Aepa Gemae 24
24
Emalehamuʼa Aisaki afeʼmo kahauya huʼniya gemae
1Emalehamuʼa ago kosuna leʼniye. Ala kava neʼmoʼa Emalehamuʼmo muki yaʼmo alagepa huno alino auleno ateʼniye. 2#Aep 15:2; 47:29Inagi Emalehamuʼa agaiʼaleʼmo asole kafugamo aliʼyaʼamo aliteno muki kagemi yaʼaleʼmo yagaino neʼateya vekaeʼmo ha painoʼaeʼmo, kahao ke hovanagi kayaʼmo naluʼmo afeʼalumelaga malo. 3#Aep 14:19,22; Loa 7:3Maleʼneka Ala kava neʼmo kokuʼnateʼe ma mopafiʼeʼmo neʼyagaiya Goti agiʼaletiʼmo kagoʼyamo ataleteka naha paigane. Kenani nofi vayaʼai folagapiʼmo maiʼnova vayaʼmogi a mafaʼne anagapatiʼmo mafaʼnekamo aʼmo avaleliʼna oʼmegauve, huka naha paiyo. 4Kagaemo koʼnilega konagaʼnimogimo maiʼnayanagi uka mafaʼneʼnimo Aisaki aʼmo avalelika eno, huno ha paiʼniye. 5Aliʼyaʼamo neʼaliya vekamoʼmo hunoʼaeʼmo, Ani a mafaʼnemoʼmo koʼamo ataleno nakame huno esiyafeʼmo ohausigeʼnaeʼmo nagaemo mafaʼnekamo avaleliʼna ani kokalegamo visufiye, huno afi geʼniye. 6Afi geʼniyaʼmonanafa Emalehamuʼa geʼaleʼmo aeno atagaina hunoʼaeʼmo, Ehekae, Mafaʼneʼnimo avalelika koʼnilegamo oʼuvo. 7#Hat 23:20Ala kava neʼmo kokuʼnapi Gotiʼa konagaʼnimogi mopale afoʼnimo nopatiʼmo navalelino etenoʼaeʼmo agoʼyamo ataleno polomasi gemo naha painoʼaeʼmo, ani mopamo kaginago vayaʼmo apamiguve, huno naha paiʼniye. Agaemo enisole vekaʼamo alino atesigeno uno hogotetesigeka uka mafaʼneʼnimo aʼmo ani kotegatiʼmo avalelika egane. 8#Yas 2:17-20Ani a mafaʼnemoʼmo koʼamo ataleno esiyafeʼmo ohausigekaeʼmo kagoʼyamo ataleʼnana kavafeʼmo kagesa oʼafiyo. Kagaemo koʼnilegamo mafaʼneʼnigeʼmo alagi avalelika oʼuvo, huno ha paiʼniye. 9Inagi aliʼyaʼamo neʼaliya vekamoʼmo Emalehamu aluʼmo afeʼalumelaga ayaʼmo maleʼneno ani kavatefeʼmo agoʼyamo ataleʼniye.
10Aliʼyaʼamo neʼaliya vekamoʼmo teniʼa kamolu anagaʼmo apavaleteno alu ya alu yaʼamo aliteno Mesopatemiya kotegamo Neho taonifiʼmo uʼniye. 11#Hat 2:16Uneʼmo aʼne anagaʼmogimo eʼa aniʼmo he nefiya agufa kanaleʼmo uno avaʼyi huteno kamolu anagaʼamo ani keli kotuʼmo haopaleʼmo apateʼnigeʼa havaeʼa maiʼnae. 12#Niy 1:11Havaetagenoʼaeʼmo Gotifeʼmo hunoʼaeʼmo, Ala kava neʼmo ala vekaʼnimo Emalehamu Gotiʼamogae, huno, Kahao ke hove, kagaemo ala vekaʼnimo Emalehamutegamo alagepa kavaʼmo hisanafeʼmo mani afinaʼmo aliʼyaʼnimo alagepa huka alika afole aika ato. 13Nago, huno, Mani keli kotuʼmo haopale maiʼnovanageʼa taonifiʼmo neʼmaiya vayaʼai a mafaʼne anagaʼmo aniʼmo he fisayafeʼmo egae. 14#Yag 6:17,37Ani kavaʼmo afole aino, nagaemo mago a mafaʼneeʼmo, ina lafeʼmo kahaoke hogi, ani kekamo alika afe paiʼnegeʼna aiseʼamo aniʼmo neno, huʼna hisugenoʼaeʼmo afaʼa no, huno huteno, kamolu anagakaʼeʼmo aniʼmo he fiʼna apamiguve, huno hisiya a mafaʼnemo aliʼyakamo neʼaliya vekamo Aisaki aʼamo lekana paika atesana a mafaʼnemo maigiye. Nagaemo ani kavaʼmo ageteʼnaeʼmo ala vekaʼnimo ha neʼmane, huʼna agegauve, huno nunumuʼmo huʼniye.
