MARK 12
12
Ch'il na'atł'o'ii áádóó yaa ádahalyáanii binahjį' hane' bee ak'idi'dootį́įłii
(Mt. 21:33-46; Lk. 20:9-19)
1Nít'éé' hane' bee ak'idi'dootį́įłii bee bich'į' ayázh'niiłti'go ájíní, Diné ła' ch'il na'atł'o'ii k'izhdííláago tsé binaa ahénátł'ingo ájiilaa,#Is. 5:1,2. áádóó ákwii ch'il na'atł'o'ii yiljizh dooleełgi hahodziiznil, índa bikáá'dóó ha'alzídí hajíítł'ingo dego nízaadgóó yaa'áago ájiilaa, áko ch'il na'atł'o'ii yaa ádahalyą́ą dooleełii baa dzisįįdgo náánáła' kéyahgóó ajííyá. 2Áko baa hoolzhiizhgo há naalte' ła' ch'il na'atł'o'ii yaa ádahalyánígíí bich'į' ajííł'a', dá'ák'eh yaa ádahalyáanii bits'ą́ą́dę́ę́' ch'il na'atł'o'ii bineest'ą' ła' shóidoołt'eeł biniyé. 3Nít'éé' dahasiłgo nídahoneesxaalgo ch'il na'atł'o'ii t'áágééd anídahas'a'. 4Áko há naalte' náánáła' bich'į' anáájííł'a', nít'éé' éí [tsé yee nídahoniłne'go] bitsiits'iin atídayiilaa, áádóó t'óó baa yáhásinígi ádayííł'įįd. 5Áko náá'áłdó' náánáła' anáájííł'a', nít'éé' éí dayiisxį́, áko t'áá ákót'éego lą'í anáádziis'a', éí ła' nídeineesxaal, ła' éí nideistseed. 6Áko t'ááłá'í yidziih, éí haye' ayóó'ájó'nínígíí, áko, Shiye'jígo bił danilį́į dooleeł, jiníigo éí bee nihoolzhíísh góne' bich'į' ajííł'a'. 7Nidi ch'il na'atł'o'ii yaa ádahalyánígíí áda'ahidoo'niid, Díí ch'il na'atł'o'ii bíí' dooleełígíí át'į́į́ lá; sołtį', dadiyiilyééł, áko bíí' dooleeł yę́ę nihíí' dadooleeł. 8Áko dahasiłgo dahwiisxį́ áádóó ch'il na'atł'o'ii bitahdóó ch'ídahwiisxan. 9Áko lá ch'il na'atł'o'ii bee bóhólníihii haa doonííł lá? Jó, éí doogáałgo ch'il na'atł'o'ii yaa ádahalyánígíí neidoołtsił, áko ch'il na'atł'o'ii éí náánáła' yaa ádahalyą́ą dooleełii yaa néidoosįįł. 10Da' díí bee ak'e'ashchínígíísh doo dayínółta' da?
Kin ádeił'íní tsé doo deiniizį́'ígíí,
t'áá éí tsé bee naaná'ástł'inii silį́į́';
11díidí Bóhólníihii áát'įįdígíí át'é,
áko daníil'į́įgo bik'ee t'óó nihił adahayóí.#Ps. 118:22,23.
12Áko hodi'dooltsoł ch'ééh daniizį́į́', nidi diné yíl'áhígíí yéédaaldzid, háálá éí hane' bee ak'idi'dootį́įłii binahjį' bí baa níjít'į́įgo bee hadzoodzíi'go yaa ákodaniizį́į́', áko hats'ą́ąjį' dah dahidiikai áádóó yóó'aheeskai.
Síízar bich'į' tax nahalyéhígíí bína'ídéékid
(Mt. 22:15-22; Lk. 20:20-26)
13Áko Férisii danilíinii ła' áádóó Hérad yich'ijí danilíinii ałdó' ła' hazaad yee hákada'iiłhil doo biniyé hach'į' ada'as'a'. 14Áko haa yíkaigo ádahodííniid, Na'nitiní, nihił béédahózingo t'áá aaníígóó hólne', áádóó diné ła'da t'áadoo bééníldzidí da, háálá diné yee ał'ąą át'éii doo nił ał'ąą át'ée da, nidi t'áá aaníígóó Diyin God k'ehgo honít'i' bína'níłtin. Síízar bich'į' tax nahalyéegoósh bee haz'ą́? Doodaásh? 15Nida'iyiilyée daats'í, dooda daats'í? Nidi honda'adlo'ígíí bił bééhózingo áháłní, Ha'át'íishą' biniyé shíkada'iyołhil? Aadę́ę́' béeso denériyas wolyéhígíí ła' shaa noh'aahgo nísh'į́. 16Áko ła' haa deiz'ą́. Nít'éé' ábijiní, Díishą' háí bitsiits'iin bik'i si'ą́, áádóó háísh bízhi' bikáá'? Nít'éé' ádahałní, Síízar lą́ą. 17Áko ábijiní, Síízar bíhígíí Síízar baa nídahoh'nííł, áádóó Diyin God bíhígíí éí Diyin God baa nídahoh'nííł. Áko t'áá íiyisí hak'ee t'óó bił adahayóí.
