MARK 5
5
Gádara dine'é níłch'i bida'iiníziinii bii' hólónígíí hanoolkaad
(Mt. 8:28-34; Lk. 8:26-39)
1Nít'éé' be'ek'id wónaaníjį' Gádara#5:1 Diyin God bizaad t'áá ałk'idą́ą́' bee ak'eda'ashchínígíí ła' kót'éego dabikáá', Gérgasa dine'é; ła', Gérasa dine'é. dine'é bikéyahjį' ha'naa nida'dzis'éél. 2Tsinaa'eeł biyi'dę́ę́' hajííyáago t'áá áko dajishcháá'dę́ę́' diné léi' níłch'i nichxǫ́'í tsi'nabiiłáago hadááh yílwod, 3éí dajishcháá'góó t'éí naagháá lá, áádóó diné doo ła' be'ótł'óół át'ée da, béésh da'ahólzha'ígíí bee nidi dooda, 4háálá lą'ídi akétsíín niná'niłí bąąh nii'nil, áádóó béésh bee béé'átł'óóh nidi, béésh niyiiníísh, áádóó akétsíín niná'niłí neheltǫ', áko diné ła'da doo bik'eh dódle' át'ée da. 5Tł'ée'go índa jį́įgo t'áá áłahjį' dilwoshgo tsé yee ni'ídiilgéeshgo dziłgóó áádóó dajishcháá'góó naaghá. 6Nít'éé' t'áá nízaadę́ę́' Jesus yiyiiłtsą́ągo yich'į' nídiilwod, áádóó nitsidinígo'go hach'į' nahasáago 7yéego hadoolghaazhgo ání, Jesus, Diyin God Aláahgo Ayóó'át'éii biYe' nílíinii, haashą' shíléehgo ánít'į́? Diyin God binahjį' nánooshkąąh, atíshóólééh lágo. 8Háálá díí t'ah bítséedi Jesus ábidííniid, Níłch'i nichxǫ́'í nílíinii, diné bii'dę́ę́' haninááh! 9Áko, Haashą' yinílyé, jiníigo nabízhdééłkid. Áko ánáádoo'niid, Lą'í yinishyé, háálá t'óó ahonii'yóí. 10Áádóó t'áá íiyisí Jesus náyookąąhgo ání, Díí kéyahígíí bits'ánihinóółkaad lágo. 11Nít'éé' ákwe'é yílk'id binániigi bisóodi da'ałchozhgo lą'í naakai, 12áko níłch'i danchxǫ́'í nídahookąąhgo ádaaní, Bisóodi bich'į' danihidíł'á, éí biih hidiijah. 13Áko bazh'di'ní'ą́ągo níłch'i danchxǫ́'í éí diné yii'dę́ę́' hahaazhjée'go bisóodi yiih heezhjéé', áádóó bisóodi t'áá ałtso bidah ch'ééjée'go be'ek'id yiih heezhjéé', áko tó dabííghą́ą́'. Éí bisóodi naakidi mííl daats'í nít'éé'.
14Áko bisóodi baa ádahojilyánígíí dashdiijée'go kin haal'áagi áádóó binaagóó baa nidahodzisne'. Áko díí áhóót'įįdígíí nihił béédahodoozįįł danízingo diné ła' ákǫ́ǫ́ yíkai. 15Áko Jesus baa dziiskaigo diné níłch'i bida'iiníziinii lą'í bii' hólǫ́ǫ́ nít'éé' yę́ę bi'éé' hólǫ́ǫgo áádóó bintsékees yá'át'éehgo índa hasht'edít'éego ákwii sidáago dajiiłtsą́, áko t'áá ádzíłtso t'óó hayadahodeesyiz. 16Áádóó dabíínáłígíí diné éí níłch'i bida'iiníziinii bii' hólǫ́ǫ́ nít'éé' yę́ę ádzaaígíí índa bisóodi ádaadzaaígíí t'áá ałtso baa nidahodzisne'. 17Áko nídahojookąąhgo, Nihikéyahdóó nówehjį' haninááh, dahojiníigo haa nízhdiikai. 18Áko tsinaa'eeł biih jigháahgo níłch'i bida'iiníziinii bii' hólǫ́ǫ́ nít'é'ígíí náhookąąhgo áháłní, Nikéé' naasháa doo. 19Nidi Jesus t'áadoo ha'di'ní'ą́ą́góó kóhodííniid, Nílááh, nighangóó nik'éí bich'į' nídídáahgo ayóó ádaat'éii Bóhólníihii ná yaa naayáhígíí índa yee naa joozba'ígíí bee bił dahólne'. 20Áko dashdiiyáago kéyah Diikápolis hoolyéégóó t'áá át'éé nít'éé' Jesus ayóó át'éii há yaa naayáhígíí baa hojilne'go tázhdíghááh, áko diné t'áá ałtso t'óó bił adahayóí.
