Jon 14

Iesu Ga Lox Amenemen Luvuttadi Loklok Ka Anasa Ren

1Iesu ga lok ti luvuttadi loklok ka anasa ren keretna, “Nemen gat lebelen nimi na bulu. Mina nuunu at ne Moroa, la mina nuunu bok tarak. 2Buaang lengkontaugu lixilik mo i nemen at loogu at ne Tamak. Mo dola kopmen, nia gita ba tong i rinimi. Anat pas ugo xusu ana lox agagas li lengkot tinimi. 3Dola anat pas ugo, ana lox agagas tengkot tinimi, la anabamlong bok la ana lam ka nimi ri mo lemenemen nenia ana nemen teren kusu nemi bok miba nemen eburu minia. 4Nemi miklen langas ti mo lemenemen nenia anat pas uve.”

Iesu, Neni Langas Ti Ne Temen

5Tomas ga lok ti ne Iesu, “Leeme Silok, maxoklen i do unat pas ua, kuren la mabaklen langas kereva?”

6Iesu ga vorang i rin, “Nenia langas, luruturun mi lorooro. Kopmen teta naba vosiga ne Tamak at tangas petpes, ketla atarak kusuk mun. 7Dola miklen avukar ia, mibaklen avukat bok ne Tamak. I ru ka i mo lingina, miklen ba i la mira ven ba i.”

8Pilip ga lok, “Leeme Silok, una lox ase nama mi ne Tamam la ni naba epovo atnama.”

9Iesu ga lok tin keretna, “Pilip, aga nemen amisik eburu minu la nu xovisi unaklen ia do? Do lara ira ven pam ia, neni ira ven pam ne Tamak. Ixo epovo do una tong i do, una lox ase nama mi ne Tamam. 10Kereva, uxo nuunu do nia a nemen at ne Tamak, la ne Tamak i nemen tarak? Levelinga a paase i rinimi kopmen atarak axa. Ketla at ne Tamak axa, i nemen tarak neni gak lok mo leven gugu. 11Mina nuunu at levelinga a tong i do, nenia a nemen at ne Tamak la neni i nemen tarak. Dola kopmen, mina nuunu rak mumu levempanga sangsangu nia agak lox i. 12A tong tuturun i rinimi do nege i nuunu rak, neni naba lok levempanga i ngan nia agak lox i. Neni naba lok levempanga i silok aleng ti mo levempanga nia agak lox i, mila nia anat pas uto vana at ne Tamak. 13La do mina sing ti tevempanga xeneng at laasen tarak, anaba lox epovo i, xusu nenia Nitna ne Moroa, anaba lox asilok laasen at ne Tamak. 14Minaba ngising ti levempanga nemi mi vara rin keneng at laasen tarak, la nia anaba lox i. 15Do mina balamu ia, minaba lok levempanga nia a tong i.”

Iesu Ga Vaase Alii Mi Lovotpot At Loroonan Kaala

16La ne Iesu ga lok bok, “Nia anaba sing ne Tamak, la neni naba raba bok nemi mi lara laradi loklok tooro, la neni naba nemen eburu amisik minimi. 17Neni Loroonan Kaala at luruturun. Limixin at na lavatbung menemen dixo epovo na siam ka i, mila kopmen dina ven kibis i xopla dinaklen i. Ketla nemi miklen i mila neni i nemen eburu minimi la neni naba nemen keneng atnemi. 18Dola ana onon, anoxo ke xepe nimi ngan lubungkarun, ketla anabamlong bok ude saparap nimi. 19Noxo lox abao la limixin at na lavatbung menemen dinoxo ven bok ba ia, ketla nemi miba ven ia. Nenia lavasuun at lorooro, kuren la nemi bok miba rooro. 20Dola nom laaleng na vot, mibaklen ka i do nenia a nemen eburu mi ne Tamak la nemi mi nemen tarak; kerekngan mun nenia a nemen keneng atnimi. 21Do nege na siam ka levelinga rak la na ronga res teren, neni laradi i balamu aleng ia. La ne Tamak naba balamu nege tara do na balamu ia. La nenia bok anaba balamu i la ana lox asuvos ia rin.”

22Judas (kopmen ne Judas Iskariot) ga sue i, “Leeme Silok, naba lok kereva la una lok nama xusu mana ven u, la kopmen limixin at na lavatbung menemen?”

23Iesu ga vorang i rin keretna, “Do nege i balamu ia, neni naba ronga res at levenanasa rak. Ne Tamak naba balamu i, la nema’ mi ne Tamak, maba esuxun min la mana nemen eburu min. 24Do nege xopmen na balamu ia, neni noxo ronga res at levenanasa rak. La mo levenanasa miga ronga vam i, kopmen atarak, ketla boro at ne Tamak ni ga riki ia.

25Agara tong pam na levelinga rinimi at na levenaleng nenia a nemen eburu minimi. 26Ketla laradi loklok tooro, ni Loroonan Kaala ne Tamak naba riki i xeneng at laasen tarak. Neni naba anasa nimi mi levempanga vipis axap la naba vaase aronga nemi ri levempanga agara tong pam i rinimi. 27Lenmila rak na nemen maxeneng atnimi; limila rak ana raba nimi min. Axo raba i na i ngan limixin at na lavatbung menemen dim taba i xuren. Nemen mita bulu la mina marat.

28Mia ronga vam levelinga rak keretna; ‘ana on basinge nimi, ketla anabamlong bok ude saparap nimi.’ Do mina balamu ia, miba momo aleng do nenia anat pas uto at ne Tamak; mila neni i silok aleng tia. 29Agara tong avot pam na levempanga rinimi. Do na levempanga na vot, miba nuunu ba at na lempapaase rak. 30Anoxo vaase babaalom eburu bok minimi mila laradi gomgo at na lavatbung menemen monga na vot. Kopmen tololos teren mavana rak. 31Ketla limixin at na lavatbung menemen dinabaklen ka i do a balamu aleng ne Tamak, la nia ak lok levempanga axap kerekngan neni ga tong i ria. Dik ta mo, ata vas kaxat basinge na lenep.”

Currently Selected:

Jon 14: mmx

Highlight

Copy