Aninéédę́ę́' náádi'doojahgi bína'ídíkid
(Mt. 22:23-33; Lk. 20:27-40)
18Nít'éé' Sádjusii danilíinii haa náánákai, éí aninéédę́ę́' doo náá'di'yiijeeh da daaní,#Acts 23:8. áko kódaaníigo nidahódééłkid, 19Na'nitiní, Mózes yę́ę kót'éego nihá ak'e'ashchį́, Diné ła'da bił hajíí'áázh ba'áłchíní t'áadoo haleehí be'asdzą́ą́ yąąh daaztsą́ągo, hak'is be'asdzą́ą́ nít'éé' yę́ę hwe'asdzą́ą dooleeł, áko hak'is yę́ę bá áłchíní hwee hodooleeł, níí nít'éé'.#Deut. 25:5. 20Áko nít'éé' ashiiké t'áá ła' háájé'ígíí tsosts'id yilt'éé lá, áko alą́ąjį'ígíí be'asdzą́ą́ hazlį́į́', nít'éé' t'áadoo ba'áłchíní haleehí daaztsą́, 21áko hakéédę́'ígíí éí hwe'asdzą́ą́ nít'éé' yę́ę néidiiłtį́, nidi t'áadoo ba'áłchíní nááhádleehí danáánáztsą́, áko náá'ákéédę́'ígíí t'áá ákónáánádzaa, 22áko tsosts'id jilt'éhígíí t'áá ádzíłtso t'áadoo ha'áłchíní dahazlį́į' da. Hakée'di índa asdzání ałdó' daaztsą́. 23Aninéédę́ę́' náá'di'yiijeeh bijį́įdishą' éí háí be'asdzą́ą́ jílį́į doo? Háálá t'áá tsosts'id yilt'éego be'asdzą́ą́ dzizlį́į́'.
24Áko Jesus áháłní, Da' doósh Diyin God bizaad bee ak'eda'ashchínígíí áádóó Diyin God bibee adziilii doo nihił béédahózinígíí biniinaa nida'ayohsíih da? 25Háálá diné daneeznáádę́ę́' náádiijée'go, doo nááda'doogeh da, doo nidi ahaa dabi'dii'níił da doo, nidi yá'ąąshdi diyingo nidaal'a'ígíigi ádaat'é. 26Aninéédę́ę́' náá'di'yiijeeh bídéét'i'gi, Diyin God éí dówózhii sikaadóó Mózes yich'į' haadzíi'go ání, Shí Éíbraham biDiyin God áádóó Áízak biDiyin God índa Jéíkab biDiyin God nishłį́,#Ex. 3:6. dííniidiísh Mózes binaaltsoos biyi'gi t'ah doo dayínółta' da? 27Daneeznáanii doo biDiyin God jílį́į da; dahináanii biDiyin God jílį́, áko t'áá íiyisí nida'ayohsííh.
Bee haz'áanii ts'ídá aláahdi át'éii
(Mt. 22:34-40; Lk. 10:25-28)
28Nít'éé' bee haz'áanii yínda'niłtinii ła' níyáago ałghadazh'dit'áhígíí yidiizts'ą́ą́', áko Jesus beełt'éego hach'į' t'ą́ą́' hanáádzí'ígíí bił bééhoozingo nabídééłkidgo ání, Bee haz'áanii t'áá ałtso biyi'dóoshą' háidíígíí ts'ídá aláahgo bee haz'ą́? 29Áko Jesus hach'į' hanáánáádzíi'go áháłní, Ts'ídá aláahgoígíí éí díí,
Ízrel dine'é danohłíinii, da'íísółts'ą́ą́':
Bóhólníihii nihiDiyin God éí Bóhólníihii t'ááłá'í,
30áko nijéí t'áá át'é bee, áádóó nii' sizíinii t'áá át'é bee,
áádóó níni' t'áá át'é bee, índa ne'adziil t'áá át'é bee Bóhólníihii niDiyin God ayóó'ííní'ní.
Éí bee haz'áanii aláahgoígíí át'é.#Deut. 6:4,5. 31Naaki góne'ígíí éí kót'é,
T'áá ni ádííní'nínígi át'éego bił kééhót'íinii ayóó'ííní'ní.#Lev. 19:18.
