Aepa Gemae 26
26
Aisakiʼa Gela taonifiʼe Miyasima taonifiʼeʼmo maiʼniya gemae
1Emalehamu maiʼniya afinaʼmo neʼyafe kafu huʼnaya agufa kavaʼmo huno halate Kenani mopaleʼmo magoʼe huno kafu kavaʼmo afole aiʼniye. Inagi Aisakiʼa Filisatini nofi vayaʼaiteʼmo neʼyagaiya kini vekamo Amimalekiʼa maiʼniya taonimo Gela taonifilagamo uʼniye. 2#Aep 12:7; 17:1Ala kava neʼmo Aisakitegamo afole aiteno, Kagaemo Isipi kotegamo uka olamiyo. Nagaemo kaha paisuva haopalegageʼmo maiyo. 3#Aep 22:16,18; Hi 6:17Kalaga hageka uka kalaga vekamo mani mopale maiʼnegeʼnao aliʼna auleʼna kategauvanagi. Nagaemo kagaeʼe kaginago vayaʼeʼmo muki mani mopamo lapamiguve. Nagaemo afokamo Emalehamufeʼmo nagoʼyamo ataleteʼna ha paiʼnova polomasi gemo akame huʼna aliʼna afole aiʼna ategauve. 4#Ap 3:25Nagaemo kaginago mafaʼne anagaʼmo magoʼe huʼna kokunate kanefigana huʼna aliʼna afole aiʼna apategauve. Nagaemo muki mani mopaʼamo kaginago mafaʼne anagakamo apamiguve. Nagaemo kaginago vekaletiʼmo muki nofi vayaʼmo aliʼna auleʼna apategauve. 5#Sam 128:1-6Emalehamuʼa geʼnimo afige huvo, huʼna huʼnova gemo akame huge keʼaepa geʼnimo akame huge huno maiʼniyaʼmofeʼmae.
6Inagi Gotiʼa ina ge huno ha paiʼniyaʼmofeʼmo Aisakiʼa ataleno oʼuno Gela mopaleʼmo afaʼa maiʼniye. 7#Aep 12:13Maiʼnigeʼapaeʼmo ani kote ve anagaʼmogimo aʼaeʼmo ge huʼa afi geʼnagenoʼaeʼmo, Nasaʼnimoʼae, huno hapa paiʼniye. Koli huʼniyaʼmofeʼmo aʼnimo maiʼniye, huno osuʼniye. Agaemo, fiku yanageʼa Lipekatetifeʼmo kamitimo namagigae. Agaemo alagepa aʼmo maiʼnigeʼa alagepa apaulagamo neʼagayaʼmofeʼmo kamitimo namagigae, huno agesa afiʼniye. 8#Mai 5:18-19Ani kote yatala afinaʼmo maitegenoʼaeʼmo Amimalekiʼa Filisatini nofi vayaʼai kini vekamoʼmo he tino yasi katetiʼmo ageʼniyana Aisakiʼa aʼamo Lipekaʼmo agufaleʼmo ame aliʼnigeno ageʼniye. 9Inagi Amimalekiʼa Aisakifeʼmo keya aeno ge huno ha painoʼaeʼmo, Alagi akageʼmo maiʼniye. Na kava higeka nasaʼnimoʼae, huka huʼnane, huno afi geʼnigenoʼaeʼmo Aisakiʼa hunoʼaeʼmo, Nagaemo nagesa afiʼnaeʼmo, aʼniye, huʼna hisugetapaeʼmo agaetetife fikumo namagisageʼna falisufi, huʼna nagesamo afiteʼnaeʼmo ani agufa gemo huʼnove, huno ha paiʼniye. 10Amimalekiʼa ha painoʼaeʼmo, Kagaemo mani kavaʼmo lagaetegamo haiya agufa kavaʼmo huʼnane. Mago vekamoʼmo akaʼeʼmo magokepi lokaeno havaeʼniesinana vaiʼmo alinika eka lagaemo lamiʼnanesine, huno ha paiʼniye. 11#Mai 6:29Inagi Amimalekiʼa muki vayaʼaeʼmo hapa painoʼaeʼmo, Haiya vekamoʼmo ani vekalegamofi aʼalegamofi huno hosu kavaʼmo hisiyana ani vekamo alagi kamitimo amagigeno falino, huno hapa paiʼniye.