Jéí'iras bitsi' áádóó asdzání Jesus bi'éé' yideelchidii
(Mt. 9:18-26; Lk. 8:40-56)
21Áádóó be'ek'id tsé'naagóó Jesus hoł niná'ní'éelgo, diné t'óó ahayóí haa nánízą́, áko be'ek'id bibąąhgi dzizį́. 22Áko diné áłah ná'ádleehgo á dah náńdaahígíí ła', Jéí'iras wolyéhígíí, níyáago, hoołtsą́ągo hach'į' nitsidinígo', 23áádóó t'áá íiyisí náhookąąhgo ání, Shitsi' áłts'íísígíí bi'niitsą́. Tį' ákǫ́ǫ́, hadaałt'é nídoodleełígíí biniyé bik'i dah didíílnih, áko náádidoodáałgo hináa doo. 24Áádóó ákǫ́ǫ́ Jesus hoł dah dii'áázh.
Áko diné t'óó ahayóí hakéé' yikahgo hoł dinííyił. 25Nít'éé' ákwe'é asdzání léi' dił bigháńdiniiltałgo naakits'áadah nááhai lá, 26áko azee' ádeił'íní lą'í ch'ééh ádahóół'įįdgo biniinaa ałtso ádaa nahozdeesdzá, nidi t'áadoo náázdiidzáa da, nidi t'óó tsé'édinda ádziidzaa. 27Nít'éé' Jesus baa hojíínii', áko diné ahénál'áago Jesus bine'dę́ę́' nizhníyáii' bi'éé' bizhdeelchid. 28Háálá ájíní, Bi'éé' t'éiyá bidinishchid nidi hadaałt'é nídeeshdleeł. 29T'áá áko dił haghánílínígíí ásdįįd, áko hąąh dah haz'ánígíí náázdiidzáago hoł bééhoozin. 30Áko Jesus bee adziilii hats'áhoníle'go baa ákozniizį́į'go honás'áhígíí bich'į' nídzízyizgo ájíní, Háishą' shi'éé' yideelchid? 31Áko hódahooł'aahii ádahodííniid, Jó, diné ninás'áhígíí nił bééhózin. Ha'át'éegoshą' háí shideelchid diní? 32Nidi hodeelchidígíí yizdoołtsééł biniyé diné bitaa dzizghal. 33Nít'éé' asdzání doo át'éhí da áho'diilyaaígíí hoł bééhózingo, nídzíldzidgo hatah hoditłidgo Jesus baazhníyáago biyaajį' nitsizhdinígo', áko t'áá ałtso t'áá aaníígóó bee bił hojoolne'. 34Áko asdzání ábizhdííniid, Shitsi', ne'oodlą' bee doo ánít'éhí da násínídlį́į́'; nił hózhǫ́ǫgo náádááł, áádóó nąąh dah haz'ą́ nít'é'ígíí bits'ą́ąjį' hadaníłt'ée doo.
35Áko Jesus t'ah yájíłti'go diné ła' Jéí'iras bighandę́ę́' yíkaigo ádaaní, Nitsi' daaztsą́. T'áásh doo biniyéhégóó Na'nitiní baa nínáánít'į́į dooleeł? 36Nidi ha'oodzí'ígíí Jesus doo yaa ná'áhodílt'į́į́góó áłah ná'ádleehgo á dah náńdaahígíí áyidííniid, T'áadoo nił yé'í, t'óó iinídlą́ągo aa dzíínílí. 37Áko diné doo ła' hakéé' yigáał da dooleełgo ájiilaa, t'áá hazhó'ó Peter áádóó James índa James bitsilí John t'éiyá bił ákǫ́ǫ́ jíkai. 38Áko áłah ná'ádleehgo á dah náńdaahígíí bighandi jíkai, nít'éé' diné hahóół'áago ła' daacha índa ła' ayóó íits'a'go ák'idadiit'aahgo jiiłtsą́. 39Áko yah ajííyáago ábizhdííniid, Ha'át'íishą' biniyé hahooł'áago daahcha? At'ééd doo daaztsą́ą da, nidi t'óó ałhosh. 40Áko t'óó há nidahałt'i'go haa daadloh. Nidi t'áá ádzíłtso ch'íhonizhníłkaadgo at'ééd bizhé'é índa bimá áádóó bił nijikaígíí t'éiyá at'ééd sitíní góne' bił yah ajookai. 41Áko at'ééd bíla' jiiłtsoodgo ábijiní, Talétha kóomii, éí, At'ééd, nídiidááh nidishní, jiníigo óolyé. 42T'áá áko at'ééd nídii'na'go dah diiyá, háálá éí naakits'áadah binááhai. T'áá áko t'áá ádzíłtso t'áá íiyisí t'óó hoł adahóóyóí. 43Áko Jesus hach'į' haadzíi'go áháłní, T'ááká diné ła'da bił dahoołne' yíila', áádóó ábizhdííniid, At'ééd ba'nołtsóód.
Currently Selected:
MARK 5: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