15Ina kava huno nunumuʼmo huno hano osuʼnigenoʼaeʼmo Lipekaʼa ani keʼmo kofino aliteno eʼniye. Lipekaʼa Metuveli a mafaʼnemo maiʼnigeno Metuveli itaʼamoʼmo Milikaʼmo maiʼnigeno afoʼamoʼmo Nehoʼmo Emalehamu aganaʼamoʼmae. 16#Aep 26:7Ani a mafaʼnemo kanale aʼmafaʼnemogeno mago veʼeʼmo lokaeno ohavaeʼniye. Agaemo ani keli kotuteʼmo uno lamino aniʼmo he fino alinino haineʼniye. 17Inagi Emalehamu aliʼyaʼamo neʼaliya vekamo agaetegamo nagu nagu huno uno, Kahaoke hovanagi yafa ani kekamo namigeʼna mago aiseʼamo aniʼmo neno, huno huʼniye. 18#1 Pi 3:8-9Huʼnigeno Lipekaʼa hunoʼaeʼmo, ala vekae, huno, afaʼa alika no, huteno malage huno yafa ani keʼmo agiʼnale kofino aliʼniyatetiʼmo afepaino ayate aliʼneno aniʼmo amiʼnigeno neʼniye. 19Amiʼnigeno netegenoʼaeʼmo, kamolu anagakaʼeʼmo aniʼmo he fiʼna apamisugeʼa neʼa apamu hugae, huno ha paiteno 20ani keʼmo alino yafa kalokalopafiʼmo aeno lakino apateʼnigeʼa neʼnageno halate ani keli kotutegamo nagu nagu huno uno lamino aniʼmo he filino eno haineno muki kamolu anagaʼamo apamiʼnigeʼa neʼnae. 21#Aep 24:12-14Neʼnageno aliʼyaʼmo neʼaliya vekamoʼmo ge osuno afaʼa ageno maiʼnenoʼaeʼmo Ala kava neʼmoʼa eʼnova kavaʼmo alagepa huno alino afole aino ateʼnifi oʼateʼnifi, huteno agesa alaʼamo afino maiʼniye.
22Ani kava huʼa kamolu anagaʼmo aniʼmo ago netagenoʼaeʼmo aliʼyaʼmo neʼaliya vekamoʼmo mago goliletiʼmo alo hu maleʼnaya linimo agoʼyafiʼmo aeno alisiyafeʼmo amiteno lole goli hanalaʼmo alino ayatalateʼmo vaino ateʼniye. 23Atetenoʼaeʼmo, kahao ke hove. Ina la a mafaʼnemo maiʼnapi naha paiyo. Hemeni haniʼilagamo afokamo nopiʼmo havaesuna yaʼeʼmo haneʼnifiye, huno ge huno afi geʼnigenoʼaeʼmo 24Lipekaʼa hunoʼaeʼmo, Nagaemo Nehogani Milikagani mafaʼnemo Metuveli a mafaʼnemo maiʼnove. 25Magoʼe gemo ha painoʼaeʼmo, Kamolu anagakamogi nesaya kahauʼe neʼyaʼeʼmo afaʼa haneʼniye. Nopiʼmo havaesaya yaʼmo haneʼniyanagetapa afaʼa havaegae, huno ha paiʼniye. 26#Hat 4:31Ani gemo afitenoʼaeʼmo ape huʼneno Ala kava nefeʼmo mono huʼniye. 27#Hat 18:10Mono hunoʼaeʼmo, Ala vekaʼnimo Emalehamu Ala kava neʼamo Gotifeʼmo aliʼna auleʼna ategauve. Gotiʼa ala vekaʼnimo oʼataleno hau huno atege lama geʼamo alagi akame huge huteno ha maeʼniye. Nagaemo kategamo eʼnogenoʼaeʼmo Ala kava neʼmoʼa kaʼmo alino ho huno nateʼnigeʼna ala vekaʼnimo nofi vayaʼalegamo eʼnove, huno mono huʼniye. 28Huʼnigeno ani aʼmafaʼnemoʼmo nagu nagu huno uno itaʼamo nopiʼmo uno haino muki agaetegamo afole aiʼniya kavaʼe gefeʼmo nopi maiʼnaya vayaʼaifeʼmo hapa paiʼniye.