12Aisakiʼa ani mopaleʼmo avina yaʼmo hakaleʼnigeno Ala kava neʼmoʼa ha maeno alino auleno ateʼnigeno neʼyaʼmo hageteno ani kafugafiʼmo magoʼe huno asole neʼyaʼmo afole aiʼniye. 13Aisakiʼmo aepa faino kagemi yaʼamo afole aime aime uno magoʼe magoʼe huno afole aigeno lusi kagemi yaʼamo haneʼniya vekamo hamaleʼniye. 14Agaemo asole sipisipi anagaʼamo maige pulumaka anagaʼamo maige asole aliʼya vayaʼamo maige huʼniyaʼmofeʼmo Filisatini vayaʼmogi apaipa kafa haeʼnae. 15Aisaki afoʼamoʼmo Emalehamu maiʼniya afinaʼmo aliʼyaʼale maiʼnaya vayaʼmogimo kafi maleʼnaya ani kelimo Filisatini vayaʼmogimo ka akanige mopamo aliʼa ani keli kotuʼamo aeʼa ati kaege huʼnae. 16Amimalekiʼa Aisakifeʼmo hunoʼaeʼmo, Kagaemo magoʼe huka lagaemo ago aeka laga seʼnanaʼmofeʼmo ago ataleka uvo, huno huʼniye.
17Inagi Aisakiʼmo ani kotetiʼmo apataleno uno Gela otuleʼmo seli noʼamo alino hetino ateteno maiʼniye. 18Ani koteʼmo hogoteno Emalehamuʼa ani keli kotuʼamo kafi maleteno falitegeʼapaeʼmo Filisatini vayaʼmogimo mopa kafili eʼa aeʼa ati kae maleʼnaya kelimo halate Aisakiʼa mopamo kafino ataleteno alagepa huʼniye. Inagi afoʼamoʼmo ateʼniya agileʼmo aeʼniye. 19Aisaki aliʼyaʼamo neʼaliya vayaʼmogi ani otu mopaleʼmo keli kafiliʼa lamiʼa aniʼmo ageʼnageno aniʼmoʼa malelino haineno aino kalafu aino lamiʼniya kelimo afole aiʼniye. 20Huʼniyaʼmonanafa aniʼmo ageʼnayaʼmofeʼmo Gela vayaʼai pulumakale neʼyagaiya vayaʼmogi Aisaki pulumakale neʼyagaiya vayaʼmo ge hapauʼnae. Gela vayaʼmogimo, lagae aniʼmae, huʼa huʼnayaʼmofeʼmo Aisakiʼa ani aniʼmo agiʼamo Eseke ani kotune, huno ateʼniye. Ani agimo aepaʼamo ge vaiʼnona aniʼmae. 21Inagi Aisaki aliʼyaʼamo neʼaliya vayaʼmogimo mago alu keli kotuʼmo nekafigeʼapaeʼmo ani keliʼefeʼmo ani kavakeʼmo huʼa ge hapauʼnae. Aisakiʼa ani ani keli kotuʼmo agimo Sitana anikeli kotune, huno ateʼniye. Ani agimo aepaʼamo ge vaiʼnaya ani kotuʼmae. 22Aisakiʼa ani mopaletiʼmo ataleno uʼnigeʼa uʼa mago alu ani keli kotuʼmo kafiʼnageʼapaeʼmo magoʼe huʼa ge oʼvaiʼnae. Agaemo, Ala kava neʼmoʼa maisuna mopamo lamiyaʼmofeʼmo magoʼe huno alu ya alu yatimo afaʼa afole aigiye, huno huteno agiʼamo Lehomoti ani keli kotuʼmae, huno ateʼniye. Ani agimo aepaʼamo afaʼa maisuna ani kotune.
