'áá áko k'íńdzísdǫǫdgo Diyin God baa hodziznih. 14Nidi háá'áyį́į́h jį́ azlį́į́' góne' Jesus éí asdzání náázdiisáhígíí biniinaa áłah ná'ádleehgo á dah náńdaahígíí, doo bił hóózhǫǫdgóó diné áłah silį́'ígíí áyidííniid, Hastą́ą́h jį́ t'éí na'anishgo bee haz'ą́; ákóne' nídaahkahgo hadaałt'é áńdanihi'dilne' doo, háá'áyį́į́h jį́į́ góne' éí dooda.#Ex. 20:9,10; Deut. 5:13,14. 15Áko Bóhólníihii hach'į' hanáánáádzíi'go áhodííniid, Nihí t'óó ádahodoł'íinii! Da' t'ááłá'í nootínígoósh doo háá'áyį́į́h jį́į́ góne' nihibéégashii, doodaii' nihitélii bighandóó k'ééda'oh'a'go, áádóó taah nídaahdlóos da? 16Da' ákoósh díí asdzání, Éíbraham bitsi' nilį́įgo, Séítan t'áá yaa biztįhgo tseebííts'áadah nááhai nít'é'ígíí, háá'áyį́į́h jį́į́ góne' doo k'éédooldǫǫł da? 17Áko díidíígíí bee hadzoodzíi'go, hak'i dahodii'aahii t'áá ałtso ádaa yádaniidzį́į́', áádóó ayóó ádaat'éii ájoolíłígíí biniinaa diné áłah silį́'ígíí t'áá ałtso baa bił dahóózhǫǫd.
Mástad bílástsii' binahjį hane' bee ak'idi'dootį́įłii
(Mt. 13:31,32; Mk. 4:30-32)
18Éí bąą ázhdííniid, Diyin God bee bóhólníihgo bił haz'áaniishą' ha'át'íí nahalin? Ha'át'íishą' bił ahąąh nideeshniłgo binahjį' hodeeshnih? 19Jó, díí nahalin: Diné ła' mástad bílástsii' néidii'ą́ągo bidá'ák'ehgi k'iidíílá, áádóó dínéesą́ągo tsin silį́į́', áko tsídii nidahat'ahgo tsin bits'áoz'a' bąąhgóó bit'oh ádayiił'įįh.
Bááh bee niilyółí binahjį' hane' bee ak'idi'dootį́įłii
(Mt. 13:33)
20Áádóó ánáázhdoo'niid, Diyin God bee bóhólníihgo bił haz'áaniishą' ha'át'íí bił ahąąh nideeshniłgo binahjį' hodeeshnih? 21Jó éí, asdzání ła' bááh bee niilyółí néidii'ą́ągo ak'áán táadi haaką́ągo yił tayooznii'go niilyółígíí nahalin.
Áhoołts'óózígo yah ahóót'i'
(Mt. 7:13,14,21-23)
22Áko dah náázdiidzá áádóó kin hadaas'áágóó índa kin naazhjaa'góó nazh'nitingo Jerúsalemgóó joogááł. 23Áko diné ła' áhodííniid, Bóhólníihii da' yisdáhaaskaígíísh t'áá díkwíí dooleeł? Áádóó ábizhdííniid, 24Áhoołts'óózígo yah ahóót'i' góne' yah adahidoohkahgi yéego hádaaht'į́, háálá ánihidishní, T'óó ahayóí ákóne' yah adahidookahgi ch'ééh ádeił'į́į doo, nidi doo yídaneel'ą́ą da doo. 25Kin bee bóhólníihii nídidoo'nahgo dádi'doołkał, áko nihí t'áá tł'óo'di nidasoozį́įgo, dáádílkał nídanołts'ingo ádadohníi doo, Bóhólníihii, [Bóhólníihii,] nihá ąą ánílééh. Áko ánihididooniił, Nidaahkaidę́ę́' doo shił bééhózin da. 26Áko índa ádadidoohniił, Ninááł da'iidą́ą́' áádóó da'iidlą́ą́', áádóó nihikintahgi na'nítin nít'éé'. 27Nidi ázhdidooniił, Ánihidishní, Nidaahkaidę́ę́' doo shił bééhózin da. Bąąhági át'éii baa deínóhkáahii t'áá ánółtso, shits'ánóhkááh!#Ps. 6:8. 28Éíbraham áádóó Áízak áádóó Jéíkab índa Diyin God yá dahalne'ii t'áá ałtso Diyin God bee bóhólníihgo bił haz'ą́ągi deidoołtsééł, nidi nihí t'éiyá yówehjį' anihi'diistł'íid dooleeł, áadi daahchxa doo, índa nihiwoo' ahídadołk'ash dooleeł.#Mt. 22:13; 25:30. 29Ha'a'aahdę́ę́' áádóó e'e'aahdę́ę́' áádóó náhookǫsdę́ę́' índa shádi'ááhdę́ę́' diné áłah dooleeł, áádóó Diyin God bee bóhólníihgo bił haz'ą́ądi bikáá' adání yich'į' dah dadínóobįįł.#Mt. 8:11,12. 30Áádóó jó'akon, ła' da'akéédę́'ígíí da'alą́ąjį' dooleeł, índa ła' da'alą́ąjį'ígíí da'akéédę́ę' dooleeł.#Mt. 19:30; 20:16; Mk. 10:31.
Jesus éí Jerúsalem yąąh bíni'
(Mt. 23:37-39)
31Ts'ídá ákohgo Férisii danilíinii ła' yíkaigo ádahodííniid, Nílááh, kodóó háájída dínááh, háálá Hérad hodiyeesxééł nó'ní. 32Nít'éé' Jesus kóhodííniid, Éí mą'ii bina'adlo'í ni' kóbidohní, Jó'akon, díí jį́ índa yiską́ągo níłch'i bida'iiníziinii ayi'dę́ę́' hadahinishkaad áádóó hadaałt'é áńda'ashdle' doo, índa táá' yiską́ągo shinaanish ádįįh. 33Ákondi díí jį́ áádóó yiską́ągo índa náábiiskání shá honít'i'góó yisháał doo; doo yee' Diyin God yá halne'ii ła' Jerúsalemdóó tł'óo'di daotsa' át'ée da. 34Jerúsalem, Jerúsalem nílíinii, Diyin God yá dahalne'ii naniłtseedii, áádóó nich'į' nídabi'dil'aahígíí bił nidziyíłne'ii! T'áá naa'ahóóhai bit'a' biyaa góne' biyázhí anéí'niłígi át'éego haadashą' néelą́ą'di na'áłchíní áłah ánéishdlaa doo nít'éé', nidi éí doo danohsin da! 35Jó'akon, nihighan yóó'adíí'ą́. Áko ánihidishní, Kodóó doo náádashiidoołtséeł da, Bóhólníihii bízhi' bee bi'dójíigo yigáłígíí bik'ihojidlíi doo!#Ps. 118:26. dadooniidgo índa.
Currently Selected:
LUKE 13: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