29-30 #
Aep 29:5,13 Lipeka asaʼamoʼmo mago maiʼniyana Lepaniʼmae. Lepaniʼa golileti alo hu maleʼnaya liniʼe lole hanalaʼeʼmo asaʼamoʼmo vaino aliʼnigeno agege asaʼamoʼmo Lipekaʼa huʼniya gemo afige hutenoʼaeʼmo ani vekalegamo nagu nagu huno uno ageʼniyana ani keli kotuteʼmo kamolu anagaʼaʼeʼmo he tino maiʼnigeno ageʼniye. 31Lepaniʼa hunoʼaeʼmo, Ala kava neʼmoʼa alino auleno kateʼniya vekae, huno, Na kava higeka malaga he tika maiʼnane. Nopiʼmo ago aliʼna kanale huge kamolu anagakaʼmo maisaya yaʼmo aliʼna kanale huge hu maleʼnovanagi eno, huno ha paiʼniye.
32Aliʼyaʼmo neʼaliya vekamo noteʼmo eʼnigenoʼaeʼmo Lepaniʼa kamolu anagaʼmogi apagotofuletiʼmo kagemi yaʼmo alino maleteno kahauʼe neʼyaʼeʼmo apamiteno aliʼyaʼmo neʼaliya vekamo aiyaʼe avagi huʼa uʼnaya vayaʼai apaiyaʼeʼmo sese hisayafeʼmo aniʼmo he filino eno apamiʼniye. 33#Yo 4:34Neʼyaʼmo kaeʼa apateʼnayaʼmonanafa Emalehamu aliʼyaʼamo neʼaliya vekamoʼmo hunoʼaeʼmo, Neʼyaʼmo oʼneʼneʼna hogoteʼna eʼnova kavafekeʼmo lapa paigesuve, huno huʼnigenoʼaeʼmo Lepaniʼa, he, kanalene. Afaʼa huvo, huno huʼnigenoʼaeʼmo 34Nagaemo Emalehamu aliʼyaʼamo neʼaluva vekamo maiʼnove. 35#Aep 13:2Ala kava neʼmoʼa ala vekaʼnimo magoʼe huno haʼmaeteno alino auleno ateʼnigeno ala agi vekamo hamaleʼniye. Ala kava neʼmoʼa asole yaʼmo sipisipigi memegi pulumakagi siluva yafanagi goli yafanagi aliʼyaʼamo neʼaliya ve aʼnegi kamolugi nokigi huno amiʼniye. 36#Aep 25:5Ala vekaʼnimo aʼmo Selaʼmo ago anekalo leʼniyana mago ve mafaʼnemo alino ateʼniye. Emalehamuʼa muki kagemi yaʼamo ani mafaʼnemo amiʼniye. 37#Aep 24:2-4Ala vekaʼnimoʼmo nagaefeʼmo naha painoʼaeʼmo, Nagaemo Kenani vayaʼmogi folagapiʼmo maiʼnovanageka ani vayaʼmogi aʼmafaʼnefatiʼmo nagae mafaʼnemo aʼmo oʼavalegauve, huka kagoʼyamo ataleka naha paiyo, huno huteno, 38Kagaemo afoʼnimo nofi vayapatikeʼmo mafaʼneʼnimo aʼmo avalegane, huno naha paiʼnigeʼnaeʼmo 39Nagaemo Ala vekaʼnieʼmo ha paiʼnaeʼmo, Ani a mafaʼnemoʼmo navagi hisiyafeʼmo ohausifi, huʼna ha paiʼnove. 40Agaemo naha painoʼaeʼmo, Nagaemo Ala kava neʼmo aulagaleʼmo geʼamo akame nehuva Ala kava neʼmoʼa enisole vekaʼamo alino atesigeno kagaeʼeʼmo magokepi lokaeno uteno kaʼmo alino ho huno katesigeka mafaʼneʼnimo aʼmo afoʼnimo nofi vayapatiʼmo afaʼa avalegane. 41Kagaemo apakaetegamo uka avaʼyi hisanageʼapaeʼmo ani a mafaʼnemo avaleʼa okamisagekaeʼmo kagoʼyamo ataleka naha paiʼnana gemoʼa katafauno okategaiye, huno naha paiʼniye. 