23Henagaʼamo Aisakiʼa ani kotetiʼmo ago ataleno Miyasima kotegamo uno haiʼniye. 24Haino maiʼniya haniʼilagamo Ala kava neʼmoʼa agaetegamo afole aiteno ha painoʼaeʼmo, Nagaemo afokamo Emalehamu Gotiʼamoʼnamo maiʼnove. Nagaemo kagaeʼeʼmo maiʼnovanagi alagi koli osuvo. Nagaemo aliʼyaʼnimo aliʼniya vekamo Emalehamutefeʼmo aliʼna auleʼna katesugeʼa asole kaginago vayaʼmo magoʼe huʼa afole aigae, huno ha paiʼniye. 25#Sam 116:17Aisakiʼa ani gemo afitenoʼaeʼmo yafa hiʼyalamuʼmo hu maleʼneno Ala kava neʼmo agiʼaleʼmo keya aeno mono huʼniye. Agaemo seli noʼamo alino he tino atetegeʼa aliʼyaʼamo neʼaliya vayaʼmogimo ani keli kotuʼamo kafiʼnae.
Aisakiʼe Amimalekiʼeʼmo kotalakemo huʼnaʼa gemae
26Amimalekiʼagi mago ao vekamo Ahusatiʼagi ati vayaʼaleʼmo yagaino apateʼniya vekamo Faikoliʼagi huʼa Gela kotegatiʼmo Aisakitegamo eʼnae. 27Aisakiʼa apakaefeʼmo ina ge huno ge huno apafi geʼniye, lapakaemo nagaefeʼmo alagi olapauʼnigetapa lapaini hutetapa alitapa naha faitapa nataleʼnayana na kava higetapaeʼmo nagaetegamo eʼnae, huno apafi geʼniye. 28#Hi 6:16Lagaemo ageta alagepa huta ageʼnonana Ala kava neʼmo kagaeʼeʼmo lokaeno maiʼnigeta ageʼnonaʼmofeʼmo kagaegiʼeʼmo magokepi lagoʼya ataleteta kotalakemo hugune. 29Lagaemo kame huta okateta alagepa kavaʼageʼmo huteta laipamoʼmo falu huʼnigeta alita kataleʼnonaʼmofeʼmo lagaetegamo hosu kava osisanafeʼmo magokepi kotalakemo hu malegaune. Ala kava neʼmoʼa alino auleno kateʼniya vekamo maiʼnane, huno ha paiʼniye. 30#Lo 12:18; Hi 12:4Inagi Aisakiʼa alopa neʼyaʼmo yagita huno apateʼnigeʼa neʼyaʼmo nege ani nege huʼnae. 31Egaʼamo gotilamiyapiʼmo he tiʼa apagoʼyamo ataleteʼapa magokepiʼmo kotalakemo huʼnae. Aisakiʼa alino apateʼnigeʼa apaipamoʼmo falu huʼnigeʼa uʼnae. 32Ani afinakeʼmo Aisaki aliʼyaʼamo neʼaliya vayaʼmo eʼa Aisakifeʼmo ha paiʼapaeʼmo, Mago ani keli kotuʼmo kafiʼnonageno malelino aniʼmo haineʼniye, huʼa ha paiʼnae. 33Inagi Aisakiʼa agiʼamo Sema ani keli kotune, huno ateʼniye. Ani kava huʼniyaʼmofeʼmo hemenimo ani haopalegamo haneʼniya taonieʼmo Miyasima taonie, huʼa agi neʼae.
Iso atalaʼmogani anakiʼanimo haneʼniya gemae
34Isoʼa fotiʼa kafugamo maitenoʼaeʼmo Yuʼnitiʼmo Hiti nofi vekamo Meli aʼmafaʼnemo aliteno mago aʼamo Mesamatiʼmo Hiti nofi vekamo Eloni a mafaʼnemo aliʼniye. 35#Aep 28:1-2,8Aisakiʼe Lipekaʼeʼmo ani lole atalaʼani kavaʼanimo anaketeʼanaeʼmo anaipamoʼmo kana huʼniye.
Currently Selected:
Aepa Gemae 26: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
