Aepa Gemae 38
38
Temaʼa Yutafeʼmo humi ateʼniya gemae
1Ani afinaʼmo Yutaʼa konagaʼamogimo apataleno mago vekamo Hilaʼmo Aʼnulami taonifi maiʼniyategamo uʼniye. 2Yutaʼa ani taonifi mago Kenani nofi vekamo agiʼamo Suva a mafaʼnemo agetenoʼaeʼmo alitegeʼana magokepi lokaeʼana maiʼnaʼae. 3Aliʼnigeʼana lokaeʼana havaeteʼana aipaguʼemo maiteno ve mafaʼnemo alino ateʼnigeno Yutaʼa agiʼamo Eʼae huno ateʼniye. 4Aʼamoʼmo halate aipaguʼeʼmo maiteno mago ve mafaʼnemo alino atetenoʼaeʼmo agiʼamo Onaniʼae huno ateʼniye. 5Inagi halate aipaguʼeʼmo maiteno ve mafaʼnemo alino atetenoʼaeʼmo agiʼamo Selaʼae huno ateʼniye. Yutaʼa Kesipi taonifiʼmo maiʼnigenoʼaeʼmo aʼamoʼmo Selaʼmo alino ateʼniye. 6#Mt 1:3Henagaʼamo Yutaʼa yege mafaʼneʼamo Eʼa mago a mafaʼnemo alisiyafeʼmo agiʼamo Temaʼmo avalelino eʼniye. 7Avalelino eʼniyaʼmonanafa Ala kava neʼmo aulagaleʼmo kavaʼmoʼmo alagi hosuʼnigeno Ala kava neʼmoʼa ago amagiʼnigeno faliʼniye. 8Falitegenoʼaeʼmo Yutaʼa Onanifeʼmo ha painoʼaeʼmo, Nepukamo aʼmo aliteka mafaʼneʼamo alino atesiyafeʼmo magokepi lokaetana havaeʼao. Ani kava hisanagenoʼaeʼmo nepukamo mafaʼneʼamo alino atesiyafeʼmae, huno ha paiʼniye. 9Onaniʼa, aliʼna atesuva mafaʼnemo nagaiʼni mafaʼnemo oʼmaigiye, huno agesamo afiʼniyaʼmofeʼmo lokaeʼana havaeʼnaʼa afinaʼmo aniʼamo neʼegenoʼaeʼmo alino ataleʼniye. Nepuʼamo mafaʼnemo alino oʼapatesiyafeʼmo ani kavaʼmo huʼniye. 10#2 Sam 11:27Ala kava neʼmoʼa Onani huʼniya kavafeʼmo amuse osuʼniyaʼmofeʼmo ago amagiʼnigeno faliʼniye. 11Falitegenoʼaeʼmo Yutaʼa anofeloʼamoʼmo Temafeʼmo ha painoʼaeʼmo, Anaukamoʼmo ago faliʼniye. Inagi uka afokamoʼeʼmo kogu aʼmo maime neʼugenoʼao mafaʼneʼnimo Selaʼmo kosino, huno huʼniye. Yutaʼa agesamo afinoʼaeʼmo, fiku yanageno nepuʼalaʼmoganimo faliʼnaʼa kava huno Selaʼmo falisifi, huno huʼniyaʼmofeʼmae. Inagi Temaʼa uno afoʼamoʼeʼmo maiʼniye.
12Mago yatala afinaʼmo ago utegeno Yuta aʼmo Suva a mafaʼnemo faliʼnigeno Yutaʼa yulagefa aino aviʼyaʼmo huno mailino uʼnigeno ani kanaʼamo hano hutegenoʼaeʼmo agaeʼe ao vekamo Hilaʼmo Aʼnulami vekaʼeʼmo Timina kotegamo vayaʼamogimo sipisipi anagaʼamogi apayokaʼmo lagauʼa neʼapataya vayaʼaitegamo uʼnaʼae. 13Mago vekamoʼmo Temafeʼmo ha painoʼaeʼmo, Afiyo, huno, kanofelokamoʼmo sipisipi anagaʼamogi apayokaʼmo lagausiyafeʼmo Timina kotegamo uno haiʼniye, huno ha paiʼniye. 14Ani gemo afitenoʼaeʼmo kogu kukenaʼamo ago asagino ataleteno aise lavolavomo alino augosafiʼmo aino ati kaeno aliteno kenaletiʼmo agufalegamo hayaeteno Timina kotega uʼniya ka agiʼnale uno fai maiʼniye. Selaʼa ago kosiʼniyaʼmonanafa Yutaʼa Sela aʼmo maisuvafeʼmo navaleno oʼamiʼniye, huno agesamo afitenoʼaeʼmo eno maiʼniye. 15Yutaʼa Temaʼmo agetenoʼaeʼmo, mago kumai a kanoe, huno agesamo afiʼniye. Augosafiʼmo aise lavolavoletiʼmo aino ati kaeno aliʼniyaʼmofeʼmae. 16Yutaʼa agaetegamo uno, Kahaoke hove, huno, kagaeʼeʼmo lokaeʼna havaegesuve, huno ge huno afi geʼniye. Yutaʼa nanofeloʼnimoʼmae, huno oʼageʼniyaʼmofeʼmae. Temaʼa agaefeʼmo, Nagaeʼeʼmo lokaeka havaesana yatefeʼmo hogoteka na agufa yaʼmo namigane, huno ge huno afi geʼniye. 