Luk 22
22
Diga Sevut Li Levelinga Xusu Ri Sev Amet Ne Iesu
(Mt 26:1-5; Mk 14:1-2; Jo 11:45-53)
1Laaleng ga sixit auret ta xusu ri leluxa at loxongkide diga ove vetpes i, laasen ap mo leluxa do Lovovolo Pe.#22:1 Leluxa limixin me Iudaia diga lok katling laaleng, diga vas kaxat boro Isip. La di goxo lok li laiis at lengkongkide atdi. 2La lavamaasa silok eburu mi luvuttadi loklox ase at Lenavolo diga puse ngas xusu ri sev amet ne Iesu kusu limixin di noxoklen i, mila diga marat atdi.
Judas Ga Siam Kusu Neni Naba Song Araba Ne Iesu
(Mt 26:14-16; Mk 14:10-11)
3Satan ga vubeles ukeneng at ne Judas, laasen bok teren ne Iskariot; neni lara atdi lasangaun mi legepura luvuttadi loklok ka anasa. 4La ne Judas ga vot pasa lavamaasa silok la luvuttadi amgomgo atnedi luvuttadi esep diga lok tatao loogu laplavang la ga epaase eburu midi mumu teventaangas kusu neni naba song araba ne Iesu ridi. 5Diga lok momo aleng la diga siam do diba un i mi tempilas. 6La ne Judas ga siam ap mo levelinga la ni ga puse ri tangas kusu neni naba song araba ne Iesu rinedi xusu limixin noxoklen i.
Iesu Ga Gagas Kusu Ti Laanan At Lovovolo Pe
(Mt 26:17-25; Mk 14:12-21; Jo 13:21-30)
7Laaleng ga vot kusu ni leluxa at loxongkide diga ove vetpes i; ap mo laaleng diga sev amet levesipsip ti lok katling leluxa at Lovovolo Pe. 8La ne Iesu ga riki ne Pita mi ne Jon mi levelinga xeretna, “Munat pas la muna lox agagas li leveluxa ri Lovovolo Pe xusu ridik ti anan.”
9La duga sue i, “U vara i do mana lox agagas li i at ua loxot?”
10La ne Iesu ga lok, “Muna ronga i na! Mo do muna beles ukeneng at lemenemen silok, lara laradi nabap kip lubuxom dan naba xip tangarang numu. Muna mumu asu i uto at loogu ni na beles teren; 11la muna lok ti laradi ap mo loogu xeretna, ‘Laradi loklox ase i sue u do, loxot ua at na loogu ram, nema eburu mi luvuttadi loklok ka anasa rak maba lok katling leluxa at Lovovolo Pe ren?’ 12Neni naba lox ase numu mi loxot silok diga gagas li vam i no i nemen to vana at loogu, la muba lox agagas li lempanga anan go.”
13Duga vas kaxat la duga long lenget ka lempanga axap kerekngan ne Iesu gara tong pam i ridu, la duga lox agagas li leveluxa ri Lovovolo Pe.
Leluxa At Leeme Silok
(Mt 26:26-30; Mk 14:22-26; 1 Ko 11:23-25)
14Se at loxonaleng ti anan, Iesu ga xis eburu mi luvuttadi loklok ka anasa ren. 15La ni ga lok tidi, “A vara aleng i xusu ana lok katling na leluxa eburu minimi, avot at losongsongot mo abap kiv i. 16A tong i rinimi do, a noxo lok katling bok ba na leluxa, se at loxonaleng anaba lox epovo i ro at Linintoo at ne Moroa.”
17La ne Iesu ga lok kaka lakap inin, la ga tong avukat ti ne Moroa, la ga lok, “Mina lok kaka i na la mina in teren. 18A tong i rinimi do a noxo in bok ba at lavaen se at loxonaleng Linintoo at ne Moroa na vot.”
19La neni ga lok kaka loxongkide, la ga tong avukat ti ne Moroa, la ga sebex i, la ga raba luvuttadi loklok ka anasa ren min, la ga lok, “Labantuxu rak na, [a raba nimi min. Mina lox amisik na loklok kusu mina doma mumu ia.”
20Se diga an axap, neni ga lok kaka bok lakap inin la ga raba nedi min la ga lok, “Ana lavaen i ngan lada rak la i lok katling lekabus maxat, la nenia anaba lox epovo i xusu ri lox arooro buaang limixin.]
21Ketla lara laradi naba song araba ia ri luvuttadi xapmek; it kis de eburu midik. 22Nenia, Laradi Mevana, anaba met kerekngan lodoxoma at ne Moroa, ketla naba lok kapmek aleng ti mo laradi na song araba ia uto at luvuttadi xapmek.” 23La diga esue min kantubu atdi do ua lara atdi naba lox i mo.
