Aepa Gemae 37
37
Yosefefeʼmo konagaʼamogimo hosu apaipamo kaliʼa ateʼnaya gemae
1Yekopu Afoʼamoʼmo kalaga hageno eno Kenani koteʼmo maiʼniyaʼmofeʼmo Yekopuʼa ani kote maiʼniye. 2#1 Sam 2:22-24Yekopuʼe mafaʼne anagaʼaʼefeʼmo apava gemo haneʼniye. Yosefeʼa neya vekamo kafugaʼamo sevetiniʼa kafugamo maiʼniye. Maiʼnenoʼaeʼmo mago afinaʼmo nepuʼamogiʼeʼmo sipisipileʼmo yagaiʼa maiʼnae. Agaemo afoʼamo atalaʼmo Miliha mafaʼnelaʼe Silipa mafaʼnelaʼeʼmo magokepi lokaeʼa maiʼneʼapaeʼmo nepuʼamogimo huʼnaya hosu kavafeʼmo afoʼapimofeʼmo eno ha paiʼniye. 3#Yo 3:35Isaleli mafaʼneʼamo Yosefefeʼmo lusi kava huno hauʼnigeno alu mafaʼne anagaʼaeʼmo aiseʼamo hauʼniye. Kosuna leʼniyapatiʼmo alino ateʼniyaʼmofeʼmae. Yekopuʼa alapaʼage siotimo alagepa yatala siotimo alo huno amiʼniye. 4Nepuʼamogimo ageʼnayana afoʼapimoʼmo Yosefefekeʼmo lusi kava huno hauʼnigeno apakaefeʼmo aiseʼamo hauʼniya kavaʼmo ageteʼapaeʼmo Yosefefeʼmo alagi ohapauʼnigeʼa apaini huteʼa agaeʼeʼmo alagepa huʼa magokepi gege huʼa oʼmaiʼnae.
5Mago afinaʼmo Yosefeʼa alagamuna ageteno nepuʼamogifeʼmo ava ge huno hapa paiʼnigeʼa afiteʼapaeʼmo magoʼe huʼa apaini huteʼa alagi ohapauʼniye. 6Yosefeʼa hapa painoʼaeʼmo, Lapaoke hovanagi, alagamuna ageʼnova gemo afiyo. 7Lagaemo mukiʼamo mago hoyafikeʼmo maiʼneta vitimo hayaeʼnonana nagae viti hayamoʼmo aeno he tino haneʼnigeʼa lapakae viti hayamoʼmo nagae viti hayaleʼmo he tiʼa faiʼa vego huʼa ateʼneʼa ape huʼa ateʼnae, huno hapa paiʼniye. 8#Aep 49:26; Loa 33:16Nepuʼamogimo ani gemo afiteʼapaeʼmo Yosefefeʼmo huʼapaeʼmo, kagaemo ala vekamo maiteka yagaika latesanafeʼmo nehapiye. Kagaemo ala vekatimo maisanafeʼmo nehapiye, huʼa huteʼa alagamuna ageʼniya kavaʼe hapa paiʼniya geʼefeʼmo magoʼe huno alagi ohapauʼniye.
9Henagaʼamo Yosefeʼa alagi magoʼe huno alagamuna agetenoʼaeʼmo nepuʼamogifeʼmo ina ge huno hapa paiʼniye. Afiyo, huno, nagaemo magoʼe huʼna alagamuna ageʼnovana hemeni alagamunafiʼmo yegegi kaigi leveniʼa kanefinagi huʼa nagaeteʼmo ape huʼa nateʼnageʼna ageʼnove, huno hapa paiʼniye. 10Agaemo ani alagamuna gemo afoʼamoʼe nepuʼamogiʼefeʼmo hapa paiʼnigeno afoʼamoʼmo ge hauteno, Mani alagamunamo na agufa alagamuna ageʼnane. Nagaegi itakamoʼagi nepukamogiʼenagi huta kagaeteʼmo ape huta katesupiye, huno afi geʼniye. 11Yosefe nepuʼamogimo apaipa kafa haeʼnayaʼmonanafa afoʼamoʼmo afitenoʼaeʼmo ani kavafeʼmo alino aipa agesafi maleʼniye.