42Hemenimo uneʼmo ani keli kotuteʼmo eʼna avaʼyi huteʼnaeʼmo nunumuʼmo huʼnaeʼmo, Gotiyo, huʼna, Ala vekaʼnimo Emalehamu Ala kava neʼamogae, huʼna, hemenimo alagepa huka visuva kaʼmo alika ho huka nato. 43Hemenimo nago, huʼna, ani keli kotuʼmo haopaleʼmo maiʼnove. Inagi mago veʼeʼmo lokaeno ohavaeʼnisiya a mafaʼnemoʼmo aniʼmo he fisiyafeʼmo neʼesigeʼnaeʼmo nagaemo ha paiʼnaeʼmo, Kahaoke hovanagi, yafa ani kekafatiʼmo aniʼmo namigeʼna neno, huʼna ha paiguve. 44Agaemo ina ge huno hugiye, aniʼmo afaʼa negane. Kamolu anagakaʼeʼmo aniʼmo apamiguve, huno hisiya aʼmafaʼnemo Ala kava neʼmoʼa Ala vekaʼnimo mafaʼneʼamo aʼmo lekana paiʼniya a mafaʼnemae, huʼna agegauve, huʼna nunumuʼmo huʼnove. 45#1 Sam 1:13Naipafiʼmo nunumuʼmo huʼna hano osuʼnogenoʼaekeʼmo Lipekaʼa yafa ani keʼamo agiʼnale kofiteno eno avaʼyi huʼniye. Agaemo ani keli kotuteʼmo uno lamino aniʼmo he filino haine neʼegeʼnaeʼmo, Kahaoke hovanagi aniʼmo mago namigeʼna neno, huʼna afi geʼnogenoʼaeʼmo, 46malage huno agiʼnaletiʼmo yafa ani keʼamo alininemineno ayate aliʼnenoʼaeʼmo, Ala vekae, huno, kanalenagi aniʼmo afaʼa no. Netesanageʼnaeʼmo kamolu anagakaʼeʼmo aniʼmo apamiguve, huno huʼnigeʼna netogenoʼaeʼmo kamolu anagaʼniʼeʼmo aniʼmo apamigeʼa neʼnae. 47Inagi nagaemo loka huʼna ge huʼna afiʼnaeʼmo, Ina la a mafaʼnemo maiʼnane, huʼna afi geʼnogenoʼaeʼmo, Nehoʼe Milikaʼeʼmo aliʼana ateʼnaʼa mafaʼnemo agiʼamo Metuveli a mafaʼnemo maiʼnove, huno naha paiʼnigeʼnaeʼmo goli linimo agoʼyafi aeʼna ateteʼna lole hanalaʼmo ayatalateʼmo vaiʼna ateʼnove. 48Ape huʼna maiʼneʼnaeʼmo Ala kava netefeʼmo mono huʼna ala vekaʼnimo Emalehamu Ala kava nefeʼmo aliʼna auleʼna ateʼnove. Agaemo kaʼmo alino ho huno navalelino ala vekaʼnimo aganaʼamo nopiʼmo eʼniyanageno a mafaʼneʼamoʼmo ala vekaʼnimo mafaʼneʼamo aʼmo maigiye. 49#Yas 2:14Inagi lapakaemo ala vekaʼnilegamo lama ge huta alagepa kavaʼmo hugune, hutapa naha paisageʼna nagaemo haiyaʼalegamo visufi, huno hapa paiʼniye.
50 #
Sam 118:23
Inagi Lepaniʼe Metuveliʼeʼmo geʼaleʼmo aeʼana atagaina huʼanaeʼmo, Ala kava netegatiʼmo ani kavaʼmo eʼniyaʼmofeʼmo laʼagaemo alagepa geʼe hosu geʼeʼmo afaʼa osuguʼae. 51Lipekaʼmo kahaopale maiʼniyanagi kagaemo afaʼa avalelika uvo. Ala kava neʼmoʼa huʼniya gelefeʼmo ala vekakamo mafaʼneʼamo aʼmo afaʼa maigiye.
