LUKE 9

Jesus bídahooł'aahii naakits'áadahígíí dayííł'aad

(Mt. 10:5-15; Mk. 6:7-13)

1Áko naakits'áadahígíí áłah ájiilaago níłch'i bi'iiníziinii t'áá ałtso ayi'dę́ę́' hadeiniiłkaad doo biniyé, índa bąąh nidahałniihii doo át'éhí da áńdeidle' doo biniyé bee adziilii áádóó bee óhólnííh bitaazdeez'ą́, 2índa Diyin God bee bóhólníihgo bił haz'áanii baa dahojilne' doo biniyé, áádóó hadaałt'é áńdazh'doodlííł ałdó' biniyé adziis'a'. 3Áko ábizhdííniid, Dasidoohkaigóó ha'át'íhída t'áadoo dayínóhłéhí, gish dooda, azis bee na'aljidí dooda, yist'éí dooda, béeso nidi dooda, éé' naakigo ałdó' dooda. 4Áko t'áá haa'ída hooghangi yah adahisoohkaigo, dah náádahidoohkaijį' t'áá ákwii nahísóotą́ą doo. 5T'áá háiida doo danihinízinígíí éí bee hwéédahózin doo biniyé kin haal'áádóó dah náádahidoohkáahgo nihikee' łeezh bąąh nidahinołdéeh doo.#Lk. 10:4-11; Acts 13:51. 6Áko dashdiikaigo kin dah naazhjaa'góó ch'íjiikáahgo, t'áá át'éé nít'éé' hane' yá'át'éehii baa dahojoolne', áádóó t'áá ałtsogóó hadaałt'é áńda'jiidlaa.

Hérad t'óó bił haada

(Mt. 14:1-12; Mk. 6:14-29)

7Hérad, naat'áaniishchíín nilíinii, ádahóót'įįdígíí t'áá ałtso yiyíínii'go bik'ee t'óó bił haada, háálá ła' ádaaní, John yę́ę daaztsą́ą́dę́ę́' náádiidzáá lá, 8ła' éí ádaaní, Iiláíjah yę́ę nádzáá lá, áádóó náádaała' éí, Ałk'idą́ą́' Diyin God yá dahalne'ii yę́ę ła' daaztsą́ą́dę́ę́' náádiidzáago át'į́į́ lá, náádadi'ní.#Mt. 16:14; Mk. 8:28; Lk. 9:19. 9Áko Hérad ání, John la' bitsiits'iin kíníłne' ni', ákodashą' díí háí át'į́įgo kót'éego baa hodiists'a'? Áko hwiideestsééł hó'ní.

Diné ashdladi mííl yilt'éego ba'íltsood

(Mt. 14:13-21; Mk. 6:30-44; Jn. 6:1-14)

10Áko daal'aadii nákaigo, ádáát'įįdígíí yee hoł dahoolne'. Áko dashdii'eezhgo Bethséyida hoolyéego kin haal'áhígíí bit'áahjį' t'áá sáhí bił jíkai. 11Diné t'óó ahayóí éí bił béédahoozingo, hakéé' yíkai, áko baa hoł hózhǫ́ǫgo Diyin God bee bóhólníihgo bił haz'áanii bee bich'į' hadzoodzíí', áádóó hadaałt'é nídeeshdleeł danízinígíí éí hadaałt'é áńdajiidlaa. 12Áko doozhǫǫgo yaa adeez'ą́ągo naakits'áadahígíí haa yíkaigo ádahodííniid, Diné yíl'áhígíí nídayínóhkááh bidiní, áko kin naazhjaa'góó índa kéyah binaagóó ahidookah, áadi dabiidoołkááł, áádóó ch'iyáán nideidiyoołnih, jó, díí doo naagháhígi ádeiit'į́. 13Nidi ábizhdííniid, T'áá nihí bada'nołtsóód. Nít'éé' ádaaní, Łees'áán t'áá ashdla'í índa łóó' t'áá naakíhí t'éiyá nideijaah; t'óó daats'í níláhgóó diikahgo díí diné t'áá ałtso bá ch'iyáán nidahidiilnih. 14Háálá ashdladi mííl daats'í diné ánéelą́ą́' lá. Áko hódahooł'aahii ábizhdííniid, Ashdladiin daníjaa'go dinohbįįh dabidohní. 15Ákódabizhdííniidgo t'áá ałtso dadineezbin. 16Áko łees'áán ashdla'ígíí índa łóó' naakiígíí nízhdiinilgo dego yá'ąąshgóó dzidéez'į́į'go sozdoolzin, índa nijiitíihgo hódahooł'aahii bitaa jiniih, éí diné yíl'áhígíí yitaa deidoonih biniyé. 17Áko da'jííyą́ą'go t'áá ádzíłtso hwiih dadzizlį́į́'. Áádóó nidahaasti'go bi'oh da'jííyą́'ígíí náádajiizdláa'go ts'iizis naakits'áadah hadazdeesbin.