Isameli nofi vayaʼmogimo Yosefeʼmo avaleliʼa Isipi kotegamo uʼnaya gemae
12Mago afinaʼmo Yosefe nepuʼamogimo afoʼapimo sipisipileʼmo yagaiʼa maisayafeʼmo Sekemi kotegamo uʼnae. 13Inagi Isaleliʼa Yosefefeʼmo hunoʼaeʼmo, Nepukamogimo Sekemi kotega sipisipileʼmo yagaiʼa maiʼnegae. Egeʼnao aliʼna katesugeka uka apakegane, huno huʼnigeno Yosefeʼa hunoʼaeʼmo, ove, afoʼnimo maiʼnove, huno huʼniye. 14Huʼnigenoʼaeʼmo kahaoke hovanagi, uka nepukamogiʼe sipisipi anagaʼeʼmo alagepa huʼa maiʼnisafigi apakegeka atagineka eka naha paiyo, huno ha paiteno alino ateʼnigenoʼaeʼmo Hipaloni kagomuʼmo alino ataleno Sekemi kotegamo uʼniye. 15Mago vekamoʼa ageʼniyana ani haopalegamo fiku uneno nehigeno agetenoʼaeʼmo, kagaemo na agufa yafeʼmo kahauya nehane, huno ge huno afi geʼniye. 16Yosefeʼa, Nepuʼnimogifeʼmo kahauya nehuve. Kahaoke hovanagi haiyaʼaleʼmo sipisipileʼmo yagaiʼa maiʼnafigi naha paiyo, huno afi geʼnigenoʼaeʼmo 17ani vekamoʼa ha painoʼaeʼmo, Maniletiʼmo ago ataleʼa uʼnae. Notani taoni haopalegamo ugune, huʼa huʼnageʼna afiʼnove, huno ha paiʼnigeno Yosefeʼa Notani taoni haopalegamo uno kahauya huno apakesiyafeʼmo uʼniye.
18 #
Sam 37:12,32; Mt 21:38 Apakaemo ageʼnayana afagiʼaleʼmo eʼnigeʼa ageteʼapaeʼmo hapaopaleʼmo eno hogo osuʼnigeʼapaeʼmo kamitimo amagisageno falisiyafeʼmo vege huʼnae. 19Apakaemo apakaiʼapimo huʼapaeʼmo, Ageyo, huʼa, alagamuna neʼageya vekamo ago eʼniye. 20Egetao. Hemenimo kamitimo amagiteta agufaʼamo alita mago kelifiʼmo yaga auta atalegaune. Ataletetaeʼmo henagaʼamo lagaemo hutaeʼmo, Mago afela pusimoʼmo haeʼnisifi, huta hugune. Alagamunaʼamoʼmo haiya agufa kavaʼmo afole aisifigeta agegaune, huʼa huʼnae. 21#Aep 42:22Lumeniʼa afiʼnigeʼa ani gemo huʼnagenoʼaeʼmo apayapatiʼmo Yosefe agufamo alino katino atesiyafeʼmo hunoʼaeʼmo, Alagi kamiti amagisunageno ofaligiye. 22Mago kola hisiya kavaʼmo osuge agufaleʼmo lapaya oʼalige hutetapa asagautapa mani kelifiʼmo yaga autapa ataleyo, huno hapa paiʼniye. Apayapatiʼmo agufamo alino katino ateteno afoʼamotegamo avalelino uno atesiyafeʼmo ani gemo huʼniye.