Leedak Mumu Lisisilok
24La leedak ga ravasu xantubu at luvuttadi loklok ka anasa, mumu ua lara atdi neni ga silok tidi. 25La ne Iesu ga lok tidi, “Lavaorong silok at na lavatbung menemen di ruuna lololos mavana at limixin atdi, la limixin di so asen di do, ‘Larapen tangas at limixin.’ 26Ketla nemen mita mu asu mo langas atdi; lara silok kantubu atnimi neni na lok ngan lara kakalik, la lara gomgo neni na lok ngan lasaxaruki. 27Nege i silok atdu na? Lara it kis to vana xusu na anan kopla lara i gugu rin? Mo lara it kis to vana. Ketla nenia a nemen kantubu atnimi ngan lasaxaruki. 28At levenaleng levesongsongot ga vot saparap dik, nemi goxo sixiro basinge ia. 29Ne Tamak ga lok li ia xusu ri vaxaxis avukat limixin, la ana lok li nimi xusu ri vaxaxis avukat limixin. 30Kuren la miba anan la mina inin to at loxot kitkis tarak to xeneng at Linintoo rak, la mibat kis at liinin orong la miba ronga linga at lasangaun legepura larabibinat boro Israel.”
Iesu Ga Vaase Alii Do Ne Pita Naba Sok Tixirixes I
(Mt 26:31-35; Mk 14:27-31; Jo 13:36-38)
31La ne Iesu ga lok ti ne Simon, “Simon, Simon! Satan ira lok kaka vam lisisiam at ne Moroa xusu naba lok tong pen nemi axap, kerekngan laradi loklok tatao at laraamang i mangma asu levennit piao boro at lengkakan teren la i lok kepe leventuxu piao. 32Ketla ara sing pam tu, ne Simon, kusu lunuunu ram noxo subu. La do una leeng basinge laxakapmek taram, una lox alolos luvutnetam.”
33La ne Pita ga vorang i rin keretna, “Leeme Silok, a gagas kusu anat pas eburu minu uto at loxokoxo la aba met bok eburu minu!”
34La ne Iesu ga lok tin keretna, “Pita, a tong i ru do laxaxak kovisi noxo reng lingina, la nenu uba sev apkap naba vantun do uxoklen ia.”
35La ne Iesu ga lok tidi, “At nom laaleng nia aga riki aonon nimi xusu na lok lugugu rak la mi goxop kip tengkontonom ka, la lentat lukluxa, la tempanga vatpas; kereva, migak pakes bok ti tempanga?”
La diga vorang i rin keretna, “Ma goxok pakes ti tempanga.”
36La ne Iesu ga lok, “Ketla monga, do nege i ruuna toxontonom ka kopla tarat lukluxa, neni nap kiv i; la do nege xopmen na ruuna tavarise sepsep, neni na sesep mi lavanga singsiga ren kusu ri un ka tara. 37A tong i rinimi do Lovoang Kaala i lok do,
‘Neni ga nemen eburu mi limixin bilinga.’ Ais 53:12
La naba sorun mumu ia. Lavanga salai diga malagan i at Lovoang Kaala mumu ia, monga na sorun.”
38La diga lok, “Leeme Silok, legepu varise sepsep na.”
La ni ga lok tidi, “I epovo!”
Lakaana Olip
(Mt 26:36-46; Mk 14:32-42)
39La ne Iesu ga vas su basinge mo lemenemen, la gat pas uto at Lakaana Olip, i ngan ni ga lox amisix i. Luvuttadi loklok ka anasa ren diga mumu asu i. 40Se diga rupot ap mo loxot, neni ga lok tidi, “Mina sing kusu mi noxo subu at loklok tong.”
41La neni ga vas silatla axakalik uto basinge luvuttadi loklok ka anasa, la ga xis tiktikbu mi luvatgulom teren la ga sing. 42La ni ga lok, “Tamak, mo do u vara i, una lok pes na lumumuat basinge ia. Ketla nemen gat uta mumu asu lavavara rak, ketla una mu asu mun lavavara ram.” 43[La laangelo ga vot saparav i, ga si boro vana at laxalibet kusu na raba i mi lololos. 44La neni ga bulu aleng la ga sing lolos tinotno, la lantentelep teren ga sen su ukopok ti laxangka ga ngan lempatkaarum da.]
45Se neni ga xatu kaxat, neni ga vot pasa luvuttadi loklok ka anasa ren la ni ga long lenget di, diga unga mila diga bulu aleng. 46La ne Iesu ga lok tidi, “Tila nemi mi unga? Mina xatu la mina ngising kusu mi noxo subu at loklok tong pen.”