Peter éí, Christ Diyin God biYe' nílį́, yidííniid

(Mt. 16:13-19; Mk. 8:27-29)

18Łah hódahooł'aahii t'éí bił nijikaigo t'áá sáhí sozdoolzin, nít'éé' ábijiní, Diné ádaaníigoshą' háí ájít'į́ dashiłní? 19Áko hoł dahoolne'go ádaaní, John Tó Yee Asį́įhii yę́ę át'į́, nidi ła' éí, Iiláíjah át'į́, daaní; náánáła' éiyá, Ałk'idą́ą́' Diyin God yá dahalne'ii yę́ę ła' daaztsą́ą́dę́ę́' náádiidzáago át'į́, daaní.#Mt. 14:1,2; Mk. 6:14,15; Lk. 9:7,8. 20Áko ábizhdííniid, Nidi nihíshą' éí háí ájít'į́ dashidohní? Peter áhodííniid, Diyin God biChrist#9:20 Christ éí, Yiyíísį́į'ii, jiníigo óolyé. Jn. 6:68,69. nílį́.

Jesus bidi'yoolyéłígíí yaa halne'

(Mt. 16:20-28; Mk. 8:30—9:1)

21Nidi t'áá íiyisí hazhó'ó bee bich'į' hadzoodzíi'go ábizhdííniid, T'ááká diné ła'da díí bee bił dahoołne' yíila', 22kójíníigo, Diné Silį́į'ii éí ts'ídá lą'ígóó ti'hwiidoonih, áko diné yá aląąjį' naazíinii áádóó aláahgo nááda'iiłniihii índa bee haz'áanii yínda'niłtinii doo dahodínóozįįł da, áko hodi'yoolyééł, áádóó tágí jį́ aleeh góne' nááhodi'doodlááł.

23Áko t'áá ałtso ábizhdííniid, Diné t'áá háiida shikéé' dashdiigháhígíí éí ádeizhdiyoo'nah, áádóó t'áá ákwíí jį́ t'áá hó hatsin ałnáoszid jootį́įł doo, áádóó shikéé' joogáał doo.#Mt. 10:38; Lk. 14:27. 24Háálá t'áá háiida jiinánígíí bąąh hą́ą́sniizį́į'go éí yóó'azhdootłish, nidi t'áá háiida shí shiniinaa jiinánígíí ninázhdiní'ą́ągo éí jiináa dooleeł.#Mt. 10:39; Lk. 17:33; Jn. 12:25. 25Háálá diné ła'da nahasdzáán t'áá si'ą́ą́ nít'éé' hóó' dooleeł biniyé hwii' sizíinii yóó'azhdíí'ą́ągo, doodaii' t'áá ákójínéehgo jiinánígíí yóó'azhdíí'ą́ągo, haa néelą́ą́' há bínéidoodił? 26Háálá t'áá háiida shí índa shizaad baa yázniizį́'ígíí, éí Diné Silį́į'ii t'áá bí bee bits'ádi'nílíidii áádóó biTaa' índa diyingo nidaal'a'í bee bits'ádi'nílíidii yił níyáago hó ałdó' haa yádínóozįįł. 27Nidi t'áá aaníígóó ánihidishní, Kǫ́ǫ́ naazínígíí ła' Diyin God bee bóhólníihgo bił haz'áanii t'áadoo dayiiłtséhí aniné ts'ídá doo deidoolįh da.

Łahgo ázhnoolningo áho'diilyaa

(Mt. 17:1-8; Mk. 9:2-8)