23 #
Mt 27:28
Inagi Yosefeʼa nepuʼamogi maiʼnaya yateʼmo eno avaʼyi huʼnigeʼapaeʼmo atafauʼneʼa alapaʼage siotiʼamo asagiʼa ataleteʼa 24avaleliʼuʼa aniʼmo ago laneʼniya kelifiʼmo asagauʼa yaga auʼa ataleʼnae. 25Apakaemo neʼya nesayafeʼmo fai maiʼneʼapaekeʼmo ageʼnayana Isameli nofi vayaʼmo Giliyati kotegatiʼmo Isipi kotega visayafeʼmo kamoluleʼmo malasini alige alagepa atu neʼaiya uvelimo alige huliʼa eʼnageʼa apakeʼnae. 26Inagi Yutaʼa konagaʼamogifeʼmo hunoʼaeʼmo, Laganatimoʼmo kamiti amagiteta alita fala kita atalesunana lagaemo akamelegatiʼmo na agufa alagepa yaʼmo aligune. 27Egetao, lagaemo avaleta Isameli nofi vayaʼmo apamisunageʼa miya faigae. Agaemo laganatimoʼmo maiʼnigeta magoke kolaʼmo maiʼnonaʼmofeʼmo oʼamagigune, huno huʼniya gemo konagaʼamogimo afiʼnae. 28Ani Mitiyani kagemiyaʼapiʼe vayaʼmo eʼnayana nepuʼamogimo Yosefeʼmo ago kelifati avaleliʼa hai eʼa Isameli nofi vayaʼmo apamiʼnageʼa tuveti siluva moniletiʼmo miya faiteʼa Isipi kotegamo avaleliʼa uʼnae.
29Lumeniʼa ago apataleno uʼniyatetiʼmo halate enoʼaeʼmo ageʼniyana Yosefeʼmo kelifi oʼmaiʼnigeno agetenoʼaeʼmo hau huʼnigeno kukenaʼamo alino apake aiʼniye. 30Agaemo konagaʼamogitegamo uno hapa painoʼaeʼmo, Mafaʼnemo kelifi oʼmaiʼniye. Nagaemo haiya kava huguve, huno huʼniye. 31Inagi apakaemo mago aikeli mememo amagiteʼa kolaʼafiʼmo siotimo aliʼa aeʼnae. 32Apakaemo ani alapaʼage siotimo aliniʼa afoʼapimotegamo uʼa, mani siotimo ageta avateʼnone. Mafaʼnekamo siotifigi alika ago, huʼa huʼnageno 33Yekopuʼa ageʼniyana, Mafaʼneʼnimo siotie, huno agetenoʼaeʼmo, he, mafaʼneʼnimo Yosefe siotigeʼmae. Mago afela afumoʼmo ago haeno neʼniye. Lole nagesamo oʼafiʼnofa afela afumoʼmo ago alagi haeʼnigeno faliʼniye, huʼna nagesamo afiʼnove. 34Inagi Yekopuʼa kukenaʼamo alino apake aino ataleteno kogu kukena alino vaiteno asole afinaʼmo mafaʼneʼaeʼmo yulagefa aige aige huno maiʼniye. 35Muki mafaʼne anagaʼaʼe a mafaʼne anagaʼaʼmogiʼeʼmo eʼa aipamoʼmo falu hisiya kavaʼmo huʼnayaʼmonanafa aipamoʼmo falu osuʼnigeno hapa painoʼaeʼmo, nagaemo yulagefakeʼmo aime aime uʼna mafaʼneʼnilagamo nagaeʼeʼmo kelifi uʼna lamiguve, huno hapa paiteno aviʼyaʼmo huge huge huno maiʼniye. 36Mitiyani nofi vayaʼmogimo Yosefeʼmo Isipi kotega avaleliʼuʼa kini vekamo Felo ami vayaʼaleʼmo yagaino neʼapateya vekamo agiʼamo Potifaʼmo amiʼnigeno halate miya faiʼniye.
Currently Selected:
Aepa Gemae 37: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