Bee haz'áanii náánáła' díí biláahgo át'éego nááhódlǫ́ǫ dooleełii t'áá ádin. 32Áko bee haz'áanii yína'niłtinii áhodííniid, T'áá ákót'é, Na'nitiní, Diyin God t'ááłá'í, t'áá hó t'éí Diyin God jílį́, náánáła' éí ádin,#Deut. 4:35. dííníniidígíí t'áá aaníígóó ádííníniid, 33áko éí hajéí t'áá át'é bee, áádóó hantsíkees t'áá át'é bee, [áádóó hwii' sizíinii t'áá át'é bee] índa hwe'adziil t'áá át'é bee Diyin God ayóó'ájó'nínígíí índa t'áá hó ízhdó'nínígi át'éego bił kééhojit'íinii ayóó'ájó'nínígíí, éí t'áá át'é didlidgo nááhániihii índa nidaatseedgo nááhániihii t'áá ałtso biláahgo át'é.#Hos. 6:6. 34Áko hojíyą́ągo hadzoodzí'ígíí éí Jesus bił bééhoozingo áháłní, Diyin God bee bóhólníihgo bił haz'ą́ą́dóó koshídę́ę́' honílǫ́. Áádóó éí bik'ijį' diné ła'da t'áá łahgo ninááhódídóołkiłgi nidi t'óó hats'ąą dáátiid.#Lk. 10:25-28.
David biye' bína'ídíkid
(Mt. 22:41-46; Lk. 20:41-44)
35Nít'éé' kin bii' sohodizin bił haz'ą́ą́ góne' Jesus nazh'nitingo ájíní, Ha'át'éegoshą' bee haz'áanii yínda'niłtinii ádaaní, Christ éí David biye' nilį́? 36Jó, David t'áá bí Níłch'i Diyinii yee ádííniid:
Bóhólníihii éí shiBóhólníihii áyidííniid,
Shinish'náájí dah sínídá,
nida'ana'í bik'i dííníl'eezgo ániishłaajį'.#12:36 Bik'i dííníl'eezgo ániishłaajį', nínígíí éí, Ná bik'eh díshdlį́į'jį', níigo ání. Ps. 110:1.
37David t'áá bí shiBóhólníihii hałní, ákoshą' haa yit'éego biye' jílį́? Áko diné t'áá bóhólníhígíí bił dahózhǫ́ǫgo dahodiizts'ą́ą́'.
Jesus éí bee haz'áanii yínda'niłtinii yideezteh
(Mt. 23:1-36; Lk. 20:45-47)
38Áko nazh'nitingo bich'į' hadzoodzíi'go ájíní, Bee haz'áanii yínda'niłtinii bits'ąą ádaa ádahołyą́, éí bi'éé' danineezgo nidaakaigo bił ayóó ádaat'é, áádóó nida'iiniihgóó k'é dabidi'níigo bił ayóó ádaat'é, 39índa kin bii' áłah nída'adleehí naaznil dabiyi'góó áádóó áda'azįįdgóó aląąjį' naazíinii bá nidahaz'ą́ą́góó bił ayóó ádahoot'é, 40índa asdzání bąąh ádahasdįįdii dabighan yaa nidahodikai, índa t'óó ádaat'į́įgo nízaadgóó sodadilzin. Éí t'ah aláhígi át'éego bik'e'íyée'go bá nidahodiyoot'ááł.
Asdzání bąąh áhásdįįdii béeso ayíínil
(Lk. 21:1-4)
41Nít'éé' Jesus éí béeso adaha'níłígíí binaashiidę́ę́' dasneezdáago, diné t'óó ahayóí hanááł béeso adayiiznil. Lą'í diné da'at'íinii béeso t'óó ahayóí adayiiznil. 42Áko asdzání ła' bąąh áhásdįįdii nilį́įgo bahojoobá'í léi' áajį' niníyáago, béeso ts'ídá a'ohgo ílínígíí naaki ayíínil, éí naakigo t'áálá'í sindáo bíighah. 43Ákohgo hódahooł'aahii hágo bizhdííniidgo ábijiní, T'áá aaníígóó ánihidishní, Díí asdzání bąąh áhásdįįdii bahojoobá'í nidi, éí béeso ahi'níiłjį' béeso adayiiznilígíí t'áá ałtso yiláahgo béeso ayíínil. 44Háálá t'áá ádzíłtso t'áá ałtsoní bee bilááh dazhneel'ánígíí éí lą'í adadziiznil, nidi díí asdzání t'áá íiyisí bahojoobá'í nidi, t'áá bee hólónígi ayíínil, yee hináanii nidi t'áá ałtso.
Currently Selected:
MARK 12: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