28Díí ádahodoo'niidóó bik'ijį' tseebíí daats'í neiłka' góne' Jesus éí Peter áádóó John índa James yił dah diikaigo sozdidoolzįįł biniyé dził bighą́ą'jį' hadziskai. 29Áko sozdilzingo, hanii'jį' łahgo ánoolningo ályaa, áádóó ha'éé' łigaigo bits'ádi'nílííd silį́į́'. 30Áádóó jó'akon, diné nidilt'éego, Mózes índa Iiláíjah éí Jesus yił ałch'į' yádaalti'go, 31éí ałdó' t'áadoo bahat'aadí bits'ádi'nílíidgo bił nidzizį́. Áko Jerúsalemgi Jesus dazdootsaałgo bee nihoot'áanii łazh'doolíłígíí yaa yádááłti'. 32Peter índa yił naakaígíí t'áá íiyisí bił daniizį́į́', nidi t'áá dadéez'į́į'go hats'ádi'nílídígíí áádóó diné naaki hoł sizínígíí dayiiłtsą́. 33Ákódzaago diné éí Jesus yits'ą́ą́' dah dii'áazhgo Peter éí Jesus áyidííniid, Bóhólníihii, dooládó' yá'át'éeh da kwe'é neiikaígíí; haa'íshą' chaha'oh táa'go ádadiilnííł, ła' ni ná, ła' Mózes bá, ła' éí Iiláíjah bá, nidi bee hadzoodzí'ígíí doo hoł bééhózingóó ázhdííniid. 34Díí t'ah baa yájíłti'go, k'os hoł łeeshoogizhgo nídadzisdzííd. 35Nít'éé' k'os biyi'dę́ę́' iinéé' diists'ą́ą'go ání, Díí shiYe' ayóó'óósh'níinii át'é, dayísółts'ą́ą́'.#Ps. 2:7; Is. 42:1; Mt. 3:17; 12:18; Mk. 1:11; Lk. 3:22; 2Pet. 1:17,18. 36Iinéé' dazdiizts'ą́ą́'dóó bik'ijį' Jesus t'áá sáhígo dajiiłtsą́. Áko díí doo baa dahojilne' dago, éí yoołkáłígíí biyi' dajiiłtsánígíí diné t'áadoo ła' bee bił dahojoolne' da.

Jesus éí ashkii níłch'i nichǫ́'íii bii' hólóonii hadaałt'é ánáyiidlaa

(Mt. 17:14-18; Mk. 9:14-27)

37Ákódzaago biiskání dziłghą́ą́'dę́ę́' hadáájookaigo, diné t'óó ahayóí hadááh nánízą́. 38Áádóó jó'akon, diné yíl'áhígíí ła' hadoolghaazhgo ání, Na'nitiní, nánooshkąąh, shiye' nilíinii t'áá éí t'éiyá she'awé'ígíí shá dínííł'įįł; 39jó, níłch'i bi'iiníziinii bik'i néilwo', áko t'áadoo hooyání háádílwosh, áádóó éí naa'anábiilghą́ąhgo bizhéé' hahagháahgo ánábiil'įįh, índa doo bits'áoya' át'éégóó atíbíł'į́. 40Áko nídahooł'aahii, Éí bii'dę́ę́' hadanołchééh, bidishníigo néisiskan, nidi ch'ééh ádayííł'įįd. 41Áko Jesus haadzíi'go ádííniid, Doo da'oodláanii índa bízhą́ da'ílį́įgo ahoolchíiłii danohłíinii, haash nízáagi nihił honishłǫ́ǫgo nihich'į' ha'ííníshníi dooleeł? Níláhdę́ę́' niye' shaa nílóós. 42Áko éí ashkii t'ah hach'į' yigáałgo, níłch'i bi'iiníziinii bik'iilwodgo naa'anáábiyííłhango ditsxizgo anáábiidlaa. Nidi Jesus éí níłch'i nichxǫ́'ígíí yideezteh, áádóó ashkii hadaałt'é ánáyiidlaago bizhé'é yaa néiníłtį́. 43Áko t'áá ádzíłtso Diyin God bibee adziil ayóó át'éii bąą t'óó hoł adahayóí.

Jesus bidi'yoolyéłígíí yaa nááhálne'

(Mt. 17:22,23; Mk. 9:30-32)

Nidi t'ah nidi t'áá ádzíłtso t'áá ałtsoní yaa naayáhígíí bąą t'óó hoł adahayóigo, Jesus bídahooł'aahii áyidííniid, 44Díí saadígíí nihijeeh dahidódlaad, háálá Diné Silį́į'ii éí diné bílák'eejį' ninábidi'doot'ááł. 45Nidi bee hadzoodzí'ígíí t'áadoo yik'ida'diitą́ą da. Doo bił béédahózin da doo biniyé bił ch'aa'óolzin nít'éé', áko yee haadzí'ígíí t'óó bíndabídízhdóołkiłgi nidi bits'ąą dajíítiid.

Háishą' aláahdi ayóó át'éii nilį́?