Larangtanga Alis At Ne Iesu
(Mt 26:47-56; Mk 14:43-50; Jo 18:3-11)
47Iesu move ga paase la buaang nedi limixin diga vot, la lara laradi laasen teren ne Judas gat pas to melamgo atdi; neni legesara atnedi lasangaun legepura luvuttadi loklok ka anasa, la neni ga vas auret ne Iesu la ga nes i. 48La ne Iesu ga lok tin, “Judas, kereva, u song araba ia, Laradi Mevana, uto at limixin kapmek mi lenetnes?”
49La nom luvuttadi loklok ka anasa mo diga nemen eburu mi ne Iesu diga ven lai mo ga lok do na vot, la diga lok, “Leeme Silok, u vara i do mana esep bok mi luvarise sepsep atnama?” 50La lara atdi ga ra korop kepe labaalung tino at lasaxaruki at lamaasa gomgo.
51Ketla ne Iesu ga lok, “I epovo nga.” La ni ga long tu at lavatlak at nom laradi la ni ga lox avukat labaalung teren.
52La ne Iesu ga ven lavamaasa silok la luvuttadi amgomgo at loogu laplavang la loxongkulao silok at leme Judaia mo digat pas ugo xusu diba ranga alis i. La ni ga lok tidi xeretna, “Mit pas ude mi lemparise sepsep la levesoso, i ngan ta do nia lavanga xipkip pilo. 53At levenaleng axap aga nemen eburu minimi ro xeneng at loogu laplavang, la mi goxo lok tong pen i xusu mina ranga alis ia. Ketla monga at laxanimin tubu, neni loxonaleng at ne Satan, kuren la nemi mi lok na lavanga xapmek at lamain.”
Pita Ga Sev Apkap
(Mt 26:57-58, 69-75; Mk 14:53-54, 66-72; Jo 18:12-18, 25-27)
54Diga ranga alis ne Iesu la diga lam kaka i uto at loogu at lamaasa gomgo; la ne Pita ga mumu asu di ro vaxalom. 55Limixin mo diga mas laxao go xantubu at lemelua, la ne Pita ga xis eburu minedi digat kis mamain. 56La lara loolik, neni lasaxaruki, ga ven ne Pita gat kis go saparap laxao, neni ga ven avukar i la ga lok, “Na laradi bok ga nemen eburu mi ne Iesu.”
57Ketla ne Pita ga sev apkap, ga lok keretna, “Axoklen mo laradi!”
58Melemu lixilik, lara laradi ga ven kibis ne Pita la ga lok, “Nenu bok lara atnedi luvuttadi loklok ka anasa ren.”
Ketla ne Pita ga vorang i rin keretna, “Nia xopmen!”
59La melemu at legesa xonatat aleng lara laradi vetpes manga ga vaase lolos keretna, “I ruturun tinotno, na laradi ga nemen eburu min, mila neni bok boro Galili.”
60Ketla ne Pita ga vorang i rin keretna, “Axoklen lavanga salai u paase min!” La soso mun ap mo loxonaleng, neni move ga paase, la laxaxak ga reng. 61La Leeme Silok ga rem gili la ga ven mokmokso ri ne Pita, la ne Pita ga doma amlong ti levelinga at Leeme Silok, ga tong avor i rin keretna, “Avot ti laxaxak na reng lingina, uba sev apkap naba vantun do uxoklen ia.” 62La ne Pita ga vas su ukamang la gang teng tuntun aleng.
Diga Lok Kalise Ne Iesu La Digap Sev I
(Mt 26:67-68; Mk 14:65)
63Mo luvuttadi esep diga lok tatao ne Iesu diga lok kalise i la digap sev i. 64Diga is pe luxatli ren mi loxontamon la diga sue i, “Una tong kisip ka i do, nege mo i sev u?” 65La diga vaase buaang bok laxalinga xapmek tin.
Iesu Ga Ru Ro Melamgo At Lixitkis Buru
(Mt 26:59-66; Mk 14:55-64; Jo 18:19-24)
66Laxangking ga losu, la loxongkulao silok at leme Judaia, la lavamaasa silok, la luvuttadi loklox ase at Lenavolo diga vot buru, la diga lok li ne Iesu uto melamgo atdi. 67La diga lok, “Una tong i rinama; kereva, nenu Lanarong?”
La ni ga vorang i ridi xeretna, “Mo do nia ana tong i rinimi, mi noxo nuunu at levelinga rak; 68la do nia ana sue nimi mi lususue, mi noxo vorang i. 69Ketla i ru ka nga i mo lingina, nenia, Laradi Mevana, anabat kis to saparap lekngen tino at ne Moroa i lolos aleng.”
70La diga lok, “Kereva, nenu ne Nitna ne Moroa?”
La ni ga vorang i ridi xeretna, “Levelinga atnimi ik mokso; nenia vam.”
71La diga lok, “Keke bok ba tevelinga! Nedik axa tara ronga vam levelinga ren la i epovo dik ta lok li lumumuat teren!”
Currently Selected:
Luk 22: mmx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