52Emalehamu aliʼyaʼamo neʼaliya vekamoʼmo apakaemo huʼnaya gemo afitenoʼaeʼmo ape huʼneno Ala kava nefeʼmo mono huʼniye. 53Mono hutenoʼaeʼmo apakufaleʼmo neʼvaiya alagepa konali yaʼmo siluva konali yanagi goli konali yanagi alagepa kukena yanagi huno Lipekaʼmo amiʼniye. Amitenoʼaeʼmo asaʼamoʼe itaʼamoʼeʼmo alopa moniletiʼmo miya nefaiya yaʼmo fikumo anamiʼniye. 54Hutegeʼapaeʼmo agaeʼe avagi huʼa eʼnaya vayaʼeʼmo neʼyaʼmo nege aniʼmo nege huʼa ani haniʼilagamo maiʼnae. Inagi netepiʼmo he tiʼapaeʼmo Emalehamu aliʼyaʼamo neʼaliya vekamoʼmo hunoʼaeʼmo, Ala vekaʼnilegamo alitapa nategeʼna vino, huno huʼnigeʼanaeʼmo, 55Lipeka itaʼamoʼe asaʼamoʼeʼmo ha paiʼanaeʼmo, a mafaʼnemo afaʼa lagaeʼeʼmo aiseʼamo teniʼa agufa afinaʼmo maitenoʼaekeʼmo henagaʼmo afaʼa ugiye, huʼana ha paiʼnaʼae. 56Emalehamu aliʼyaʼamo neʼaliya vekamoʼmo hunoʼaeʼmo, Lapakaemo natafautapa oʼnateyo. Ala kava neʼmoʼa alagepa kaʼmo valino nateʼniyaʼmofeʼmo afaʼa ago alitapa nategeʼna ala vekaʼnilegamo vino, huno huʼnigeʼa 57Apakaemo huʼapaeʼmo, Lagaemo ani a mafaʼneeʼmo keya aeta agaiʼaekeʼmo afigegaune, huʼa ha paiʼnae. 58Inagi Lipekafeʼmo ge huʼnageno eʼnigeʼapaeʼmo kagaemo ani vekaʼeʼmo ugaʼafiye, huʼa afi geʼnagenoʼaeʼmo he, afaʼa ugapiye, huno huʼniye. 59-60#Aep 17:16Apakaemo Lipekafeʼmo aliʼa auleʼa ateteʼapaeʼmo, lasatimogae, huʼa, kagaemo asole tauseni tauseniʼa vayaʼai itaʼapimogamo maigane. Kaginago vayaʼmogimo kame vayaʼapimo aeʼa apaka seteʼa taoniʼapimo aligae, huʼa ha paiteʼa Lipekaʼe aliyaʼamo neʼaliya aʼne anaganagi Emalehamu aliʼyaʼamo neʼaliya vekagi vayaʼagi huʼa aliʼa apateʼnageʼa uʼnae.
61Lipekaʼe aliʼyaʼamo neʼaliya aʼne anagaʼeʼmo kamoluleʼmo haiʼa fai maiteʼa Emalehamu aliʼyaʼamo neʼaliya vekamo akame huʼa uʼnae. Ina kava huno Lipekaʼmo avalelino uʼniye. 62Ani afinaʼmo Aisakiʼa Negevi kotega ani keli kotuʼmo agiʼamo Miya Lahai Loi ani keli kotuteʼmo maiʼniyatetiʼmo eʼniye. 63#Yas 1:8Inagi Aisakiʼa mago uneʼmo umenitata huno maiʼniyatetiʼmo alino maku huno ageʼniyana kamolu anagaʼmo eʼnageno apakeʼniye. 64-65Lipekaʼa kamoluleʼmo fai maiʼnenoʼaeʼmo aulu heno ageyategamo Aisakiʼmo agetenoʼaeʼmo Emalehamu aliʼyaʼamo neʼaliya vekaeʼmo, Uma vekamo ina laʼmo lagaeʼeʼmo fotu hisiyafeʼmo neʼe, huno afi geʼnigenoʼaeʼmo, Ala vekaʼnimae, huno ha paiʼnigenoʼaeʼmo kamoluʼmo agotofuletiʼmo ataleno mopafi asagauno aiteno agenopaleʼmo kino aliʼniya lavolavoletiʼmo alino augosafiʼmo aino ati kaeʼniye. 66Aliʼyaʼmo neʼaliya vekamoʼmo Aisakifeʼmo muki huʼniya kavaʼaeʼmo ava gemo huno ha paiʼniye. 67Inagi Aisakiʼa Lipekaʼmo avalelino uno lamino itaʼamo Sela seli nopiʼmo ateteno aliʼniye. Aisakiʼa Lipekafeʼmo lusi kava huno hau ayamopafiʼmo hauʼniyaʼmofeʼmo aipamoʼmo kanale huʼnigeno alagepa huno maiʼniye. Hogoteno itaʼamoʼmo faliʼniya kavafeʼmo aipamoʼmo kana huʼnigeno maiʼniyaʼmofeʼmae.
Currently Selected:
Aepa Gemae 24: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