(Mt. 18:1-5; Mk. 9:33-37)

46Áko nít'éé', Háí lá aláahdi át'éé lá, dajiníigo ałghadazh'dit'ááh.#Lk. 22:24. 47Nidi Jesus éí dahajéí biyi'di baa nitsídadzikeesígíí bił bééhoozingo, áłchíní yázhí ła' nízhdiiłtį́įgo hwíighahgi bijiisį', 48áko ábizhdííniid, T'áá háiida díí áłchíní yázhí shízhi' bee bich'į' k'éznídzinígíí éí shich'į' k'éznídzin, áádóó t'áá háiida shich'į' k'éznídzinígíí, éí shiníł'a'ii bich'į' k'éznídzin,#Mt. 10:40; Lk. 10:16; Jn. 13:20. háálá nihitahgóó t'áá háiida t'áá a'ohgo ájít'éhígíí, éí ayóó át'éii jílį́.

Doo nihits'ą́ą́jí jílínígíí éí nihich'ijí jílį́

(Mk. 9:38-40)

49John haadzíi'go ádííniid, Bóhólníihii, diné ła' nízhi' bee níłch'i bi'iiníziinii hainiiłkaadgo dahwiiltsą́, áko, T'áadoo ánít'íní, dahodii'niid, háálá doo hoł nikéé' neiikai da. 50Nidi Jesus áhodííniid, T'áadoo ánít'íní, t'áadoo dabidohníní, háálá doo nihits'ą́ą́jí jílínígíí éí nihich'ijí jílį́.

Samériya bikin sinilgi Jesus doo deiniizį́į' da

51Áko yá'ąąsh góde Jesus ahodi'dooltéełjį' hodideeshzhiizhgo, Jerúsalemgóó dah dideeshááł jinízingo t'áá íiyisí háni' áhojiilaa. 52Áádóó nidaal'a'í álą́ąjį' ayííł'a', áko dashdiikaigo Samériya dine'é bikin sinil léi'gi jíkai, bá hasht'edahozhdoolííł biniyé, 53nidi t'áadoo bahat'aadí Jerúsalemgóó joogáałgo biniinaa doo dahoniizį́į' da. 54Áko hóhooł'aahii James áádóó John díí yiyiiłtsą́ągo ádííniid, Bóhólníihii, Iiláíjah ádzaaígi át'éego yádiłhił biyi'dę́ę́' kǫ' dayídíikiłgo díí diné íidoołdįįłgoósh nił t'áá áko?#2Kgs. 1:9-16. 55Nidi nídzízyizgo dzideezteh. [Áádóó ázhdííniid, Ádanoht'éii doo nihił béédahózin da, 56háálá Diné Silį́į'ii doo diné íidoołdįįł yiniyé níyáa da, nidi yisdéídiyoonił yiniyé níyá.]#9:56 Saad ła' áádóó saad naazhjaa' ła' kót'éego daasdzohígíí [ ] bita'gi dabiká'ígíí éí Diyin God bizaad t'áá ałk'idą́ą́' bee ak'eda'ashchínígíí doo t'áá ałtso dabikáa' da, nidi ła' t'éiyá dabikáá'. Áko náánáła' kin sinilígóó dashdiikai.

Jesus yikéé' dayíkáah dadooleeł nít'ée'ii

(Mt. 8:19-22)

57Áádóó t'áá jookahgo diné léi' ła' áhodííniid, T'áá nanináágóó nikéé' naasháa dooleeł. 58Áko Jesus áháłní, Mą'ii dootł'izhí be'a'áán dahólǫ́, áádóó tsídii wódahgo nidaat'a'ígíí bit'oh dahólǫ́, nidi Diné Silį́į'ii éí t'áadoo nizhnót'áałgi da. 59Áádóó náánáła' ábizhdííniid, Shikéé' yínááł. Nidi áhodííniid, Bóhólníihii, átsé shizhé'é łeeh deeshtééłgóó nídeeshdáałgo bee sha'di'ní'aah. 60Nidi Jesus ábidííniid, Bíni' daneeznáanii t'áá bí łeeh da'ahii'nííł, nidi ni, dah diináahgo Diyin God bee bóhólníihgo bił haz'áanii t'áá níłtéél nít'éé' baa nahólne'. 61Náánáła' ałdó' ání, Bóhólníihii, nikéé' naasháa dooleeł, nidi áłtsé shighandiígíí bílák'ee dadideeshnihgo bee sha'di'ní'aah.#1Kgs. 19:20. 62Nidi Jesus áhodííniid, Diné ła' bee nihwiildlaadí jiiłtsoodgo t'ą́ąjį' nízdéest'į́į'go hojoołdlałígíí éí Diyin God bee bóhólníihgo bił haz'áanii biyi' chojoo'į́į dooleełígíí doo bą́ą́h jílį́į da.

Currently Selected:

LUKE 9: NVJOB

Highlight

Copy

Want to have your highlights saved across all your devices? Sign up or sign in

Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).

Learn More About Navajo Bible