17Yutaʼa hunoʼaeʼmo, Nagaemo mago aikeli mememo aeʼna apamisugeʼa avaleliʼeʼa kamigae, huno huʼnigenoʼaeʼmo, polomasi gekamo akame hisanafeʼmo alagena yakamo namigapiye, huno ge huno afi geʼniye. 18Na agufa alagena yaʼmo kamisuve, huno huʼnigenoʼaeʼmo, lugokafi huka aliʼna alagena yakamo liniʼe nofiʼaʼeʼmo namiteka hayopa kayokaʼeʼmo namiyo, huno huʼnigeno Yutaʼa ani yaʼamo amitegeʼana lokaeʼana havaeteʼanaeʼmo agae aipaguʼeʼmo maiʼniye. 19Temaʼa he tinuno augosafiʼmo aino ati kaeno aliʼniya lavolavomo alino ataleteno kogu kukenaʼamo vaiteno maiʼniye. 20Yutaʼa alagena kavaʼmo huʼniya yaʼamo alisiyafeʼmo mago aikeli mememo aeno ao vekamo Hilaʼmo amiʼnigeno avalelino uʼniyaʼmonanafa ani a kanomo oʼageʼniye. 21Oʼagenoʼaeʼmo ani kote vayaʼaifeʼmo ge huno apafi geʼniye. Ka agiʼnaleʼmo itopale neʼmaiya kumai a kanomo haiyaʼaleʼmo maiʼniye, huno ge huno apafi geʼnigeʼapaeʼmo, Haʼao, huʼa, mago kumai a kanomo mani kote oʼmaiʼniye, huʼa ha paiʼnae. 22Inagi Hilaʼa atagineno eno Yutafeʼmo, Ani a kanomo oʼagove. Ani kote vayaʼmogimo, mago kumai a kanomo oʼmaiʼniye, huʼa huʼnae, huno ha paiʼniye. 23Yutaʼa hunoʼaeʼmo, Ani yaʼmo afaʼa ategenoʼa alino. Fiku yanageno laʼavagage hugiye. Nagaemo aikeli mememo aeʼna kamiteʼna aliʼna kateʼnogeka uʼnanaʼmonanafa ani a kanomo oʼageʼnane, huno ha paiʼniye.
24Inagi maiʼnagenoʼaeʼmo loleʼe magoʼe kai agufa yaʼmo utegeʼapaeʼmo Yutafeʼmo ha paiʼapaeʼmo, Temaʼmo kanofelokamoʼmo kumai kavaʼmo huteno hemenimo aipaguʼeʼmo maiʼniye, huʼa ha paiʼnageno Yutaʼa afitenoʼaeʼmo lokiya gemo hunoʼaeʼmo, avalelita utapa ata kaetapa sagalitapa atalegeno falino, huno huʼnigeʼa 25anofeloʼamoʼmo Yutategamo avaleliʼa eʼnagenoʼaeʼmo Temaʼmo alagena kava huʼniya nofiʼaʼenagi hayopa kayoʼaʼenagi huno alino ave liteno, ina la yaʼmo haneʼnisifi ani vekamo naipaguʼeʼmo maiʼnove, huno ha paiʼniye. 26Yutaʼa ani yaʼmo agetenoʼaeʼmo, Nagaemo avaleʼna mafaʼneʼnimo Selaʼmo oʼamiʼnovaʼmofeʼmo agaemo hosu kavaʼmo osuʼniyaʼmonanafa nagaekeʼmo hosu kavaʼmo huʼnove, huno huteno halate magoʼe huno agaeʼeʼmo lokaeno ohavaeʼniye.
27Maime eʼnigeno Temaʼa mafaʼne alino atesiya afinaʼamo afole aiʼnigeno lole mafaʼnelaʼmo aipafiʼmo maiʼnaʼae. 28Ina kava huno alino anateʼniya afinaʼmo ha maeʼniya a kanomoʼa mago mafaʼnemo ayaʼmo hogoteno afole aiʼnigeno ageteno haesa nofitetiʼmo ayateʼmo aeno ateteno, ani mafaʼnemo hogoteno afole aiʼniye, huno huʼniye. 29#Nap 26:20Inagi ina kavaʼmo afole aiʼniye. Ani mafaʼnemoʼmo ayaʼmo alino aupa nehigeno alu mafaʼnemo hogoteno anileʼmo fikumo afole aiʼniye. Ha maeʼniya a kanomoʼmo agetenoʼaeʼmo, haiya kava huka ani hogoteka afole aiʼnane, huno huʼnigeʼapaeʼmo agiʼamo Pelesiʼae huʼa ateʼnae. 30Henagaʼamo aganaʼamoʼmo haesa nofiʼmo ayate haneʼniya mafaʼnemo afole aiʼniye. Afole aiʼnigeʼapaeʼmo agiʼamo Selaʼae huʼa ateʼnae.
Currently Selected:
Aepa Gemae 38: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
